(Proċedura leġiżlattiva ordinarja: l-ewwel qari)

Il-Parlament Ewropew,

–  wara li kkunsidra l-proposta tal-Kummissjoni lill-Parlament Ewropew u lill-Kunsill (COM(2011)0453),

–  wara li kkunsidra l-Artikolu 294(2) u l-Artikolu 53(1) tat-Trattat dwar il-Funzjonament tal-Unjoni Ewropea, skont liema artikoli l-Kummissjoni ppreżentat il-proposta lill-Parlament (C7-0210/2011),

–  wara li kkunsidra l-Artikolu 294(3) tat-Trattat dwar il-Funzjonament tal-Unjoni Ewropea,

–  wara li kkunsidra l-opinjoni motivata preżentata mill-Kamra tad-Deputati Rumena u mill-Parlament Svediż, fil-qafas tal-Protokoll Nru 2 dwar l-applikazzjoni tal-prinċipji ta' sussidjarjetà u proporzjonalità li tiddikjara li l-abbozz ta' att leġiżlattiv ma jimxix mal-prinċipju ta’ sussidjarjetà,

–  wara li kkunsidra l-opinjoni tal-Bank Ċentrali Ewropew tal-25 ta' Jannar 2012(1),

–  wara li kkunsidra l-impenn meħud mir-rappreżentant tal-Kunsill, permezz tal-ittra tas-27 ta' Marzu 2013, li japprova l-pożizzjoni tal-Parlament Ewropew, skont l-Artikolu 294(4) tat-Trattat dwar il-Funzjonament tal-Unjoni Ewropea,

–  wara li kkunsidra l-Artikolu 55 tar-Regoli ta' Proċedura tiegħu,

–  wara li kkunsidra r-rapport tal-Kumitat għall-Affarijiet Ekonomiċi u Monetarji (A7-0170/2012),

1.  Jadotta l-pożizzjoni fl-ewwel qari li tidher hawn taħt;

2.  Japprova d-dikjarazzjoni tal-Parlament mehmuża ma' din ir-riżoluzzjoni;

3.  Jitlob lill-Kummissjoni biex terġa' tirreferi l-kwistjoni lill-Parlament jekk ikollha l-ħsieb li temenda l-proposta b'mod sustanzjali jew li tibdilha b'test ġdid;

4.  Jagħti istruzzjonijiet lill-President tiegħu sabiex jgħaddi l-pożizzjoni tal-Parlament lill-Kunsill u lill-Kummissjoni kif ukoll lill-parlamenti nazzjonali.

(1) ĠU C 105, 11.4.2012, p. 1.

(Peress li ntlaħaq ftehim bejn il-Parlament u l-Kunsill, il-pożizzjoni tal-Parlament jaqbel mal-att finali, d-Direttiva 2013/36/UE.)

Dikjarazzjoni tal-Parlament

B'dan qed ikun iddikjarat li l-qbil milħuq bejn il-Parlament Ewropew u l-Kunsill dwar id-Direttiva ġdida dwar ir-Rekwiżiti ta' Kapital li jkun qed jagħti drittijiet lill-Kummissjoni, fuq talba mill-ABE bil-ħsieb tal-applikazzjoni tar-Regolament (UE) Nru 1095/2010 jew fuq inizjattiva tagħha stess, li l-Istati Membri jintalbu jipprovdu aktar informazzjoni dettaljata dwar it-traspożizzjoni u l-implimentazzjoni tad-dispożizzjonijiet nazzjonali tagħhhom u din id-Direttiva, ma għandux jikkostitwixxi preċedent għal negozjati dwar atti leġislattivi f'oqsma oħra ta' politika.

Din is-soluzzjoni speċifika hi meħtieġa minħabba ċirkostanzi partikolari marbuta mal-Arkitettura Superviżorja Ewropea. Il-ħruġ ta' dokumenti ta' spjegazzjoni għandu, bħala regola ġenerali, ikompli jsir f'konformità mad-Dikjarazzjoni Politika Konġunta tas-27 ta' Ottubru 2011 tal-Parlament Ewropew, il-Kunsill u l-Kummissjoni.