Il-Parlament Ewropew,,

–  wara li kkunsidra l-baġit ġenerali tal-Unjoni Ewropea għas-sena finanzjarja 2012(2),

–  wara li kkunsidra l-kontijiet annwali konsolidati tal-Unjoni Ewropea għas-sena finanzjarja 2012 (COM(2013)0570 – C7‑0274/2013)(3),

–  wara li kkunsidra r-rapport dwar il-ġestjoni baġitarja u finanzjarja - Taqsima I – Il-Parlament Ewropew - Sena Finanzjarja 2012(4),

–  wara li kkunsidra r-rapport annwali tal-Awditur Intern għas-sena finanzjarja 2012,

–  wara li kkunsidra r-rapport annwali tal-Qorti tal-Awdituri dwar l-implimentazzjoni tal-baġit għas-sena finanzjarja 2012, flimkien mat-tweġibiet tal-istituzzjonijiet(5),

–  wara li kkunsidra d-dikjarazzjoni ta' assigurazzjoni(6) dwar l-affidabilità tal-kontijiet, kif ukoll dwar il-legalità u r-regolarità tal-operazzjonijiet li jaqgħu taħthom, ipprovduta mill-Qorti tal-Awdituri għas-sena finanzjarja 2012, skont l-Artikolu 287 tat-Trattat dwar il-Funzjonament tal-Unjoni Ewropea,

–  wara li kkunsidra l-Artikolu 314(10) u l-Artikolu 318 tat-Trattat dwar il-Funzjonament tal-Unjoni Ewropea u l-Artikolu 106a tat-Trattat li jistabbilixxi l-Komunità Ewropea tal-Enerġija Atomika,

–  wara li kkunsidra r-Regolament tal-Kunsill (KE, Euratom) Nru 1605/2002 tal-25 ta' Ġunju 2002 rigward ir-Regolament Finanzjarju applikabbli għall-baġit ġenerali tal-Komunitajiet Ewropej(7), u b'mod partikolari l-Artikoli 145, 146 u 147 tiegħu,

–  wara li kkunsidra r-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta' Ottubru 2012 dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002(8), u b'mod partikolari l-Artikoli 164, 165 u 166 tiegħu,

–  wara li kkunsidra l-Artikolu 13 tar-regoli interni dwar l-implimentazzjoni tal-baġit tal-Parlament Ewropew(9),

–  wara li kkunsidra l-Artikolu 166(1) tar-Regolament (UE, Euratom) Nru 966/2012, skont liema artikolu kull Istituzzjoni tal-Unjoni għandha tieħu l-passi kollha xierqa biex twettaq l-osservazzjonijiet li jakkompanjaw id-deċiżjoni ta' kwittanza tal-Parlament Ewropew,

–  wara li kkunsidra r-riżoluzzjoni tiegħu tad-9 ta' Marzu 2011 dwar il-linji gwida għall-proċedura baġitarja 2012 – it-Taqsimiet I, II, IV, V, VI, VII, VIII, IX u X(10),

–  wara li kkunsidra r-riżoluzzjoni tiegħu tas-6 ta' April 2011 dwar l-estimi tad-dħul u tan-nefqa tal-Parlament Ewropew għas-sena finanzjarja 2012 - Taqsima I - Il-Parlament Ewropew(11),

–  wara li kkunsidra l-Artikolu 77, l-Artikolu 80(3) u l-Anness VI tar-Regoli ta' Proċedura tiegħu,

–  wara li kkunsidra r-rapport tal-Kumitat għall-Kontroll tal-Baġit (A7-0246/2014),

A.  billi fl-4 ta' Lulju 2013 il-President adotta l-kontijiet tal-Parlament għas-sena finanzjarja 2012;

B.  billi fiċ-ċertifikazzjoni tal-kontijiet definittivi, l-uffiċjal tal-kontabilità tal-Parlament afferma l-assigurazzjoni raġonevoli tiegħu li l-kontijiet jippreżentaw stampa vera u ġusta tal-pożizzjoni finanzjarja tal-Parlament fl-aspetti materjali kollha, u li ma waslet għall-attenzjoni tiegħu l-ebda kwistjoni li dwarha jesprimi riżerva;

C.  billi s-Segretarju Ġenerali ċċertifika, fis-6 ta' Settembru 2013, l-assigurazzjoni raġonevoli tiegħu li l-baġit tal-Parlament ġie implimentat skont il-prinċipji tal-ġestjoni finanzjarja tajba u li l-qafas ta' kontroll stabbilit joffri l-garanziji neċessarji dwar il-legalità u r-regolarità tal-operazzjonijiet li jaqgħu taħtu;

D.  billi s-Segretarju Ġenerali ċċertifika wkoll li mhuwiex konxju dwar kwalunkwe fatt li ma ġiex iddikjarat li jista' jagħmel il-ħsara lill-interess tal-istituzzjoni;

E.  billi, permezz tal-awditu tiegħu, il-Qorti tal-Awdituri kkonkludiet li, fir-rigward tal-infiq amministrattiv fl-2012, is-sistemi superviżorji u ta' kontroll applikati minn kull istituzzjoni ssodisfaw ir-rekwiżiti tar-Regolament Finanzjarju u li minn 151 tranżazzjoni awditjati mill-Qorti, waħda kienet żbaljata filwaqt li l-Qorti testima li r-rata tal-iżball l-aktar probabbli hija ta' 0 %;

F.  billi, f’konformità mal-proċedura tas-soltu, intbagħat kwestjonarju lill-amministrazzjoni tal-Parlament u t-tweġibiet waslu u ġew diskussi mill-Kumitat għall-Kontroll tal-Baġit, fil-preżenza tas-Segretarju-Ġenerali u l-Awditur Intern;

G.  billi l-proċedura ta' kwittanza annwali tal-Parlament tagħti valur miżjud peress li tinvolvi eżami komprensiv tal-kontijiet, fejn l-objettiv hu li l-Parlament ikun jista' jissodisfa r-responsabbiltà tiegħu għaċ-ċittadini tal-Unjoni u jaġixxi b'mod kompletament trasparenti billi jtihom idea dettaljata dwar il-ġestjoni finanzjarja tiegħu; billi, ukoll, ħaqqu l-opportunità għal awtokritika u li jitjieb f'dawk l-oqsma fejn hemm lok għal titjib f'termini ta' kwalità, effiċjenza, u effikaċja fil-ġestjoni tal-finanzi pubbliċi u b'hekk ta' flus il-kontribwenti;

Il-ġestjoni baġitarja u finanzjarja Parlamentari għall-2012

Valur miżjud tal-proċedura ta' kwittanza tal-Parlament

1.  Jenfasizza l-valur miżjud tal-proċedura parlamentari li twassal għall-kwittanza annwali tal-Parlament;

2.  Jindika li din ir-riżoluzzjoni tibqa' prinċipalment ikkonċentrata fuq l-implimentazzjoni tal-baġit u fuq il-kwittanza tiegħu għas-sena finanzjarja 2012 u li l-objettiv ewlieni tagħha huwa dak li tiżgura li l-flus pubbliċi tal-kontribwenti jintużaw bl-aħjar mod possibbli filwaqt li tagħmel enfasi fuq fejn jista' jsir titjib; iħeġġeġ lill-entitajiet responsabbli tal-Parlament jibqgħu jtejbu, fil-livelli kollha possibbli, l-effiċjenza fil-ħidma ta' kuljum tal-Parlament;

3.  Jerġa' jitlob lill-Bureau jiddistribwixxi iktar 'White Papers' dwar il-kwistjonijiet ta' politika lill-Membri kollha li jwassal biex il-punti ta' politika jiġu diskussi fi ħdan il-gruppi politiċi qabel ma tittieħed deċiżjoni finali;

4.  Josserva li l-baġit ġenerali tal-Unjoni għall-2012 ammonta għal EUR 148 200 miljun f'approprjazzjonijiet ta' impenn, li minnhom EUR 1 718 miljun intużaw għall-baġit tal-Parlament; josserva, barra minn hekk, li din iċ-ċifra tirrappreżenta ftit aktar minn 1 % tal-baġit ġenerali tal-Unjoni u tammonta għal inqas minn 20 % tal-ammont ta' EUR 8 278 miljun allokati għall-ispejjeż amministrattivi tal-istituzzjonijiet tal-UE kollha kemm huma għall-2012; josserva li dan hu konformi mal-Ftehim Interistituzzjonali bejn il-Parlament Ewropew, il-Kunsill u l-Kummissjoni dwar id-dixxiplina baġitarja, u l-kooperazzjoni fi kwistjonijiet baġitarji u dwar il-ġestjoni finanzjarja soda biex jiġi kopert l-infiq fuq il-bini u l-infrastruttura, il-pagi u l-pensjonijiet tal-persunal, it-teknoloġija tal-informatika, u s-sigurtà;

5.  Josserva li fil-baġit tal-Parlament, l-erba' kapitoli ewlenin kienu l-Kapitolu 10 (Membri tal-Istituzzjoni), il-Kapitolu 12 (Uffiċjali u persunal temporanju), il-Kapitolu 20 (Bini u nefqiet relatati) u l-Kapitolu 42 (Nefqa relatata mal-assistenza parlamentari) li koprew 70 % tal-impenji totali;

6.  Jinnota li l-approprjazzjonijiet awtorizzati fil-baġit finali tal-Parlament għall-2012 kienu jammontaw għal EUR 1 717 868 121, li jirrapreżentaw 1.9 % żieda fuq il-baġit tal-2011 (EUR 1 685 829 393), u jinnota wkoll li ma tressaq l-ebda baġit ta' emenda bħal fl-2011; hu tal-fehma li l-Parlament wera r-responsabbiltà baġitarja tiegħu u l-limitazzjoni proprja billi baqa' taħt ir-rata ta' inflazzjoni ta' 2,6 % fl-2012; jistenna li għall-baġit tal-2015 se tkun prevalenti l-limitazzjoni proprja billi l-baġit jinżamm taħt l-20 % tal-Kapitolu 5;

7.  Jindika li fl-2012, 99 % (93 % fl-2011) tal-approprjazzjonijiet definittivi attwali ġew impenjati, b'rata ta' kanċellazzjoni ta' 1 % (6 % fl-2011) u li, bħal fis-snin preċedenti, inkiseb livell għoli ta' implimentazzjoni baġitarja, minkejja li din kienet influwenzata mit-trasferiment ta' tmiem is-sena tal-fondi li ma ntefqux fuq it-talba tal-Grupp Konġunt ta' Ħidma tal-Bureau u l-Kumitat għall-Baġits u opinjoni pożittiva min-naħa tal-Kumitat għall-Baġits;

Ir-rapport tal-Parlament dwar il-ġestjoni baġitarja u finanzjarja

8.  Josserva li d-dħul totali li ddaħħal fil-kontijiet tal-Parlament fil-31 ta' Diċembru 2012 ammonta għal EUR 175 541 860 fl-2012 (EUR 173 293 432 fl-2011) li kienu jinkludu EUR 22 274 843 (EUR 23 815 077 fl-2011) fi dħul assenjat;

9.  Josserva li l-Parlament iddeċieda li jwettaq trasferiment ta' tlaqqit ta' tmiem is-sena minn diversi linji baġitarji li ammontaw għal EUR 45 000 000 f'fondi li ma ntefqux li kienu intiżi għat-tieni pagament akkont tal-akkwist tal-Bini Trebel fi Brussell (EUR 35 000 000) u l-bini tal-Bini KAD il-ġdid fil-Lussemburgu; jifhem li dan irriżulta fi ffrankar ta' madwar EUR 10,4 miljun fi spejjeż ta' finanzjament mill-perjodi ta' bini u amortizzament ta' self; jiddeplora, madankollu, il-fatt li l-Parlament ripetutement talab li fl-interess taċ-ċarezza baġitarja, l-infiq fuq il-bini għandu jiddaħħal fil-baġit minflok li jiġi ffinanzjat minn trasferiment ta' tlaqqit kif mitlub f'bosta riżoluzzjonijiet ta' kwittanza preċedenti;

Il-kontijiet tal-Parlament tal-2012

10.  Jikkonstata li ċ-ċifri ta' għeluq tal-kontijiet tal-Parlament għas-sena finanzjarja 2012 huma ppreżentati kif ġej:

11.  Jindika ż-żieda sinifikanti ta' riporti lejn l-2012 (EUR 244,600,384) u jħeġġeġ li jitjieb l-ippjanar tan-nefqa;

12.  Josserva li, fiċ-ċertifikazzjoni tiegħu tal-kontijiet definittivi, l-uffiċjal tal-kontabilità tal-Parlament iddikjara l-assigurazzjoni raġonevoli tiegħu li l-kontijiet jippreżentaw stampa vera u ġusta tal-pożizzjoni finanzjarja tal-Parlament fl-aspetti materjali kollha; jinnota wkoll l-osservazzjoni tiegħu dwar il-fatt li ma ġiet imressqa għall-attenzjoni tiegħu l-ebda kwistjoni li titlob riserva;

13.  Ifakkar fid-deċiżjoni tal-President tiegħu fl-4 ta' Lulju 2013 dwar l-adozzjoni tal-kontijiet għas-sena finanzjarja 2012;

L-opinjonijiet tal-Qorti tal-Awdituri dwar l-affidabbiltà tal-kontijiet tal-2012 u dwar il-legalità u r-regolarità tat-tranżazzjonijiet sottostanti ta' dawk il-kontijiet

14.  Jilqa' l-fatt li l-Qorti tal-Awdituri sabet, fil-valutazzjoni speċifika li wettqet tan-nefqa amministrattiva u nfiq ieħor b'mod globali, li l-ittestjar ta' tranżazzjonijiet jindika li l-iżball l-iktar probabbli preżenti fil-popolazzjoni huwa żero u li s-sistemi superviżorji u ta' kontroll tal-infiq amministrattiv ġew ivvalutati bħala effikaċi; jilqa', barra minn hekk, il-fatt li l-awditu li twettaq mill-Qorti tal-Awdituri jindika li l-pagamenti fl-2012 tal-infiq aċċettat ma ġewx affettwati minn livell ta' żball materjali; jinnota li l-awditu inkluda eżami ta' kampjun ta' 151 tranżazzjoni ta' pagament - 91 pagament ta' pagi, pensjonijiet u allowances marbuta u 60 pagament għal kuntratti marbuta ma' bini u nfiq ieħor - kontra 56 pagamanet awditjati fl-2011;

15.  Josserva li n-nefqa amministrattiva u nfiq ieħor jinkludu n-nefqa fuq riżorsi umani (pagi, allowances u pensjonijiet), li tammonta għal 60 % tat-total tan-nefqa amministrattiva u nfiq ieħor, u n-nefqa fuq bini, tagħmir, enerġija, komunikazzjoni, u teknoloġija tal-informatika hija meqjusa bħala qasam b'riskju baxx; jindika li skont il-Qorti tal-Awdituri, ir-riskji prinċipali fir-rigward tan-nefqa amministrattiva u nfiq ieħor huma n-nuqqas ta’ konformità mal-proċeduri għall-akkwist, għall-implimentazzjoni ta' kuntratti, għar-reklutaġġ u għall-kalkolu tal-pagi u tal-allowances;

Reklutaġġ ta' persunal temporanju u kuntrattwali

16.  Jinnota b'sodisfazzjoni li l-awditu li twettaq mill-Qorti tal-Awdituri ta' 15-il proċedura ta' reklutaġġ fil-Parlament fl-2012 ma żvela l-ebda żball jew dgħjufija; jistieden, madankollu, lis-Segretarju-Ġenerali japplika strettament ir-regoli applikabbli għall-ħatra jew il-promozzjoni tal-persunal b'mod ġenerali, u b'mod partikolari dawk f'pożizzjonijiet maniġerjali;

Akkwisti

17.  Josserva li l-awditu li twettaq mill-Qorti tal-Awdituri eżamina 18 mill-proċeduri ta' akkwist tal-Parlament; jenfasizza li l-Qorti tal-Awdituri sabet nuqqasijiet fl-applikazzjoni ta' kriterju ta' għoti f'każ wieħed u fil-ġestjoni u d-dokumentazzjoni tal-proċedura ta' akkwist f'każ ieħor;

18.  Jirrakkomanda li l-uffiċjali awtorizzanti jtejbu d-disinn, il-koordinazzjoni u r-rendiment tal-qafas u l-proċeduri ta' akkwist tal-Parlament permezz ta' kontrolli xierqa u gwida iktar ċara; josserva li l-implimentazzjoni tar-Regolament Finanzjarju l-ġdid u r-Regoli ta' Applikazzjoni tiegħu għandhom ikunu akkumpanjati mid-disinn ta' mudelli ġodda għal kuntratti u inviti għal offerti, kif ukoll l-iżvilupp ta' korsijiet ta' taħriġ speċifiku dwar kif għandhom jiġu definiti u applikati l-kriterji tal-għażla u tal-għoti;

19.  Jappoġġa t-tweġibiet mogħtija mill-Parlament fil-proċedura kontradittorja mal-Qorti tal-Awdituri;

Rieżami tal-progress tal-Qorti tal-Awdituri fl-indirizzar tar-rakkomandazzjonijiet li sar f'rapporti annwali preċedenti

Eżekuzzjoni ta' verifiki ex-ante fuq il-proċeduri ta' reklutaġġ

20.  Ifakkar fil-konstatazzjoni tal-Qorti tal-Awdituri skont liema, fil-proċeduri ta' reklutaġġ tal-assistenti parlamentari akkreditati (APA), il-fajl ma kien fih l-ebda dokument li juri li kienu ġew eżegwiti kontrolli ex-ante fuq id-dokumenti ta' reklutaġġ; jilqa' l-fatt li l-Qorti tal-Awdituri tikkunsidra li l-Parlament implimenta b'mod sħiħ ir-rakkomandazzjoni tagħha biex jiżgura li d-dokumentazzjoni xierqa issa tiġi stabbilita u li issa d-dokumentazzjoni sottostanti għal dawk il-verifiki qed tinżamm biex tiġġustifika d-deċiżjonijiet ta' reklutaġġ ta' persunal temporanju u kuntrattwali; jistieden lis-Segretarju-Ġenerali jinforma lill-Kumitat għall-Kontroll tal-Baġit tiegħu sa Settembru 2014 bl-effikaċja tal-miżuri meħuda inklużi dawk ibbażati fuq is-sejbiet tal-Awditur Intern, ukoll fid-dawl tar-reklutaġġ ta' bosta assistenti parlamentari (APAs) ġodda wara l-elezzjonijiet;

Akkwisti

21.  Jiddispjaċih li l-eżami li twettaq mill-Qorti tal-Awdituri tal-kampjun tal-proċeduri ta' akkwist wera li għad hemm żbalji fid-disinn, il-koordinazzjoni u r-rendiment tal-proċeduri ta' akkwist u li, għalhekk, l-analiżi mwettqa mill-Qorti tal-Awdituri tal-progress li sar turi li r-rakkomandazzjoni preċedenti tagħha għadha, fil-biċċa l-kbira tagħha, qed tiġi implimentata; itenni s-sejħa tiegħu biex jiġi żgurat progress reali, mingħajr iktar dewmien, fil-mekkaniżmi ta' kontroll kollha għall-akkwist pubbliku sabiex jingħelbu n-nuqqasijiet identifikati mill-Qorti tal-Awdituri, kif ukoll biex jiġu garantiti l-iktar prezzijiet kompetittivi għall-prodotti u s-servizzi akkwistati;

Pagament ta' allowances u benefiċċji soċjali lill-membri tal-persunal

22.  Ifakkar fis-sejba speċifika tal-Qorti tal-Awdituri rigward l-informazzjoni disponibbli lis-servizzi tal-Parlament dwar is-sitwazzjoni tal-membri tal-persunal; jinsab sodisfatt li l-awditu tal-Qorti tal-Awdituri ma wera l-ebda dgħjufija iżda wera li għad hemm ir-riskju li jsiru pagamenti żbaljati jew żejda; jinnota, barra minn hekk, li l-Parlament ħa miżuri fl-2012 li tejbu dejjem iktar ir-rata ta' reazzjoni għall-proċedura annwali tal-verifika elettronika u l-aġġornament ta' data personali tal-membri tal-persunal u li, fejn meħtieġ, id-dikjarazzjonijiet tal-membri tal-persunal huma akkumpanjati minn dokumenti ta' sostenn xierqa;

Rapport annwali tal-Awditur Intern

23.  Josserva li, fil-laqgħa tal-kumitat kompetenti tal-21 ta' Jannar 2014 mal-Awditur Intern, dan tal-aħħar ippreżenta r-rapport annwali tiegħu ffirmat fit-12 ta' Lulju 2013 li fih indika li, fl-2012, wettaq l-eżerċizzju ta' awditjar li ġej fuq l-amministrazzjoni tal-Parlament:

24.  Jindika li fost l-aktar konklużjonijiet sinifikanti stabbiliti fir-rapport annwali tal-Awditur Intern insibu dawn l-aspetti li ġejjin:

25.  Josserva u jappoġġa l-fehmiet espressi mill-Awditur Intern rigward is-"Segwitu tal-Awditjar tal-politika immobiljari: Ippjanar, valutazzjoni & ġestjoni tal-ħtiġijiet ta' akkomodazzjoni" sabiex:

26.  Josserva u jappoġġa l-fehmiet espressi mill-Awditur Intern rigward l-"Awditu ta' Assistenti Parlamentari Akkreditati impjegati bħala aġenti oħra tal-Komunitajiet Ewropej" li globalment, l-ambjent ta' kontroll u l-attivitajiet ta' kontroll fid-DĠs għall-Persunal u l-Finanzi jagħtu assigurazzjonijiet raġonevoli li l-APAs huma reklutati b'konformità mar-regoli statutorji u li l-intitolamenti finanzjarji huma mħallsa korrettament mill-Allowance tal-assistenza parlamentari tal-Membri (PAA); jitlob liż-żewġ DĠ jiżguraw li dawn il-garanziji jsiru stabbli u mingħajr l-ebda dubju bi kwalunkwe mezz meħtieġ;

27.  Jieħu nota tal-fatt li fl-2012, kien meħtieġ trasferiment mis-subpartita għall-assistenti lokali (partita 4220-01) għas-subpartita 4220-02 (Assistenti akkreditati) ta' EUR 7,3 miljun u s-subpartita 4220-01 tnaqqas b'total ta' EUR 14,1 miljun (14,3 %), li rriżulta minn estimi ħżiena tal-ħtiġijiet kemm għall-assistenti lokali kif ukoll għall-assistenti akkreditati, minkejja li l-għadd ta' assistenti akkreditati żdied biss bi ftit fl-2012 meta mqabbel mal-2011; jemmen li fil-futur, estimi mtejba tal-ħtiġijiet għal dawn is-subpartiti se jkunu meħtieġa biex jiġu rrispettati l-prinċipji ta' ġestjoni finanzjarja tajba u biex tkun possibbli reazzjoni għall-ħtiġijiet reali;

28.  Josserva, madankollu, li sabiex jiġu sodisfatti l-objettivi ta' kontroll intern b'mod sħiħ u konsistenti u biex tiġi żgurata l-applikazzjoni korretta mhux biss tar-Regoli ta' Proċedura tal-Parlament u r-regoli rilevanti li jirriżultaw minn dawn, adottati mill-entitajiet kompetenti tal-Parlament iżda wkoll ir-Regolament Finanzjarju, hemm lok għal iktar tisħiħ ta' ċerti proċeduri ta' ġestjoni u kontroll li jinvolvu esponiment moderat għal riskju residwu u rigward l-oqsma li ġejjin:

29.  Ifakkar għal darb'oħra li, wara ħames snin tal-implimentazzjoni tal-Istatut għall-Assistenti l-ġdid, hu meħtieġ li titwettaq evalwazzjoni sħiħa ta' dan l-Istatut inklużi l-adattamenti possibbli tar-regoli mill-iktar fis possibbli;

Awditjar tal-Qafas ta' Kontroll Intern

30.  Ifakkar li fl-2003 u fl-2004 r-rieżami oriġinali tal-Qafas ta' Kontroll Intern ta lok għal 14-il rapport ta' awditjar li koprew id-dipartimenti kollha u s-servizzi ċentrali u li kien fihom 452 azzjoni li kien hemm qbil dwarhom immirati lejn it-titjib tal-livelli kumplessivi ta':

"Azzjonijiet pendenti" li baqa'

31.  Josserva li fi tmiem l-2012, wara awditi ta' segwitu suċċessivi, 15-il azzjoni baqgħu ma tlestewx minn 452 azzjoni ta' qafas tal-kontroll intern li kien sar qbil dwarhom inizjalment; jieħu nota tal-konklużjoni tal-Awditur Intern li għal żewġ DĠs (Finanzi u Infrastruttura u Loġistika), kien hemm titjib evidenti fil-proċessi ta' akkwist pubbliku;

32.  Josserva l-proċess trasversali u ta' monitoraġġ tal-Awditu Intern għas-segwitu ta' azzjonijiet miftiehma mir-rapporti tiegħu li fih kull kompitu ta' segwitu huwa trasversali, u jkopri b'mod simultanju l-azzjonijiet pendenti kollha li għandhom jiġu implimentati; jinnota, barra minn hekk, li l-kompiti issa qegħdin jitwettqu kull sentejn, b'konformità mar-riżoluzzjoni tal-Parlament tal-10 ta' Mejju 2011 dwar il-kwittanza għas-sena finanzjarja 2009;

33.  Josserva li sa tmiem l-2012, l-Awditur Intern innota li 73 azzjoni kienu għadhom ma ġewx implimentati, inklużi żewġ azzjonijiet kritiċi, 35 azzjoni ta' riskju sinifikanti u 36 azzjoni ta' riskju moderat; jinnota b'sodisfazzjon li fl-2012, 80 azzjoni ġew implimentati b'mod sħiħ u għalhekk ingħalqu, inklużi żewġ azzjonijiet kritiċi; iħeġġeġ lid-Direttorati Ġenerali tiegħu kollha kkonċernati biex ikomplu bl-isforzi tagħhom biex itejbu l-proċeduri ta' ġestjoni u ta' kontroll rispettivi tagħhom; jistieden lill-Awditur Intern sabiex jistabbilixxi skedi ta’ żmien aktar stretti dwar l-azzjonijiet li għandhom jiġu implimentati; jistieden lill-Awditur Intern iżomm lill-Kumitat għall-Kontroll tal-Baġit infurmat dwar l-azzjonijiet pendenti kollha tar-rieżami oriġinali tal-Qafas ta' Kontroll Intern; itenni t-talba tiegħu lit-tmexxija dipartimentali u ċentrali biex jimplimentaw l-"azzjonijiet pendenti" li baqa' qabel it-tmiem tal-leġiżlatura attwali;

34.  Josserva l-konklużjonijiet tas-Servizz tal-Awditjar Intern li l-proċess ta' segwitu tal-2012 wera titjib globali evidenti, bl-għeluq ta' 80 mill-153 azzjoni pendenti validati kif ukoll tnaqqis fl-għadd ta' azzjonijiet kritiċi ta' riskju għoli (minn tmienja għal tlieta); jinsab imħasseb, madankollu, dwar l-għadd relattivament kbir ta' 73 azzjoni skaduta li ġew riportati għall-2013; jagħraf li l-profil ta' riskju li għandu l-Parlament għall-azzjonijiet pendenti fi tmiem is-sena juri proporzjon ta' azzjonijiet fil-kategorija ta' riskju moderat ikbar minn dak fil-bidu tal-2012, li jindika li kien hemm progress fis-servizzi, anki f'oqsma fejn l-azzjonijiet għadhom ma ngħalqux;

Segwitu mogħti mis-Segretarju Ġenerali għar-riżoluzzjoni dwar il-kwittanza tal-2011

35.  Jieħu nota tat-tweġibiet bil-miktub għar-riżoluzzjoni tal-kwittanza tal-2011 mogħtija lill-Kumitat għall-Kontroll Baġitarju fil-25 ta' Ottubru 2013 li jfisser li waslu qabel il-bidu tal-eżerċizzju tal-kwittanza tal-2012; jilqa' l-preżentazzjoni sussegwenti tas-Segretarju Ġenerali tat-tweġibiet u s-segwitu tal-amministrazzjoni tal-Parlament fil-25 ta' Novembru 2013 għad-diversi mistoqsijiet u talbiet tar-riżoluzzjoni tal-kwittanza tal-Parlament tal-2011 u l-iskambju ta' fehmiet mal-Membri li kienu qegħdin isegwu;

36.  Jilqa' l-fatt li mill-2011, saru bidliet sinifikanti fis-servizzi tat-traduzzjoni u tal-interpretazzjoni tal-Parlament; jagħraf li tul dan il-proċess, l-effiċjenza tista' tiżdied b'mod konsiderevoli u sussegwentement, jitnaqqsu l-finanzi, filwaqt li jinżammu l-kwalità u l-offerta għall-Membri; josserva li fil-qafas ta' politika ta' multilingwiżmu sħiħa effiċjenti fl-użu tar-riżorsi, it-traduzzjoni fuq talba ta' rapporti verbatim ta' proċedimenti u ta' mistoqsijiet bil-miktub waslet għal tnaqqis fit-traduzzjoni esterna ta' EUR 11 miljun fuq bażi permanenti;

37.  Ifakkar fit-tieni deċiżjoni meħuda mill-Bureau fit-12 ta' Marzu 2012 dwar multilingwiżmu sħiħ u effiċjenti fl-użu tar-riżorsi li pprevediet li d-delegazzjonijiet li jeħtieġu derogi għall-ivvjaġġar waqt il-ġimgħat tal-Kumitati jingħataw biss reġim ta' lingwa limitat li ma jaqbiżx l-interpretazzjoni għal lingwa waħda; josserva li minħabba din il-miżura, l-għadd ta' missjonijiet li saru waqt dawn il-ġimgħat iddedikati għall-attivitajiet parlamentari esterni żdied minn 36 % tal-missjonijiet kollha fl-2011 għal 46 % fl-2012, filwaqt li l-għadd ta' jiem ta' missjoni għall-interpreti naqas bi 23 % bejn l-2011 u l-2012;

38.  Jinnota d-deċiżjoni sussegwenti mis-Segretarju Ġenerali fit-23 ta' Marzu 2013 li tipprevedi li kull nhar ta' Tlieta u kull nhar ta' Erbgħa tal-ġimgħat tal-Kumitati huma riżervati esklużivament għal laqgħat tal-kumitati u għal trilogi; josserva b'mod pożittiv li dawn il-miżuri rriżultaw fit-tnaqqis fis-sehem li għandhom l-ispejjeż tal-interpretazzjoni esterna fil-baġit totali tal-Parlament minn 3,5 % fl-2011 għal 2,6 % fl-2012; jemmen li l-prinċipju ta' ġestjoni finanzjarja tajba jeħtieġ li jkun japplika għall-interpretazzjoni wkoll, u li bil-ħsieb li jiġi żgurat l-aħjar valur għall-flus għall-kontribwenti tal-Unjoni, għandha titwettaq analiżi kritika kontinwament biex tevalwa fejn u kif tista' tittejjeb l-effiċjenza u kif jistgħu jiġu kkontrollati jew limitati l-ispejjeż; jistieden lis-Segretarju Ġenerali jippubblika r-rapport annwali għall-applikazzjoni tal-Kodiċi ta' Kondotta għall-Multilingwiżmu għall-Membri tal-kumitat responsabbli;

39.  Josserva t-tweġiba tas-Segretarju Ġenerali li tindika li n-nefqa għall-premju LUX tnaqqset, kif kien propost mill-Kumitat għall-Kontroll tal-Baġit u saret votazzjoni dwarha fil-plenarja fir-rapport tal-kwittanza għall-2010, jinnota li ttieħdu għadd ta' miżuri konkreti sabiex tiġi minimizzata n-nefqa fuq il-Premju LUX, b'mod partikolari billi jitnaqqsu l-ispejjeż relatati mal-attivitajiet ta' promozzjoni fil-festivals internazzjonali u fi ħdan il-bini tal-Parlament; josserva li n-nefqa fuq il-Premju LUX fl-2012 kienet ta' EUR 434 421, li tirrappreżenta tnaqqis ta' 24 % meta mqabbel mal-2011 (EUR 573 722); jitlob li jinstabu effiċjenzi ulterjuri;

40.  Jikkunsidra li l-premijiet mhumiex attività ewlenija tal-Parlament u jitlob li ssir analiżi tal-kost-benefiċċju qabel ma tiġi żviluppata kwalunkwe inizjattiva ta' premju ġdida;

41.  Jinnota li fid-dawl tal-ammont dejjem jikber ta' klijenti u l-evoluzzjoni tal-istituzzjoni, il-Bureau adotta, fil-laqgħa tiegħu tal-10 ta' Ġunju 2013, strateġija komprensiva li tistabbilixxi l-orjentazzjonijiet ewlenin għall-politika tal-forniment tal-ikel tal-Parlament sal-2019; ifakkar fil-fatt li l-attivitajiet tal-forniment tal-ikel kollha żdiedu b'madwar 150 % mill-2002 għall-2011, minn 1 472 miljun klijent fl-2002 meta mqabbel ma' 3 711-il miljun klijent fl-2011; josserva li s-servizz tal-forniment tal-ikel tal-Parlament għadu mmarkat minn defiċit operattiv li m'għandux ikun hemm kumpens għalih esklużivament b'żieda fil-prezzijiet; jinnota li l-politika tal-prezzijiet fil-Parlament għandha tibqa' tikkonforma mal-istituzzjonijiet l-oħrajn u li l-Parlament qiegħed f'pożizzjoni aħjar biex jikseb kundizzjonijiet imtejba għall-kuntratturi u l-ekonomiji ta' skala f'dawk l-operazzjonijiet, billi jitqies l-għadd ta' klijenti li jiġu servuti;

42.  Jinnota li bosta talbiet li saru fir-rapporti ta' kwittanza annwali appoġġati mill-plenarja tal-Parlament ma ġew issodisfati; jinnota li s-Segretarju-Ġenerali jsostni li dawn it-talbiet jaqgħu taħt l-ambitu tal-Bureau tal-Parlament jew tal-Konferenza tal-Presidenti tal-Parlament; jinsisti li t-talbiet tal-plenarja li saru fir-rapporti ta' kwittanza annwali huma implimentati b'mod sħiħ;

Il-kwittanza tal-Parlament tal-2012

43.  Jinnota li l-kamp ta' applikazzjoni tal-proċedura tal-kwittanza m'għandux ikopri biss l-implimentazzjoni baġitarja u l-attivitajiet maniġerjali tas-Segretarju Ġenerali u l-Amministrazzjoni għas-sena finanzjarja 2012, iżda wkoll id-deċiżjonijiet li jittieħdu mill-korpi ta' governanza tiegħu, jiġifieri l-President, il-Bureau u l-Konferenza tal-Presidenti; jenfasizza li l-Parlament, fi skrutinju kritiku tal-ġestjoni finanzjarja tal-istituzzjoni, jagħti l-kwittanza mhux lis-Segretarju Ġenerali iżda lill-President tiegħu;

44.  Jilqa', f'dan ir-rigward, il-kwalità tal-iskambju ta' fehmiet bejn is-Segretarju Ġenerali u l-Kumitat għall-Kontroll tal-Baġit fil-preżenza tal-Awditur Intern, fil-21 ta' Jannar 2014 fil-kuntest tal-kwittanza tal-Parlament tal-2012; itenni li l-korpi governattivi u l-amministrazzjoni tal-Parlament huma responsabbli tul dan il-proċess u li hu għalhekk essenzjali biex issir il-proċedura tat-teħid ta' deċiżjonijiet b'mod kompletament trasparenti biex jiżguraw li ċ-ċittadini tal-Unjoni jingħataw stampa reali u preċiża ta' kif il-Parlament jieħu d-deċiżjonijiet tiegħu u juża r-riżorsi li jitqiegħdu għad-dispożizzjoni tiegħu; jitlob, għaldaqstant, li l-aġendi għal-laqgħat ta', u d-deċiżjonijiet meħuda mill-korpi tat-teħid ta' deċiżjonijiet tal-Parlament jiġu kkomunikati mingħajr dewmien kemm lill-Membri kif ukoll lill-persunal tal-Parlament b'mod globali u lill-pubbliku ġenerali;

45.  Jindika li r-referenzi ewlenin, ħielsa minn kwalunkwe kunsiderazzjoni politika, għall-valutazzjoni tal-implimentazzjoni tal-baġit tal-Parlament l-ewwel għandhom jinkludu l-opinjoni tal-awditur indipendenti estern tiegħu u t-tieni, l-opinjoni mogħtija mill-Awditur Intern tal-Parlament u l-valutazzjoni tiegħu tas-sistema ta' kontroll intern tal-Parlament; itenni s-sodisfazzjon tiegħu bl-opinjoni pożittiva tal-Qorti tal-Awdituri dwar l-affidabbiltà tal-kontijiet tal-Parlament u dwar il-legalità u r-regolarità tat-tranżazzjonijiet sottostanti ta' dawk il-kontijiet;

46.  Ifakkar li l-Kodiċi ta' Kondotta għall-Membri tal-Parlament rigward l-interessi finanzjarji u l-kunflitti ta' interess, adottat mill-plenarja fl-1 ta' Diċembru 2011, jirrikjedi li l-Membri jiżvelaw kompletament kwalunkwe attività mħallsa barra l-Parlament, il-pagament li jirċievu u kwalunkwe funzjoni oħra li jwettqu li tista' twassal għal kunflitti ta' interess u li, b'mod espliċitu, il-kodiċi jipprojbixxi lill-Membri milli jaċċettaw kwalunkwe somma ta' flus jew rigal ieħor bi skambju għall-influwenza fuq id-deċiżjonijiet tal-Parlament; josserva li jistabbilixxi regoli ċari dwar l-aċċettazzjoni ta' rigali u dwar ex Membri li jinvolvu ruħhom fl-attivitajiet ta' lobbying; jitlob li l-amministrazzjoni tiskrutinizza tal-inqas 15 % ta' dawn id-dikjarazzjonijiet fuq bażi regolari u annwali;

47.  Jinnota li l-miżuri ta' implimentazzjoni għall-Kodiċi ta' Kondotta għall-Membri ġew adottati mill-Bureau fil-15 ta' April 2013; jinnota b'sodisfazzjon li l-miżuri ta' implimentazzjoni rigward l-Artikolu 5(3), biex tiġi żgurata t-trasparenza fir-rigward tan-nefqiet fuq l-ivvjaġġar, l-akkomodazzjoni u s-sussistenza tal-Membri, imħallsa minn partijiet terzi, fis-seħħ mill-1 ta' Lulju 2013, jistipulaw li r-rimborż kollu għan-nefqiet ta' vvjaġġar, akkomodazzjoni u sussistenza koperti minn partijiet terzi għall-attendenza ta' Membri f'avvenimenti organizzati minn partijiet terzi għandu jiġi ddikjarat; jinnota, barra minn hekk, li jekk ma jsirx tali rimborż, u jitħallsu biss l-ispejjeż ta' ikla, biljett ta' dħul jew simili inqas minn valur ta' EUR 150, m'hemmx bżonn ta' dikjarazzjoni;

48.  Jitlob li l-annessi għall-mistoqsijiet bil-miktub parlamentari (l-Artikolu 117 tar-Regoli ta' Proċedura tal-Parlament) jiġu ppubblikati flimkien mal-mistoqsijiet ikkonċernati fuq il-websajt tal-Parlament;

49.  Jemmen li l-Parlament huwa l-unika istituzzjoni pubblika Ewropea li tħallas allowance intiża biex tkopri l-ispejjeż tal-amministrazzjoni tal-uffiċċju f'kontijiet bankarji privati u personali mingħajr ma titlob li jinżammu rċevuti jew li tiġi awditjata n-nefqa; jissuspetta li l-Membri kieku jikkritikaw ħafna kwalunkwe entità oħra li tonqos milli tissorvelja l-użu tal-flus pubbliċi b'mod simili; jistieden lis-Segretarju-Ġenerali jipproponi arranġamenti żgħar biex jiżgura li l-Allowance għan-Nefqa Ġenerali tintuża għall-finijiet intiżi u ma tistax tipprovdi dħul privat supplementari lill-Membri;

50.  Jitlob li ssir evalwazzjoni tal-allowance għas-sussistenza għal kull jum għall-Membri rigward l-ammont u l-użu tagħha, jitlob li l-Bureau jirrevedi din il-miżura ta' implimentazzjoni kif xieraq biex jiżgura li din l-allowance tintuża bl-iktar mod kost-effiċjenti possibbli;

L-attivitajiet politiċi tal-President

51.  Jitlob informazzjoni dettaljata dwar kif il-President, bħala persunaġġ politiku newtrali, żamm id-dmirijiet tal-kariga tiegħu separati mill-preparazzjonijiet biex imexxi l-lista tas-Soċjalisti u tad-Demokratiċi fl-elezzjonijiet Ewropej, b'mod partikolari fir-rigward tal-persunal fil-kabinett tiegħu u fl-uffiċċji ta' informazzjoni tal-Parlament u tal-ispejjeż tal-ivvjaġġar; hu tal-opinjoni li b'rabta ma' bosta minn dawk l-attivitajiet, ma saret l-ebda distinzjoni bejn iż-żewġ rwoli; jitlob segregazzjoni ċara tal-funzjonijiet ta' min ikun fil-kariga, li jsegwi l-approċċ tal-Kummissjoni, sabiex il-kontribwenti tal-Unjoni ma jkollhomx iħallsu għall-kampanji elettorali tal-mexxejja tal-lista Ewropea;

Il-postijiet tax-xogħol tal-Parlament

52.  Jinnota li l-Protokoll 6, anness mat-Trattati, dwar il-post tas-sedi tal-istituzzjonijiet, deċiż bi qbil komuni mill-gvernijiet tal-Istati Membri, jimponi fuq il-Parlament it-tliet postijiet tax-xogħol tiegħu; josserva l-istedina espressa fir-riżoluzzjoni tiegħu fis-17 ta' April 2013 dwar il-kwittanza għall-2011(13) biex "is-Segretarju Ġenerali u l-Bureau jipprovdu lill-Membri b'ċifri u informazzjoni aġġornati dwar l-impatt ambjentali u finanzjarju tal-arranġament ta' postijiet tax-xogħol multipli" li segwiet ir-riżoluzzjoni tagħħa tas-6 ta' Frar 2013 dwar il-linji gwida għall-proċedura baġitarja tal-2014(14) u r-riżoluzzjoni tagħha tal-20 ta' Novembru 2013 dwar il-post tas-sedi tal-Istituzzjonijiet Ewropej(15);

53.  Ifakkar fil-fatt li kien hemm raġunijiet storiċi sinifikanti għad-deċiżjoni li s-sede tal-Parlament jiġi stabbilit u li l-kwistjoni tad-determinazzjoni tas-sede ta' istituzzjoni tal-Unjoni tinsab fil-kompetenza esklużiva tal-Istati Membri; josserva f'dan ir-rigward li kwalunkwe deċiżjoni biex jinbidel l-arranġament tal-postijiet tax-xogħol tal-Parlament tirrikjedi bidla fit-Trattati, deċiżjoni li trid tittieħed b'mod unanimu mill-Istati Membri;

54.  Josserva li n-nefqa li tirriżulta mid-dispersjoni ġeografika tal-Parlament tikkostitwixxi qasam identifikat importanti ta' ffrankar potenzjali; jilqa' r-rapport tas-Segretarju Ġenerali(16) ta' Awwissu 2013 dwar l-impatt finanzjarju tad-dispersjoni ġeografika tal-Parlament Ewropew; jenfasizza li r-rapport inkluda l-kalkoli tal-parametri li ġejjin:

55.  Jindika li r-rapport juri ffrankar nett teoretiku meta jiġu konsolidati t-tliet postijiet tax-xogħol f'post wieħed, fi Brussell, b'estimi ta' EUR 88,9 miljun fis-sena li jirrappreżentaw madwar 5 % tal-baġit tal-Parlament fl-2014, 1,03 % tal-baġit amministrattiv totali tal-Unjoni, u 0,06 % tal-baġit totali tal-Unjoni; jinnota l-estimi tal-effett nett fuq kull ċittadin tal-Unjoni fis-sena li huwa ta' EUR 0,18 li kieku t-tliet postijiet tax-xogħol tal-Parlament kellhom jiġu konsolidati f'post wieħed;

56.  Jindika li r-rapport juri li fużjoni possibbli tal-Lussemburgu u Brussell tirriżulta f'nefqa addizzjonali ta' EUR 14-il miljun fis-sena; jenfasizza l-livell ta' appoġġ kwalitattiv u kwantitattiv differenti rrappurtat mogħti lill-Parlament mill-istati ospitanti; jinnota li dawk l-ispejjeż potenzjali għadhom ma ġewx tradotti f'ekwazzjoni ta' ffrankar potenzjali fir-rigward tal-fatt li Brussell tintuża bħala s-sede unika;

57.  Jenfasizza l-fatt li 10 703 tunnellati ta' emissjonijiet ta' CO2 fis-sena jiġu ffrankati jekk is-Strasburgu (10 235) u l-Lussemburgu (468) ma jibqgħux jintużaw bħala postijiet tax-xogħol; jiddispjaċih dwar il-fatt li dan l-impatt ambjentali tad-dispersjoni tal-Parlament f'termini ta' emissjonijiet tal-karbonju jkopri 11,16 % tal-marka tal-karbonju tal-Parlament fl-2011;

58.  Qiegħed jistenna bil-ħerqa l-pubblikazzjoni tal-istudju tal-Qorti tal-Awdituri biex tingħata analiżi komprensiva tal-iffrankar potenzjali għall-baġit tal-Unjoni li kieku l-Parlament kellu post tax-xogħol wieħed biss, kif mitlub mir-riżoluzzjoni tiegħu tal-20 ta' Novembru 2013 dwar il-post tas-sedi tal-Istituzzjonijiet tal-Unjoni Ewropea u jitlob li din l-analiżi tinkludi l-aspetti baġitarji u l-ispejjeż anċillari bħall-iffrankar li jsir permezz tat-tnaqqis fit-telf ta' ħin tax-xogħol u iktar effiċjenza; jitlob li ma jitqisux biss l-ispejjeż tal-ivvjaġġar għall-persunal tal-Parlament (inkluż il-persunal interim, l-esperti esterni u l-aġenti temporanji) iżda wkoll iż-żieda fl-ispejjeż tal-ivvjaġġar għall-persunal tal-Kummissjoni u l-Kunsill minħabba s-siti multipli;

Ġestjoni tal-amministrazzjoni tal-Parlament: it-tisħiħ tal-effiċjenza operattiva

59.  Jafferma mill-ġdid, li din ir-riżoluzzjoni tibqa' prinċipalment ikkonċentrata fuq l-implimentazzjoni tal-baġit u fuq il-kwittanza tiegħu għas-sena finanzjarja 2012 u li l-objettiv ewlieni tagħha huwa dak li tiżgura li l-flus pubbliċi tal-kontribwenti jintużaw bl-aħjar mod possibbli filwaqt li tagħmel enfasi fuq fejn jista' jsir titjib effiċjenti; jistieden lill-korpi responsabbli tal-Parlament ikomplu jtejbu, fil-livelli kollha possibbli, l-effiċjenza tax-xogħol ta' kuljum tal-Parlament filwaqt li dejjem ikun hemm l-għan li ċ-ċittadini tal-Unjoni jingħataw dejjem servizz aħjar; jistenna li s-Segretarju-Ġenerali jiffoka iktar fuq l-effiċjenza u l-effikaċja tal-infiq fir-rapport tiegħu li jmiss lill-Kumitat għall-Kontrol tal-Baġit;

60.  Hu tal-opinjoni li tul il-mandat leġiżlattiv 2009-2014, f'kuntest ekonomiku u finanzjarju diffiċli, ta' spiss inkiseb iffrankar spontanju u temporanju iżda sinifikanti; jemmen li l-amministrazzjoni tal-Parlament għandha tidentifika miżuri ta' effiċjenza addizzjonali li joffru ffrankar strutturali sistematiku u definittiv, l-ewwel billi jitnaqqas il-baġit tal-Parlament u t-tieni billi jkun jista' jsir il-varar mill-ġdid ta' riżorsi f'oqsma ġodda ta' intervent tal-Parlament, pereżempju fit-tisħiħ tad-dimensjoni tal-iskrutinju dwar l-implimentazzjoni mill-Kummissjoni tal-politiki tal-Unjoni;

61.  Jistieden lill-amministrazzjoni tal-Parlament tikkunsidra li żżid l-użu tat-teknoloġiji disponibbli bħat-telekonferenzi u t-telexogħol sabiex jitnaqqsu l-ispejjeż amministrattivi u tal-ivvjaġġar; jitlob li titressaq proposta konkreta għall-użu miżjud taż-żewġ teknoloġiji; jestima li l-iffrankar żejjed sinifikanti, mingħajr ma tiġi kompromessa l-kwalità tal-azzjonijiet, jista' jinkiseb u li, minbarra l-vantaġġi finanzjarji, l-użu tal-vidjokonferenzi u t-telexogħol jista' jikkontribwixxi wkoll għal użu iktar effiċjenti tal-ħin u għal Parlament iktar favur l-ambjent;

62.  Jitlob lill-amministrazzjoni tapplika iktar miżuri ta' tnaqqis intelliġenti, biex ikun possibbli ffrankar mingħajr ma jiġu affettwati l-effikaċja, l-effiċjenza u l-kwalità tal-attivitajiet parlamentari;

Id-Direttorat Ġenerali għall-Presidenza

63.  Jinnota li d-DĠ PRES ġie organizzat mill-ġdid, li wassal għall-ħolqien tad-DĠ EPRS ġdid (Servizzi ta' Riċerka Parlamentari) u li s-servizzi tas-sigurtà tal-Parlament ġew internalizzati, li wassal għall-ħolqien tad-DĠ Sigurtà; jesprimi sodisfazzjon għall-fatt li hu previst li l-internalizzazzjoni tas-sigurtà se tirriżulta f'iffrankar ta' iktar minn EUR 11-il miljun tul il-perjodu 2013-2016; jinnota, madankollu, li ħames membri tal-Kabinett tal-President ġew allokati fil-karigi bħala diretturi ġenerali jew diretturi fl-amministrazzjoni tal-Parlament; jikkritika dan il-ħtif politiku tal-pożizzjonijiet maniġerjali u t-twaqqigħ tar-Regolamenti tal-Persunal; jindika li l-UE tikkritika l-patroċinju politiku madwar id-dinja, u jitlob li dak il-prinċipju jiġi rrispettat fir-rigward tal-amministrazzjoni tal-Parlament, ukoll; jixtieq jiġi infurmat mis-Segretarju-Ġenerali kull sena dwar l-ammont speċifiku ffrankat, li jista' jkun ta' eżempju tajjeb li jwassal għall-internalizzazzjoni ta' servizzi oħra li bħalissa huma pprovduti minn partijiet terzi;

64.  Jinnota li l-kariga ta' Direttur Ġenerali ġiet okkupata iżda li sitt xhur wara l-ħatra, il-membru tal-persunal li ntgħażel għadu ma daħalx fil-kariga; jitlob li titħassar dik il-kariga ta' Direttur Ġenerali;

Direttorat Ġenerali għall-Politiki Esterni

65.  Jinnota bi tħassib li minħabba sejħiet ġenerali għall-ekonomija, id-delegazzjonijiet interparlamentari jistgħu jsiru inqas kapaċi jżommu l-profil ta' relazzjonijiet esterni tal-Parlament, li jippremettilu li jkun viżibbli daqs l-istituzzjonijiet l-oħrajn tal-Unjoni, speċjalment il-Kummissjoni u l-Kunsill, u li l-effett jista' jkun li jitwaqqa' l-approċċ parlamentari għall-politika esterna u l-konsolidazzjoni tad-diplomazija parlamentari biex tikkumplementa l-attivitajiet tal-Kummissjoni u l-SEAE; iqis bħala kruċjali, għalhekk, li jinżammu l-għarfien u l-esperjenza li kiseb il-Parlament waqt li ssorvelja l-proġetti Ewropej u għamilhom viżibbli u li jiġi żgurat li l-miżuri proposti ma jwasslux fi dgħjufija tas-setgħa u l-effikaċja tad-djalogu interparlamentari tal-Parlament ma' pajjiżi oħra, speċjalment fi żminijiet ta' instabbiltà politika u ta' periklu għad-demokrazija (ir-Rebbiegħa Għarbija, il-kunflitt fil-Lvant Nofsani, il-kunflitt fl-Ukraina, il-preparazzjoni għal elezzjonijiet kontroversjali, eċċ.); jirrakkomanda bis-saħħa li jkun żgurat il-livell xieraq ta' koordinazzjoni mas-servizzi tas-SEAE għat-tħejjija u l-kapaċità ta' rispons effikaċi biex jiggarantixxi l-aspetti ta' sigurtà tad-delegazzjonjiet u l-missjonijiet esterni tal-Parlament;

Direttorat Ġenerali għall-Komunikazzjoni

66.  Jinnota li d-DĠ COMM għandu baġit kbir taħt il-linji 3242, "Pubblikazzjoni, informazzjoni u parteċipazzjoni fil-laqgħat pubbliċi"; jinnota iktar u iktar għotjiet ta' kuntratti bi spejjeż addizzjonali għall-kontribwent; jitlob lista dettaljata dwar il-miżuri tal-għoti ta' kuntratti u l-ispiża tagħhom fid-DĠ COMM;

67.  Jinsab imħasseb dwar il-possibbiltà ta' kunflitti ta' interess mhux identifikati fir-rigward tal-għoti ta' għotjiet mill-baġit tal-Parlament; jindika l-Artikolu 58 tar-Regolament Finanzjarju u l-obbligu tal-Amministrazzjoni biex tivverifika d-dikjarazzjonijiet magħmula minn dawk li jitolbu l-għoti u l-kuntratturi; jitlob informazzjoni dwar liem analiżi tar-riskju huma mwettqa mill-Amministrazzjoni tal-Parlament fir-rigward ta' dawk id-dikjarazzjonijiet sabiex tiġi verifikata l-veraċità tagħhom;

L-Uffiċċji ta' informazzjoni

68.  Jinnota li l-ispejjeż ta' missjonijiet fl-2012 għall-persunal tal-Uffiċċji ta' Informazzjoni ammontaw għal EUR 1,8 miljun b'missjonijiet lejn is-Strasburgu li ammontaw għal ftit iktar minn EUR 1 miljun; jinsisti li għandha tingħata prijorità lill-użu ta' vidjokonferenzi, bi tnaqqis fl-ispejjeż strutturali fil-baġit tal-Parlament kif ukoll b'titjib ambjentali, li ma jnaqsux il-valur fil-ħidma tal-Parlament;

Il-gruppi ta' viżitaturi

69.  Josserva li minn Jannar 2012, daħal fis-seħħ sett ġdid ta' regoli li jirregola l-akkoljenza ta' gruppi ta' viżitaturi, inkluż il-metodu ta' pagament ta' sussidji; jinnota li l-Bureau ddeċieda li jżomm l-għażla li jsiru pagamenti fi flus kontanti lil gruppi ta' viżitaturi; jinsab imħasseb dwar ir-riskju sinifikanti ta' reputazzjoni u sigurtà li jirriżulta minn pagamenti fi flus kontanti lil gruppi ta' viżitaturi; jitlob li tittieħed deċiżjoni ġdida tal-Bureau biex jitneħħew il-pagamenti fi flus kontanti li jikkostitwixxu ksur tad-Direttiva 2005/60/KE tal-Parlament Ewropew u tal-Kunsill(17); jinnota li minn madwar 2 000 grupp ta' viżitaturi fis-sena, 365 biss fl-2012 ingħataw iktar minn EUR 15 000 iżda li l-maġġoranza ta' dawn il-gruppi ta' viżitaturi jagħżlu l-metodu ta' pagament fi flus kontanti, minkejja li l-amministrazzjoni tal-Parlament tħeġġeġ il-pagament permezz ta' trasferiment bankarju jew taħlit taż-żewġ metodi minflok;

Dar l-Istorja tal-Ewropa

70.  Jinnota li l-kofinanzjament mill-Kummissjoni għall-ispejjeż ta' funzjonament ta' Dar l-Istorja tal-Ewropa ġie żgurat bi EUR 800 000 f'approprjazzjonijiet ta' impenn fl-abbozz ta' baġit tagħha tal-2014, taħt l-Intestatura 3 tal-Qafas Finanzjarju Multiannwali; jinnota wkoll li l-ammont jikkorrespondi għal 30 % tal-ispejjeż ta' funzjonament previsti fil-baġit għal dik is-sena u li hu intiż ukoll li jkopri n-nefqa li tippermetti l-ftuħ tas-seba' jum kull ġimgħa;

71.  Jinnota li, fit-22 ta' Ottubru 2012, il-Bureau, fundamentalment, approva l-kunċett għall-wirja permanenti fid-Dar tal-Istorja Ewropea;

EuroparlTV

72.  Jinnota li fil-baġit tal-2012 adottat mill-Parlament fil-plenarja, EUR 8,5 miljun ġew allokati għall-EuroparlTV taħt il-partita baġitarja 3246; jagħraf li billi l-baġit għall-EuroparlTV tnaqqas b'mod sustanzjali minn EUR 9 miljun fl-2008 għal EUR 5 miljun fl-2014, il-prestazzjoni ta' dan is-servizz tjiebet b'għadd ta' attivitajiet u proġetti ġodda, inter alia, proporzjon kbir ta' prodotti awdjoviżivi lesti biex jintużaw b'tul ta' ħajja itwal, u serje ta' koproduzzjonijiet esklużivi ma' stazzjonijiet tat-TV nazzjonali f'bosta Stati Membri, li jirriżultaw f'żieda fin-numri fl-udjenza; jilqa' n-numru dejjem jikber ta' dawk li jsegwu lill-Parlament fuq il-midja soċjali, b'mod partikolari fuq Facebook b'iktar minn 1,2 miljun 'ħabib' attwalment, li għalihom jiġu żviluppati produzzjonijiet esklużivi tal-EuroparlTV; jistenna bil-ħerqa li jirċievi l-istudju ta' evalwazzjoni indipendenti tal-produzzjoni tal-multimidja tal-Parlament fuq l-internet ikkummissjonat skont id-deċiżjoni tal-Bureau tat-3 ta' Diċembru 2012;

73.  Jikkunsidra li l-EuroparlTV mhuwiex attività ewlenija tal-Parlament u jitlob li ssir analiżi tal-kost-benefiċċju qabel ma jiġu żviluppati kwalunkwe attivitajiet tal-EuroparlTV;

Direttorat Ġenerali għall-Persunal

74.  Jindika d-diffikultajiet fir-reklutaġġ ta' uffiċjali jew aġenti minn ċerti Stati Membri bħall-Ġermanja, ir-Renju Unit, l-Awstrija jew il-Pajjiżi l-Baxxi, li l-proporzjon tal-persunal tagħhom fis-Segretarjat tal-Parlament huwa konsiderevolment inqas mill-"piż demografiku" tal-pajjiż partikolari fl-Unjoni u josserva n-numru relattivament għoli ta' persunal li għandhom ċittadinanza Belġjana (13,6 %) jew Lussemburgiża (2,2 %), konsegwenza tal-postijiet ta' ħidma tal-Parlament; jitlob lill-Bureau jeżamina l-proċeduri u l-kundizzjonijiet ta' reklutaġġ biex ikun aċċertat x'parti jista' jkollu biex joħloq diffikultajiet fir-reklutaġġ ta' persunal minn dawn l-Istati Membri;

75.  Jitlob informazzjoni dwar l-arranġamenti ta' impjieg għall-uxxiera lokali fi Strasburgu u l-arranġamenti ta' impjieg għall-uxxiera fi Brussell waqt il-ġimgħat ta' Strasburgu; jitlob rapport mill-amministrazzjoni tal-Parlament dwar jekk, fil-każ tal-uxxiera lokali fi Strasburgu, il-liġi tax-xogħol u tas-sigurtà soċjali tal-Unjoni hijiex irrispettata u dwar il-prekawzjonijiet meħuda kontra l-impjieg indipendenti fittizju; jitlob tqabbil fl-ispejjeż, bil-ħsieb li tiġi stabbilita l-aħjar għażla għall-kontribwent;

76.  Jieħu nota sew tad-Deċiżjoni tat-Tribunal tal-Ħaddiema tas-Servizz Pubbliku tat-12 ta' Diċembru 2013 dwar il-Każ F-129/12 u jiddispjaċih bil-kbir dwar il-fatt li l-Parlament ġie kkundannat minħabba li ma setax jagħti l-assistenza f'każijiet ta' fastidju u sensji irregolari; għalhekk jagħti istruzzjonijiet lis-servizzi kompetenti biex jieħdu l-miżura kollha meħtieġa sabiex jiġu evitati sitwazzjonijiet simili fil-futur;

77.  Jitlob rapport dwar iż-żieda fil-karigi AD u AST fl-amministrazzjoni tal-Parlament bejn l-2005 u s-sena finanzjarja attwali; jitlob tqassim skont il-grad u n-nazzjonalità;

78.  Jitlob rapport dwar iż-żieda fil-karigi ta' Diretturi u Diretturi Ġenerali fl-amministrazzjoni tal-Parlament mill-2005; jitlob tqassim skont in-nazzjonalità;

79.  Jitlob għal rapport dwar kemm hemm persunal mill-gruppi politiċi li saru uffiċjali mill-2009 (a) bi proċedura ta' għażla konvenzjonali u (b) abbażi tal-klawżola 'passarelle';

80.  Jindika li iktar minn 1 500 membru tal-persunal tal-Parlament għandhom it-tfal fl-Iskejjel Ewropej; isostni li l-Parlament għandu jkollu rwol mexxej fi ħdan l-istrutturi organizzattivi tal-iskejjel;

Direttorat Ġenerali għall-Infrastruttura u l-Loġistika (DĠ INLO)

Politika immobiljari tal-Parlament

81.  Jenfasizza l-fatt li l-Parlament sar, tul is-snin, proprjetarju u li din l-istrateġija għandha riskji inerenti u li l-ispejjeż għall-funzjonament u l-manutenzjoni tal-faċilitajiet tekniċi se jkollhom jiżdiedu fil-futur biex ikampaw mal-bini li jsir antik; jenfasizza b'mod partikolari li kwalunkwe strateġija ta' proprjetà u bini għandha tqis ukoll dawk l-ispejjeż li dejjem jiżdiedu u n-neċessità fuq terminu medju għal rinnovazzjonijiet tal-bini; jindika li l-istrateġija tal-proprjetà u l-bini għandha tiżgura s-sostenibbiltà tal-baġit tal-Parlament u żżomm ċertu grad ta' flessibbiltà b'diversi akkwisti, kiri jew użufrutt sabiex jiġi żgurat l-aqwa valur għall-flus tal-Parlament; jenfasizza li x-xiri ta' bini mhuwiex dejjem l-aqwa soluzzjoni;

82.  Jinnota li tul l-2012, bdiet serje ta' reviżjonijiet kuntrattwali, li saru każ b'każ, rigward it-termini finanzjarji, partikolarment fid-dawl tax-xejriet fis-suq tal-kiri tal-proprjetà; jilqa' l-fatt li dawn in-negozjati mill-ġdid se jirriżultaw fi ffrankar strutturali li ġej fis-snin li ġejjin:

Il-Bini Konrad Adenauer (KAD)

83.  Ifakkar fin-nuqqas inizjali ta' selezzjoni tal-kandidati marbuta mal-istedina biex wieħed jippreżenta offerta għall-proġett tal-bini Konrad Adenauer għax il-prezzijiet proposti ppreżentati bħala tweġiba tal-istedina biex wieħed jippreżenta offerta kienu ferm ogħla mill-estimi; jinnota li d-deċiżjoni sussegwenti tal-Bureau fl-2012 biex terġa' titfassal is-sejħa għall-offerti għall-bini tal-KAD, li rriżultat f'offerti ħafna iktar baxxi, u b'hekk ġie rrispettat il-baġit li kien sar qbil dwaru inizjalment għal dan il-proġett ta' bini; jinnota li x-xogħlijiet bdew f'Settembru 2013 b'maniġer tal-proġett ġdid u arranġamenti ta' sħubija mtejba li jinvolvu l-appoġġ mill-Gvern Lussemburgiż; jistenna li l-baġit totali li sar qbil dwaru inizjalment għall-bini tal-proġett jiġi rrispettat, minkejja d-dewmien li ma setax jiġi evitat;

Is-Sala tal-Parlament fi Brussell

84.  Jinnota li t-tiswija tal-qafas ta' sostenn tas-saqaf fis-Sala tal-Parlament fi Brussell se tinvolvi spejjeż ta' ftit iktar minn EUR 2 miljun ċifra iżgħar mit-EUR 3 miljun stmati, u li minħabba l-età tal-bini, l-ebda proċedimenti legali ma jistgħu jittieħdu sussegwentement; jirrikonoxxi li l-politika ta' spezzjoni kontinwa regolari u ta' manutenzjoni preventiva għall-bini tal-Parlament introdotta fl-2012 skopriet id-difetti strutturali fit-travi tas-saqaf tal-injam u b'hekk ġie evitat diżastru kbir, li seta' rriżulta f'imwiet u ħsara estensiva għall-bini inkwistjoni; jinnota li kien possibbli li jiġu rilokati s-servizzi spostati fil-bini l-ieħor tal-Parlament, meta ngħalqet temporanjament iż-żona A ta' Paul-Henri Spaak (PHS) u li s-Sala għandha tkun disponibbli għall-użu mill-ġdid fil-bidu ta' April 2014;

Direttorat Ġenerali għall-Interpretazzjoni u l-Konferenzi u d-Direttorat Ġenerali għat-Traduzzjoni

85.  Josserva b'sodisfazzjoni li l-implimentazzjoni tad-deċiżjoni tal-Bureau dwar Multilingwiżmu effiċjenti fl-użu tar-riżorsi fl-2012 irriżultat f'iffrankar ta' EUR 10,9 miljun u EUR 10 miljun fis-servizzi tal-interpretazzjoni u tat-traduzzjoni rispettivament, mingħajr ma ġie affettwat il-prinċipju tal-multilingwiżmu jew mingħajr ma ddgħajfet il-kwalità tax-xogħol parlamentari; itenni li l-kooperazzjoni interistituzzjonali hija essenzjali biex ikun hemm skambju tal-aħjar prattiki li jippromwovu l-effikaċja u jagħmlu l-iffrankar possibbli;

Direttorat Ġenerali għall-Finanzi

Fond ta’ Pensjoni Volontarja

86.  Jinnota li fl-2012 il-valur tal-assi tal-Fond ta' Pensjoni Volontarja(18) żdied bi dħul minn investimenti ta' 9,4 % tul il-kontinwazzjoni tal-irkupru mill-kriżi finanzjarja dinjija tas-swieq tal-investiment;

87.  Josserva, madankollu, li l-Fond ta' Pensjoni Volontarja żied l-estimi tad-defiċit attwali, ikkalkulat abbażi tal-assi tal-Fond, għal EUR 207,9 miljun fi tmiem l-2012; jenfasizza li dawn ir-responsabbiltajiet futuri previsti huma mifruxin fuq bosta deċennji;

88.  Jinnota, madankollu, li dan jirriżulta fi tħassib dwar il-possibbiltà tal-użu tal-Fond kollu u li l-Parlament qiegħed jiggarantixxi l-pagament tad-drittijiet ta' pensjoni lill-ex Membri kollha u xi wħud minn dawk attwali ta' dan il-Fond, meta u jekk dan il-fond mhuwiex kapaċi jissodisfa l-obbigi kollha tiegħu; ifakkar fil-fatt li l-Fond ta' Pensjoni Volontarja ġie konċepit bħala soluzzjoni tranżitorja qabel ma l-Istatut il-ġdid għall-Membri tal-Parlament daħal fis-seħħ fl-14 ta' Lulju 2009;

89.  Jinnota li l-Qorti tal-Ġustizzja tal-Unjoni Ewropea ddeċidiet fl-2013 li d-deċiżjonijiet li ttieħdu mill-Bureau fl-2009, partikolarment biex tiżdied l-età tal-irtirar għal dawk miktuba fil-Fond minn 60 għal 63 sena, sabiex jiġi evitat li l-kapital jintuża kollu kmieni wisq u biex jiġi allinjat mal-Istatut il-ġdid għall-Membri tal-Parlament Ewropew kienu validi; ifakkar fil-fatt li żewġ terzi mill-pagamenti lejn il-fond saru direttament mill-Parlament pjuttost milli minn membri individwali;

Direttorat Ġenerali għall-Innovazzjoni u l-Appoġġ Teknoloġiku

90.  Jinsab imħasseb ħafna dwar il-fatt li l-emails individwali personali u kunfidenzjali ta' xi Membri, assistenti parlamentari u uffiċjali ġew ipperikolati wara li l-Parlament kien suġġett għal attakk intermedjarju fejn hacker qabad il-komunikazzjoni bejn l-ismartphones privati u l-Wi-Fi pubbliku tal-Parlament; jinsisti li jitwettaq awditu ta' sigurtà tal-ICT minn parti terza indipendenti għas-sistemi tal-ICT u telekomunikazzjonijiet parlamentari kollha skont l-ispeċifikazzjonijiet msemmija fil-paragrafu 99 bil-ħsieb li jitlesta l-pjan direzzjonali lejn politika ta' sigurtà tal-ICT iktar robusta fl-2015;

91.  Iqis li l-utenti mistiedna għandu jkollhom aċċess għal netwerk tal-Wi-Fi li ma jistax jagħti aċċess għall-intranet jew għas-servizzi tal-IT interni tal-Parlament bħall-webmail, biex b'hekk jiġu separati l-funzjonalitajiet tan-netwerk tal-Wi-Fi privat u n-netwerk tal-Wi-Fi tal-mistednin; hu tal-fehma li għandu jitwettaq awditu tas-sigurtà indipendenti fuq l-infrastruttura tat-telekomunikazzjoni tal-IT tal-Parlament kollu li jiżgura li l-Parlament jopera bl-ogħla standards ta' sigurtà disponibbli kontra l-hacking u l-attivitajiet ta' smigħ bil-moħbi ta' konverżazzjonijiet fuq it-telefown;

92.  Jikkunsidra li l-avvanzi importanti għandhom ikunu appoġġati minn investimenti adegwati f'attivitajiet ta' appoġġ u manutenzjoni għal dawn il-proġetti, kif ukoll il-kooperazzjoni xierqa mal-Membri u l-persunal; jindika b'mod partikolari li t-tnedija tas-sistema AT4AM irnexxiet; jiddispjaċih li ma tkomplietx il-konfigurazzjoni ta' distribuzzjoni Linux tal-Parlament Ewropew, li qatt ma ġie reklamat jew immirat lejn il-Membri u l-persunal li kieku kienu jkunu interessati fi proġett ta' dan it-tip; jinnota li l-introduzzjoni ta' għodod ta' ħidma ġodda għall-Membri u l-persunal tassumi li l-ittestjar fil-fażi pilota ta' tali għodod ta' ħidma jitwettaq biss bil-kooperazzjoni ta' tali Membri u persunal li huma lesti jaċċettaw xogħol addizzjonali li huwa involut fl-ittestjar fil-fażi pilota;

93.  Jinsisti li fl-istess spirtu li l-kooperazzjoni tal-Parlament tikkollabora iktar mad-Direttorat Ġenerali għall-Informatika tal-Kummissjoni biex jidentifikaw mhux biss l-għodod tal-ICT ġodda u li jfixklu minn bejjiegħa mhux uffiċjali, iżda wkoll sostituti xierqa għall-għodod u l-infrastrutturi tal-ICT antiki li jimxu fid-direzzjoni ta' soluzzjonijiet mhux dipendenti fuq il-bejjiegħa, miftuħa u interoperabbli bil-kunsiderazzjoni ta' responsabbiltà soċjali, etika u ekonomika;

94.  Jieħu nota tal-proċess ta' internalizzazzjoni tal-persunal fid-Direttorat Ġenerali għall-Innovazzjoni u l-Appoġġ Teknoloġiku u t-tnaqqis imwiegħed tal-ispejjeż u l-livell miżjud ta' għarfien espert u identità korporattiva fost il-persunal fil-qasam tal-IT; ifakkar li l-livell miżjud tal-għarfien espert rigward l-innovazzjonijiet permanenti kien ukoll ir-raġuni li ngħatat biex jiġi esternalizzat dan is-settur ħafna snin ilu; jiddubita l-argument tal-ispejjeż imnaqqsa; hu konxju dwar ir-restrizzjonijiet u l-isfidi fir-rigward tar-reklutaġġ tal-aqwa professjonisti disponibbli fis-suq; jistieden lis-Segretarju Ġenerali biex jikkoopera mal-Uffiċċju Ewropew għas-Selezzjoni tal-Persunal biex jinsabu modi li jħaffu l-proċedura ta' reklutaġġ u li jattiraw l-aqwa esperti fil-qasam tat-teknoloġiji u s-sigurtà tal-IT;

95.  Isostni li l-Parlament għandu jkollu s-setgħa tad-deċiżjoni finali fil-kwistjonijiet kollha marbuta mal-ICT;

96.  Jinnota li l-infrastruttura tal-ICT eżistenti tal-Parlament hija biss parzjalment ibbażata fuq sors miftuħ u għalhekk tillimita l-użu mill-Parlament ta' applikazzjonijiet ta' ħardwer u softwer; jitlob li ssir tranżizzjoni gradwali lejn infrastruttura tal-ICT ibbażata fuq sors miftuħ li jwassal għal iktar kosteffiċjenza u interoperabbiltà filwaqt li jkun possibbli l-ogħla livell ta' sigurtà; jitlob ukoll, f'dan ir-rigward, għal appoġġ tekniku u amministrattiv suffiċjenti li jiżgura manutenzjoni adegwata;

97.  Jipproponi li jintużaw iktar it-teknoloġiji ta' informazzjoni u komunikazzjoni l-ġodda fis-servizzi tat-traduzzjoni u l-interpretazzjoni;

98.  Iħeġġeġ lis-Segretarju-Ġenerali jassigura wkoll li l-persunal ta' appoġġ tal-ICT ikun disponibbli għall-Membri u l-persunal fil-post tax-xogħol, biex kemm il-persunal ta' appoġġ tal-ICT kif ukoll il-persunal u l-Membri parlamentari ikollhom is-sigurtà u l-kumdità li jikkomunikaw wiċċ imbwiċċ; ifakkar lis-Segretarju Ġenerali li l-appoġġ tal-ICT mill-bogħod jista' jkun skomdu u inqas xieraq għall-istabbiliment ta' relazzjonijiet ta' fiduċja bejn il-persunal tal-manutenzjoni tal-IT u dawk li jeħtieġu l-manutenzjoni tal-IT; jindika wkoll kemm mhuwiex xieraq li wieħed jiddependi kompletament fuq soluzzjoni mill-bogħod sakemm jitwettaq b'mod xieraq l-awditu ta' sigurtà msemmi hawn fuq;

99.  Jitlob lis-Segretarju-Ġenerali jiżgura li sal-1 ta' Diċembru 2014, tal-inqas l-azzjonijiet ta' awditjar li ġejjin ikunu twettqu:

Jistenna li r-riżultati tal-awditu jiġu ppreżentati lill-Kumitat għall-Kontroll tal-Baġit u l-Kumitat għall-Baġit flimkien mal-estimi tal-infiq, ir-riżorsi tal-persunal u l-ħin meħtieġ biex jiġu rimedjati kwalunkwe nuqqas ta' sigurtà li jinstabu fl-awditu;

100.  Huwa tal-fehma li d-disponibilità tad-data ma tridx tkun limitata mill-użu ta' arkitettura speċifika għal pjattaforma jew għal sistema u li l-format tad-data jrid ikun imsejjes fuq standards użati b’mod mifrux u aċċessibbli liberament u għandha tkun appoġġata u miżmuma minn organizzazzjonijiet li jkunu indipendenti mill-manifatturi; jenfasizza li d-dokumentazzjoni sħiħa relatata mal-format u mal-estensjonijiet kollha għandha tkun disponibbli liberament;

Aġenzija tal-ivvjaġġar

101.  Jilqa' l-fatt li, kif intalab mill-Kumitat għall-Kontroll tal-Baġit, il-kuntratt il-ġdid tal-aġenzija tal-ivvjaġġar, li daħal fis-seħħ fl-1 ta' Jannar 2014, jippermetti li jitwettqu awditi finanzjarji u ta' prestazzjoni; jinnota li l-unika kumpanija li għamlet offerta għall-kuntratt kienet BCD Travel N.V., l-aġenzija li ngħatat il-kuntratt preċedenti, u li l-kuntratt attwali huwa ta' sentejn;

102.  Jissuġġerixxi li, fejn hu xieraq, għall-ivvjaġġar bl-ajru tal-Membri fi ħdan l-Ewropa, għandu jiġi inkoraġġat l-użu ta' biljetti fil-klassi ekonomika;

Rapport annwali dwar il-kuntratti aġġudikati

103.  Ifakkar fil-fatt li r-Regolament Finanzjarju u r-Regoli ta' Applikazzjoni (RAP) tiegħu, li daħlu fis-seħħ fl-1 ta' Jannar 2013, jistabbilixxu l-informazzjoni li għandha tingħata lill-awtorità baġitarja u lill-pubbliku rigward l-aġġudikazzjoni ta' kuntratti mill-istituzzjoni; jinnota li r-Regolament Finanzjarju l-ġdid jirrikjedi li għandhom jiġu ppubblikati l-kuntratti aġġudikati b'valur ta' iktar minn EUR 15 000 (kontra l-EUR 25 000 preċedentement), valur li jikkorrespondi għal limitu ġdid li jekk jinqabeż tkun meħtieġa sejħa għall-offerti kompetittiva obbligatorja;

104.  Jinnota li d-Direttorati Ġenerali kollha tal-Parlament aġġudikaw kuntratti b'valur ikbar minn EUR 25 000 fl-2012 u li l-valur totali ta' dawk il-kuntratti kien ta' EUR 724 miljun (EUR 603 miljun fl-2011); jinnota wkoll li s-servizzi ċentrali stabbiliti, abbażi ta' informazzjoni li ddaħħlet mid-dipartimenti awtorizzanti fir-reġistru ta' kuntratti aġġudikati, ir-rapport annwali għall-awtorità baġitarja għal kuntratti aġġudikati fl-2012;

105.  Jinnota t-tqassim tal-kuntratti aġġudikati fl-2012 u fl-2011 skont it-tip ta' kuntratt użat kif ġej:

106.  Josserva li l-kompożizzjoni tal-kuntratti aġġudikati fl-2012 u fl-2011 skont it-tip ta' proċedura hija s-segwenti:

107.  Jinnota li minn total ta' 230 kuntratt li ngħataw fl-2012, 97 kuntratt, b'valur ta' EUR 514 miljun, kienu bbażati fuq proċeduri miftuħa jew ristretti, filwaqt li 133, b'valur ta' EUR 210 miljun, kienu bbażati fuq proċeduri negozjati; jinnota li ż-żieda konsiderevoli fl-użu ta' proċeduri negozjati, mill-2011 sal-2012, f'termini ta' valur, tirriżulta mit-tliet proċeduri ta' kuntratt tal-bini, b'valur totali ta' EUR 177,28 miljun, li jżidu b'mod sustanzjali l-ammont totali;

108.  Jiddispjaċih dwar il-fatt li, minħabba tnaqqis fil-piż amministrattiv għal kuntratti ta' valur baxx, bil-għan li tiżdied il-parteċipazzjoni tal-SMEs fl-offerti għal dawn il-kuntratti, l-amministrazzjoni ma għandhiex l-għadd ta' SMEs li ħadu kuntratti ta' valur baxx; għaldaqstant is-Segretarjat Ġenerali ma setax juri jekk it-tnaqqis fil-piż amminstrattiv fil-fatt wassalx għal żieda fil-parteċipazzjoni tal-SMEs u għaldaqstant l-effikaċja tal-miżuri meħuda; jitlob li jiġi monitorjat l-għadd ta' SMEs li ħadu kuntratti ta' valur baxx;

109.  Hu tal-fehma li għall-kuntratti taħt il-limitu ta' EUR 60 000 wkoll, għandha tingħata trasparenza sħiħa dwar il-kriterji tal-għoti u għandu jkun possibbli kontroll ta' kunflitti ta' interess;

Proċeduri negozjati eċċezzjonali

110.  Jindika li l-użu mill-Parlament tal-proċeduri negozjati eċċezzjonali naqas f'termini ta' numri fl-2012 (minn 59 fl-2011 għal 43 fl-2012), tnaqqis ta' 27 % għall-istituzzjoni u ħames Direttorati Ġenerali ma użawx il-proċedura ta' dan it-tip fl-2012, filwaqt li Direttorat Ġenerali wieħed ta l-istess numru ta' kuntratti bħal fl-2011, filwaqt li tnejn taw iktar; jindika, barra minn hekk, li mill-2012, l-uffiċjal awtorizzanti responsabbli għandu jiddikjara sistematikament ir-raġunijiet, f'anness mehmuż ma' rapporti ta' attività annwali, għall-użu ta' proċedura negozjata eċċezzjonali;

Gruppi politiċi (partita baġitarja 4 0 0)

111.  Hu tal-opinjoni li l-gruppi politiċi huma atturi ewlenin fil-Parlament u l-Unjoni kollha peress li n-natura transnazzjonali tagħhom tirrappreżenta mudell uniku fid-dinja u r-rwol tagħhom hu kruċjali sabiex tiġi garantita r-responsabbiltà demokratika b'saħħitha tal-istituzzjonijiet kollha tal-Unjoni;

112.  Josserva li, fl-2012, l-approprjazzjonijiet iskritti fil-partita baġitarja 4 0 0 intużaw bil-mod li ġej:

Partiti politiċi Ewropej u fondazzjonijiet politiċi Ewropej

113.  Josserva li fl-2012 l-approprjazzjonijiet iskritti fil-partita baġitarja 4 0 2 intużaw bil-mod li ġej(19):

114.  Josserva li, fl-2012, l-approprjazzjonijiet iskritti fil-partita baġitarja 4 0 3 ntużaw bil-mod li ġej(20):

(1) Testi adottati, P7_TA(2014)0289. (2) ĠU L 56, 29.2.2012. (3) ĠU C 334, 15.11.2013, p. 1. (4) ĠU C 188, 29.6.2013, p. 1. (5) ĠU C 331, 14.11.2013, p. 1. (6) ĠU C 334, 15.11.2013, p. 122. (7) ĠU L 248, 16.9.2002, p. 1. (8) ĠU L 298, 26.10.2012, p. 1. (9) PE 349.540/Bur/ann/def. (10) ĠU C 199 E, 7.7.2012, p. 90. (11) ĠU C 296 E, 2.10.2012, p. 226. (12) Il-Protokoll tat-Telefown fuq l-Internet. (13) ĠU L 308, 16.11.2013, p. 3. (14) Testi adottati, P7_TA(2013)0048. (15) Testi adottati, P7_TA(2013)0498. (16) "'It-tliet postijiet tax-xogħol tal-Parlament Ewropew - l-impatt finanzjarju, ambjentali u reġjonali tad-dispersjoni ġeografika', nota mħejjija mis-Segretarju Ġenerali tal-Parlament Ewropew fit-30 ta' Awwissu 2013. (17) Id-Direttiva 2005/60/KE tal-Parlament Ewropew u tal-Kunsill tas-26 ta' Ottubru 2005 dwar il-prevenzjoni tal-użu tas-sistema finanzjarja għall-iskop tal-ħasil tal-flus u l-finanzjament tat-terroriżmu (ĠU L 309, 25.11.2005, p. 15). (18) Il-Fond ta' Pensjoni Volontarja ġie stabbilit bħala Assoċjazzjoni bla skop ta' qligħ (ASBL) iffurmata skont il-liġi Lussemburgiża fl-14 ta' Lulju 1993. (19) Sors : PV BUR. 09.09.2013 (PE 512.496/BUR) punt 14 u PV BUR. 07.10.2013 (PE 516.110/BUR) punt 12 (20) Sors : PV BUR. 09.09.2013 (PE 512.496/BUR) punt 14, Nota tas-SĠ lill-Bureau: D(2013)33164