(Approvazzjoni)

Il-Parlament Ewropew,

–  wara li kkunsidra l-proposta tal-Bord tas-Superviżuri tal-Awtorità Bankarja Ewropea tal-14 ta' Jannar 2020 (C9-0006/2020),

–  wara li kkunsidra l-Artikolu 51(2) tar-Regolament (UE) Nru 1093/2010 tal-Parlament Ewropew u tal-Kunsill tal-24 ta' Novembru 2010 li jistabbilixxi Awtorità Superviżorja Ewropea (Awtorità Bankarja Ewropea) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE(1),

–  wara li kkunsidra r-riżoluzzjoni tiegħu tal-14 ta' Marzu 2019 dwar il-bilanċ bejn is-sessi fin-nomini fis-settur tal-affarijiet ekonomiċi u monetarji tal-UE(2),

–  wara li kkunsidra r-riżoluzzjoni tiegħu tas-16 ta' Jannar 2020 dwar l-istituzzjonijiet u l-korpi tal-Unjoni Ekonomika u Monetarja: il-prevenzjoni tal-kunflitti ta' interess wara l-impjieg fis-servizz pubbliku(3),

–  wara li kkunsidra l-Artikolu 131 tar-Regoli ta' Proċedura tiegħu,

–  wara li kkunsidra r-rapport tal-Kumitat għall-Affarijiet Ekonomiċi u Monetarji (A9-0008/2020),

A.  billi d-Direttur Eżekuttiv attwali tal-Awtorità Bankarja Ewropea ħabbar ir-riżenja tiegħu mill-kariga b'effett mill-31 ta' Jannar 2020;

B.  billi, fl-14 ta' Jannar 2020, il-Bord tas-Superviżuri tal-Awtorità Bankarja Ewropea, wara proċedura tal-għażla miftuħa, ippropona li jaħtar lil Gerry Cross bħala Direttur Eżekuttiv għal mandat ta' ħames snin, b'konformità mal-Artikolu 51(2) u (3) tar-Regolament (UE) Nru 1093/2010;

C.  billi, fit-22 ta' Jannar 2020, il-Kumitat għall-Affarijiet Ekonomiċi u Monetarji kellu seduta ta' smigħ ma' Gerry Cross, li fiha hu għamel stqarrija preliminari u mbagħad wieġeb għal mistoqsijiet li saru mill-membri tal-Kumitat;

1.  Jirrifjuta li jagħti l-approvazzjoni tiegħu għall-ħatra ta' Gerry Cross bħala Direttur Eżekuttiv tal-Awtorità Bankarja Ewropea u jitlob li tiġi rtirata l-proposta kif ukoll li tiġi preżentata waħda ġdida lill-Parlament;

2.  Jagħti istruzzjonijiet lill-President tiegħu biex jgħaddi din id-deċiżjoni lill-Kunsill, lill-Kummissjoni, lill-Awtorità Bankarja Ewropea kif ukoll lill-gvernijiet tal-Istati Membri.

(1) ĠU L 331, 15.12.2010, p. 12. (2) Testi adottati, P8_TA(2019)0211. (3) Testi adottati, P9_TA(2020)0017.