Tá Parlaimint na hEorpa,

–  ag féachaint do Threoir 2009/81/CE ó Pharlaimint na hEorpa agus ón gComhairle an 13 Iúil 2009 maidir le comhordú nósanna imeachta um dhámhachtain conarthaí áirithe oibreacha, soláthair agus seirbhíse ag údaráis nó eintitis chonarthacha i réimsí na cosanta agus na slándála, agus lena leasaítear Treoir 2004/17/CE agus Treoir 2004/18/CE(1) (an ‘Treoir maidir le Soláthar Trealaimh Cosanta’),

–  ag féachaint do Threoir 2009/43/CE ó Pharlaimint na hEorpa agus ón gComhairle an 6 Bealtaine 2009, lena simplítear téarmaí agus coinníollacha aistrithe táirgí a bhaineann le cosaint laistigh den Chomhphobal(2) (an ‘Treoir maidir le hAistrithe’),

–  ag féachaint don tuarascáil ón gCoimisiún do Pharlaimint na hEorpa agus don Chomhairle an 30 Samhain 2016 dar teideal ‘maidir le cur chun feidhme Threoir 2009/81/CE maidir le soláthar poiblí i réimsí na cosanta agus na slándála, i gcomhlíonadh Airteagal 73(2) den Treoir sin’ (COM(2016)0762),

–  ag féachaint don tuarascáil ón gCoimisiún do Pharlaimint na hEorpa agus don Chomhairle an 30 Samhain 2016 dar teideal ‘Meastóireacht ar Threoir 2009/43/CE ó Pharlaimint na hEorpa agus ón gComhairle an 6 Bealtaine 2009, lena simplítear téarmaí agus coinníollacha aistrithe táirgí a bhaineann le cosaint laistigh den Chomhphobal’ (COM(2016)0760),

–  ag féachaint don fhógra ón gCoimisiún an 30 Samhain 2016 dar teideal ‘Treoraíocht maidir le dámhachtain conarthaí idir rialtais i réimsí na cosanta agus na slándála (Airteagal 13.f de Threoir 2009/81/CE)’ (C(2016)7727),

–  ag féachaint do Mholadh (AE) 2018/624 ón gCoimisiún an 20 Aibreán 2018 maidir le rochtain trasteorann ar an margadh d’fho-sholáthróirí agus FBManna in earnáil na cosanta(3),

–  ag féachaint don fhógra ón gCoimisiún maidir le treoraíocht maidir le soláthar comhoibrítheach i réimsí na cosanta agus na slándála (Treoir maidir le Soláthar Trealaimh Cosanta 2009/81/CE (2019/C(4),

–  ag féachaint don staidéar ó Sheirbhís Taighde Pharlaimint na hEorpa (EPRS), Meán Fómhair 2020 dar teideal ‘Pacáiste Cosanta AE: An Treoir maidir le Soláthar Trealaimh Cosanta agus an Treoir maidir le hAistrithe, laistigh den Chomhphobal’,

–  ag féachaint do Riail 54 dá Rialacha Nós Imeachta, mar aon le hAirteagal 1(1)(e) den chinneadh ó Chomhdháil na nUachtarán an 12 Nollaig 2002 maidir leis an nós imeachta i gcomhair údarú a dheonú chun tuarascálacha féintionscnaimh a tharraingt suas, agus d’Iarscríbhinn 3 a ghabhann leis an gcinneadh sin,

–  ag féachaint don tuairim ón gCoiste um Ghnóthaí Eachtracha,

–  ag féachaint don tuarascáil ón gCoiste um an Margadh Inmheánach agus um Chosaint an Tomhaltóra (A9-0025/2021),

A.  de bhrí go bhféachann an Treoir maidir le Soláthar Trealaimh Cosanta le rialacha cothroma trédhearcacha a thabhairt isteach chun a áirithiú go mbeidh rochtain ag cuideachtaí um chosaint sna Ballstáit ar mhargaí cosanta Ballstát eile;

B.  de bhrí go bhfuil rún ag an Treoir maidir le hAistrithe feabhas a chur ar fheidhmiú mhargadh na hEorpa um threalamh cosanta (EDEM), comhtháthú shlabhra soláthair na cosanta san Aontas a chur chun cinn agus slándáil an tsoláthair a fheabhsú, trí na rialacha agus na nósanna imeachta d’aistrithe táirgí a bhaineann le cosaint laistigh den Aontas a shimpliú;

C.  de bhrí go bhfuil rún ag an dá threoir borradh a chur faoin margadh inmheánach do tháirgí a bhaineann le cosaint agus iomaíochas EDEM a neartú;

D.  de bhrí go bhfuil gá le treoracha an Phacáiste Cosanta chun comhcultúr Eorpach slándála agus cosanta a fhorbairt tuilleadh, bunaithe ar luachanna agus cuspóirí comhroinnte an Aontais, agus gné shonrach bheartais slándála agus cosanta na mBallstát á n-urramú;

E.  de bhrí gur tháinig meastóireacht 2016 ón gCoimisiún ar an gconclúid i ndáil leis an Treoir maidir le Soláthar Trealaimh Cosanta, nár baineadh na cuspóirí amach ach go páirteach, sa mhéid gur fhág sí go bhféadfaí iomaíocht, trédhearcacht agus neamh-idirdhealú i margadh soláthair an Aontais do tháirgí cosanta a mhéadú i dtús báire, ach nár mhiste i bhfad níos mó dul chun cinn a dhéanamh ó thaobh an treoir a bheith in úsáid ar bhealach comhsheasmhach ag na Ballstáit chun na cuspóirí sin a bhaint amach go hiomlán;

F.  de bhrí gur dhírigh staidéar EPRS aird ar an éifeacht neamhleor ar Eorpú na slabhraí luacha i ndáil le cosaint a bhain leis an Treoir maidir le Soláthar Trealaimh Cosanta;

G.  de bhrí gur léirigh meastóireacht 2016 ón gCoimisiún go raibh bacainní móra ag baint le cur i bhfeidhm éifeachtach na Treorach maidir le hAistrithe ag éirí as difríochtaí sa tslí a ndearnadh í a thrasuí, ionas gur cuireadh i bhfeidhm í go mall nó go neamhiomlán i mBallstáit aonair, go raibh easpa comhchuibhithe i gcoitinne ann ó thaobh ceanglas agus nósanna imeachta ó Bhallstát go chéile, agus coinníollacha agus teorannuithe an-éagsúil sna Ceadúnais um Aistriú Ginearálta (GTLanna) arna bhfoilsiú ag Ballstáit;

H.  de bhrí go mbíonn deacrachtaí riaracháin ann d’fhiontair bheaga agus mheánmhéide (FBManna) in earnáil na cosanta freisin, amhail údair imní faoi shlándáil an tsoláthair, castacht na bhforálacha fochonraitheoireachta agus na costais arda deimhniúcháin, de bhreis ar na gnáthbhacainní iontrála sa mhargadh amhail fad geografach, bacainní teanga agus easpa eolais ar an margadh trasteorann;

I.  de bhrí go mbíonn dúshláin mhóra roimh FBManna nuair a ghlacann siad páirt i nósanna imeachta soláthair phoiblí;

J.  de bhrí gur mórchúis le heaspa rannpháirtíocht FBManna easpa rochtain trasteorann ar shlabhraí soláthair; de bhrí go bhfuil fócas suntasach náisiúnta ag slabhraí soláthair na cosanta, gabhann dúshláin leis sin do FBManna ar mian leo dul isteach i slabhraí soláthair na cosanta i dtíortha eile san Eoraip; de bhrí, thairis sin, nach leanann monaróirí buntrealaimh de bheith ag ligean ar fochonradh ach FBManna a bhfuil caidreamh oibre acu leo cheana féin, i ngeall ar shrianta airgeadais;

K.  de bhrí gur gá coincheap cuimsitheach iomlánaíoch a fhorbairt do Mhargadh na hEorpa um Threalamh Cosanta lena nasctar go foirmiúil na gnéithe go léir atá ann cheana amhail an Clár Eorpach Forbartha Tionscal i réimse na Cosanta (EDIDP), an Réamhbheart maidir le Taighde Cosanta (PADR), an Ciste Eorpach Cosanta (EDF), an Buanchomhar Struchtúrtha (PESCO), an Comhsheasamh maidir le hOnnmhairiú Arm, an Rialachán maidir le Dé-Úsáid(5), an dá threoir de chuid Phacáiste Cosanta 2009 agus tionscnaimh amach anseo amhail rialacha comhchoiteanna maidir le slándáil an tsoláthair;

L.  de bhrí go bhfuil baol ann gan comhleanúnachas beartais agus gan iarracht a bheith á déanamh chun naisc a chruthú idir na gnéithe éagsúla beartais go gcuirfeadh gníomhaíocht ar leibhéal an Aontais le saobhadh margaidh atá ann cheana agus le próisis agus beartais eile in earnáil na cosanta atá thar a bheith neamhéifeachtúil;

feabhas a chur ar fheidhmiú an mhargaidh inmheánaigh do tháirgí cosanta tríd an bPacáiste Cosanta a chur chun feidhme agus a fhorfheidhmiú níos fearr

1.  á athdhearbhú go dtacaíonn sí le huaillmhianta na dtreoracha sa Phacáiste Cosanta, a bunaíodh chun comhtháthú breise shlabhra soláthair cosanta AE a chur chun cinn agus muinín fhrithpháirteach agus trédhearcacht idir na Ballstáit, cóir chomhionann agus iomaíochas foriomlán thionscal cosanta na hEorpa a mhéadú;

2.  á chur i bhfáth gur céim chun cinn é cur chun feidhme éifeachtach na dtreoracha i dtreo uaillmhian AE maidir le huathriail straitéiseach agus Aontas Eorpach um Chosaint; á chur i bhfios go láidir go bhféadfaí, leis na treoracha, beartas cosanta AE a dhéanamh níos comhleanúnaí, agus forbairt thionscail cosanta na hEorpa a chothú, ar choinníoll go mbeadh fís choiteann agus dearcadh straitéiseach comhroinnte ag na Ballstáit maidir le tionscnaimh chosanta na hEorpa;

3.  á chur in iúl gurb oth léi ilroinnt leanúnach mhargadh inmheánach an Aontais maidir le táirgí cosanta, rud a bhfuil dúbailtí neamhriachtanacha agus iolrú neamhéifeachtachaí i leith caiteachas cosanta ag na Ballstáit mar thoradh air go fóill;

4.  á dhearbhú gur díol sásaimh di cuid de na treochtaí dearfacha a chonacthas i gcur chun feidhme na Treorach maidir le Soláthar Trealaimh Cosanta, mar atá, méadú ar líon na bhfógraí conartha agus na bhfógraí faoi dhámhachtain conarthaí arna n-eisiúint ag Ballstáit, agus an cion níos mó den soláthar a ndearnadh tairiscint iomaíoch air trí Tenders Electronic Daily (TED); á chur i dtábhacht áfach gur lasmuigh den treoir a thabhaítear méid mór den chaiteachas soláthair i gcónaí agus go mbronntar céatadán ollmhór conarthaí go náisiúnta fós; á chur i bhfáth freisin nach furasta do FBManna rochtain a fháil ar na nósanna imeachta;

5.  á chur i bhfios go láidir go bhféadadh an úsáid chórasach a bhaineann na Ballstáit as na forálacha a bhaineann le heisiamh, go háirithe na forálacha sin a leagtar síos in Airteagal 346 den Chonradh ar Fheidhmiú an Aontais Eorpaigh (CFAE), an bonn a bhaint de chur chun feidhme iomlán iomchuí na Treorach maidir le Soláthar Trealaimh Cosanta;

6.  á mheabhrú treoir léirmhínitheach an Choimisiúin maidir leis na coinníollacha faoinar féidir Airteagal 346 CFAE a agairt i réimse an tsoláthair cosanta, arb é is aidhm dó cosc a chur ar na Ballstáit leas a d’fhéadfadh a bheith ar mhodh mí-úsáideach a bhaint as an bhforáil sin, agus cosc a chur orthu mí-úsáid agus míthuiscint a bhaint aisti. á iarraidh ar na Ballstáit treoir léirmhínitheach an Choimisiúin a leanúint go docht agus á iarraidh ar an gCoimisiún a áirithiú go ndéanfar í a chur chun feidhme agus a fhorfheidhmiú go comhsheasmhach;

7.  á iarraidh go ndéanfaí úsáid cheart a bhaint as díolúintí agus as ceanglais fritháirimh in éadálacha cosanta, lena gcuirtear teorainn le hiomaíocht chóir i Margadh na hEorpa um Threalamh Cosanta, agus go háirithe ar mhaithe le faireachán agus forfheidhmiú níos fearr a dhéanamh ar cheartúsáid na díolúine le haghaidh díolacháin rialtas go rialtas i gcomhréir le fógra treorach 2016 ón gCoimisiún maidir le díolacháin rialtas go rialtas agus le cur i bhfeidhm na Treorach maidir le Soláthar Trealaimh Cosanta; á iarraidh ar na Ballstáit, i ndáil leis sin, tuairisciú níos córasaí agus níos cuimsithí ar shonraí comhsheasmhacha, cruinne agus inchomparáide maidir leis an úsáid a bhaineann siad as díolúintí chun grinnscrúdú agus cur chun feidhme threoirlínte ábhartha an Choimisiúin a fheabhsú; á chreidiúint gur cheart don Choimisiún an fhreagracht a ghlacadh air féin maidir le faireachán a dhéanamh ar riachtanas agus comhréireacht na n-eisiamh a bhíonn á n-agairt ag na Ballstáit agus conarthaí á ndámhachtain acu lasmuigh de raon feidhme na Treorach maidir le Soláthar Trealaimh Cosanta, agus nár cheart brath go príomha ar ghearáin a fuarthas ón tionscal; ag tathant ar an gCoimisiún, dá bhrí sin, dlús a chur lena iarrachtaí agus bearta misniúla, réamhghníomhacha a ghlacadh chun mí-úsáid eisceachtaí a chosc agus beartas forfheidhmithe níos teanntásaí a ghlacadh, go háirithe trí éifeachtacht na nósanna imeachta um shárú a áirithiú;

8.  den tuairim i gcónaí nár mhiste díriú ar an Treoir maidir le Soláthar Trealaimh Cosanta a chur chun feidhme agus a fhorfheidhmiú go héifeachtach agus, chun go dtarlódh sé, gur cheart do na Ballstáit a bheith ag díriú ar chóir chothrom, trédhearcacht agus iomaíocht a áirithiú, mar aon le rochtain ar sholáthar poiblí sa réimse sin, agus don Choimisiún a bheith ag díriú ar chomhchaighdeáin tuairiscithe a chur chun feidhme agus treoirlínte agus faisnéis bhreise a chur ar fáil do na Ballstáit maidir le feidhmiú na bhforálacha a leagtar síos sa treoir;

9.  á iarraidh ar na Ballstáit an Treoir maidir le Soláthar Trealaimh Cosanta a chur chun feidhme i gceart agus á iarraidh orthu siúd a bhfuil tionscal mór seanbhunaithe cosanta acu a bheith ina n-eiseamláir;

10.  den tuairim, ionas gur féidir soláthar lúfar atá dírithe ar ardchaighdeáin a chur ar fáil, go bhféadfaí gnéithe de chur chun feidhme na Treorach maidir le Soláthar Trealaimh Cosanta a fheabhsú, amhail an nós imeachta oscailte, comhpháirtíochtaí nuálaíochta nó nósanna imeachta nua eile dá bhforáiltear i dTreoir 2014/24/CE(6) a bheith in úsáid ag na Ballstáit, agus á mholadh do na Ballstáit an treoir sin a chur chun feidhme a mhéid is féidir; go láidir den tuairim, áfach, nach gá aon athbhreithniú a dhéanamh ar an Treoir maidir le Soláthar Trealaimh Cosanta agus ar an Treoir maidir le hAistrithe ag an bpointe seo, mar gur leor an creat rialachais reatha ach é a chur chun feidhme i gceart agus a úsáid agus a fhorfheidmiú go cuí;

11.  á iarraidh ar an gCoimisiún, dá bhrí sin, faireachán a dhéanamh ar chur chun feidhme na dtreoracha, a dtrédhearcacht a fheabhsú agus treoir a chur ar fáil do na Ballstáit chun a áirithiú go ndéanfar iad a fhorfheidhmiú go comhsheasmhach agus go hiomlán agus, dá réir sin, go ndéanfar a gcuspóirí ar fad a bhaint amach, ós rud é go bhféadfadh an easpa cómhalartachta a bheith ina díspreagadh do na Ballstáit ag a bhfuil leibhéal níos airde cur chun feidhme;

12.  á tabhairt dá haire i leith na Treorach maidir le hAistrithe go bhfuil an glacadh i gcás uirlisí nua, lena n-áirítear GTLanna, sách íseal i gcomparáid le Ceadúnais Aistrithe Indibhidiúla (ITLanna), ar beartaíodh na huirlisí nua a chur ina n-ionad;

13.  á thabhairt dá haire, thairis sin, go raibh an glacadh deimhniúcháin níos ísle agus níos moille ná mar a bhíothas ag súil, agus go bhfuil bacainní fós ar fheidhmiú éifeachtach na Treorach maidir le hAistrithe mar aon le leibhéil ísle feasachta, i measc FBManna go háirithe, maidir leis na huirlisí a bhfuil fáil orthu faoin treoir agus na deiseanna atá sa mhargadh inmheánach, agus maidir leis an gcóras atá in úsáid ag na Ballstáit ina rialú onnmhairiúcháin, chomh maith leis an easpa comhchuibhithe i gcur chun feidhme GTLanna, agus go bhfeidhmíonn siad mar bhacainní móra ar fheidhmiú éifeachtach na treorach;

14.  den tuairim, dá réir sin, maidir leis na príomhchuspóirí sa Treoir maidir le hAistrithe, nár baineadh amach iad ach go páirteach, go háirithe an cuspóir maidir le bealach a réiteach laistigh den mhargadh inmheánach do chúrsaíocht táirgí a bhaineann le cosaint, agus margadh inmheánach éifeachtúil a bheith ann, slándáil soláthair níos fearr agus iomaíochas feabhsaithe;

15.  á chur i dtreis a thábhachtaí atá fíormhargadh inmheánach d’aistrithe táirgí a bhaineann le cosaint laistigh den Aontas, áit arb eol do na húdaráis náisiúnta cé na táirgí atá á n-aistriú agus cé chuige a n-aistreofar iad agus áit a dteorannaítear na húdaruithe onnmhairiúcháin agus na sriantachtaí eile don íosleibhéal a cheanglaítear;

16.  á tabhairt dá haire sa chomhthéacs seo an dul chun cinn atá déanta ag an gCoimisiún lena chuid moltaí maidir le raon feidhme chur i bhfeidhm GTLanna agus maidir leis na coinníollacha a ghabhann leo;

17.  á iarraidh ar an gCoimisiún cur chun feidhme na Treorach maidir le hAistrithea fheabhsú i mBallstáit aonair trína áitiú go réiteoidh údaráis náisiúnta saincheisteanna atá fós gan réiteach;

18.  á iarraidh go ndéanfaí teagmhálacha agus malartuithe a fhorbairt tuilleadh idir na pobail náisiúnta maidir le rialú ar aistriú ar fud an Aontais Eorpaigh chun aghaidh a thabhairt ar na héagsúlachtaí atá ann faoi láthair maidir le cleachtais i dtaca le rialú ar aistriú agus an easpa muiníne idir na Ballstáit, mar aon le measúnú a dhéanamh ar cheapadh na bpointí teagmhála náisiúnta uathúla le haghaidh saincheisteanna a bhaineann le haistrithe laistigh den Aontas;

19.  á iarraidh ar na Ballstáit moltaí an Choimisiúin maidir le raon feidhme chur i bhfeidhm GTLanna agus maidir le coinníollacha GTLanna a chur san áireamh go hiomchuí, agus gan coinníollacha a chur le haistrithe faoi GTLanna, a bheadh ag teacht trasna ar na coinníollacha a liostaítear sna moltaí nó a bhainfeadh an bonn díobh; á chur i bhfios go láidir gur gá aistriúcháin ar rialacháin náisiúnta a bhaineann le ceadúnú aistrithe a chur ar fáil, i mBéarla ar a laghad; á iarraidh ar an gCoimisiún tacú agus cabhrú go hiomlán leis na Ballstáit agus ceadúnais chomhchuibhithe dhomhanda agus aonair á bhforbairt acu do thionscadail de chuid EDIDP agus EDF;

20.  á chur in iúl gur geal léi forálacha na Treorach maidir le hAistrithe arb é is aidhm leo soláthar comhoibritheach a chothú i réimse na cosanta, agus á iarraidh ar na Ballstáit leas a bhaint as na deiseanna comhair uile a chuirtear ar fáil leis an treoir de mheon dílis dlúthpháirtíochta, go háirithe faoi EDIDP agus faoi EDF a bheidh ann amach anseo;

21.  á iarraidh ar an gCoimisiún an obair leantach ar na moltaí maidir le raon feidhme chur i bhfeidhm GTLanna agus maidir le coinníollacha GTLanna a áireamh ina tosaíocht, lena n-áirítear cuimhneamh go bhféadfaí na moltaí a chomhshó ina bhforálacha ceangailteacha, d’fhonn comhchuibhiú comhleanúnach a bheith ina chuspóir uileghabhálach do na blianta le teacht;

22.  á iarraidh ar an gCoimisiún agus ar na Ballstáit méadú ar a n-iarrachtaí feasacht a chothú maidir le huirlisí agus buntáistí na Treorach maidir le hAistrithe, i measc FBManna go háirithe;

23.  á thabhairt dá haire an Compás Straitéiseach a beartaíodh chun anailís a dhéanamh ar bhagairtí comhchoiteanna; go láidir den tuairim go mba cheart an Pacáiste Cosanta a bheith ar cheann dá bhloic tógála a rannchuideodh leis na beartais rialaithe onnmhairiúcháin;

24.  á iarraidh ar an gCoimisiún agus ar na Ballstáit cáilíocht, trédhearcacht, comhsheasmhacht, agus infhaighteacht sonraí a fheabhsú agus machnamh a dhéanamh ar chóid thiomnaithe aicmithe staidrimh a chruthú chun faireachán ar chur chun feidhme an dá threoir sin a éascú agus grinnscrúdú fóinteach a sholáthar;

25.  á thabhairt chun suntais na difríochtaí maidir le rátaí foilsithe fógraí conartha idir na Ballstáit i dtaca le TED; á chur i bhfáth a thábhachtaí atá sé inrochtaineacht agus inúsáidteacht bhunachar sonraí ar líne Chlár na bhFiontar Deimhnithe a bhaineann le Cosaint (CERTIDER) a áirithiú, ag cur béim ar an bhfíoras gur gá sonraí maidir le haistrithe laistigh den Aontas a chur ar fáil go córasach, lena n-áirítear sonraí cainníochtúla mar aon le miondealú de réir catagóirí ceadúnais, chun gur fearr a chuirfear gníomhaíochtaí cosanta agus armála san áireamh; ag tabhairt dá haire go gcuireann na héagothromaíochtaí sin leis an easpa sonraí iontaofa agus go bhféadfadh sé cur isteach ar an margadh inmheánach, agus go bhféadfadh an easpa cómhalartachta a bheith ina díspreagadh do na Ballstáit ag a bhfuil leibhéal níos airde cur chun feidhme;

26.  á iarraidh ar an gCoimisiún scrúdú a dhéanamh ar a indéanta atá sé foirmeacha coiteanna caighdeánaithe riaracháin a bhunú chun ualach riaracháin gnólachtaí a laghdú, go háirithe i gcás FBManna, agus cur chuige Eorpach a fhorbairt maidir le haistriú táirgí a bhaineann leis an gcosaint;

27.  á iarraidh ar an gCoimisiún a bheith láidir agus na treoracha á bhforfheidhmiú aige, lena n-áirítear, trí úsáid níos mó a bhaint as an gceart atá aige, a leagtar síos in Airteagal 258 de CFAE, nósanna imeachta um shárú a thionscnamh; á iarraidh ar an gCoimisiún nósanna imeachta um shárú a thionscnamh in ionad gníomhú amháin i gcás gearáin a fuarthas ón tionscal;

ilroinnt an mhargaidh a chomhrac agus rannpháirtíocht FBManna a mhéadú

28.  á thabhairt dá haire gur cosúil nach n-éiríonn chomh maith sin le FBManna conarthaí a bhuachan faoin Treoir maidir le Soláthar Trealaimh Cosanta seachas faoi ghnáthsholáthar poiblí an Aontais; á thabhairt dá haire, thairis sin, gur léir nár bhain údaráis na mBallstát úsáid as forálacha fochonraitheoireachta na treorach ar bhonn struchtúrtha rialta; á shuí go bhfuil Ballstáit ann a bhraitheann go bhfuil na forálacha sin casta agus deacair a úsáid, páirtmhíniú ar thionchar teoranta na treorach, agus gur gá, dá bhrí sin, FBManna a spreagadh chun páirt a ghlacadh sa phróiseas sin agus nósanna imeachta a shimpliú;

29.  á thabhairt chun suntais go mbreathnaítear ar phróisis deimhniúcháin a bheith costasach, fada agus ró-achrannach, agus dá bhrí sin nach bhfuil siad inrochtana ná tarraingteach do FBManna;

30.  á iarraidh ar na Ballstáit an moladh ón gCoimisiún maidir le rochtain trasteorann ar an margadh d’fhosholáthraithe agus do FBManna in earnáil na cosanta a leanúint go córasach, amhail ceanglais maidir le cáilíocht na faisnéise, conarthaí a roinnt ina mbaisceanna nó an t-ualach riaracháin a eascraíonn as an nós imeachta soláthair a mhaolú;

31.  den tuairim, dá réir sin, maidir leis an sprioc rannpháirtíocht FBManna a mhéadú, nár gnóthaíodh í ach go páirteach;

32.  den tuairim nach raibh tionchar ar bith ag foralácha na treorach maidir le Soláthar Trealaimh Cosanta maidir le hiomaíocht idir fochonaitheoirí ar rochtain trasteorann na bhfo-sholáthróirí agus na FBManna in earnáil na cosanta, nó má bhí gur tionchar an-teoranta é; á iarraidh ar na Ballstáit a chinntiú go bhforáiltear sna nósanna imeachta inmheánacha do rannpháirtíocht trasteorann FBManna agus simpliú a dhéanamh ar a rochtain ar phróisis tairisceana i réimsí na cosanta agus na slándála;

33.  á thabhairt faoi deara go bhfuil baint le dé-úsáid ag roinnt FBManna atá gníomhach i margaí na cosanta, cé go bhfuil go leor díobh fós speisialaithe go sonrach i ngníomhaíochtaí a bhaineann leis an gcosaint agus, dá bhrí sin, tá siad ag brath go háirithe ar ghnólachtaí míleata agus ar ghnólachtaí a bhaineann leis an gcosaint;

34.  á iarraidh ar an gCoimisiún leanúint dá chuid oibre agus na cúiseanna le heaspa rannpháirtíocht FBManna a scrúdú go críochnúil;

35.  á iarraidh ar an gCoimisiún a mharana a dhéanamh ar léarscáil nuashonraithe de shonraí maidir le FBManna ábhartha a chruthú, lena léirítear, agus cosaint sonraí íogaire agus maoin intleachtúil á ráthú, a gcumais thionsclaíocha agus theicneolaíocha agus a fhéadfaidh príomhchonraitheoirí ó Bhallstáit eile rochtain a fháil orthu go poiblí chun FBManna a bhfuil na cumais ábhartha acu is gá do thionscadail shonracha a shainaithint, agus chun uirlisí éifeachtacha eile a mholadh a d’fhéadfadh cur le rannpháirtíocht FBManna sa phróiseas soláthair phoiblí;

36.  á iarraidh ar an gCoimisiún rochtain ar mhaoiniú a fheabhsú do FBMannai

37.  den tuairim go bhféadfaí an rochtain trasteorann ar an margadh a fheabhsú go suntasach do FBManna agus d’fho-sholáthróirí in earnálacha na cosanta trí ghníomhaíocht na mBallstát, agus á iarraidh ar na Ballstáit dá réir moltaí an Choimisiúin a chur chun feidhme ar bhealach chomh cuimsitheach agus is féidir;

38.  á iarraidh ar na Ballstáit úsáid níos córasaí a bhaint as uirlisí reatha ar leibhéal an Aontais Eorpaigh, amhail an Líonra Fiontar Eorpach, chun tacú le gníomhaíochtaí trasteorann FBManna;

margadh oscailte Eorpach a bhaint amach i ndáil le trealamh cosanta

39.  den tuairim go bhfuil sé criticiúil na treoracha a chur chun feidhme níos fearr chun an cuspóir uileghabhálach a ghnóthú, mar atá, feabhas a chur ar fheidhmiú an mhargaidh inmheánaigh do tháirgí cosanta agus rannchuidiú chun EDEM oscailte a bhunú;

40.  á iarraidh ar an gCoimisiún oibriú chun an creat reachtaíochta maidir le haistrithe táirgí a bhaineann le cosaint a chur á úsáid níos mó, feabhas a chur ar infhaighteacht GTLanna ar fud an Aontais agus aghaidh á tabhairt ar chur i bhfeidhm teoranta na scéime deimhniúcháin, a fhéadfaidh borradh a chur faoi fhorbairt EDEM agus a chuirfeadh feabhas dá réir ar fheidhmiú an mhargaidh inmheánaigh do tháirgí cosanta;

41.  á iarraidh ar an gCoimisiún gníomhaíochtaí sonracha a dhéanamh a bhfuil mar aidhm acu níos mó muiníne a chothú i measc na mBallstát i réimse na cosanta agus na slándála chun borradh a chur faoina gcomhar agus fíormhargadh aonair a chruthú do tháirgí cosanta;

42.  á chreidiúint go gcuirfeadh cur chun feidhme éifeachtach na dtreoracha tuilleadh feabhais ar éifeachtacht na dtionscnamh cosanta a seoladh le blianta beaga anuas, go háirithe PESCO, an tAthbhreithniú Bliantúil ar Chosaint (CARD), EDF, an Plean Forbraíochta athbhreithnithe um Chumas (CDP), a fhéadfaidh borradh a chur faoi chur chuige comhoibríoch i dtaca le cumas cosanta, pleanáil, forbairt, soláthar agus oibriú; á iarraidh ar na Ballstáit borradh a chur faoi EDEM trí mheán an chomhair i gcás tionscadail faoi PESCO agus faoi EDF; ag tabhairt dá haire i ndáil leis seo gur cheart na ceachtanna a foghlaimíodh agus na dea-chleachtais go dtí seo a eascraíonn as cur chun feidhme an Phacáiste Cosanta a chomhroinnt leis na Ballstáit chun leibhéal neamhchothrom a gcur chun feidhme a leigheas;

43.  á chur i bhfios go láidir go bhfuil gá le léirmhíniú níos comhleanúnaí agus cur chun feidhme níos comhsheasmhaí ar Chomhsheasamh AE maidir le hOnnmhairiú Arm, ina gcuirtear san áireamh na n-ocht gcritéar AE maidir le honnmhairiú arm, chun ilroinnt mhargadh cosanta inmheánach AE a theorannú agus comhsheasmhacht a bheartais eachtraigh a threisiú; á iarraidh go ndéanfaí gníomhaíocht chun aghaidh a thabhairt ar aon lúb ar lár a d’fhéadfadh a bheith ann idir an Treoir maidir le hAistrithe, an Comhsheasamh nó an Rialachán maidir le Dé-Úsáid;

44.  á iarraidh ar na Ballstáit an dea-thoil pholaitiúil a léiriú maidir le héadáil cosanta laistigh den Aontas agus comhar T&F a mhéadú, agus úsáid a bhaint as T&F agus éadálacha comhchosanta chun idir-inoibritheacht idir a gcuid fórsaí míleata a threisiú;

45.  á iarraidh go ndéanfar iarrachtaí breise chun dul i ngleic le bearnaí agus moilleanna leanúnacha ó thaobh na teicneolaíochta agus na nuálaíochta de in EDTIB chun spleáchas méadaitheach na hEorpa ar allmhairí cosanta a laghdú; á chur i bhfáth gur gá don Choimisiún straitéis maidir le réimeas cuimsitheach uile-Eorpach do shlándáil an tsoláthair a thíolacadh chun margadh iontaofa agus cuimsitheach Eorpach um threalamh cosanta agus earnáil éifeachtúil cosanta a thógáil;

46.  á chur i bhfáth nach gcumhdaítear sa Chomhaontú Trádála agus Comhair an comhar cosanta idir an tAontas Eorpach agus an Ríocht Aontaithe, agus á mholadh go ndéanfaí anailís iomchuí ar an tionchar a bheidh ag Brexit ar mhargadh AE um threalamh cosanta;

47.  den tuairim go bhfuil neart athruithe curtha de ag EDEM ó glacadh an dá threoir; á iarraidh ar an gCoimisiún, i bhfianaise na n-athruithe sin, anailís a dhéanamh ar éifeachtúlacht na n-uirlisí atá ar fáil;

o
o   o

48.  á threorú dá hUachtarán an rún seo a chur ar aghaidh chuig an gComhairle agus chuig an gCoimisiún.

(1) IO L 216, 20.8.2009, lch. 76. (2) IO L 146, 10.6.2009, lch. 1. (3) IO L 102, 23.4.2018, lch. 87. (4) IO L 157, 8.5.2019, lch. 1. (5) Rialachán (CE) Uimh. 428/2009 ón gComhairle an 5 Bealtaine 2009 lena mbunaítear córas Comhphobail chun onnmhairí, aistriú, bróicéireacht agus idirthuras earraí dé-úsáide a rialú (IO L 134, 29.5.2009, lch. 1). (6) IO L 94, 28.3.2014, lch. 65.