(An gnáthnós imeachta reachtach: an dara léamh)

Tá Parlaimint na hEorpa,

–  ag féachaint don seasamh ón gComhairle ar an gcéad léamh (06116/1/2021‑C9-0179/2021),

–  ag féachaint do thuairim ó Choiste Eacnamaíoch agus Sóisialta na hEorpa an 17 Deireadh Fómhair 2018(1),

–  ag féachaint dá seasamh ar an gcéad léamh(2) ar an togra ón gCoimisiún chuig an bParlaimint agus chuig an gComhairle (COM(2018)0443),

–  ag féachaint d’Airteagal 294(7) den Chonradh ar Fheidhmiú an Aontais Eorpaigh,

–  ag féachaint don chomhaontú sealadach a d’fhormheas an coiste freagrach faoi Riail 74(4) dá Rialacha Nós Imeachta,

–  ag féachaint do Riail 67 dá Rialacha Nós Imeachta,

–  ag féachaint don mholadh don dara léamh ón gCoiste um Ghnóthaí Eacnamaíochta agus Airgeadaíochta (A9-0167/2021),

1.  ag formheas an tseasaimh ón gComhairle ar an gcéad léamh;

2.  á thabhairt dá haire gur mór ag an bParlaimint an ráiteas ón gComhairle atá i gceangal leis an rún seo agus go raibh sé ríthábhachtach chun teacht ar chomhaontú críochnaitheach;

3.  á thabhairt dá haire go nglactar an gníomh i gcomhréir le seasamh na Comhairle;

4.  á threorú dá hUachtarán an gníomh a shíniú le hUachtarán na Comhairle, i gcomhréir le hAirteagal 297(1) den Chonradh ar Fheidhmiú an Aontais Eorpaigh;

5.  á threorú dá hArdrúnaí an gníomh a shíniú, a luaithe a bheidh sé fíoraithe go bhfuil na nósanna imeachta go léir curtha i gcrích go cuí, agus, i gcomhaontú le hArdrúnaí na Comhairle, socrú a dhéanamh maidir lena fhoilsiú in Iris Oifigiúil an Aontais Eorpaigh;

6.  á threorú dá hUachtarán a seasamh a chur ar aghaidh chuig an gComhairle, chuig an gCoimisiún agus chuig na parlaimintí náisiúnta.

(1) IO C 62, 15.2.2019, lch. 118. (2) IO C 158, 30.4.2021, lch. 459.

Ráiteas ón gComhairle

Tugann an Chomhairle dá haire gur mian leis an bParlaimint tuilleadh trédhearcachta a bhaint amach maidir le chur chun feidhme reachtaíocht an Aontais i réimse an chomhraic i gcoinne calaois chánach, imghabháil cánach agus seachaint cánach. I gcomhthéacs chreat dlíthiúil na gConarthaí lena rialaítear an caidreamh idirinstitiúideach, aithníonn an Chomhairle an breisluach a bhaineann le malartuithe bliantúla tuairimí a thionól le Parlaimint na hEorpa agus leis an gCoimisiún maidir leis na ceachtanna atá foghlamtha ón gClár ‘Fiscalis’, i bhfianaise na dtuarascálacha bliantúla ón gCoimisiún ar dhul chun cinn.