Tá Parlaimint na hEorpa,

–  ag féachaint dá rúin roimhe seo maidir leis an Rúis, go háirithe na rúin sin uaithi an 18 Meán Fómhair 2014 maidir leis an staid san Úcráin agus staid na himeartha sa chaidreamh idir an tAontas Eorpach agus an Rúis(1), an 11 Meitheamh 2015 maidir leis an staid straitéiseach mhíleata in Imchuach na Mara Duibhe tar éis don Rúis ionghabháil neamhdhleathach a dhéanamh ar an gCrimé(2), an 16 Márta 2017 maidir leis na príosúnaigh Úcránacha sa Rúis agus an staid sa Chrimé(3), an 14 Meitheamh 2018 maidir le críocha na Seoirsia atá faoi fhorghabháil 10 mbliana tar éis ionradh na Rúise(4), an 23 Samhain 2016 maidir le cumarsáid straitéiseach AE chun gníomhú in aghaidh bolscaireacht a dhéanann tríú páirtithe ina choinne(5), an 12 Márta 2019 maidir le staid an chaidrimh pholaitiúil idir AE agus an Rúis(6), an 19 Meán Fómhair 2019 maidir leis an tábhacht a bhaineann le cuimhneachán Eorpach do thodhchaí na hEorpa(7), an 19 Nollaig 2019 maidir le dlí na Rúise maidir le ‘gníomhairí eachtracha’(8), an 17 Meán Fómhair 2020 dar teideal ‘an staid maidir le nimhiú Alexei Navalny’(9), an 21 Eanáir 2021 maidir le gabháil Alexei Navalny(10), an 29 Aibreán 2021 maidir leis an Rúis, cás Aleksei Navalny, an méadú míleata ag teorainn na hÚcráine agus ionsaithe na Rúise i bPoblacht na Seice(11), an 10 Meitheamh 2021 maidir le liostú eagraíochtaí neamhrialtasacha Gearmánacha mar ‘eagraíochtaí neamh-inmhianaithe’ ag an Rúis agus coinneáil Andrei Pivovarov(12),

–  ag féachaint do Chairt na Náisiún Aontaithe, do Choinbhinsiún na Náisiún Aontaithe maidir le Dlí na Farraige, do Dhearbhú Uilechoiteann Chearta an Duine, don Chúnant Idirnáisiúnta ar Chearta Sibhialta agus Polaitiúla, agus do Choinbhinsiún Chomhairle na hEorpa chun Cearta an Duine agus Saoirsí Bunúsacha a Chosaint,

–  ag féachaint do bhallraíocht Chónaidhm na Rúise i gComhairle na hEorpa agus san Eagraíocht um Shlándáil agus Comhar san Eoraip (ESCE), agus dá gealltanais agus oibleagáidí iarmhartacha,

–  ag féachaint do bhearta sriantacha AE mar fhreagairt ar an ngéarchéim san Úcráin, atá i bhfeidhm ó 2014,

–  ag féachaint don phacáiste beart le haghaidh Comhaontuithe Mhionsc a chur chun feidhme, a glacadh agus a síníodh i Mionsc an 12 Feabhra 2015 agus a formhuiníodh ina iomláine le rún 2202 (2015) ó Chomhairle Slándála na Náisiún Aontaithe an 17 Feabhra 2015 ina leith,

–  ag féachaint do thorthaí Chomhairle Gnóthaí Eachtracha AE an 14 Márta 2016, go sonrach an comhaontú maidir le cúig threoirphrionsabal bheartas an Aontais Eorpaigh i leith na Rúise, agus do na conclúidí ón gComhairle Eorpach an 24 agus an 25 Bealtaine 2021 maidir leis an Rúis, agus an 24 Meitheamh 2021 maidir le caidreamh seachtrach,

–  ag féachaint don teachtaireacht chomhpháirteach ón gCoimisiún agus ó Ardionadaí an Aontais do Ghnóthaí Eachtracha agus don Bheartas Slándála an 16 Meitheamh 2021 dar teideal EU-Russia relations – Push back, constrain and engage [Caidreamh idir an tAontas Eorpach agus an Rúis – Brú ar ais, srian agus plé] (JOIN(2021)0020),

–  ag féachaint don teachtaireacht chomhpháirteach ón gCoimisiún agus ó Ardionadaí an Aontais do Ghnóthaí Eachtracha agus don Bheartas Slándála an 10 Meitheamh 2020 dar teideal ‘Dul i ngleic le bréagaisnéis COVID-19 – Na fíricí a bheith i gceart’ (JOIN(2020)0008),

–  ag féachaint don dearbhú comhpháirteach ó Ardán Idirnáisiúnta na Crimé an 23 Lúnasa 2021;

–  ag féachaint do Riail 118 dá Rialacha Nós Imeachta,

–  ag féachaint don tuarascáil ón gCoiste um Ghnóthaí Eachtracha (A9-0259/2021),

A.  de bhrí gur dlúthchuid de mhór-roinn na hEorpa í an Rúis agus gurb í an chomharsa is mó atá ag an Aontas, agus de bhrí go bhfuil idirspleáchais láidre stairiúla, chomh maith le naisc chultúrtha agus dhaonna, idir an Rúis agus Ballstáit AE; de bhrí go ndéanann forbairtí sa Rúis, ó thaobh a cuid beartas de agus ó thaobh shaintréithe a húdarás de, difear go díreach ar AE agus ar a gharchomharsanacht; de bhrí, in ainneoin na mbacainní a forchuireadh in 2014, gurb é AE fós an comhpháirtí trádála is mó atá ag an Rúis agus gurb í an Rúis an cúigiú ceann is mó atá ag AE; de bhrí gurb é AE an t-infheisteoir is mó sa Rúis;

B.  de bhrí go ndéanann an Pharlaimint idirdhealú idir muintir na Rúise agus réimeas an Uachtaráin Putin, ar réimeas é atá ina chreachlachas forlámhach marbhánta faoi cheannas uachtarán feadh an tsaoil a bhfuil ciorcal olagarcaí timpeall air; de bhrí go bhfuil na gníomhaíochtaí criticiúla a mholtar sa mholadh seo dírithe, dá bhrí sin, ar réimeas an Uachtaráin Putin agus ar ghníomhaíochtaí coiriúla agus beartais fhrithdhaonlathacha an réimis sin, agus á chur i bhfáth, ag an am céanna, go bhfuil gá práinneach le teagmháil a dhéanamh le saoránaigh na Rúise chun a léiriú dóibh go bhfuil an tAontas Eorpach réidh chun aghaidh a thabhairt ar na hábhair imní atá acu;

C.  de bhrí gurb é príomhleas AE an tsaoirse, an chobhsaíocht agus an tsíocháin a chaomhnú ar mhór-roinn na hEorpa agus níos faide i gcéin, atá faoi bhagairt ag beartais ionsaitheacha údaráis na Rúise, ar cheann de na príomhdhúshláin iad do chlár oibre bheartas straitéiseach agus eachtrach AE;

D.  de bhrí gur féidir leis an Rúis todhchaí dhaonlathach a bheith aici; de bhrí, cosúil le gach duine, go bhfuil saoránaigh na Rúise ag dréim le luachanna uilechoiteanna na saoirse agus an daonlathais; de bhrí gur cheart do AE tograí nithiúla a thíolacadh do mhuintir na Rúise maidir le comhar a rachaidh chun tairbhe don dá thaobh;

E.  de bhrí nach mór dhá mhórchuspóir a chomhcheangal le straitéis AE i leith na Rúise: ar an gcéad dul síos, chun stop a chur le hionsaitheacht seachtrach agus brú faoi chois intíre ag an gCreimil, agus ar an dara dul síos, chun teagmháil a dhéanamh le muintir na Rúise agus cabhrú leo an todhchaí mhalartach sin a thógáil, rud a rachadh chun tairbhe gach duine ar mhór-roinn na hEorpa, lena n-áirítear muintir na Rúise;

F.  de bhrí go bhfuil caidreamh AE le Cónaidhm na Rúise bunaithe ar phrionsabail an dlí idirnáisiúnta, ar phrionsabail bhunaidh ESCE, ar an daonlathas, ar réiteach síochánta coinbhleachtaí agus ar dhea-chaidreamh comharsanachta; de bhrí gur léirigh Rialtas reatha na Rúise díspeagadh ar na prionsabail sin in ainneoin gur thug sé gealltanas ina leith; de bhrí go mbaineann an Rúis mí-úsáid as institiúidí idirnáisiúnta, go príomha na Náisiúin Aontaithe agus ESCE, chun an ceartas agus réiteach coinbhleachta a chosc ar fud an domhain;

G.  de bhrí gur fhill an Rúis ar Chomhairle na hEorpa in 2019, ach go leanann sí de sháruithe forleathana ar chearta an duine a dhéanamh, chomh maith le diúltú de chinntí na Cúirte Eorpaí um Chearta an Duine a chomhlíonadh;

H.  de bhrí gur léir go bhfuil beartas eachtrach an Uachtaráin Putin ionsaitheach agus athbhreithnitheach, mar go bhfuil sé ag iarraidh go bhféachfaí air mar chosantóir leasanna na Rúise agus go bhfuil sé ag iarraidh smacht a fháil ar chríocha a mheasann sé a cailleadh tar éis chliseadh an Aontais Sóivéadaigh agus níos faide i gcéin; de bhrí go n-áirítear an méid seo a leanas freisin le spriocanna réimeas an Uachtaráin Putin: a údarás a dhearbhú mar mhórchumhacht; cur isteach an réimis i dtíortha iar-Shóivéadacha agus níos faide i gcéin a chomhdhlúthú; ceannasacht stát cumhachtach a chur thar an gceart chun ceannasachta atá ag stáit eile; úsáid a bhaint as an gcoincheap maidir le Rúisigh eitneacha thar lear a chosaint mar údar le cogadh hibrideach agus bréagaisnéis; úsáid a bhaint as limistéir coinbhleachtaí calctha mar ghné straitéiseach chun cur isteach ar na tíortha atá buailte agus chun cosc a chur orthu bogadh níos gaire don Aontas agus do ECAT; úsáid a bhaint as acmhainní fuinnimh agus as cleachtais aindleathacha sciúrtha airgid mar uirlisí le haghaidh ionramhála agus dúmháil; an bonn a bhaint de shamhail an daonlathais liobrálaigh agus a chur in iúl go bhfuil an Rúis níos fearr ó thaobh na moráltachta de, agus nach bhfuil an tIarthar chomh maith céanna ó thaobh na moráltachta de; an daonlathas, an freasúra daonlathach agus an ceart atá ag na daoine a saorthoil a chur in iúl sa Rúis a chur faoi chois; de bhrí go ndiúltaíonn réimeas an Uachtaráin Putin go háirithe don iltaobhachas agus don ord idirnáisiúnta atá bunaithe ar an smacht reachta, go ndéanann sé neamhaird ar an dlí idirnáisiúnta, lena n-áirítear na prionsabail atá cumhdaithe i gCairt na Náisiún Aontaithe, in Ionstraim Chríochnaitheach Heilsincí 1975 agus i gCairt Pháras 1990 de chuid ESCE, mar a léiríodh inter alia le leasuithe bunreachtúla in 2020, ar mheas an Coimisiún Eorpach maidir le Daonlathas tríd an Dlí (‘Coimisiún na Veinéise’) go raibh a bpróiseas glactha ‘go soiléir míchuí’ agus gur sáraíodh dlí na Rúise agus a oibleagáidí ESCE araon leo; de bhrí gur theip ar an Rúis breis agus míle breithiúnas ón gCúirt Eorpach um Chearta an Duine a chur chun feidhme;

I.  de bhrí go bhfuil an tsíocháin agus an tslándáil san Eoraip á gcur i mbaol ag réimeas reatha na Rúise trí leanúint de sháruithe sistéamacha a dhéanamh ar chearta an duine in aghaidh a mhuintire agus d’iompraíocht ionsaitheach ina bheartas eachtrach, lena n-áirítear an méid seo a leanas, ach gan a bheith teoranta dóibh: freachnaimh ar mhórscála agus méaduithe míleata; forghabháil agus ionghabháil neamhdhleathach agus fhoréigneach na Crimé; sárú ar ionracas críochach agus díchobhsú na hÚcráine, na Seoirsia agus Phoblacht na Moldóive; tacaíocht a thabhairt do choinbhleachtaí calctha agus a mainneachtain maidir le comhaontuithe sosa cogaidh a urramú sa tSeoirsia agus san Úcráin; gníomhartha líomhnaithe sceimhlitheoireachta ar chríoch Bhallstáit AE amhail an tSeicia; cibirionsaithe agus ionsaithe ar bhonneagar íogair i mBallstáit AE; sáruithe ar an dlí idirnáisiúnta; cur isteach toghcháin; agus sáruithe ar spás farraige agus aeir na dtíortha i Muir Bhailt agus i réigiúin na Mara Duibhe; de bhrí gur spreag teip AE, maidir le freagairt go leormhaith d’ionsaithe éagsúla na Rúise ón uair a tharla an t-ionsaí i gcoinne na Seoirsia in 2008, don Rúis leanúint le feachtais mhíleata agus pholaitiúla ionsaitheacha a dhéanamh, ina comharsanacht agus níos faide i gcéin araon, agus ar an gcaoi sin an t-ord idirnáisiúnta riailbhunaithe agus an chobhsaíocht a lagú agus an bonn a bhaint díobh san Eoraip agus in áiteanna eile;

J.  de bhrí go leanann rialtas na Rúise d’armáin ionsaitheacha a stoc-charnadh agus trúpaí a lonnú gar do theorainneacha AE in iamhchríoch Kaliningrad;

K.  de bhrí, faoina réimeas reatha, go bhfuil an Rúis ina bagairt fhadtéarmach ar shlándáil na hEorpa de réir an mheasúnaithe a rinne Meitheal Mhachnaimh ECAT le déanaí; de bhrí gur bhunaigh an Rúis bunáiteanna míleata nua agus go ndearna sí sean-bhunáiteanna míleata a nuachóiriú i dtuaisceart na tíre; de bhrí gur uasghrádaigh an Rúis stádas a Cabhlaigh Thuaidh go stádas atá ag ceantar míleata, gur mhéadaigh sí brainsí éagsúla dá fórsaí armtha agus gur athbhunaigh sí coincheap na cosanta urdhúin atá dírithe ar a cumais straitéiseacha a chosaint; de bhrí go raibh ról ríthábhachtach ag Láithreacht Tosaigh Fheabhsaithe ECAT ar an gCliathán Thoir i stop a chur leis an Rúis gníomhaíochtaí díchobhsaithe a dhéanamh, lena n-áirítear méadú míleata i gCeantar Míleata an Iarthair; de bhrí gur cúis mhór imní do shlándáil shaoránaigh na hEorpa é cliseadh an rialaithe arm leis an Rúis (e.g. a tarraingt siar ó Chonradh um Fhórsaí Núicléacha le Meánraon agus ó Chonradh um Aerspás Oscailte) agus an easpa dul chun cinn atá déanta maidir le dí-armáil núicléach faoin gConradh maidir le Neamhleathadh Arm Núicléach, chomh maith le diúltú na Rúise don Chonradh nua maidir le Toirmeasc ar Airm Núicléacha; de bhrí go bhfuil sé sin ceangailte le nuachóiriú contúirteach ar armlanna núicléacha agus traidisiúnta na Rúise agus ar a modhanna seachadta agus ar thabhairt isteach teicneolaíochtaí díchobhsaitheacha (diúracáin hipearsonacha le hacmhainn núicléach, toirpéid, etc.);

L.  de bhrí, i mí an Mhárta agus i mí Aibreáin 2021 go háirithe, gur mhéadaigh réimeas na Creimile a láithreacht mhíleata ar theorainn thoir agus thuaidh na hÚcráine leis an Rúis, atá ar an dlús is mó de thrúpaí na Rúise ó 2014; de bhrí gur chuir réimeas na Creimile an ceart chun gluaiseachta do longa cogaidh agus do shoithí tráchtála tíortha eile trí chuid den Mhuir Dhubh i dtreo Chaolas Kerch ar fionraí, ar sárú é ar chearta loingseoireachta a ráthaítear le Coinbhinsiún na Náisiún Aontaithe maidir le Dlí na Farraige, a bhfuil an Rúis ina páirtí ann;

M.  de bhrí go bhfuil tacaíocht pholaitiúil agus eacnamaíoch chomhsheasmhach á cur ar fáil ag an Rúis do réimeas neamhdhlisteanach agus inchainte Aliaksandr Lukashenka sa Bhealarúis; de bhrí gurb í infheistíocht pholaitiúil agus eacnamaíoch an Uachtaráin Putin i marthanas réimeas neamhdhlisteanach Aliaksandr Lukashenka an t-aon chúis go bhfuil sé fós in ann leanúint dá ghéarleanúint bhrúidiúil ar mhuintir na Bealarúise, muintir atá ag éileamh go n-urramófaí chearta an duine, toghcháin shaora agus thrédhearcacha, an smacht reachta agus an ceartas; de bhrí go bhfuil go leor gnéithe comhchoiteanna ag na forbairtí polaitiúla a tharla le déanaí sa Bhealarúis agus sa Rúis, agus go bhfuil tionchar an-mhór ag na próisis sa dá thír ar a chéile; de bhrí go bhfuil na hagóidí i gcoinne an réimis fhorlámhaigh agus na héilimh ar athrú sa Bhealarúis ag spreagadh éilimh chomhchosúla ó mhuintir na Rúise; de bhrí go bhfuil brú faoi chois á mhéadú ag údaráis na Creimile ar an bhfreasúra polaitiúil roimh thoghcháin an Dúma atá le teacht i mí Mheán Fómhair 2021, lena ndéantar an fhéidearthacht a bheith rannpháirteach a theorannú agus a dhiúltú agus cosc a chur ar pholaiteoirí áirithe freasúra seasamh i dtoghchán, agus, ar an gcaoi sin, go bhfuil an iomaíocht pholaitiúil á scriosadh acu tríd an deis toghcháin chóra a bheith ann a ghoid, rud a rinne an deachtóireacht sa Bhealarúis i mí Lúnasa 2020;

N.  de bhrí go bhfuil an tUachtarán Putin ag leanúint dá iarrachtaí chun tíortha is iarrthóirí ar bhallraíocht AE agus tíortha comhlachaithe Chomhpháirtíocht an Oirthir a dhíchobhsú agus é mar aidhm aige bacainní a chruthú nó deireadh a chur le próiseas a lánpháirtithe Eora-Atlantaigh; de bhrí go bhfuil beartas ina gcuirtear iallach ar dhaoine iarratas a dhéanamh ar phasanna Rúiseacha á úsáid chun borradh a chur faoi líon na gcomhthíreach Rúiseach agus de facto chun dlínse na Rúise a leathnú ar chríocha a bhfuil faoi fhorghabháil aici agus ar chríocha scarúnaíocha, go háirithe an Tras-dnístria, an Oiséit Theas, an Abcáis, Donbas agus Leithinis na Crimé; de bhrí go bhfuil na gníomhaíochtaí sin ina sárú ar dhlíthe idirnáisiúnta;

O.  de bhrí go ndearnadh athbhreithniú ar stair an Dara Cogadh Domhanda le hathchóirithe bunreachtúla 2020 na Rúise, lenar glanadh stair Shóivéadach agus lenar ainmníodh an Rúis mar chomharba ar an Aontas Sóivéadach, lenar tugadh isteach an ceart chun idirghabháil idirnáisiúnta a dhéanamh chun comhthírigh Rúiseacha a chosaint agus lenar cuireadh cosc ar phlé faoi thailte arna n-éileamh ag an Rúis a thabhairt ar ais chuig tíortha eachtracha;

P.  de bhrí gur cheart do AE dlúthfhaireachán a dhéanamh ar sheasamh agus ar rannpháirtíocht na Rúise san Afganastáin, ós rud é go bhfuil an Rúis ag iarraidh leas a bhaint as tarraingt siar an Iarthair ar mhaithe leis agus an bhfolús cumhachta a thagann as sin a líonadh

Q.  de bhrí go bhfuil Ballstáit AE a cheadaíonn déshaoránacht neamhchosanta ar bheartas na Rúise ina gcuirtear iallach ar dhaoine iarratas a dhéanamh ar phasanna Rúiseacha; de bhrí go gcuireann Ballstáit AE a ghlac réimis maidir le pasanna órga, mar a thugtar orthu, ar chumas daoine atá dílis don Chreimil teachtadh ar chaighdeán maireachtála Eorpach le hairgead a goideadh ó mhuintir na Rúise agus an t-éilliú a scaipeadh in AE;

R.  de bhrí go bhfuil coincheap naimhdeach ‘Domhan Rúiseach’ á chur chun feidhme ag an Rúis chun an bealach a réiteach chun cur isteach ar thíortha eachtracha i gcosaint chomhthírigh na Rúise; de bhrí go bhfuil an ‘Domhan Rúiseach’ á chur chun cinn ag eagraíochtaí meán atá faoi úinéireacht an stáit amhail Russia Today agus Sputnik i dteangacha dúchais Bhallstáit AE; de bhrí go bhfuil paindéim COVID-19 á úsáid ag meaisín bolscaireachta na Creimile chun cur leis an deighilt i measc Bhallstáit AE, chun a léiriú nach bhfuil AE in ann déileáil leis an bpaindéim, chun amhras faoi na vacsaíní atá formheasta ag an nGníomhaireacht Leigheasra Eorpach a scaipeadh, chun daoine in AE a díspreagadh ó bheith vacsaínithe, agus íomhá na Rúise a athshlánú i súile phobal AE, go háirithe trí vacsaín Sputnik V a chur chun cinn;

S.  de bhrí go bhfaigheann líon iomadúil eagraíochtaí neamhrialtasacha áitiúla (ENRanna) agus grúpaí radacacha, lena n-áirítear gluaiseachtaí polaitiúla, cistiúchán ón Rúis;

T.  de bhrí go bhfuil an Rúis fós rannpháirteach i roinnt áiteanna ar domhan, lena n-áirítear na Balcáin Thiar, an Áise Láir, an Meánoirthear, an Afraic Thuaidh, an Afraic fho-Shahárach, Meiriceá Laidineach agus an tArtach; de bhrí go n-úsáideann Rialtas na Rúise aonaid pharaimíleatacha (‘Grúpa Wagner’) chun tacú le réimis deachtóireachta ar fud an domhain agus chun an bonn a bhaint d’iarrachtaí AE agus an chomhphobail idirnáisiúnta coinbhleachtaí a mhaolú, síocháin a fhorbairt agus cobhsaíocht a áirithiú; de bhrí go bhfuil láithreacht láidir Rúiseach ag réigiún na mBalcán Thiar, lena n-áirítear ballstáit ionchasacha nua AE, go háirithe sa tSeirbia; de bhrí, in 2016 i Montainéagró, go raibh an ghníomhaireacht faisnéise míleata Rúiseach (GRU) páirteach sna hiarrachtaí parlaimint na tíre a chuir as cumhacht, an príomh-aire a fheallmharú agus rialtas ar son na Rúise agus i gcoinne ECAT a insealbhú, chun aontachas Mhontainéagró le ECAT a chosc;

U.  de bhrí, chomh fada agus a bhaineann sé leis an Aontais, go líomhnaítear go raibh oifigigh faisnéise Rúiseacha ar dhualgas gníomhach de chuid réimeas na Creimile bainteach le dhá phléascadh iosta armlóin in 2014, inar maraíodh beirt shaoránach na Seice agus inar rinneadh an-chuid damáiste do mhaoin; de bhrí go raibh na gníomhairí GRU céanna freagrach freisin as an iarracht ar dhúnmharú Sergei agus Yulia Skripal sa Ríocht Aontaithe in 2018 inar baineadh úsáid as néar-oibreán Novichok de ghrád míleata; de bhrí gur cúisíodh gníomhairí GRU freisin as an iarracht ar dhúnmharú Emilian Gebrev, úinéir monarchan arm, agus beirt eile sa Bhulgáir in 2015, agus as feallmharú Zelimkhan Khangoshvili ag gníomhairí Rúiseacha i mBeirlín i 2019; de bhrí gur sárú criticiúil ar a gceannasacht iad gníomhaíochtaí neamhdhleathacha réimeas na Creimile ar chríoch na Seice, na Bulgáire agus go leor Ballstát eile, na Ríochta Aontaithe agus thíortha Chomhpháirtíocht an Oirthir; de bhrí nach bhfuil réimeas na Creimile comhoibritheach maidir le himscrúdú a dhéanamh ar na coireanna sin agus go bhfuil sé ag tabhairt tearmann do phríomhamhrastaigh;

V.  de bhrí go bhfuil sé náireach go bhfuil údaráis na Rúise ag cur a dtír i sáinn, go toilteanach nó go neamhthoilteanach, ó thaobh a bheith spleách ar an tSín, rud a lagóidh Cónaidhm na Rúise agus mór-roinn na hEorpa ar fad agus, go háirithe, a chumasóidh údaráis na Síne a láithreacht agus a tionchar a leathnú san Áise Láir agus sa tSibéir;

W.  de bhrí go bhfuil an Chreimil ag leanúint den bhréagaisnéis, den bholscaireacht agus den chur isteach hibrideach ar pholaitíocht inmheánach agus ar phróisis dhaonlathacha AE, a chuireann luachanna bunúsacha AE i mbaol – i.e. urraim don daonlathas, don chomhionannas, don smacht reachta agus do chearta an duine – agus gur féidir leo an bonn a bhaint de bheartais rialtas náisiúnta, clúmhilleadh a scaipeadh agus íomhá den Iarthar mar namhaid a chur in iúl, fuath, éadulaingt agus cumha Sóivéadach a chur chun cinn, stair na gcoireanna Sóivéadacha a athscríobh, agus, ar deireadh, an deighilt idir an Rúis agus an Eoraip a mhéadú, go háirithe maidir leis na tíortha sin a bhí mar chuid den bhloc Cumannach; de bhrí go ndíríonn cibirionsaithe na Rúise go leanúnach ar AE agus institiúidí na mBallstát, agus ar réada a bhfuil tábhacht straitéiseach ag baint leo agus ar phróisis dhaonlathacha amhail toghcháin; de bhrí go dtacaíonn an ordlathas is airde in Eaglais Cheartchreidmheach na Rúise le réimeas Putin; de bhrí go gceadaíonn dlíthe na Rúise grúpaí reiligiúnacha a mheastar a bheith antoisceach a bhrú faoi chois; de bhrí gur gá imscrúdú cuimsitheach a dhéanamh ar na torthaí a fuarthas le déanaí maidir leis an teagmháil dhlúth agus rialta idir oifigigh na Rúise, lena n-áirítear comhaltaí na seirbhíse slándála, agus ionadaithe de ghrúpa scarthach Catalónach sa Spáinn; de bhrí go bhféadfadh sé sin a bheith ina shampla eile de chur isteach na Rúise sna Ballstáit agus de na hiarrachtaí leanúnacha atá á ndéanamh ag an Rúis leas a bhaint as aon ábhar is féidir chun díchobhsú inmheánach a chur chun cinn in AE;

X.  de bhrí go bhfuil deacrachtaí airgeadais ag an Rúis mar gheall ar an meascán de smachtbhannaí ón Iarthar ar an Rúis, an laghdú ar ioncam ó onnmhairí breosla iontaise, geilleagar neamhiomaíoch, caiteachas míleata ard agus aistrithe sóisialta intíre; de bhrí go rangaítear an Rúis sa 129ú háit as 180 tír in Innéacs na Braistinte i dtaca le hÉilliú in 2020, toisc go mbíonn éifeacht ag éilliú ollmhór ar leibhéal an stáit ar chaighdeán na seirbhísí poiblí do mhuintir na Rúise, atá fós tearcmhaoinithe, lena n-áirítear cúram sláinte poiblí, a bhfuil tábhacht ar leith ag baint leis le linn na paindéime; de bhrí go bhfuil beagnach 19 milliún Rúiseach ina gcónaí faoi thairseach na bochtaineachta;

Y.  de bhrí gur fhorchuir Rialtas na Rúise smachtbhannaí inter alia ar Uachtarán na Parlaiminte David Sassoli, ar Leas-Uachtarán an Choimisiúin Věra Jourová agus ar shé oifigeach eile de chuid na mBallstát agus de bhrí go bhfuil na smachtbhannaí sin do-ghlactha agus gan bhunús ós rud é nach bhfuil aon údar dlithiúil leo; de bhrí gur fhormheas Rialtas na Rúise liosta de ‘thíortha míchairdiúla’ freisin, lena n-áirítear an tSeicia agus Stáit Aontaithe Mheiriceá;

Z.  de bhrí gur táirgí fuinnimh iad breis agus 60 % d’allmhairí AE ón Rúis in 2019; de bhrí gur cheart do AE spleáchas a gheilleagair, go háirithe in earnáil an fhuinnimh, ar sholáthairtí gáis Rúiseacha chuig margaí AE a laghdú, arb ionann é anois agus 48 %, agus ar dócha go dtiocfaidh méadú air; de bhrí gur ionstraim shuntasach é an Comhaontú Glas don Eoraip maidir le slándáil gheopholaitiúil AE a áirithiú agus de bhrí go meastar, de réir réamhaisnéisí an Choimisiúin, má chuirtear an Comhaontú Glas don Eoraip chun feidhme, go dtiocfaidh laghdú mór ar allmhairí ola agus gáis nádúrtha AE tar éis 2030, le laghdú 78-79 % ar allmhairí ola agus 58-67 % ar allmhairí gáis nádúrtha i gcomparáid le figiúirí 2015;

AA.  de bhrí go bhfuil buaicphointe thomhaltas gáis na hEorpa sroichte agus nach bhfuil acmhainn iomlán na píblíne reatha Nord Stream á húsáid faoi láthair; de bhrí go bhfuil an cinneadh conspóideach a rinne roinnt Ballstát chun Nord Stream 2 a thógáil ar neamhréir le luachanna dlúthpháirtíochta agus muiníne an Aontais Fuinnimh; de bhrí nach bhfuil Nord Stream 2 ag luí le spriocanna an Chomhaontaithe Ghlais don Eoraip astaíochtaí gás ceaptha teasa AE a laghdú 55 % ar a laghad faoi 2030 agus nach mbeidh aon ghlanastaíochtaí gás ceaptha teasa ann faoi 2050;

AB.  ba cheart go n-iarrfadh an tAontas ar an Rúis rochtain shaor gan bhac ar na cartlanna trófaí, mar a thugtar orthu, a aistríodh go Moscó in 1944 agus 1945 ó chríocha a bhí faoi fhorghabháil an Aontais Shóivéadaigh, chomh maith le cartlanna agus déantáin stairiúla a thóg Impireacht na Rúise ó thíortha Eorpacha agus atá á gcoimeád sa Rúis faoi láthair;

AC.  de bhrí go bhfuil an smacht reachta, breithiúna neamhspleácha agus saorphreas i gcroílár sochaithe daonlathacha athléimneacha;

AD.  de bhrí nach bhfuil Cónaidhm na Rúise ina bagairt sheachtrach ar shlándáil na hEorpa amháin, ach go bhfuil sí ag cur a muintire féin faoi chois freisin; de bhrí go bhfuil an staid sa Rúis ag dul in olcas go mór mar gheall ar an méadú atá ag teacht ar an mbrú faoi chois atá á dhéanamh ag an Uachtarán Putin ar fhórsaí daonlathacha, arb é is aidhm dó a cháinteoirí baile, an freasúra polaitiúil agus gníomhaithe frith-éillithe a chur ina dtost, a saoirse comhthionóil a theorannú agus bac a chur ar a ngníomhaíochtaí agus ar ghníomhaíochtaí shochaí shibhialta na Rúise, mar a léiríodh le coinneáil níos mó ná 11 000 léirsitheoir síochánta ag údaráis na Rúise díreach dhá sheachtain tar éis ghabháil Alexei Navalny, rud a fhágann gur cuireadh níos mó ná 15 000 Rúiseach faoi choinneáil san iomlán ó mhí Eanáir 2021 i leith; de bhrí go bhfuil an Rúis ag leanúint dá saoránaigh a choinneáil go neamhdhleathach agus díriú ar cheannairí an fhreasúra, ar iriseoirí neamhspleácha, agóideoirí agus ar ghníomhaithe chearta an duine; de bhrí go bhfuil coinníollacha príosúin sa Rúis fós uafásach agus de bhrí go ndéantar céasadh, ciapadh agus ionsaithe fisiciúla orthu siúd atá i bpríosún;

AE.  de bhrí, trí dhlíthe a ghlacadh maidir le ‘gníomhairí eachtracha’ agus ‘eagraíochtaí neamh-inmhianaithe’, go bhfuil réimeas na Creimile ag ceadú daoine aonair, comhlachais agus eagraíochtaí meán a stiogmatú, rud a sháraíonn a gcearta daonna agus a saoirse chun tuairimí a nochtadh agus saoirse comhlachais, a chuireann srian ar chearta na saoránach a bheith tiomanta do shochaí shibhialta na Rúise agus rannchuidiú léi, agus a chuireann a sábháilteacht phearsanta i mbaol; de bhrí go ndearna réimeas na Creimile na dlíthe sin a fheabhsú tuilleadh trí shrianta a leathnú chuig daoine nó eintitis a thacaíonn le ‘gníomhairí eachtracha’ agus ‘eagraíochtaí eachtracha neamh-inmhianaithe’, rud a chuireann bac sistéamach ar bhaill ghníomhacha na sochaí sibhialta, ar eagraíochtaí neamhrialtasacha maidir le cearta an duine agus ar an bhfreasúra páirt a ghlacadh i dtoghcháin pharlaiminteacha 2021 sa Rúis; de bhrí go ndearnadh, go háirithe, le reachtaíocht nua a glacadh i mí na Nollag 2020 agus i mí Eanáir 2021 raon feidhme na ndaoine aonair agus na ngrúpaí ar féidir iad a ainmniú mar ‘ghníomhairí eachtracha’, an sainmhíniú ar ‘chistí eachtracha’, agus na ceanglais maidir le hábhair lipéadaithe a leathnú; de bhrí go raibh sé d’aidhm ag dréachtbhillí nua a moladh i mí na Bealtaine 2021 tionchar an dlí ar eagraíochtaí ‘neamh-inmhianaithe’ a leathnú agus toirmisc a fhorchur a mbeadh éifeacht chúlghabhálach acu ar iarrthóirí ionchasacha do Pharlaimint na Rúise; de bhrí go leanann údaráis na Rúise de dhaoine a ionchúiseamh mar gheall ar chleamhnú líomhnaithe le grúpaí antoisceacha faoi dhlí frith-antoisceachais na Rúise atá thar a bheith leathan; de bhrí go bhfuil cinneadh údaráis na Rúise a dhearbhú go bhfuil an Fhondúireacht um Fhrith-Éilliú faoi cheannas Alexei Navalny ina heagraíocht antoisceach gan bhunús, idirdhealaitheach agus gur glacadh é leis an sprioc aonair go scriosfaí féidearthachtaí an fhreasúra a bheith rannpháirteach i bhfeachtais toghcháin;

AF.  de bhrí, de réir Ionad Cuimhneacháin Chearta an Duine, go bhfuil beagnach 400 príosúnach polaitiúil á gcoimeád ag údaráis na Rúise faoi láthair, rud a sháraíonn oibleagáidí Chónaidhm na Rúise faoi Airteagal 5 den Choinbhinsiún Eorpach um Chearta an Duine, Airteagal 9 den Chúnant Idirnáisiúnta ar Chearta Sibhialta agus Polaitiúla, agus Airteagal 23 de dhoiciméad deiridh Chruinniú Vín an 5 Eanáir 1989 den Chomhdháil um Shlándáil agus Comhar san Eoraip;

AG.  de bhrí, le fiche bliain anuas, go ndearnadh iarrachtaí ar fheallmharuithe nó feallmharuithe rathúla ar lucht freasúra an réimis agus iriseoirí neamhspleácha, laistigh den Rúis féin nó i dtíortha iasachta, lena n-áirítear ar Anna Politkovskaya, Boris Nemtsov, Alexander Litvinenko, Sergei agus Yulia Skripal, Sergei Protazanov, Pyotr Verzilov, Vladimir Kara-Murza, Alexei Navalny, Zelimkhan Khangoshvili agus daoine eile; de bhrí go bhfuil lucht eagraithe na gcoireanna sin fós gan aithint agus gan díotáil toisc go ndéantar treisiú ar bhrú faoi chois leanúnach ar easaontú sóisialta ós rud é go bhfuil na póilíní agus na fórsaí slándála saor ó phionós agus toisc nach mian leis na breithiúna géarleanúint a dhéanamh ar dhéantóirí iarbhír na gcoireanna sin; de bhrí go ndéantar ionsaí béil córasach ar ionadaithe ón bhfreasúra, go mbíonn feachtais ad hominem ann ina gcoinne agus go ndéanann an rialtas nó na meáin atá ar son an rialtais dídhaonnú orthu; de bhrí gur thángthas ar an gconclúid i dtuarascáil Thionól Parlaiminteach ESCE ar dhúnmharú Boris Nemtsov ‘nach é cumas forfheidhmithe dlí na Rúise an príomhdhúshlán a bhaineann le dul i ngleic le daoine a bheith ag dul saor ó phionós, ach an toil pholaitiúil sa tír’; de bhrí go sonraítear freisin sa tuarascáil ó Thionól Parlaiminteach ESCE go mbeadh imscrúdú iomlán ar an bhfeallmharú ‘ina chéim thosaigh chun aghaidh a thabhairt ar an gcultúr de dhaoine a ligean saor ó phionós’ sa Rúis;

AH.  de bhrí, leis na leasuithe bunreachtúla neamhdhleathacha, nach amháin gur tugadh isteach tarscaoileadh a shaorfadh an tUachtarán Putin ó theorainneacha téarma uachtaránachta in 2024, ach gur laghdaíodh tuilleadh an ceart chun triail chóir a fháil sa Rúis, lena n-áirítear tríd an gcumhacht a thabhairt don uachtarán breithiúna a ainmniú do na Cúirteanna Bunreachtúla agus Uachtaracha agus ceapacháin na mbreithiúna feidearálacha uile a thionscnamh agus breithiúna sinsearacha feidearálacha a chur as oifig;

AI.  de bhrí go bhfuil saoirse na meán sa Rúis ag meath go gasta de réir mar atá dlús á chur ag Rialtas na Rúise lena fheachtas, a bhí ar bun aige le blianta fada anuas, chun deireadh a chur leis an tsochaí shibhialta agus leis an bpreas neamhspleách, ag bagairt ar eagraíochtaí amhail Meduza, Radio Free Europe/Radio Liberty, VTimes, For Human Rights, European Endowment for Democracy agus Open Russia le hualaí troma reachtacha, rialála agus maorlathacha, ag fáil réidh leis an rochtain ar gach foinse mhaoiniúcháin nach bhfuil faoi smacht an rialtais agus a chomhghuaillithe, á maslú le lipéid amhail ‘gníomhairí eachtracha’ nó ‘daoine míchuibhiúla’, rud a tharraingíonn droch-cháil ar na grúpaí sin agus ar na hardphrionsabail iriseoireachta agus chearta an duine a seasann siad dóibh, prionsabail nach féidir leis an Rúis a bheith daonlathach, rachmasach agus saor ina n-éagmais; de bhrí go bhfuil spás na meán sa Rúis faoi rialú agus faoi úinéireacht an stáit, nach bhfuil aon chraoltóir poiblí ann, agus go bhfuil an líon beag foinsí neamhspleácha meán eile ag streachailt ó thaobh airgeadais de agus iad á ngéarleanúint, géarleanúint lena n-áirítear ionsaithe fisiciúla agus cur i bpríosún a gcuid oibrithe; de bhrí gur maraíodh 58 n-iriseoir sa Rúis ó 1992 i leith; de bhrí go gcuireann an dlí ‘flaitheasach um an idirlíon’ ar chumas an rialtais aon inneachar idirlín nach bhfuil ag teastáil a bhlocáil; de bhrí gur bunchloch de shochaí dhaonlathach atá bunaithe ar an smacht reachta í obair shaor agus neamhspleách eagraíochtaí na sochaí sibhialta agus na meán;

AJ.  de bhrí go bhfuil na deiseanna le haghaidh breathnóireacht neamhchlaonta toghcháin ag laghdú go seasta sa Rúis le deich mbliana anuas, toisc nach ann d’fhorálacha maidir le creidiúnú díreach na saoránach a dhéanann breathnóireacht ar thoghcháin agus go gcuireann sé sin iallach ar na breathnóirí sin gníomhú thar ceann iomaitheoirí nó thar ceann eagraíochtaí meán agus, dá bhrí sin, go bhfuil sé ag teacht salach ar an gcoincheap go ndéanfadh an tsochaí shibhialta grinnscrúdú neamhspleách ar thoghcháin agus ag teacht salach ar chaighdeáin idirnáisiúnta freisin; de bhrí gur chuir tuarascáil 2021 um Shaoirse ar Domhan an Rúis i gcatagóir na dtíortha ‘nach bhfuil saor’; de bhrí go bhfuil saoirsí bunúsacha na saoránach teoranta sa Rúis agus go rialaítear an timpeallacht toghcháin, go ndíspreagtar muintir na Rúise páirt a ghlacadh in agóidí poiblí trí na nósanna imeachta maorlathacha troma arna mbunú do shaoránaigh chun cead a fháil agóid a dhéanamh agus trí fhoréigean na bpóilíní le linn agóidí síochánta;

AK.  de bhrí go bhfágfaidh na forbairtí baile sin go bhféadfadh meath breise tarlú sa tréimhse roimh thoghcháin pharlaiminteacha mhí Mheán Fómhair 2021 sa Rúis, agus go bhféadfaí an freasúra polaitiúil sa Rúis a chur faoi chois tuilleadh, lena n-áirítear le sáruithe tromchúiseacha ar chearta an duine; de bhrí go bhfuil príomhghníomhaithe freasúra an fheachtais toghcháin pharlaimintigh á gcoimeád i bpríosún nó faoi bhraighdeanas baile ag údaráis na Rúise; de bhrí go bhfágann an brú faoi chois leanúnach a dhéanann údaráis na Rúise ar iarrthóirí an fhreasúra, trí mhí-úsáid a bhaint as na nósanna imeachta clárúcháin agus trí spriocdhíriú go roghnaitheach ar lucht an fhreasúra pholaitiúil agus ar eagraíochtaí na sochaí sibhialta ar na sráideanna agus sna cúirteanna le cásanna dlí bréagchumtha, gur féidir a rá gur dodhéanta a bheadh sé toghcháin pharlaiminteacha chothroma a bheith ann i mí Mheán Fómhair 2021, ós rud é go bhfuil iomaíocht pholaitiúil agus daonlathas iolraíoch á scriosadh ag an réimeas sa Rúis trí mheán na ngníomhaíochtaí sin;

AL.  de bhrí, dá bhrí sin, go bhfuil amhras dlisteanach ann go mbeidh na toghcháin pharlaiminteacha atá ar na bacáin saor agus cothrom;

AM.  de bhrí gur chuir an Pharlaimint a himní in iúl go mion minic maidir le staid an daonlathais, maidir leis an teip chórasach chun seasamh leis an smacht reachta agus maidir le cearta agus prionsabail bhunúsacha a urramú, maidir leis an gcrapadh atá ag teacht ar an spás do ghníomhaithe neamhspleácha agus easaontacha, agus maidir leis an ionsaí ar shaoirse na meán sa Rúis; de bhrí gur oscailt súl don chomhphobal idirnáisiúnta go léir é an cos ar bolg sistéamach síormhéadaitheach atá á déanamh ag an gCreimil ar an bhfreasúra sa Rúis, agus de bhrí nach mór don Aontas a bheith ullamh chun aghaidh a thabhairt air agus straitéis freagartha chomhleanúnach a fhorbairt; de bhrí gur cheart, go háirithe, don Aontas níos mó agus níos mó brú a chur ar réimeas na Creimile sa tréimhse roimh thoghcháin pharlaiminteacha 2021 agus ina diaidh chun cearta mhuintir na Rúise a chosaint maidir le saorthoghcháin a bheith acu, toghcháin ina mbeadh rochtain chothrom agus deiseanna comhionanna ag na páirtithe polaitiúla uile;

AN.  de bhrí go bhfuil idirdhealú éagórach fairsing á dhéanamh ar phobal LGBTI+ i gcodanna éagsúla de Chónaidhm na Rúise, lena n-áirítear ciapadh, céasadh, príosúnacht agus marú agus de bhrí go bhfuil an scéal an-chontúirteach sa tSeisnia, a thosaigh in 2017 ar dhíbirt daoine LGBTI+, ag coinneáil agus ag céasadh na scórtha agus ag marú ar laghad beirt, rud a fhágann go bhfuil go leor daoine ag lorg tearmainn shábháilte thar lear; de bhrí go gcuireann na dlíthe atá ann cheana féin cosc ar aon phlé poiblí maidir le ‘caidrimh ghnéasacha neamhthraidisiúnta’; de bhrí, tar éis athruithe neamhdhleathacha bunreachtúla, gur glacadh reachtaíocht a bhfuil tionchar diúltach aici ar chearta daoine LGBTI+, lena n-áirítear na cearta chun pósadh agus leanaí a thógáil;

AO.  de bhrí go bhfuil bearnaí tromchúiseacha fós ann sa Rúis sa fhreagairt oifigiúil d‘fhoréigean inscnebhunaithe agus d’fhoréigean baile forleathan, lena n-áirítear easpa cosanta leordhóthanaí agus easpa modhanna sásaimh d’íospartaigh; de bhrí nach ndearnadh leis an dréachtdlí maidir le foréigean baile, a moladh i mí na Samhna 2019, sainmhíniú cuimsitheach a chur ar fáil ar fhoréigean baile; de bhrí gur bhain an Pharlaimint, go luath in 2020, an t-athbhreithniú ar an dréachtdlí ó thús a liosta tosaíochtaí, athbhreithniú atá fós ar feitheamh; de bhrí gur thug Ombudsman na Rúise dá haire gur mhéadaigh líon na gcásanna d’fhoréigean baile as cuimse le linn phaindéim COVID-19, le níos mó ná dúbailt tagtha ar líon na gcásanna le linn dhianghlasáil an earraigh; de bhrí gur cheart, dá bhrí sin, do straitéis an Aontais maidir leis an Rúis dul i ngleic le hidirdhealú méadaitheach agus neamhionannas inscne chomh maith le cearta na mban, cearta daoine LGBTI+ agus cearta na mionlach eile sa Rúis;

AP.  de bhrí gur mórcheist slándála gheopholaitiúil don Aontas é claochlú daonlathach na Rúise agus gurb í Rúis an Uachtaráin Putin fós an dúshlán is mó atá ann don tslándáil Eorpach;

AQ.  de bhrí, ina rúin an 17 Meán Fómhair 2020, an 21 Eanáir 2021 agus an 29 Aibreán 2021, gur iarr an Pharlaimint ar Leas-Uachtarán an Choimisiúin Eorpaigh/Ardionadaí an Aontais Eorpaigh do Ghnóthaí Eachtracha agus don Bheartas Slándála, Josep Borrell, athbhreithniú a dhéanamh ar bheartas an Aontais i leith na Rúise, lena n-áirítear na cúig threoirphrionsabal a comhaontaíodh in 2016, lena dtugtar chun suntais go mbeadh caidreamh an Aontais leis an Rúis amach anseo ag brath ar luas chlaochlú daonlathach na Rúise (nó ar an easpa claochlaithe sin); de bhrí gur iarr sí freisin ar institiúidí AE cur chuige straitéiseach cuimsitheach nua a cheapadh lena nglacfaí leis nach mór aon idirphlé leis an Rúis a bheith bunaithe ar an urraim don dlí idirnáisiúnta agus do chearta an duine;

AR.  de bhrí gur cheart a chur i gcuntas i straitéis nuashonraithe AE na cineálacha cásanna éagsúla a d’fhéadfadh tarlú, forbairtí a d’fhéadfadh a bheith ann agus freagairtí soiléire ar sháruithe na Rúise ar an dlí idirnáisiúnta agus ar chearta an duine, lena n-áirítear ionstraimí éifeachtacha i gcoinne thrasnaíocht na Rúise agus leathadh na bréagaisnéise a dhéanann an Rúis, chomh maith le hionstraimí maidir le rannpháirtíocht roghnaíoch, i gcás inar féidir; de bhrí gur iarr an Pharlaimint ar an gComhairle freisin tús a chur láithreach leis na hullmhúcháin agus glacadh le straitéis AE maidir leis an gcaidreamh a bheidh ann amach anseo le Rúis dhaonlathach, lena n-áirítear tairiscint leathan dreasachtaí agus coinníollacha chun treochtaí intíre i dtreo na saoirse agus an daonlathais a neartú;

AS.  de bhrí gur cuidíodh le díspreagadh réimeas na Creimile óna thuilleadh ionsuithe a dhéanamh i gcoinne na hÚcráine mar gheall ar chúig threoirphrionsabal AE maidir leis an gcaidreamh leis an Rúis, ach nach luaitear aon rud iontu maidir le srian a chur leis an mbrú faoi chois atá ar siúl ag an Uachtarán Putin ar mhuintir na Rúise; de bhrí go bhfuil cúig threoirphrionsabal AE don chaidreamh leis an Rúis fós bailí mar chreat feidhmeach, ach nach mór go mbeadh straitéis iarbhír ag gabháil leo a bhfuil sé mar aidhm léi spriocanna AE a bhaint amach ina chaidreamh leis an Rúis, lena n-áirítear inter alia trí bheartais naimhdeacha reatha na Creimile a chomhrac agus a thuilleadh ionsuithe a dhéanamh ar a comharsana a dhíspreagadh agus trí na hiarmhairtí a ghabhann le gníomhaíochtaí míleata i dtíortha eachtracha a bheith ina n-iarmhairtí níos tromchúisí, lena n-áirítear gníomhaíochtaí a dhéanann ionadaithe agus saighdiúirí tuarastail; de bhrí, ós rud é nach bhfuil aon ionchais ann go dtarlóidh forbairtí suntasacha dearfacha faoi cheannaireacht reatha na Rúise, gur cheart na cúig phrionsabal a chomhlánú le go n-áireofaí brú faoi chois an Uachtaráin Putin ar mhuintir na Rúise agus gníomhaíochtaí éagobhsaithe níos leithne na Creimile;

AT.  de bhrí gur cheart straitéis nua AE a bheith dírithe ar na prionsabail ‘cur i gcoinne, srian a chur agus rannpháirtíocht’ arb e is aidhm dóibh acmhainneacht an Aontais a neartú chun bagairtí na Creimile a chomhrac, go háirithe i réigiún Chomhpháirtíocht an Oirthir (EaP), lena n-áirítear an Bhealarúis, agus sa Rúis féin, trí chearta an duine a chosaint agus cabhrú le claochlú daonlathach na Rúise i gcomhréir leis an bprionsabal ‘bíodh tús áite ag an daonlathas’; de bhrí gur cheart gurb é príomhchuspóir uileghabhálach AE caidreamh le Cónaidhm na Rúise a mhúnlú sa chaoi is go gcaomhnófar síocháin, cobhsaíocht, slándáil, rathúnas, ceannasacht agus sláine chríochach na dtíortha uile san Aontas agus ina chomharsanacht, go n-urramófar an dlí idirnáisiúnta agus go mbeidh cearta an duine agus an smacht reachta fós ina dtreoirphrionsabail; de bhrí gur léirigh na forbairtí is déanaí sa Rúis gur cheart straitéis AE i leith na Rúise a bheith i bhfad níos réamhghníomhaí agus gur cheart go mbeadh cuspóir na ‘rannpháirtíochta’ sainithe go soiléir sa straitéis sin, ar cuspóir é ar cheart dó díriú ní hamháin ar rannpháirtíocht roghnaíoch thraidisiúnta leis an gCreimil, ach ar rannpháirtíocht ‘straitéiseach’ le sochaí shibhialta na Rúise chun cabhrú le claochlú na Rúise i dtreo an daonlathais;

AU.  de bhrí gur cheart, i gcroílár straitéis AE maidir leis an Rúis, go mbeadh tacaíocht don tsaoirse agus don daonlathas; de bhrí gur cheart go mbeadh an straitéis sin chun leasa slándála AE agus gur cheart idirphlé cuiditheach a thairiscint don Rúis; de bhrí go rachadh caidreamh cuiditheach chun leasa AE agus na Rúise agus a bpobal araon; de bhrí go bhfuil deis ann fós comhoibriú chun leasanna coiteanna a roinnt, fadhbanna a réiteach agus aghaidh a thabhairt ar dhúshláin straitéiseacha, amhail an beartas aeráide nó an fhrithsceimhlitheoireacht, agus luachanna chearta an duine, an smachta reachta agus an daonlathais a chur chun cinn, agus a áirithiú go mbeidh neartú an chaidrimh dhéthaobhaigh amach anseo ag brath ar go gcomhlíonfadh Cónaidhm na Rúise a gealltanais féin maidir le cearta an duine agus leis an daonlathas i gcomhréir lena bunreacht agus lena hoibleagáidí idirnáisiúnta;

AV.  de bhrí, ag an am céanna, nach mór don Aontas díriú ar a cheridiúnacht a shábháil maidir lena iompar luach-dhírithe go hinmheánach, trí chaomhnú a dhéanamh ar an smacht reachta agus ar chearta bunúsacha ar bhealach i bhfad níos dírí agus níos ionraice, mar go ndéanann foréigean póilíneachta, dlíthe coiriúla seanchaite agus frithsheasmhacht in aghaidh comhionannas inscne agus na héagsúlachta i roinnt Ballstát dochar dá chlú agus dá chreidiúnacht thar lear; de bhrí nach mór don Aontas ionchais inchomparáide a chur in iúl i dtaca leis na comhpháirtithe uile, trí sháruithe ar an dlí idirnáisiúnta a cháineadh, trí bhearta diana iarmhartacha a ghlacadh go comhsheasmhach agus trí staonadh ón dá thaobhachas a chur i bhfeidhm agus measúnú á dhéanamh ar sháruithe den sórt sin;

AW.  de bhrí gurb é aontacht i measc Bhallstáit an Aontais an beartas is fearr chun an Rúis a dhíspreagadh ó thabhairt faoi ghníomhaíochtaí díchobhsaitheacha agus treascracha san Eoraip; de bhrí, agus cinneadh á dhéanamh maidir le conas a straitéis nuashonraithe a chomhordú – go háirithe i réimsí straitéiseacha amhail an tAontas Eorpach um Chosaint, an tAontas Fuinnimh Eorpach, an chibearchosaint, an chibear-sceimhlitheoireachtagus uirlisí cumarsáide straitéisí – gur cheart, dá bhrí sin, go mbeadh an tAontas níos aontaithe ós rud é gurbh é an beartas a bhí ag an Rúis ina leith, le fada an lá, ná neamhshuim a dhéanamh d’institiúidí an Aontais i bhfabhar an chaidrimh dhéthaobhaigh leis na Ballstáit ar leithligh, mar iarracht chun na deighiltí san Aontas a nochtadh agus a mhéadú; de bhrí go n-éileodh idirphlé tairbheach le húdaráis na Rúise comhordú, comhar agus aontacht níos dlúithe idir na Ballstáit agus níos mó nirt agus diongbháilteachta ina bhfreagairt d’aon ghríosú nó ionsaí ó Mhoscó, chun cothromaíocht a bhaint amach idir diongbháilteacht agus oscailteacht i leith an idirphlé ar shaincheisteanna comhleasa;

AX.  de bhrí gur cheart go ndéanfaí, i straitéis an Aontais maidir leis an Rúis, tacú leis an Rúis ar a conair i dtreo bheith ina tír dhaonlathach ar na bealaí seo a leanas: (i) trí smachtbhannaí a bhrú siar agus a spriocdhíriú orthusan a bhfuil dlúthnasc acu leis an gCreimil, atá sásta na toghcháin a bhreith leo go héagórach nó breabanna a thabhairt amach chun na toghcháin sin a bhuachan nó coireanna tromchúiseanna a dhéanamh a sháraíonn cearta an duine agus luachanna daonlathacha, sa Rúis agus i neaschomharsanacht AE araon, (ii) trí chúnamh a thabhairt do thíortha Chomhpháirtíocht an Oirthir trí bheartas uaillmhianach lánpháirtíochta AE a thairiscint agus acmhainneachtaí AE a fhorbairt i réimsí na freagrachta straitéisí agus na ceannaireachta geopholaitiúla a bhfuil gá leo chun na beartais sin a chur chun feidhme; agus (iii) trí straitéis rannpháirtíochta a bheith ann leis an gcuid den tsochaí sa Rúis atá ar son an daonlathais chun bealach a leagan amach don chaidreamh amach anseo le Rúis dhaonlathach;

AY.  de bhrí go measann an Chreimil gur bagairt do chobhsaíocht réimeas an Uachtaráin Putin é Comhpháirtíocht Oirthir AE a bheith rathúil, rachmasach agus daonlathach, mar go bhféadfadh sin inspioráid na ‘cumhachta boige’ a sholáthar don ghnáthdhuine sa Rúis; de bhrí gur chun leasa na dtíortha sin é do ndéanfaí Comhpháirtíocht an Oirthir san Aontas a dhaonlathú agus go bhfuil ríthábhacht ag baint leis sin do dhaonlathú na Rúise amach anseo; de bhrí gurb é fíor-aidhm na Creimile maidir le coinbhleachtaí sa réigiún sin an t-athrú daonlathach a dhídhlisteanú mar mhodh chun cumhacht a aistriú, chun forbairt rathúil na stát sin a chosc, chun míchlú a tharraingt ar an daonlathas liobrálach agus chun córas cumhachta na Rúise féin a onnmhairiú;

AZ.  de bhrí gur cheart don Aontas tabhairt faoi straitéis fhadtéarmach maidir leis an Rúis, bunaithe ar an toimhde gur féidir le muintir na Rúise a dtír a chlaochlú ina tír dhaonlathach – mar a rinne muintir na hÚcráine agus na Bealarúise; de bhrí go mbraithfidh claochlú na Rúise ina daonlathas ar thoilteanas mhuintir na Rúise; de bhrí nach mór don Aontas a bheith ullamh cuidiú le Rúisigh ar mhian leo a bheith ag maireachtáil i dtír dhaonlathach;

BA.  de bhrí gur cheart ról AE mar ghníomhaí domhanda agus inniúlachtaí beartais eachtraigh institiúidí AE a neartú;

1.  á mholadh go ndéanfadh an Chomhairle, an Coimisiún agus Leas-Uachtarán an Choimisiúin / Ardionadaí an Aontais do Ghnóthaí Eachtracha agus don Bheartas Slándála (VP/HR) athbhreithniú, in éineacht leis na Ballstáit, ar bheartas AE maidir leis an Rúis, lena n-áirítear na cúig threoirphrionsabal, agus straitéis chuimsitheach AE i leith na Rúise a fhorbairt bunaithe ar na prionsabail agus na gníomhaíochtaí seo a leanas:

2.  á threorú dá hUachtarán an moladh seo a chur ar aghaidh chuig an gComhairle, chuig an gCoimisiún, chuig Leas-Uachtarán an Choimisiúin / Ardionadaí an Aontais do Ghnóthaí Eachtracha agus don Bheartas Slándála, chuig rialtais agus parlaimintí na mBallstát, chuig rialtais agus parlaimintí thíortha Chomhpháirtíocht an Oirthir agus thíortha G7, chuig Comhairle na hEorpa, chuig an Eagraíocht um Shlándáil agus Comhar san Eoraip, agus chuig Uachtarán, Rialtas agus Parlaimint Chónaidhm na Rúise.

(1) IO C 234, 28.6.2016, lch. 14. (2) IO C 407, 4.11.2016, lch. 74. (3) IO C 263, 25.7.2018, lch. 109. (4) IO C 28, 27.1.2020, lch. 97. (5) IO C 224, 27.6.2018, lch. 58. (6) IO C 23, 21.1.2021, lch. 7. (7) IO C 171, 6.5.2021, lch. 25. (8) IO C 255, 29.6.2021, lch. 54. (9) Téacsanna arna nglacadh, P9_TA(2020)0232. (10) Téacsanna arna nglacadh, P9_TA(2021)0018. (11) Téacsanna arna nglacadh, P9_TA(2021)0159. (12) Téacsanna arna nglacadh, P9_TA(2021)0291.