Il-Parlament Ewropew,

–  wara li kkunsidra l-proposta tal-Kummissjoni lill-Parlament Ewropew u lill-Kunsill (COM(2021)0683 – C9-0404/2021),

–  wara li kkunsidra r-Regolament (UE) 2021/691 tal-Parlament Ewropew u tal-Kunsill tat-28 ta' April 2021 dwar il-Fond Ewropew ta' Aġġustament għall-Globalizzazzjoni għall-Ħaddiema Ssensjati (FEG) u li jħassar ir-Regolament (UE) Nru 1309/2013(1) ("ir-Regolament dwar il-FEG"),

–  wara li kkunsidra r-Regolament tal-Kunsill (UE, Euratom) 2020/2093 tas-17 ta' Diċembru 2020 li jistabbilixxi l-qafas finanzjarju pluriennali għas-snin 2021-2027(2) ("ir-Regolament dwar il-QFP") u b'mod partikolari l-Artikolu 8 tiegħu,

–  wara li kkunsidra l-Ftehim Interistituzzjonali tas-16 ta' Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f'materji baġitarji u dwar ġestjoni finanzjarja tajba kif ukoll dwar riżorsi proprji ġodda, inkluż pjan direzzjonali lejn l-introduzzjoni ta' riżorsi proprji ġodda(3), u b'mod partikolari l-punt 9 tiegħu,

–  wara li kkunsidra l-ittra tal-Kumitat għall-Impjiegi u l-Affarijiet Soċjali,

–  wara li kkunsidra l-ittra tal-Kumitat għall-Iżvilupp Reġjonali,

–  wara li kkunsidra r-rapport tal-Kumitat għall-Baġits (A9-0344/2021),

A.  billi l-Unjoni stabbiliet strumenti leġiżlattivi u baġitarji biex tipprovdi appoġġ addizzjonali lill-ħaddiema li qed ibatu mill-konsegwenzi tal-globalizzazzjoni u mill-bidliet teknoloġiċi u ambjentali, bħall-bidliet fix-xejriet kummerċjali dinjija, it-tilwim kummerċjali, bidliet sinifikanti fir-relazzjonijiet kummerċjali tal-Unjoni jew fil-kompożizzjoni tas-suq intern u kriżijiet finanzjarji jew ekonomiċi, kif ukoll it-tranżizzjoni għal ekonomija b'livell baxx ta' emissjonijiet ta' karbonju, jew bħala konsegwenza tad-diġitalizzazzjoni jew tal-awtomatizzazzjoni;

B.  billi Spanja ppreżentat l-applikazzjoni EGF/2021/004 ES/Aragón automotive għal kontribuzzjoni finanzjarja mill-Fond Ewropew ta' Aġġustament għall-Globalizzazzjoni (FEG), wara li 592 ħaddiem fis-settur tal-ekonomija kklassifikati taħt id-Diviżjoni 29 tan-NACE Reviżjoni 2 (Manifattura ta' vetturi bil-mutur, trejlers u semitrejlers) fir-reġjun NUTS 2 ta' Aragón (ES24) fi Spanja ġew issensjati, f'perjodu ta' referenza għall-applikazzjoni mill-1 ta' Novembru 2020 sal-1 ta' Mejju 2021;

C.  billi l-applikazzjoni hija relatata mal-592 ħaddiem issensjat li l-attività tagħhom waqfet matul il-perjodu ta' referenza f'ħamsin kumpanija(4), filwaqt li 460 ħaddiem ġew issensjati qabel jew wara l-perjodu ta' referenza bħala konsegwenza tal-istess avvenimenti li wasslu għall-waqfien tal-attività tal-ħaddiema ssensjati matul il-perjodu ta' referenza u għalhekk se jitqiesu wkoll bħala benefiċjarji eliġibbli;

D.  billi l-applikazzjoni hija bbażata fuq il-kriterju ta' intervent tal-Artikolu 4(2)(b) tar-Regolament dwar il-FEG, li jirrikjedi l-waqfien mill-attività ta' mill-anqas 200 ħaddiem issensjat fuq perjodu ta' referenza ta' sitt xhur f'intrapriżi li joperaw fl-istess settur ekonomiku definit fid-diviżjoni NACE Reviżjoni 2 u li jinsabu f'reġjun wieħed jew f'żewġ reġjuni kontigwi kif definit fil-livell NUTS 2 fi Stat Membru;

E.  billi l-pandemija tal-COVID-19, il-miżuri stretti ta' lockdown implimentati fit-tieni trimestru tal-2020 fi Spanja(5) u n-nuqqas sussegwenti ta' semikondutturi(6) affettwaw b'mod negattiv is-settur tal-karozzi fil-pajjiż, sabiex matul Jannar-Ġunju 2021, il-produzzjoni ta' vetturi fi Spanja (1,2 miljun unità) kien għadu anqas b'21,6 % mill-produzzjoni fl-istess perjodu tal-2019(7);

F.  billi f'Aragón, is-setturi tal-karozzi jirrappreżentaw 2,42 % tal-impjiegi netti u madwar 6 % tal-PDG reġjonali(8), u l-qgħad irreġistrat issa huwa 26 % ogħla mil-livelli ta' qabel il-pandemija (75 578 persuna li qed ifittxu impjieg f'Ġunju 2021 meta mqabbla mas-60 000 f'Ġunju 2019)(9);

G.  billi l-FEG m'għandux jaqbeż ammont massimu annwali ta' EUR 186 miljun (bi prezzijiet tal-2018), kif stabbilit fl-Artikolu 8 tar-Regolament QFP;

1.  Jaqbel mal-Kummissjoni li l-kundizzjonijiet stabbiliti fl-Artikolu 4(2)(b) tar-Regolament dwar il-FEG ġew issodisfati, u li Spanja hija intitolata għal kontribuzzjoni finanzjarja ta' EUR 1 404 863 fl-ambitu ta' dan ir-Regolament, somma li tirrappreżenta 85 % tal-ispiża totali ta' EUR 1 652 780, u li tinkludi n-nefqa għal servizzi personalizzati ta' EUR 1 600 280 u n-nefqa għall-implimentazzjoni tal-FEG(10) ta' EUR 52 500; jinnota li r-rekwiżiti proċedurali kollha ġew issodisfati;

2.  Jinnota li l-awtoritajiet Spanjoli ppreżentaw l-applikazzjoni fis-26 ta' Lulju 2021, u li l-Kummissjoni ffinalizzat il-valutazzjoni tagħha fit-8 ta' Novembru 2021 u nnotifikat lill-Parlament biha fl-istess jum;

3.  Jinnota li l-applikazzjoni b'kollox hija relatata ma' 1 052 ħaddiem li ngħataw is-sensja fis-settur tal-karozzi fi Spanja; jesprimi dispjaċir għall-fatt li Spanja tistenna li 320 biss mill-benefiċjarji eliġibbli kollha se jipparteċipaw fil-miżuri (benefiċjarji fil-mira); iħeġġeġ lill-awtoritajiet lokali biex jimmotivaw b'mod aktar proattiv lill-persuni ssensjati biex jieħdu sehem fl-azzjonijiet proposti;

4.  Jindika li terz tal-benefiċjarji fil-mira huma nisa (34,1 %) u kważi 40 % għandhom aktar minn 54 sena (39,7 %);

5.  Ifakkar li l-impatti soċjali tas-sensji huma mistennija li jkunu konsiderevoli għall-ekonomija ta' Aragón, fejn 60 % tal-persuni li qed ifittxu impjieg huma nisa u 49 % tal-persuni kollha li qed ifittxu impjieg għandhom aktar minn 50 sena(11); jesprimi dispjaċir, għalhekk, għall-fatt li s-sensji se jaffettwaw b'mod partikolari żewġ kategoriji ta' ħaddiema li diġà huma fi żvantaġġ fis-suq tax-xogħol reġjonali;

6.  Jinnota li Spanja bdiet toffri servizzi personalizzati lill-benefiċjarji fil-mira fil-15 ta' Ottubru 2021 u li għaldaqstant, il-perjodu ta' eliġibilità għal kontribuzzjoni finanzjarja mill-FEG se jkun mill-15 ta' Ottubru 2021 sa 24 xahar wara d-data tad-dħul fis-seħħ tad-deċiżjoni ta' finanzjament;

7.  Ifakkar li s-servizzi personalizzati li għandhom jiġu pprovduti lill-ħaddiema u lill-persuni li jaħdmu għal rashom jikkonsistu fl-azzjonijiet li ġejjin: sessjonijiet ġenerali ta' informazzjoni u ta' merħba, gwida okkupazzjonali, assistenza intensiva fit-tfittix ta' impjieg, taħriġ orizzontali, ta' taħriġ mill-ġdid u ta' titjib tal-ħiliet, kif ukoll inċentivi monetarji; iħeġġeġ lill-awtoritajiet jagħmlu enfasi akbar fuq programmi u azzjonijiet imfassla bil-ħsieb tal-interessi tan-nisa, peress li 34,1 % tal-benefiċjarji fil-mira huma nisa;

8.  Jinnota li l-miżuri ppjanati għandhom jiġu implimentati f'konformità mal-Istrateġija Spanjola dwar l-Ekonomija Ċirkolari bbażata fuq ċikli ta' materjal mhux tossiku u li l-miżuri ta' taħriġ għandhom jindirizzaw ir-rekwiżit tat-tixrid tal-ħiliet meħtieġa fl-era industrijali diġitali u f'ekonomija effiċjenti fir-riżorsi, skont l-Artikolu 7(2) tar-Regolament dwar il-FEG;

9.  Jinnota li Spanja bdiet iġġarrab in-nefqa amministrattiva sabiex timplimenta l-FEG fl-1 ta' Ottubru 2021 u li għaldaqstant, in-nefqa fuq attivitajiet ta' tħejjija, ta' ġestjoni, ta' informazzjoni u ta' pubbliċità, ta' kontroll u ta' rapportar se tkun eliġibbli għal kontribuzzjoni finanzjarja mill-FEG mill-1 ta' Ottubru 2021 sa 31 xahar wara d-data tad-dħul fis-seħħ tad-deċiżjoni ta' finanzjament;

10.  Jilqa' l-fatt li l-pakkett ikkoordinat ta' servizzi personalizzati ġie mfassal f'konsultazzjoni mas-sħab soċjali (UGT(12), CCOO(13), CEPYME(14) u CEOE(15));

11.  Jisħaq fuq il-fatt li l-awtoritajiet Spanjoli kkonfermaw li l-azzjonijiet eliġibbli ma jirċevux assistenza minn fondi jew strumenti finanzjarji oħra tal-Unjoni;

12.  Itenni li l-assistenza mill-FEG ma tridx tissostitwixxi azzjonijiet li huma r-responsabbiltà ta' kumpaniji, skont il-leġiżlazzjoni nazzjonali jew il-ftehimiet kollettivi, jew kwalunkwe allowance jew dritt tal-benefiċjarji tal-allokazzjoni tal-FEG biex tiġi żgurata l-addizzjonalità sħiħa tal-allokazzjoni;

13.  Japprova d-deċiżjoni annessa ma' din ir-riżoluzzjoni;

14.  Jagħti istruzzjonijiet lill-President tiegħu biex jiffirma din id-deċiżjoni flimkien mal-President tal-Kunsill u biex jiżgura li tiġi ppubblikata f'Il-Ġurnal Uffiċjali tal-Unjoni Ewropea;

15.  Jagħti istruzzjonijiet lill-President tiegħu biex jgħaddi din ir-riżoluzzjoni, flimkien mal-anness tagħha, lill-Kunsill u lill-Kummissjoni.

(1) ĠU L 153, 3.5.2021, p. 48. (2) ĠU L 433 I, 22.12.2020, p. 11. (3) ĠU L 433 I, 22.12.2020, p. 28. (4) Adieconti S.L., Lear Corporation Asientos S.L., Adient Automotive S.L., Lecitrailer Post Venta Zaragoza S.L., Adient Seating Spain S.L., Lecitrailer S.A., Af Aftermarket Iberica S.L. , Magna Automotive Spain S.A.U., Android Industries Zaragoza S.L., Mahle Behr Spain S.A., Arcelormital Tailored Blanks Zaragoza S.L., Majorel Sp Solutions S.A.U, Carrocerías Moncayo S.L., Mann-Hummel Iberica S.A., Carrocerías Vicam S.L., Modulos Ribera Alta S.L.U., Carrocerías Vicente Salomon Sanz S.L., Opel España S.L.U., Casting Ros S.A., Proma Hispania S.A.Ad, Celulosa Fabril S.A., Remolques Jalon S.L., Cooper Estándar Automotive España Slu, Rhenus Automotive Systems Zaragoza, Copo Aragón S.L.U., Rigual S.A., Copo Zaragoza S.A., Ronal Iberica S.A. Unipersonal, Dana Automoción S.A., Schmitz Cargobull Iberica S.A., Faurecia Automotive España S.A., Seguridad De Servicio Movil S.L., Faurecia Sistemas de Escape, Talleres Emilio Montañes S.A., Flexngate Aragón S.L., Ti Group Automotive Systems S.A., Gestamp Aragón S.A., Traf Automotions S.L., Gestamp Manufacturing Autochasis S.L., Tristone Flowtech Spain S.A., Icer Brakes S.A., Union Tecnológica del Automóvil S.L., Ilunion Servicios Industriales Aragón S.L., Valeo Térmico S.A., Ilunion Servicios Industriales S.L., Zanini Epila S.L., Insonorizantes Pelzer S.A., ZF-Aftermarket Ibérica SL., Kdk-Dongkook Automotive Spain S.A., u Zfoam España SL. (5) Skont id-data minn Confemetal u Anfac, il-pandemija kellha impatt sinifikanti fuq l-attività u fuq il-fatturat tal-intrapriżi li joperaw fis-settur tal-karozzi fi Spanja, u dan irriżulta fi tnaqqis fil-bejgħ (32,3 %), fil-produzzjoni (18,9 %), u fil-fatturat (11,3 %) fl-2020 meta mqabbel mal-2019: https://anfac.com/wp-content/uploads/2021/07/Informe-Anual-ANFAC-2020.pdf (6) Fil-bidu tal-2021, il-kriżi taċ-ċipep kienet mistennija li twassal għal telf ta' madwar EUR 60 biljun fis-settur tal-karozzi. Iċ-ċifra ġiet riveduta 'l fuq għal aktar minn EUR 90 biljun: https://www.consultancy.eu/news/6273/global-chip-shortage-costs-automotive-sector-90-billion (7) https://cincodias.elpais.com/cincodias/2021/07/22/companias/1626961844_041144.html (8) https://caaragon.com/ (9) https://www.facebook.com/GobAragon/posts/6537004519658572 (10) F'konformità mal-Artikolu 7(5) tar-Regolament dwar il-FEG. (11) http://www.aragon.es/iaest (Qgħad irreġistrat, Ġunju 2021) (12) http://www.ugt.es (13) https://www.ccoo.es (14) https://www.cepyme.es (15) https://www.ceoe.es

DEĊIŻJONI TAL-PARLAMENT EWROPEW U TAL-KUNSILL

dwar il-mobilizzazzjoni tal-Fond Ewropew ta' Aġġustament għall-Globalizzazzjoni għall-Ħaddiema Ssensjati wara applikazzjoni minn Spanja – FEG/2021/004 ES/Aragón automotive

(It-test ta' dan l-anness mhux riprodott hawnhekk billi jikkorrispondi mal-att finali, id-Deċiżjoni (UE) 2022/50.)