Il-Parlament Ewropew,

–  wara li kkunsidra s-66 sessjoni tal-Kummissjoni tan-NU dwar l-Istatus tan-Nisa u t-tema prijoritarja tagħha favur il-kisba tal-ugwaljanza bejn il-ġeneri u t-tisħiħ tal-pożizzjoni tan-nisa u l-bniet kollha fil-kuntest tal-politiki u tal-programmi b'rabta mat-tibdil fil-klima, l-ambjent u t-tnaqqis tar-riskju ta' diżastri, u l-abbozz ta' konklużjonijiet tagħha,

–  wara li kkunsidra d-Dikjarazzjoni u l-Pjattaforma ta' Azzjoni ta' Beijing tal-15 ta' Settembru 1995 u l-eżiti tal-konferenzi ta' rieżami tagħha,

–  wara li kkunsidra l-Konvenzjoni tan-NU tal-1979 dwar l-Eliminazzjoni ta' Kull Forma ta' Diskriminazzjoni kontra n-Nisa,

–  wara li kkunsidra l-Artikoli 21 u 23 tal-Karta tad-Drittijiet Fundamentali tal-Unjoni Ewropea,

–  wara li kkunsidra l-Aġenda 2030 tan-NU għall-Iżvilupp Sostenibbli, il-prinċipju li "ħadd ma jitħalla jibqa' lura" u, b'mod partikolari, l-Għan ta' Żvilupp Sostenibbli (SDG) 1 li jfittex li jintemm il-faqar, l-SDG 3 li jfittex li jiġi żgurat li n-nies ikunu jistgħu jgħixu f'saħħithom, l-SDG 5 li jfittex li tinkiseb l-ugwaljanza bejn il-ġeneri u jittejbu l-kundizzjonijiet tal-għajxien għan-nisa, l-SDG 8 li jfittex li jinkiseb tkabbir sostenibbli u ekonomiku, u l-SDG 13 li jfittex li tittieħed azzjoni urġenti biex jiġu miġġielda t-tibdil fil-klima u l-impatti tiegħu,

–  wara li kkunsidra l-Ftehim adottat fil-21 Konferenza tal-Partijiet (COP21) għall-Konvenzjoni Qafas tan-Nazzjonijiet Uniti dwar it-Tibdil fil-Klima (UNFCCC) li saret f'Pariġi fit-12 ta' Diċembru 2015 (il-Ftehim ta' Pariġi),

–  wara li kkunsidra r-riżoluzzjoni tiegħu tal-24 ta' Ġunju 2021 dwar il-25 anniversarju tal-Konferenza Internazzjonali dwar il-Popolazzjoni u l-Iżvilupp (ICPD25) (is-Summit ta' Nairobi)(1),

–  wara li kkunsidra r-riżoluzzjoni tiegħu tas-16 ta' Jannar 2018 dwar in-nisa, l-ugwaljanza bejn il-ġeneri u l-ġustizzja klimatika(2),

–  wara li kkunsidra r-riżoluzzjoni tiegħu tat-23 ta' Ottubru 2020 dwar l-Ugwaljanza bejn il-Ġeneri fil-politika estera u ta' sigurtà komuni tal-UE(3),

–  wara li kkunsidra l-Pjan ta' Azzjoni tal-UE dwar l-ugwaljanza bejn il-ġeneri u l-Għoti tas-Setgħa lin-Nisa fl-azzjoni esterna tal-UE 2021–2025 (GAP III),

–  wara li kkunsidra l-Istrateġija tal-UE dwar l-Ugwaljanza bejn il-Ġeneri għall-2020–2025 tal-5 ta' Marzu 2020,

–  wara li kkunsidra r-riżoluzzjoni tiegħu tal-24 ta' Ġunju 2021 dwar is-sitwazzjoni tas-saħħa sesswali u riproduttiva u d-drittijiet relatati fl-UE, fil-kuntest tas-saħħa tan-nisa(4),

–  wara li kkunsidra l-konklużjonijiet dwar il-ġeneru u t-tibdil fil-klima adottati fis-26 Konferenza tal-Partijiet (COP26) għall-UNFCCC li saret fi Glasgow mill-31 ta' Ottubru sas-6 ta' Novembru 2021,

–  wara li kkunsidra l-Artikolu 157(4) tat-Trattat dwar il-Funzjonament tal-Unjoni Ewropea,

–  wara li kkunsidra l-Artikolu 132(2) tar-Regoli ta' Proċedura tiegħu,

A.  billi l-ugwaljanza bejn l-irġiel u n-nisa hija prinċipju fundamentali tal-UE minqux fit-Trattat dwar l-Unjoni Ewropea u fil-Karta tad-Drittijiet Fundamentali; billi l-integrazzjoni tal-perspettiva tal-ġeneri hija għalhekk għodda importanti fl-integrazzjoni ta' dan il-prinċipju fil-politiki, il-miżuri u l-azzjonijiet kollha tal-UE, inkluża l-azzjoni esterna;

B.  billi 189 gvern madwar id-dinja, inklużi l-Unjoni Ewropea u l-Istati Membri tagħha, impenjaw ruħhom li jaħdmu favur l-ugwaljanza bejn il-ġeneri u t-tisħiħ tal-pożizzjoni tan-nisa u l-bniet kollha fir-Raba' Konferenza Dinjija dwar in-Nisa li saret f'Beijing fl-1995;

C.  billi l-Pjattaforma ta' Azzjoni ta' Beijing tal-1995 iddefiniet b'mod ċar ir-rabta bejn il-ġeneru, l-ambjent u l-iżvilupp sostenibbli, u affermat li n-nisa għandhom rwol strateġiku fl-iżvilupp ta' xejriet ta' konsum u ta' produzzjoni sostenibbli u li jirrispettaw l-ambjent, u li hemm bżonn li jipparteċipaw fuq bażi ugwali fit-teħid ta' deċiżjonijiet dwar l-ambjent fil-livelli kollha;

D.  billi l-SDGs jirrikonoxxu r-rabta bejn il-kisba tal-ugwaljanza bejn il-ġeneri u l-SDGs kollha, inkluż l-SDG 13 dwar it-tibdil fil-klima, filwaqt li jipprevedu l-possibbiltà li jiġu indirizzati l-kawżi ewlenin tal-inugwaljanzi bejn il-ġeneri u b'hekk tissaħħaħ ir-reżiljenza tan-nisa għat-tibdil fil-klima;

E.  billi l-inugwaljanza bejn il-ġeneri, flimkien mal-kriżijiet u d-diżastri klimatiċi u ambjentali, hija waħda mill-akbar sfidi ta' żminijietna, b'dimensjoni transfruntiera li taffettwa l-pjaneta kollha u li għandha impatti sproporzjonati fuq in-nisa, fid-diversità kollha tagħhom, speċjalment dawk li jiffaċċjaw diskriminazzjoni intersezzjonali, f'sitwazzjonijiet ta' emarġinazzjoni u f'kuntesti ta' kunflitt;

F.  billi n-nisa, fid-diversità kollha tagħhom, jinsabu f'sitwazzjoni aktar vulnerabbli u jiffaċċjaw riskji u piżijiet akbar mill-effetti tat-tibdil fil-klima u d-diżastri ambjentali u naturali għal diversi raġunijiet, li jvarjaw mill-aċċess inugwali tagħhom għar-riżorsi, l-edukazzjoni, l-opportunitajiet ta' impjieg u d-drittijiet tad-dominju ta' art, għal normi soċjali u kulturali prevalenti u l-esperjenzi differenti tagħhom ta' diskriminazzjoni intersezzjonali;

G.  billi l-kriżi bla preċedent ikkawżata mill-pandemija tal-COVID-19 u l-effetti multidimensjonali tagħha fuq is-soċjetà, inkluża ż-żieda fl-inugwaljanzi soċjali u bejn il-ġeneri preeżistenti, jista' jkollhom impatt negattiv fuq l-implimentazzjoni ta' azzjoni klimatika effettiva u reattiva għal kwistjonijiet ta' ġeneru;

H.  billi t-tibdil fil-klima qed iseħħ madwar id-dinja kollha iżda għandu impatt akbar fuq il-pajjiżi u l-komunitajiet li huma l-inqas responsabbli għat-tisħin globali; billi dawk b'inqas riżorsi finanzjarji meħtieġa biex jadattaw se jkunu dawk li jintlaqtu l-agħar u li se jbatu l-aktar mill-impatti tat-tibdil fil-klima;

I.  billi t-tibdil fil-klima jikkawża żieda fl-ispostament furzat peress li n-nies ikunu mġiegħla jħallu djarhom temporanjament jew b'mod permanenti meta l-ambjent ma jibqax adatt biex jgħixu fih; billi bħala medja mill-2010 'l hawn, l-għadd ta' persuni li ġew spostati kull sena minħabba diżastri relatati mal-klima kien ta' 21,5 miljun; billi skont iċ-ċifri tan-NU, in-nisa u l-bniet jirrappreżentaw 80 % tal-persuni spostati minħabba t-tibdil fil-klima u dawk l-aktar affettwati mit-temperaturi estremi u d-diżastri naturali;

J.  billi l-effetti avversi tat-tibdil fil-klima u r-riperkussjonijiet negattivi tagħhom fuq is-sitwazzjoni soċjoekonomika jistgħu jwasslu għal ksur serju tad-drittijiet bażiċi tan-nisa u tal-bniet, speċjalment għal persuni spostati internament, migranti u persuni li jfittxu ażil, bħal riskji akbar ta' vjolenza sesswali u vjolenza abbażi tal-ġeneru, sfruttament u traffikar tal-bnedmin, żwiġijiet furzati, teħid furzat tal-organi u impatti li jirriżultaw minn aċċess limitat għall-kura tas-saħħa, inklużi servizzi tas-saħħa riproduttiva u mentali;

K.  billi l-ugwaljanza bejn il-ġeneri u d-drittijiet tan-nisa huma drittijiet tal-bniedem u prerekwiżit għall-iżvilupp sostenibbli, il-ġestjoni effiċjenti tal-isfidi klimatiċi, il-paċi u l-istabbiltà ambjentali u għall-kisba ta' tranżizzjoni ekwa u ġusta fejn ħadd ma jitħalla jibqa' lura; billi l-azzjonijiet klimatiċi kollha jridu jinkludu perspettivi tal-ġeneru u intersezzjonali u jiżguraw parteċipazzjoni ugwali tan-nisa, fid-diversità kollha tagħhom, fil-korpi tat-teħid tad-deċiżjonijiet fil-livelli kollha;

L.  billi l-parteċipazzjoni inugwali tan-nisa fil-proċessi tat-teħid tad-deċiżjonijiet u fis-swieq tax-xogħol iżżid l-inugwaljanzi u spiss ma tippermettix li n-nisa jikkontribwixxu b'mod sħiħ għat-tfassil tal-politika, l-ippjanar u l-implimentazzjoni relatati mat-tibdil fil-klima u r-riskji ambjentali u ta' diżastri, u li jipparteċipaw fihom;

M.  billi tranżizzjoni ġusta reattiva għal kwistjonijiet ta' ġeneru għandha l-potenzjal li toħloq impjiegi deċenti għan-nisa; billi n-nisa għadhom jiffaċċjaw ostakli strutturali u kulturali għall-parteċipazzjoni fl-aspetti kollha tat-twettiq tat-tranżizzjoni enerġetika u klimatika; billi f'termini ta' impjiegi, is-settur tal-enerġija għadu wieħed mis-setturi tal-ekonomija fil-livell dinji bl-akbar żbilanċ bejn il-ġeneri;

N.  billi n-nisa, speċjalment il-ġenituri waħedhom, dawk li jesperjenzaw diskriminazzjoni intersezzjonali u dawk li jaqbżu l-età tal-irtirar, huma affettwati b'mod sproporzjonat kemm mit-tibdil fil-klima kif ukoll mill-faqar; billi n-nisa, fid-diversità kollha tagħhom, għandhom ukoll probabbiltà akbar li jesperjenzaw il-faqar enerġetiku f'xi punt f'ħajjithom; billi t-tranżizzjoni ekoloġika għandha tqis ukoll id-dimensjonijiet soċjali u tal-ġeneru;

O.  billi ħafna azjendi agrikoli żgħar huma proprjetà ta' nisa li se jiġu affettwati b'mod sproporzjonat mit-tibdil fil-klima u eventi ta' temp aktar estremi, li jwasslu għal nuqqas ta' ikel u ilma u jagħmluhom aktar suxxettibbli għall-malnutrizzjoni;

P.  billi l-Ftehim ta' Pariġi jistabbilixxi li l-Partijiet għalih għandhom, fost affarijiet oħra, jikkunsidraw l-obbligi rispettivi tagħhom fir-rigward tad-drittijiet tal-bniedem u l-ugwaljanza bejn il-ġeneri, meta jieħdu azzjoni biex jindirizzaw it-tibdil fil-klima bħala parti mill-implimentazzjoni tal-Ftehim;

Q.  billi n-nisa jeħtieġ li jkollhom rwoli aktar b'saħħithom fl-ambitu tat-tibdil fil-klima bħala mexxejja, rappreżentanti eletti, professjonisti u aġenti tekniċi tal-bidla; billi n-nisa għadhom sottorappreżentati fil-korpi tat-teħid tad-deċiżjonijiet dwar it-tibdil fil-klima fil-livell nazzjonali fl-Istati Membri tal-UE u fil-livell tal-UE, inkluż il-Parlament Ewropew, u fil-livell dinji jirrappreżentaw biss 32 % tal-forza tax-xogħol tal-enerġija rinnovabbli(5);

R.  billi d-dimensjoni tal-ġeneru tat-tibdil fil-klima hija rikonoxxuta fl-Strateġija tal-UE dwar l-Ugwaljanza bejn il-Ġeneri għall-2020–2025; billi l-GAP III jinkludi, għall-ewwel darba, qasam ta' prijorità dwar it-tibdil fil-klima u l-ambjent; billi l-politika tal-UE dwar it-tibdil fil-klima jista' jkollha impatt sinifikanti fuq il-protezzjoni tad-drittijiet tal-bniedem u l-promozzjoni ta' politiki dwar it-tibdil fil-klima reattivi għal kwistjonijiet ta' ġeneru fil-livell dinji;

Kisba tal-ugwaljanza bejn il-ġeneri u t-tisħiħ tal-pożizzjoni tan-nisa u tal-bniet kollha fil-kuntest tal-politiki u l-programmi dwar it-tibdil fil-klima, l-ambjent u t-tnaqqis tar-riskju ta' diżastri

1.  Jindirizza r-rakkomandazzjonijiet li ġejjin lill-Kunsill:

o
o   o

2.  Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà, u lir-Rappreżentant Speċjali tal-UE għad-Drittijiet tal-Bniedem.

(1) Testi adottati, P9_TA(2021)0315. (2) ĠU C 458, 19.12.2018, p. 34. (3) ĠU C 404, 6.10.2021, p. 202. (4) Testi adottati, P9_TA(2021)0314. (5) Briefing tal-EPRS, Beijing Platform for Action: 25-year review and future priorities (Pjattaforma ta' Azzjoni ta' Beijing: rieżami tal-25 sena u l-prijoritajiet għall-futur), 27 ta' Frar 2020, disponibbli fuq: https://www.europarl.europa.eu/thinktank/mt/document.html?reference=EPRS_BRI(2020)646194