Tá Parlaimint na hEorpa,

–  ag féachaint do Theidil II, III agus V den Chonradh ar an Aontas Eorpach (CAE) agus don ghealltanas a leagtar síos sa bhrollach chun Comhbheartas Eachtrach agus Slándála a chur chun feidhme, agus go háirithe d’Airteagail 10(1) agus (2), 13(2), 14(1), 16(1), 24(1), 26, 36, 41, 42(2), (3), (6) agus (7), 44, 45 agus 46 agus Prótacal Uimh. 10 de,

–  ag féachaint don phlean gníomhaíochta ‘Strategic Compass for Security and Defence – For a European Union that protects its citizens, values and interests and contributes to international peace and security’ [Compás Straitéiseach um Shlándáil agus Cosaint — I gcás Aontas Eorpach a chosnaíonn a shaoránaigh, a luachanna agus a leasanna agus a rannchuidíonn leis an tsíocháin agus leis an tslándáil idirnáisiúnta], a d’fhormheas an Chomhairle an 21 Márta 2022 agus a d’fhormhuinigh an Chomhairle Eorpach an 25 Márta 2022,

–  ag féachaint do Dhearbhú Versailles ó Chinn Stáit nó Rialtais an Aontais an 11 Márta 2022,

–  ag féachaint do theachtaireacht chomhpháirteach ón gCoimisiún agus ó Ardionadaí an Aontais do Ghnóthaí Eachtracha agus don Bheartas Slándála an 18 Bealtaine 2022 dar teideal ‘Anailís ar Bhearnaí Infheistíochta i Réimse na Cosanta agus an Bealach Chun Tosaigh’ (JOIN(2022)0024),

–  ag féachaint do rún uaithi an 17 Feabhra 2022 dar teideal ‘Cur chun feidhme an Chomhbheartais Eachtraigh agus Slándála – tuarascáil bhliantúil 2021’(1),

–  ag féachaint do rún uaithi an 17 Feabhra 2022 dar teideal ‘Cur chun feidhme an Chomhbheartais Slándála agus Cosanta – tuarascáil bhliantúil 2021’(2),

–  ag féachaint do theachtaireacht ón gCoimisiún an 15 Feabhra 2022 dar teideal Commission contribution to European defence [Rannchuidiú an Choimisiúin do chosaint na hEorpa] (COM(2022)0060),

–  ag féachaint do Chinneadh ón gComhairle an 22 Márta 2021, lena mbunaítear Saoráid Eorpach Síochána agus lena n-aisghairtear Cinneadh (CBES) 2015/528(3),

–  ag féachaint do rún uaithi an 16 Márta 2017 dar teideal ‘Na himpleachtaí bunreachtúla, dlíthiúla agus institiúideacha atá ag comhbheartas slándála agus cosanta: deiseanna atá ar fáil trí Chonradh Liospóin’(4),

–  ag féachaint do rún uaithi an 7 Aibreán 2022 maidir leis na conclúidí ó chruinniú na Comhairle Eorpaí an 24-25 Márta 2022, lena n-áirítear na forbairtí is déanaí maidir leis an gcogadh i gcoinne na hÚcráine agus smachtbhannaí AE i gcoinne na Rúise agus a gcur chun feidhme(5),

–  ag féachaint do rún uaithi an 24 Márta 2022 maidir leis an ngá atá le plean gníomhaíochta práinneach AE chun slándáil bia a áirithiú laistigh agus lasmuigh de AE i bhfianaise ionradh na Rúise ar an Úcráin(6),

–  ag féachaint do rún uaithi an 1 Márta 2022 maidir le hionsaí na Rúise i gcoinne na hÚcráine(7),

–  ag féachaint do na ráitis maidir leis an Úcráin ó cheannairí Pharlaimint na hEorpa an 16 agus an 24 Feabhra 2022,

–  ag féachaint don tuarascáil ar thoradh deiridh na Comhdhála maidir le Todhchaí na hEorpa i mí na Bealtaine 2022,

–  ag féachaint don ráiteas ó Chruinniú Mullaigh na Bruiséile, a d’eisigh na Cinn Stáit agus Rialtais a bhí rannpháirteach i gcruinniú Chomhairle an Atlantaigh Thuaidh sa Bhruiséil an 14 Meitheamh 2021,

–  ag féachaint d’anailís agus do Mholtaí an Meitheal Mhachnaimh arna cheapadh ag Ardrúnaí ECAT an 25 Samhain 2020 dar teideal ‘NATO 2030: United for a New Era’ [EACT 2030: Aontaithe le haghaidh Ré Nua’],

–  ag féachaint do na rúin a ghlac Comhthionól Ginearálta na Náisiún Aontaithe an 2 Márta 2022 maidir leis an ionsaí i gcoinne na hÚcráine, an 24 Márta 2022 maidir le hiarmhairtí daonnúla an ionsaí i gcoinne na hÚcráine, agus an 7 Aibreán 2022 maidir le cearta ballraíochta Chónaidhm na Rúise sa Chomhairle um Chearta an Duine a chur ar fionraí,

–  ag féachaint don Chomhaontú Comhlachais idir an tAontas Eorpach agus a Bhallstáit, de pháirt, agus an Úcráin, den pháirt eile(8), lena n-áirítear comhaontú domhain cuimsitheach saorthrádála, a tháinig i bhfeidhm an 1 Meán Fómhair 2017,

–  ag féachaint do na cinntí a ghlac an Chomhairle maidir le bearta sriantacha AE i gcoinne na Rúise mar gheall ar a cogadh san Úcráin,

–  ag féachaint don Chomhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile(9) (an Comhaontú Trádála agus Comhair idir an tAontas Eorpach agus an Ríocht Aontaithe),

–  ag féachaint do Riail 118 dá Rialacha Nós Imeachta,

–  ag féachaint don tuarascáil ón gCoiste um Ghnóthaí Eachtracha (A9-0164/2022),

A.  de bhrí gurb ionann ionsaí míleata gan ábhar agus gan údar Chónaidhm na Rúise i gcoinne na hÚcráine, tar éis ionradh na Rúise ar an tSeoirsia in 2008 agus gníomhaíochtaí ionsaitheacha eile ar fud an domhain, agus sárú follasach ar an dlí idirnáisiúnta, ar Chairt na Náisiún Aontaithe agus ar na prionsabail a chumhdaítear in Ionstraim Chríochnaitheach Heilsincí 1975 agus Meabhrán Bhúdaipeist 1994 agus Cairt Pháras le haghaidh Eoraip Nua an 21 Samhain 1990, agus go mbaineann sí an bonn go mór ó shlándáil agus ó chobhsaíocht na hEorpa agus an domhain;

B.  de bhrí nár chomhlíon Cónaidhm na Rúise an t-ordú a d’eisigh an Chúirt Bhreithiúnais Idirnáisiúnta an 16 Márta 2022 ag iarraidh go haonchiallach ar an Rúis a cuid oibríochtaí míleata a chur ar fionraí láithreach agus a áirithiú nach ndéanfaidh aon aonaid armtha mhíleata nó neamhrialta a bhféadfadh sí a bheith i gceannas orthu nó ag tacú leo, chomh maith le haon eagraíochtaí agus daoine a d’fhéadfadh a bheith faoina rialú nó faoina ceannas, aon bhearta chun na hoibríochtaí míleata atá ann cheana a chur chun cinn;

C.  de bhrí gurb ionann ionradh na Rúise ar an Úcráin agus ionsaí ar an ord síochána Eorpach féin agus, ar an gcaoi sin, go bhfuil sé mar bhagairt ar an mbonn sin ar ar tógadh beartas eachtrach, slándála agus cosanta an Aontais; de bhrí go n-éilíonn iarrachtaí leanúnacha na Rúise éagobhsaíocht a chruthú i gcomharsanacht an Aontais agus ar fud an domhain agus an bonn a bhaint den ordú slándála Eorpach, go n-éilíonn siad ar an Aontas comhtháthú agus éifeachtacht a beartais eachtraigh, slándála agus cosanta a fheabhsú go substaintiúil agus go diongbháilte;

D.  de bhrí go bhfuair na mílte Úcránach bás sa chogadh a d’fhear Cónaidhm na Rúise i gcoinne phobal na hÚcráine ó 2014; de bhrí gur gortaíodh na mílte agus go raibh ar breis is 10 milliún daoine a dtithe a fhágáil nó gur theith siad chuig tíortha comharsanachta;

E.  de bhrí go bhfuil fórsaí armtha na Rúise ag déanamh ionsaí le sliogáin d’aon ghnó agus as éadan ar bhonneagar sibhialta, lena n-áirítear tithe agus tearmainn, naíonraí, scoileanna, ospidéil, saoráidí éigeandála agus cúraim agus stáisiúin traenach agus bus;

F.  de bhrí, de réir Ard-Choimisinéir na Náisiún Aontaithe um Chearta an Duine, go bhfuil na hionsaithe sin ina gcúis le fulaingt as cuimse an duine agus gurb ionann iad agus coireanna cogaidh agus coireanna in aghaidh an chine dhaonna; de bhrí gur coireanna uafásacha cogaidh iad céasadh agus dúnmharú sibhialtach agus líon méadaitheach na dtuarascálacha ar gháinneáil ar dhaoine, ar fhoréigean gnéasach, ar dhúshaothrú, ar éigniú agus ar mhí-úsáid a mbíonn ar mhná agus ar leanaí cur suas leo, ar coireanna iad nach mór a imscrúdú agus a dhoiciméadú go práinneach ionas gur féidir déantóirí na coire a thriail; de bhrí go bhfuil imscrúdú idirnáisiúnta ar na coireanna a rinneadh in Bucha fós ar siúl; de bhrí go bhféadfadh ionradh na hÚcráine a bheith ina choir ionsaithe mar a shainmhínítear in Airteagal 8ú de Reacht na Róimhe den Chúirt Choiriúil Idirnáisiúnta agus go bhfreagraíonn na hainghníomhartha a rinne arm na Rúise agus a seachvótálaithe don sainmhíniú ar chinedhíothú atá i gCoinbhinsiún NA 1948; de bhrí nach mór cinnteoirí agus déantóirí coireanna a chur faoi bhráid an cheartais choiriúil idirnáisiúnta;

G.  de bhrí go bhfuil ionradh na Rúise ar an Úcráin tar éis cogadh a thabhairt ar ais san Eoraip agus de bhrí nach mór dúinne san Aontas Eorpach leas a bhaint as ár ndiongbháilteacht agus ár rúndaingne uile chun an tAontas seo agus na luachanna agus na prionsabail a seasann sé dó a chosaint, lena n-áirítear prionsabal na sláine críche, na ceannasachta náisiúnta agus an oird idirnáisiúnta riailbhunaithe;

H.  de bhrí gur spreag an mhainneachtain freagairt leormhaith a thabhairt ar ionsaithe na Rúise i gcoinne na Seoirsia in 2008 agus i gcoinne na hÚcráine in 2014 don Rúis leanúint d’fheachtais ionsaitheacha mhíleata agus pholaitiúla, lena n-áirítear ionradh iomlán ar an Úcráin, agus ar an gcaoi sin an t-ord idirnáisiúnta riailbhunaithe agus an chobhsaíocht san Eoraip agus in áiteanna eile a lagú agus an bonn a bhaint de;

I.  de bhrí gurb é an sprioc straitéiseach atá ag an domhan saor cabhrú leis an Úcráin dul i ngleic le hionsaitheoir na Rúise agus smacht a fháil arís ar a críoch a aithnítear go hidirnáisiúnta;

J.  de bhrí go bhfuil cogadh ionsaithe Chónaidhm na Rúise i gcoinne na hÚcráine agus an t-ionsaí a rinne sí ar ord síochána na hEorpa ag tarlú i gcomhthéacs an chúlra de dhiansmacht ar an tsochaí shibhialta agus ar an bhfreasúra polaitiúil sa Rúis, arb é is aidhm dó a áirithiú go mairfidh réimeas atá ag éirí níos ollsmachtaí de réir a céile;

K.  de bhrí, thar aon ní eile, gur oibleagáid ar dhaonlathais na hEorpa go léir é an Eoraip a chosaint; de bhrí nach mór an oibleagáid sin a mheaitseáil le spriocanna cumais airgeadais agus míleata leordhóthanacha; de bhrí go bhfuil rún daingean ag an Aontas a chuid a dhéanamh chun cur i gcoinne iarrachtaí Chónaidhm na Rúise bonn na slándála agus na cobhsaíochta idirnáisiúnta a scriosadh, lena n-áirítear i ndlúthchomhar le ECAT, bunchloch chosaint chomhchoiteann a chomhaltaí; de bhrí gur thíolaic an Fhionlainn agus an tSualainn a n-iarratais chun dul isteach in ECAT go hoifigiúil an 18 Bealtaine 2022; de bhrí go bhfuil sé tábhachtach go ndaingneoidh comhghuaillithe uile ECAT prótacail aontachais na Fionlainne agus na Sualainne go pras; de bhrí go bhfuil drogall ar an Tuirc fáilte a chur roimh iarratais na Fionlainne agus na Sualainne dul isteach in ECAT; de bhrí go bhfuil Airteagal 42(7) CAE fós ina ghné thábhachtach d’ailtireacht slándála na hEorpa, lena gcuirtear tacaíocht agus cosaint ar fáil do Bhallstáit uile AE; de bhrí go bhfuil a buíochas ó chroí curtha in iúl ag an bParlaimint as cúnamh agus comhar athnuaite na SA maidir le cosaint chríochach na hEorpa a chosaint agus a sholáthar;

L.  de bhrí go bhfuil ceart bunúsach féinchosanta ag an Úcráin faoi Airteagal 51 de Chairt na Náisiún Aontaithe; de bhrí go molann an Pharlaimint muintir na hÚcráine as a gcrógacht i dtaca lena dtír agus ár luachanna comhroinnte, eadhon saoirse agus daonlathas, a chosaint agus nach bhfágfaidh sí ina n-aonar iad;

M.  de bhrí gur iarr an Pharlaimint, ina rún an 1 Márta 2022 maidir le hionsaí na Rúise i gcoinne na hÚcráine, go n-oibreodh institiúidí AE i dtreo stádas mar iarrthóir AE a dheonú don Úcráin agus, idir an dá linn, leanúint de bheith ag obair i dtreo a lánpháirtíochta i margadh aonair AE de réir an Chomhaontaithe Comhlachais idir AE agus an Úcráin;

N.  de bhrí, faoi shainordú athnuaite Mhisean Comhairleach an Aontais Eorpaigh (EUAM) san Úcráin, go n-áiritheofar leis an misean dlúthchomhar leis an gCúirt Choiriúil Idirnáisiúnta, le gníomhaireacht an Aontais Eurojust agus leis na Ballstáit atá i mbun gníomhaíochta a thacaíonn go díreach le coireanna idirnáisiúnta a imscrúdú agus a ionchúiseamh san Úcráin;

O.  de bhrí gur cheart don Pharlaimint anailís dhomhain a thionscnamh ar na cúiseanna ar theip ar an Aontas, ar a Bhallstáit agus ar a chomhpháirtithe atá ar aon intinn leo sa chomhphobal idirnáisiúnta cosc a chur ar chogadh ionsaitheach na Rúise ar an Úcráin, rud a sháraíonn Cairt na Náisiún Aontaithe agus, dá bhrí sin, arb ionann é agus ionsaí ar chroílár ord síochána agus slándála na hEorpa, a luachanna agus a rathúnas, agus a bhunchlocha daonlathacha, agus a marana a dhéanamh ar na ceachtanna ó bhotúin a rinneadh roimhe seo i mbeartas vis-à-vis na Rúise, ag tosú le mainneachtain cur chun feidhme iomlán chomhaontú sosa cogaidh an 12 Lúnasa 2008 faoi stiúir an Aontais a áirithiú, chomh maith le himscrúdú a dhéanamh ar chásanna sáruithe ar na smachtbhannaí a forchuireadh ó 2014;

P.  de bhrí gur admhaigh an Chomhairle sa Chompás Straitéiseach nach bhfuil slándáil ná cobhsaíocht le fáil ar fud na mBalcán Thiar go fóill agus go bhféadfadh iarmhairtí a bheith ann mar gheall ar an meath atá ag teacht ar staid slándála na hEorpa faoi láthair;

Q.  de bhrí go bhfuil géarghá le hullmhacht a mhéadú chun go mbeifear in ann déileáil ar bhealach níos fearr le raon iomlán na ngéarchéimeanna atá le teacht, go háirithe géarchéimeanna daonnúla agus slándála; de bhrí gur gá don Aontas na hionstraimí uile atá ar fáil dó a úsáid, agus béim á leagan ar rannpháirtíocht thráthúil, chun an tAontas agus a chónaitheoirí agus a luachanna agus a leasanna a chosaint, agus chun rannchuidiú le síocháin agus slándáil idirnáisiúnta; de bhrí gur gá don Aontas oibriú lena chomhghuaillithe;

R.  de bhrí go bhfuil tionchar díréireach ag coinbhleachtaí armtha ar mhná, ar chailíní agus ar ghrúpaí leochaileacha; de bhrí go bhfuil síocháin níos inbhuanaithe ann mar gheall ar rannpháirtíocht chuiditheach na mban agus na gcailíní i gcosc, i réiteach agus in atógáil coinbhleachtaí; de bhrí gur gheall institiúidí AE comhionannas inscne a phríomhshruthú faoi Phlean Gníomhaíochta III maidir le hInscne, lena n-áirítear gach réimse den Chomhbheartas Eachtrach agus Slándála (CBES) agus den Chomhbheartas Slándála agus Cosanta (CBSC);

S.  de bhrí go ndéanfadh ról gníomhach don Pharlaimint i dtaca le comhbheartas cosanta de chuid an Aontais a dhearadh, agus comhchosaint a bhunú agus a tacaíocht pholaitiúil dó sin agus grinnscrúdú daonlathach air, dearbhú agus treisiú ar bhunchlocha ionadaíocha agus daonlathacha an Aontais;

T.  de bhrí go bhfuil feidhmiú an Aontais bunaithe ar an daonlathas ionadaíoch agus de bhrí go ndéantar ionadaíocht dhíreach ar shaoránaigh AE ar leibhéal an Aontais i bParlaimint na hEorpa;

U.  de bhrí gur cheart do gach institiúid AE lánúsáid a bhaint as na cumhachtaí a thugtar di leis na Conarthaí agus i gcomhréir leis na nósanna imeachta, na coinníollacha agus na cuspóirí a leagtar amach iontu; de bhrí gur cheart do na hinstitiúidí comhar dílis frithpháirteach a chleachtadh;

V.  de bhrí go gcumhdaíonn inniúlacht an Aontais i gcúrsaí CBES gach réimse den bheartas eachtrach agus gach ceist a bhaineann le slándáil an Aontais, lena n-áirítear comhbheartas cosanta a chumadh go comhleanúnach, a bhféadfadh comhchosaint teacht as nuair a chinneann an Chomhairle Eorpach amhlaidh, ag gníomhú di d’aon toil, i gcomhréir le hAirteagail 24 agus 42(2) CAE;

W.  de bhrí go sainmhínítear ról sonrach na Parlaiminte i mbeartas eachtrach, slándála agus cosanta an Aontais sna Conarthaí;

X.  de bhrí gur cheart do Pharlaimint na hEorpa, i gcomhpháirt leis an gComhairle, a feidhm bhuiséadach a fheidhmiú sa réimse seo, amhail dá bhforáiltear in Airteagal 41 CAE, agus gur cheart di a feidhm comhairliúcháin pholaitiúil a fheidhmiú amhail dá bhforáiltear in Airteagal 36 CAE;

Y.  de bhrí, nuair a dhéantar cinntí sa Chomhairle Eorpach agus sa Chomhairle maidir leis an mbeartas eachtrach, slándála agus cosanta, go bhfuil feidhmeannas an Aontais Eorpaigh comhdhéanta d’Ardionadaí an Aontais do Ghnóthaí Eachtracha agus don Bheartas Slándála, den Chomhairle, den Choiste Polaitiúil agus Slándála, agus de na foghníomhaireachtaí; de bhrí go luaitear in Airteagal 24 CAE go dtacóidh ‘na Ballstáit go gníomhach agus gan chuntar le beartas eachtrach agus slándála an Aontais de mheon dílseachta agus dlúthpháirtíochta frithpháirtí’, agus ‘go staonfaidh siad ó aon ghníomhaíocht a bheadh bunoscionn le leasanna an Aontais nó ar dóigh di a éifeachtúlacht mar fhórsa comhtháthaithe sa chaidreamh idirnáisiúnta a dhochrú’;

Z.  de bhrí gurb í an Pharlaimint an t-aon institiúid ar féidir léi feidhm an rialaithe pholaitiúil agus na maoirseachta polaitiúil a fheidhmiú go dlisteanach ar an bhfeidhmeannas ar leibhéal an Aontais;

AA.  de bhrí gur cheart go mbeadh an doimhniú ar an gcomhar cosanta i measc na mBallstát ar leibhéal an Aontais ag gabháil le neartú an ghrinnscrúdaithe agus an rialaithe pharlaimintigh ag Parlaimint na hEorpa agus na parlaimintí náisiúnta;

AB.  de bhrí go ndéanfaidh Leas-Uachtarán an Choimisiúin/Ardionadaí an Aontais do Ghnóthaí Eachtracha agus don Bheartas Slándála (VP/HR), in éineacht leis an gCoimisiún más iomchuí, a tuairimí mionsonraithe a thabhairt don Pharlaimint maidir leis na moltaí thíos, go háirithe i gcás ina bhfuil siad sin nasctha le feidhm rialaithe bhuiséadaigh agus pholaitiúil na Parlaiminte ar bheartas eachtrach, slándála agus cosanta an Aontais;

AC.  de bhrí gur cheart don chomhar idir na Ballstáit agus comhpháirtithe faoi Airteagail 42(2), 45 agus 46 CAE tairbhe a bhaint as an gcéannacht dhlíthiúil, as na pribhléidí agus as na díolúintí a chuirtear ar fáil leis na Conarthaí;

AD.  de bhrí go bhfuil sé mar aidhm ag an Aontas sochaithe síochánta agus cuimsitheacha le haghaidh forbairt inbhuanaithe a chur chun cinn, rochtain ar cheartas a chur ar fáil do chách agus institiúidí éifeachtacha, cuntasacha agus cuimsitheacha a fhorbairt ar gach leibhéal;

AE.  de bhrí nach mór don Aontas, in éineacht lena chomhghuaillithe, féachaint lena ord síochána agus slándála a chaomhnú chun an tsíocháin agus an tslándáil atá tuillte acu a chur ar fáil don mhór-roinn agus dá chónaitheoirí; de bhrí gur nochtadh lochtanna na hailtireachta slándála domhanda atá ann faoi láthair leis an gcogadh san Úcráin;

AF.  de bhrí, mar gheall ar nádúr ilghnéitheach ghníomhaíochtaí naimhdeacha na Rúise, go bhfuil sé tábhachtach smaoineamh agus dearadh a dhéanamh ar chosaint Eoraip atá saor ar bhealach iomlánaíoch, lena n-áirítear na réimsí criticiúla uile, ó chosaint, comhar idirnáisiúnta, na meáin agus bonneagar sibhialtach criticiúil, teicneolaíocht, slabhraí soláthair agus fuinneamh;

AG.  de bhrí go bhfuil an tAontas ag féachaint ar an mbagairt is dírí ar a shlándáil chríochach ó dheireadh an Dara Cogadh Domhanda; de bhrí gur léiríodh leis an ngéarchéim reatha go bhfuil gá le plé ar bhuiséad AE, go háirithe i bhfianaise an phlé leanúnaigh maidir leis an gcineál trealaimh mhíleata nó tacaíochta míleata is féidir leis an Aontas a sholáthar;

AH.  de bhrí nach mór an bhréagaisnéis agus an bholscaireacht a chomhrac go práinneach, go dleathach agus go teicniúil, go háirithe i dtíortha is iarrthóirí AE agus tíortha a d'fhéadfadh a bheith ina n-iarrthóirí sna Balcáin Thiar agus i dtíortha Chomhpháirtíocht an Oirthir;

AI.  de bhrí gur ghlac an Chomhairle an Compás Straitéiseach i mí an Mhárta 2022; de bhrí go bhfuil sé mar aidhm ag an gCompás Straitéiseach na huirlisí a thabhairt don Aontas chun a bheith ina sholáthraí slándála éifeachtach i dtimpeallacht naimhdeach agus ina ghníomhaí domhanda níos teanntásaí don tsíocháin agus don tslándáil dhaonna;

AJ.  de bhrí gur cheart gach tionscnamh AE lena ndírítear ar chosaint Eorpach a threisiú a thabhairt cothrom le dáta go rialta i gcomhréir le torthaí an Chompáis Straitéisigh agus na n-athbhreithnithe a dhéanfar amach anseo ar an anailís ar bhagairtí;

AK.  de bhrí gur cheart aon acmhainní breise a leithdháiltear chun an sprioc 2 % de OTI a chaitheamh ar chosaint a úsáid ar bhealach comhordaithe agus comhoibritheach, agus leas iomlán á bhaint as ionstraimí cosanta AE chun easnaimh chumais a shárú agus cosaint na hEorpa a neartú;

AL.  de bhrí, trí leas iomlán a bhaint as na hiarrachtaí chun cumais chosanta chomhpháirteacha AE a fhorbairt, go háirithe an Buanchomhar Struchtúrtha (PESCO) agus an Ciste Eorpach Cosanta (EDF), go gcuideofar le slándáil chomhghuaillithe ECAT agus na mBallstát araon a mhéadú;

AM.  de bhrí gur cheart do na Ballstáit gníomhaíochtaí neamhchomhordaithe a sheachaint a d’fhéadfadh ilroinnt agus dúbailt i mBonn Tionsclaíoch agus Teicneolaíoch na Cosanta de chuid an Aontais a ghéarú tuilleadh, agus ar an gcaoi sin úsáid níos fearr a bhaint as airgead na gcáiníocóirí;

AN.  de bhrí go bhfuil forfheidhmiú smachtbhannaí fós ar cheann de na príomhghnéithe i mbosca uirlisí an Aontais chun cur i gcoinne chogadh na Rúise i gcoinne na hÚcráine, agus de bhrí nach mór gach modh a chur ar fáil dá bhrí sin ar leibhéal AE agus ar leibhéal na mBallstát chun a áirithiú go ndéanfar smachtbhannaí a fhorfheidhmiú go hiomlán; de bhrí gur ghníomhaigh an Chomhairle go tapa agus ar bhealach aontaithe agus go bhfuil cúig phacáiste smachtbhannaí glactha aici go dtí seo i gcoinne na Rúise mar gheall ar a cogadh san Úcráin, lena n-áirítear smachtbhannaí aonair amhail reo sócmhainní agus srianta taistil, smachtbhannaí eacnamaíocha atá dírithe ar na hearnálacha airgeadais, trádála, fuinnimh, iompair, teicneolaíochta agus cosanta, srianta ar na meáin, bearta taidhleoireachta, srianta ar an gcaidreamh eacnamaíoch leis an gCrimé agus Sevastopol agus na limistéir Donetsk agus Luhansk nach bhfuil faoi rialú an rialtais, agus bearta maidir le comhar eacnamaíoch;

AO.  de bhrí go bhfuil iarmhairtí tánaisteacha ag ionsaí na Rúise i gcoinne na hÚcráine a imríonn tionchar ar mhacra-leibhéal an chaidrimh idirnáisiúnta, na comhghuaillíochtaí domhanda, an táirgthe thionsclaíoch agus na slabhraí soláthair, rud a imríonn tionchar ar shlándáil an tsoláthair bia agus ar shlite beatha daoine;

AP.  de bhrí go bhfuil Daon-Phoblacht na Síne, trína ráitis agus a gníomhartha, ag léiriú tacaíochta agus comhbhrón do sheasamh na Rúise, ag cur insint agus bréaga soiléire na Rúise chun cinn agus ag léiriú drogall ar cheannasacht agus iomláine chríochach na hÚcráine a fhormhuiniú go hiomlán;

AQ.  de bhrí go ndéanann an Chomhairle Eorpach agus an Chomhairle, ag gníomhú dóibh d’aon toil, CBES a dhréachtú agus a chur chun feidhme, ach amháin i gcás ina ndéantar foráil sna Conarthaí maidir le heisceachtaí, mar a dhéantar le hAirteagal 24 CAE;

AR.  de bhrí go bhfuil ról uathúil ag Parlaimint na hEorpa, mar ionadaíocht dhíreach ar shaoránaigh AE ar leibhéal an Aontais, in institiúidí AE agus go bhfuil ról lárnach aici maidir lena áirithiú go bhfuil cinnteoireacht AE, lena n-áirítear i réimse an bheartais eachtraigh, ailínithe le mianta na saoránach, mar a luaitear i dtuarascáil deiridh na Comhdhála ar Thodhchaí na hEorpa;

1.  ag moladh an mhéid seo a leanas don Chomhairle agus do Leas-Uachtarán an Choimisiúin / Ardionadaí an Aontais do Ghnóthaí Eachtracha agus don Bheartas Slándála:

2.  á threorú dá hUachtarán an rún seo a chur ar aghaidh chuig an gComhairle, chuig an gCoimisiún, agus chuig Leas-Uachtarán an Choimisiúin / Ardionadaí an Aontais do Ghnóthaí Eachtracha agus don Bheartas Slándála.

(1) Téacsanna arna nglacadh, P9_TA(2022)0039. (2) Téacsanna arna nglacadh, P9_TA(2022)0040. (3) IO L 102, 24.3.2021, lch. 14. (4) IO C 263, 25.7.2018, lch. 125. (5) Téacsanna arna nglacadh, P9_TA(2022)0121. (6) Téac sanna arna nglacadh, P9_TA(2022)0099. (7) Téac sanna arna nglacadh, P9_TA(2022)0052. (8) IO L 161, 29.5.2014, lch. 3. (9) IO L 149, 30.4.2021, lch. 10.