Il-Parlament Ewropew,

–  wara li kkunsidra t-Titoli II, III u V tat-Trattat dwar l-Unjoni Ewropea (TUE), u l-impenji stabbiliti fil-preambolu għall-implimentazzjoni ta' Politika Estera, ta' Sigurtà u ta' Difiża Komuni, u b'mod partikolari l-Artikoli 10(1) u (2), 13(2), 14(1) u 16(1), 24(1), 26, 36, 41, 42(2), (3), (6) u (7), 44, 45, 46 u l-Protokoll Nru 10 tiegħu,

–  wara li kkunsidra l-pjan ta' azzjoni "Boxxla Strateġika għas-Sigurtà u d-Difiża - Għal Unjoni Ewropea li tipproteġi liċ-ċittadini, il-valuri u l-interessi tagħha u tikkontribwixxi għall-paċi u s-sigurtà internazzjonali", approvat mill-Kunsill fil-21 ta' Marzu 2022 u mill-Kunsill Ewropew fil-25 ta' Marzu 2022,

–  wara li kkunsidra d-Dikjarazzjoni ta' Versailles tal-Kapijiet ta' Stat jew ta' Gvern tal-UE tal-11 ta' Marzu 2022,

–  wara li kkunsidra l-komunikazzjoni konġunta tal-Kummissjoni u tar-Rappreżentant Għoli tal-Unjoni għall-Affarijiet Barranin u l-Politika ta' Sigurtà tat-18 ta' Mejju 2022 bit-titolu "L-Analiżi tad-Diskrepanzi fl-Investimenti fid-Difiża u l-Approċċ Futur" (JOIN(2022)0024),

–  wara li kkunsidra r-riżoluzzjoni tiegħu tas-17 ta' Frar 2022 dwar l-implimentazzjoni tal-politika estera u ta' sigurtà komuni – rapport annwali 2021(1),

–  wara li kkunsidra r-riżoluzzjoni tiegħu tas-17 ta' Frar 2022 dwar l-implimentazzjoni tal-Politika ta' Sigurtà u ta' Difiża Komuni – rapport annwali 2021(2),

–  wara li kkunsidra l-komunikazzjoni tal-Kummissjoni tal-15 ta' Frar 2022 bit-titolu "Kontribut tal-Kummissjoni għad-difiża Ewropea" (COM(2022)0060),

–  wara li kkunsidra d-deċiżjoni tal-Kunsill tat-22 ta' Marzu 2021 li tistabbilixxi Faċilità Ewropea għall-Paċi, u li tħassar id-Deċiżjoni (PESK) 2015/528(3),

–  wara li kkunsidra r-riżoluzzjoni tiegħu tas-16 ta' Marzu 2017 intitolata "L-implikazzjonijiet kostituzzjonali, legali u istituzzjonali ta' politika ta' sigurtà u ta' difiża komuni: possibilitajiet offruti mit-Trattat ta' Liżbona,"(4),

–  wara li kkunsidra r-riżoluzzjoni tiegħu tas-7 ta' April 2022 dwar il-konklużjonijiet tal-laqgħa tal-Kunsill Ewropew tal-24 u l-25 ta' Marzu 2022, inklużi l-aħħar żviluppi tal-gwerra kontra l-Ukrajna u s-sanzjonijiet tal-UE kontra r-Russja u l-implimentazzjoni tagħhom(5),

–  wara li kkunsidra r-riżoluzzjoni tiegħu tal-24 ta' Marzu 2022 dwar il-ħtieġa ta' pjan ta' azzjoni urġenti tal-UE biex tiġi żgurata s-sigurtà tal-ikel kemm fl-UE kif ukoll barra l-UE fid-dawl tal-invażjoni Russa tal-Ukrajna(6),

–  wara li kkunsidra r-riżoluzzjoni tiegħu tal-1 ta' Marzu 2022 dwar l-aggressjoni tar-Russja kontra l-Ukrajna(7),

–  wara li kkunsidra d-dikjarazzjonijiet dwar l-Ukrajna tal-mexxejja tal-Parlament tas-16 u l-24 ta' Frar 2022,

–  wara li kkunsidra r-rapport dwar l-eżitu finali tal-Konferenza dwar il-Futur tal-Ewropa ta' Mejju 2022,

–  wara li kkunsidra l-komunikat tas-Summit ta' Brussell maħruġ mill-Kapijiet tal-Istat u l-Gvern li pparteċipaw fil-laqgħa tal-Kunsill tal-Atlantiku tat-Tramuntana fi Brussell fl-14 ta' Ġunju 2021,

–  wara li kkunsidra l-Analiżi u r-Rakkomandazzjonijiet tal-Grupp ta' Riflessjoni Maħtur mis-Segretarju Ġenerali tan-NATO tal-25 ta' Novembru 2020 bit-titolu "NATO 2030: United for a New Era" (NATO 2030: Magħquda għal Era Ġdida),

–  wara li kkunsidra r-riżoluzzjonijiet adottati mill-Assemblea Ġenerali tan-NU fit-2 ta' Marzu 2022 dwar l-aggressjoni kontra l-Ukrajna, fl-24 ta' Marzu 2022 dwar il-konsegwenzi umanitarji tal-aggressjoni kontra l-Ukrajna u fis-7 ta' April 2022 dwar is-sospensjoni tad-drittijiet ta' sħubija tal-Federazzjoni Russa fil-Kunsill tad-Drittijiet tal-Bniedem,

–  wara li kkunsidra l-Ftehim ta' Assoċjazzjoni bejn l-Unjoni Ewropea u l-Istati Membri tagħha, minn naħa waħda, u l-Ukrajna, min-naħa l-oħra(8), li jinkludi Ftehim ta' Kummerċ Ħieles Approfondit u Komprensiv u li daħal fis-seħħ fl-1 ta' Settembru 2017,

–  wara li kkunsidra d-deċiżjonijiet adottati mill-Kunsill dwar miżuri restrittivi tal-UE kontra r-Russja fuq il-gwerra tagħha fl-Ukrajna,

–  wara li kkunsidra Il-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta' Fuq, min-naħa l-oħra(9) (il-"Ftehim dwar il-Kummerċ u l-Kooperazzjoni bejn l-UE u r-Renju Unit"),

–  wara li kkunsidra l-Artikolu 118 tar-Regoli ta' Proċedura tiegħu,

–  wara li kkunsidra r-rapport tal-Kumitat għall-Affarijiet Barranin (A9-0164/2022),

A.  billi l-aggressjoni militari mhux ipprovokata u mhux ġustifikata mill-Federazzjoni Russa kontra l-Ukrajna, wara l-invażjoni Russa tal-Georgia fl-2008 u azzjonijiet aggressivi oħra madwar id-dinja, hija ksur sfaċċat tal-liġi internazzjonali, tal-Karta tan-NU u tal-prinċipji minquxa fl-Att finali ta' Ħelsinki tal-1975, tal-Memorandum ta' Budapest tal-1994 u tal-Karta ta' Pariġi għal Ewropa Ġdida tal-21 ta' Novembru 1990, u timmina serjament is-sigurtà u l-istabbiltà Ewropej u dawk globali;

B.  billi l-Federazzjoni Russa ma rrispettatx l-ordni maħruġa mill-Qorti Internazzjonali tal-Ġustizzja fis-16 ta' Marzu 2022 li talbet b'mod ċar lir-Russja tissospendi immedjatament l-operazzjonijiet militari tagħha u tiżgura li kwalunkwe unità armata militari jew irregolari li tista' tkun immexxija jew appoġġjata minnha, kif ukoll kwalunkwe organizzazzjoni u persuna li tista' tkun taħt il-kontroll jew it-tmexxija tagħha, ma jieħdu l-ebda pass biex jibqgħu għaddejjin bl-operazzjonijiet militari eżistenti;

C.  billi l-invażjoni Russa tal-Ukrajna tikkostitwixxi attakk kontra l-ordni ta' paċi Ewropew innifsu u b'hekk thedded il-pedamenti li fuqhom inbniet il-politika estera, ta' sigurtà u ta' difiża tal-Unjoni; billi t-tentattivi persistenti tar-Russja biex toħloq instabilità fil-viċinat tal-Unjoni u globalment u biex iddgħajjef u tirrevedi bil-qawwa l-ordni tas-sigurtà Ewropea jirrikjedu li l-Unjoni ssaħħaħ b'mod sostanzjali u determinat il-koeżjoni u l-effikaċja tal-politika barranija, ta' sigurtà u ta' difiża tagħha;

D.  billi eluf ta' Ukreni tilfu ħajjithom fil-gwerra li nbdiet mill-Federazzjoni Russa kontra l-Ukrajna u li ilha għaddejja mill-2014; billi eluf sfaw midruba u aktar minn 10 miljun persuna ġew sfurzati jitilqu minn djarhom jew ħarbu lejn pajjiżi ġirien;

E.  billi l-forzi armati Russi qegħdin jibbombardjaw deliberatament u indiskriminatament infrastrutturi ċivili, inklużi djar u postijiet ta' kenn, skejjel materni, skejjel, sptarijiet, faċilitajiet ta' emerġenza u kura u stazzjonijiet tal-ferroviji u tal-karozzi tal-linja;

F.  billi skont il-Kummissarju Għoli tan-NU għad-Drittijiet tal-Bniedem, dawn l-attakki qegħdin jikkawżaw tbatija umana bla qies u huma delitti tal-gwerra u delitti kontra l-umanità; billi t-tortura u l-qtil ta' persuni ċivili u l-għadd dejjem akbar ta' rapporti ta' traffikar tal-bnedmin, vjolenza sesswali, sfruttament, stupru u abbuż li n-nisa u t-tfal qegħdin jiffaċċjaw huma delitti tal-gwerra atroċi li jeħtieġ li jiġu investigati u dokumentati b'mod urġenti sabiex l-awturi jkunu jistgħu jiġu pproċessati; billi għadha għaddejja investigazzjoni internazzjonali dwar id-delitti mwettqa f'Bucha; billi l-invażjoni tal-Ukrajna tista' tikkostitwixxi delitt ta' aggressjoni kif definit fl-Artikolu 8a tal-Istatut ta' Ruma tal-Qorti Kriminali Internazzjonali u l-atroċitajiet imwettqa mill-armata Russa u l-proxies tagħha jissodisfaw id-definizzjoni ta' ġenoċidju li tinsab fil-Konvenzjoni tan-NU tal-1948; billi d-deċiżuri u l-awturi jeħtiġilhom jitressqu quddiem il-ġustizzja kriminali internazzjonali;

G.  billi l-invażjoni Russa tal-Ukrajna reġgħet ġabet gwerra fl-Ewropa u aħna l-Ewropej fl-Unjoni Ewropea issa rridu nużaw id-determinazzjoni u r-riżoluzzjoni kollha tagħna biex nipproteġu u niddefendu din l-Unjoni, u l-valuri u l-prinċipji li tirrappreżenta, inkluż il-prinċipju ta' integrità territorjali, sovranità nazzjonali u l-ordni internazzjonali bbażat fuq ir-regoli;

H.  billi n-nuqqas ta' tweġiba adegwata għall-aggressjonijiet Russi kontra l-Georgia fl-2008 u kontra l-Ukrajna fl-2014 inkoraġġew lir-Russja tkompli bil-kampanji militari u politiċi aggressivi tagħha, inkluż l-invażjoni fuq skala kbira tal-Ukrajna, b'dan il-mod, iddgħajjef u timmina l-ordni internazzjonali bbażat fuq ir-regoli u l-istabbiltà fl-Ewropa u fi bnadi oħra;

I.  billi l-għan strateġiku tad-dinja ħielsa huwa li tgħin lill-Ukrajna biex fl-aħħar mill-aħħar tegħleb lill-aggressur Russu u terġa' tikseb kontroll fuq it-territorju tagħha rikonoxxut internazzjonalment;

J.  billi l-gwerra tal-Federazzjoni Russa ta' aggressjoni kontra l-Ukrajna u l-attakk tagħha kontra l-ordni ta' paċi Ewropew qed iseħħu fl-isfond ta' repressjoni severa kontra s-soċjetà ċivili u l-oppożizzjoni politika fir-Russja, bil-għan li tiġi żgurata s-sopravivenza ta' reġim dejjem aktar totalitarju;

K.  billi d-difiża tal-Ewropa hija l-ewwel u qabel kollox obbligu għad-demokraziji Ewropej kollha; billi dan l-obbligu jrid ikollu miri adegwati ta' kapaċità finanzjarja u militari li jkunu ekwivalenti għalih; billi l-Unjoni ddeċidiet li tagħmel il-parti tagħha biex tiġġieled it-tentattivi tal-Federazzjoni Russa biex teqred il-pedamenti tas-sigurtà u l-istabbiltà internazzjonali, inkluż f'kooperazzjoni mill-qrib man-NATO, is-sisien tad-difiża kollettiva tal-membri tagħha; billi fit-18 ta' Mejju 2022, il-Finlandja u l-Iżvezja ppreżentaw uffiċjalment l-applikazzjonijiet tagħhom biex jingħaqdu man-NATO; billi huwa importanti li l-alleati kollha tan-NATO jirratifikaw malajr il-protokolli tal-adeżjoni tal-Finlandja u tal-Iżvezja; billi t-Turkija qed turi nuqqas ta' rieda li tilqa' l-applikazzjonijiet tal-Finlandja u tal-Iżvezja biex jingħaqdu man-NATO; billi l-Artikolu 42(7) tat-TUE jibqa' element importanti tal-arkitettura tas-sigurtà Ewropea li jipprovdi appoġġ u protezzjoni għall-Istati Membri kollha tal-UE; billi l-Parlament esprima l-gratitudni sinċiera tiegħu għall-assistenza u l-kooperazzjoni mġedda tal-Istati Uniti fir-rigward tal-protezzjoni u l-għoti ta' difiża territorjali Ewropea;

L.  billi l-Ukrajna għandha dritt fundamentali għall-awtodifiża skont l-Artikolu 51 tal-Karta tan-Nazzjonijiet Uniti; billi l-Parlament ifaħħar lill-poplu tal-Ukrajna għall-kuraġġ tiegħu fid-difiża ta' pajjiżu u l-valuri komuni tagħna ta' libertà u demokrazija u mhux ser jabbandunahom;

M.  billi l-Parlament, fir-riżoluzzjoni tiegħu tal-1 ta' Marzu 2022 dwar l-aggressjoni Russa kontra l-Ukrajna, talab lill-istituzzjonijiet tal-UE jaħdmu biex jagħtu status ta' kandidat lill-Ukrajna u, sadanittant, ikomplu jaħdmu lejn l-integrazzjoni tagħha fis-suq uniku tal-UE skont il-Ftehim ta' Assoċjazzjoni UE-Ukrajna;

N.  billi, skont il-mandat imġedded tal-Missjoni ta' Konsulenza tal-Unjoni Ewropea fl-Ukrajna (EUAM Ukraine), il-missjoni ser tiżgura kooperazzjoni mill-qrib mal-Qorti Kriminali Internazzjonali, mal-aġenzija tal-Unjoni Eurojust u mal-Istati Membri li jieħdu azzjoni li tappoġġja direttament l-investigazzjoni u l-prosekuzzjoni ta' reati internazzjonali fl-Ukrajna;

O.  billi l-Parlament għandu jibda analiżi profonda tar-raġunijiet għaliex l-Unjoni, l-Istati Membri tagħha u s-sħab tagħha b'mentalità simili fil-komunità internazzjonali ma rnexxilhomx jiskoraġġixxu l-gwerra ta' aggressjoni tar-Russja fuq l-Ukrajna, li tikser il-Karta tan-NU u għalhekk tikkostitwixxi attakk fuq il-qalba stess tal-ordni ta' paċi u sigurtà tal-Ewropa, il-valuri u l-prosperità tagħha, kif ukoll il-pedamenti demokratiċi tagħha, u jieħu kont tat-tagħlimiet mill-iżbalji preċedenti fil-politika vis-à-vis ir-Russja, l-ewwel fosthom in-nuqqas li tiġi żgurata l-implimentazzjoni sħiħa tal-ftehim ta' waqfien mill-ġlied medjat mill-UE tat-12 ta' Awwissu 2008, kif ukoll l-investigazzjoni tal-każijiet ta' ksur tas-sanzjonijiet imposti mill-2014;

P.  billi l-Kunsill irrikonoxxa fil-Boxxla Strateġika li s-sigurtà u l-istabbiltà fil-Balkani tal-Punent kollha għadhom mhumiex ċertezza u li hemm riskju ta' riperkussjonijiet potenzjali mid-deterjorament attwali tas-sitwazzjoni tas-sigurtà Ewropea;

Q.  billi hemm ħtieġa urġenti li tiżdied it-tħejjija sabiex ikun jista jiġi indirizzat l-ispettru sħiħ ta' kriżijiet li ġejjin, b'mod partikolari l-kriżijiet umanitarji u ta' sigurtà; billi l-Unjoni jeħtieġ tuża l-istrumenti kollha għad-dispożizzjoni tagħha, b'enfasi fuq l-impenn f'waqtu, biex tipproteġi l-Unjoni u ċ-ċittadini tagħha, il-valuri u l-interessi tagħha, u biex tikkontribwixxi għall-paċi u s-sigurtà internazzjonali; billi hemm bżonn li l-Unjoni taħdem mal-alleati tagħha;

R.  billi n-nisa, il-bniet u l-gruppi vulnerabbli huma affettwati b'mod sproporzjonat minn kunflitti armati; billi l-parteċipazzjoni kostruttiva tan-nisa u l-bniet fil-prevenzjoni u r-riżoluzzjoni tal-kunflitti u fir-rikostruzzjoni wara l-kunflitti żżid is-sostenibbiltà tal-paċi; billi l-istituzzjonijiet tal-UE impenjaw ruħhom li jintegraw l-ugwaljanza bejn il-ġeneri fi ħdan il-Pjan ta' Azzjoni dwar l-Ugwaljanza bejn is-Sessi III, li jinkludi l-oqsma kollha tal-Politika Estera u ta' Sigurtà Komuni (PESK) u l-Politika ta' Sigurtà u ta' Difiża Komuni (PSDK);

S.  billi rwol attiv tal-Parlament, u l-appoġġ politiku u l-iskrutinju demokratiku tiegħu fit-tfassil ta' politika ta' difiża komuni għall-Unjoni u l-istabbiliment ta' difiża komuni, jafferma u jsaħħaħ il-pedamenti rappreżentattivi u demokratiċi tal-Unjoni;

T.  billi l-funzjonament tal-Unjoni huwa bbażat fuq id-demokrazija rappreżentattiva u billi ċ-ċittadini tal-UE huma rappreżentati direttament fil-livell tal-Unjoni fil-Parlament;

U.  billi kull istituzzjoni tal-UE għandha tuża b'mod sħiħ is-setgħat mogħtija lilha mit-Trattati, u skont il-proċeduri, il-kundizzjonijiet u l-finijiet previsti minnhom; billi l-istituzzjonijiet għandhom jipprattikaw kooperazzjoni leali u reċiproka;

V.  billi l-kompetenza tal-Unjoni fi kwistjonijiet relatati mal-PESK tkopri l-oqsma kollha tal-politika barranija u l-kwistjonijiet kollha relatati mas-sigurtà tal-Unjoni, inkluż it-tfassil progressiv ta' politika ta' difiża komuni li tista' twassal għal difiża komuni meta l-Kunsill Ewropew, filwaqt li jaġixxi b'mod unanimu, jiddeċiedi dan, f'konformità mal-Artikoli 24 u 42(2) tat-TUE;

W.  billi r-rwol speċifiku tal-Parlament fil-politika estera, ta' sigurtà u ta' difiża tal-Unjoni huwa definit fit-Trattati;

X.  billi l-Parlament għandu, flimkien mal-Kunsill, jeżerċita l-funzjoni baġitarja tiegħu f'dan il-qasam kif previst fl-Artikolu 41 tat-TUE, u għandu jeżerċita l-funzjoni ta' konsultazzjoni politika tiegħu kif previst fl-Artikolu 36 tat-TUE;

Y.  billi fl-implimentazzjoni tad-deċiżjonijiet tal-Kunsill Ewropew u tal-Kunsill dwar il-politika estera, ta' sigurtà u ta' difiża, l-eżekuttiv tal-Unjoni Ewropea huwa magħmul mir-Rappreżentant Għoli tal-Unjoni għall-Affarijiet Barranin u l-Politika ta' Sigurtà, mill-Kunsill, mill-Kumitat Politiku u ta' Sigurtà, u mill-aġenziji subordinati; billi l-Artikolu 24 TUE jgħid li "l-Istati Membri għandhom isostnu l-politika esterna u ta' sigurtà tal-Unjoni attivament u mingħajr riżerva fi spirtu ta' lealtà u solidarjetà reċiproka" u li "għandhom joqogħdu lura minn kull azzjoni li tkun kontra l-interessi tal-Unjoni jew li x'aktarx tagħmel ħsara għall-effikaċja tagħha bħala forza b'koeżjoni fir-relazzjonijiet internazzjonali";

Z.  billi l-Parlament huwa l-unika istituzzjoni li tista' teżerċita b'mod leġittimu l-funzjoni ta' kontroll politiku u sorveljanza fuq l-eżekuttiv fil-livell tal-Unjoni;

AA.  billi l-approfondiment tal-kooperazzjoni fil-qasam tad-difiża fost l-Istati Membri fil-livell tal-Unjoni għandu jimxi id f'id mat-tisħiħ tas-sorveljanza u tal-kontroll parlamentari, kemm mill-Parlament Ewropew kif ukoll mill-parlamenti nazzjonali;

AB.  billi l-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta' Sigurtà (VP/RGħ), flimkien mal-Kummissjoni fejn xieraq, jagħti lill-Parlament Ewropew il-fehmiet dettaljati tiegħu rigward ir-rakkomandazzjonijiet ta' hawn taħt, b'mod partikolari meta dawn ikunu marbuta mal-funzjoni baġitarja u ta' kontroll politiku tal-Parlament fuq il-politika estera, ta' sigurtà u ta' difiża tal-Unjoni;

AC.  billi l-kooperazzjoni bejn l-Istati Membri u s-sħab skont l-Artikoli 42(2), 45 u 46 tat-TUE għandha tibbenefika mill-identità legali, il-privileġġi u l-immunitajiet previsti mit-Trattati;

AD.  billi l-Unjoni għandha l-għan li tippromwovi soċjetajiet paċifiċi u inklużivi għall-iżvilupp sostenibbli, tagħti aċċess għall-ġustizzja lil kulħadd u tibni istituzzjonijiet effettivi, responsabbli u inklużivi fil-livelli kollha;

AE.  billi, flimkien mal-alleati tagħha, l-Unjoni jrid ikollha l-għan li tiddefendi l-paċi u s-sigurtà tagħha sabiex tipprovdi lill-kontinent u lir-residenti tiegħu l-paċi u s-sigurtà li jistħoqqilhom; billi l-gwerra fl-Ukrajna kixfet id-difetti tal-arkitettura tas-sigurtà globali attwali;

AF.  billi, minħabba n-natura multidimensjonali tal-azzjonijiet ostili tar-Russja, huwa importanti li titqies u titfassal id-difiża ta' Ewropa libera b'mod olistiku billi tinkorpora l-oqsma kritiċi kollha, fosthom id-difiża, il-kooperazzjoni internazzjonali, il-midja u l-infrastruttura ċivili kritika, it-teknoloġija, il-ktajjen tal-provvista u l-enerġija;

AG.  billi l-Unjoni qiegħda tesperjenza l-aktar theddida diretta għas-sigurtà territorjali tagħha minn tmiem it-Tieni Gwerra Dinjija; billi l-kriżi attwali wriet il-ħtieġa għal diskussjoni dwar il-baġit tal-UE, b'mod partikolari minħabba d-diskussjoni li għaddejja dwar liema tip ta' tagħmir jew appoġġ militari jista' jiġi pprovdut mill-Unjoni;

AH.  billi d-diżinformazzjoni u l-propaganda jridu jiġu miġġielda b'mod urġenti, legalment u teknikament, speċjalment fil-pajjiżi kandidati u kandidati potenzjali tal-UE fil-Balkani tal-Punent u fil-pajjiżi tas-Sħubija tal-Lvant;

AI.  billi l-Boxxla Strateġika ġiet adottata mill-Kunsill f'Marzu 2022; billi l-Boxxla Strateġika għandha l-għan li tagħti lill-Unjoni l-għodod biex tkun fornitur effettiv tas-sigurtà f'ambjent ostili u attur globali aktar assertiv għall-paċi u s-sigurtà tal-bniedem;

AJ.  billi l-inizjattivi kollha tal-UE li għandhom l-għan li jsaħħu d-difiża Ewropea għandhom jiġu aġġornati regolarment f'konformità mas-sejbiet tal-Boxxla Strateġika u r-reviżjonijiet futuri tal-analiżi tat-theddid;

AK.  billi kwalunkwe riżorsa addizzjonali allokata biex tintlaħaq il-mira ta' nfiq ta' 2 % tal-PDG fuq id-difiża għandha tintuża b'mod koordinat u kooperattiv, filwaqt li jsir użu sħiħ mill-istrumenti tad-difiża tal-UE biex jingħelbu n-nuqqasijiet fil-kapaċitajiet u tissaħħaħ id-difiża Ewropea;

AL.  billi l-użu sħiħ tal-isforzi biex jiġu żviluppati kapaċitajiet konġunti ta' difiża tal-UE, b'mod partikolari l-Kooperazzjoni Strutturata Permanenti (PESCO) u l-Fond Ewropew għad-Difiża (FEŻ), ser jgħin biex bl-istess mod tiżdied is-sigurtà tal-alleati tan-NATO u tal-Istati Membri;

AM.  billi l-Istati Membri għandhom jevitaw azzjonijiet mhux ikkoordinati li jistgħu jkomplu jaggravaw il-frammentazzjoni u d-duplikazzjoni fil-Bażi Industrijali u Teknoloġika tad-Difiża tal-Unjoni, u b'hekk jagħmlu użu aħjar mill-flus tal-kontribwenti;

AN.  billi l-infurzar tas-sanzjonijiet jibqa' wieħed mill-elementi ewlenin fis-sett ta' għodod li l-Unjoni għandha fil-ġlieda kontra l-gwerra tar-Russja kontra l-Ukrajna, u billi għaldaqstant iridu jkunu disponibbli l-mezzi kollha fil-livell tal-UE u tal-Istati Membri biex jiġi żgurat li s-sanzjonijiet jiġu infurzati bis-sħiħ; billi l-Kunsill aġixxa malajr u b'mod magħqud u s'issa adotta ħames pakketti ta' sanzjonijiet kontra r-Russja minħabba l-gwerra tagħha fl-Ukrajna, inklużi sanzjonijiet individwali bħall-iffriżar tal-assi u r-restrizzjonijiet fuq l-ivvjaġġar, sanzjonijiet ekonomiċi mmirati lejn is-setturi finanzjarji, tal-kummerċ, tal-enerġija, tat-trasport, tat-teknoloġija u tad-difiża, ir-restrizzjonijiet tal-midja, il-miżuri diplomatiċi, ir-restrizzjonijiet fuq ir-relazzjonijiet ekonomiċi mal-Krimea u Sevastopol u ż-żoni mhux ikkontrollati mill-gvern ta' Donetsk u Luhansk, u miżuri li jikkonċernaw il-kooperazzjoni ekonomika;

AO.  billi l-aggressjoni tar-Russja kontra l-Ukrajna qed ikollha konsegwenzi sekondarji li qegħdin ikollhom impatt fuq il-livell makro tar-relazzjonijiet internazzjonali, l-alleanzi globali, il-produzzjoni industrijali u l-ktajjen tal-provvista, u b'hekk qegħdin ikollhom impatt fuq is-sigurtà tal-ikel u l-għajxien tan-nies;

AP.  billi r-Repubblika Popolari taċ-Ċina, permezz tad-dikjarazzjonijiet u l-atti tagħha, qiegħda turi appoġġ u simpatija għall-pożizzjoni tar-Russja, tippromwovi n-narrattiva u l-gideb ovvju tar-Russja u turi nuqqas ta' rieda li tapprova bis-sħiħ is-sovranità u l-integrità territorjali tal-Ukrajna;

AQ.  billi l-PESK hija abbozzata u implimentata mill-Kunsill Ewropew u mill-Kunsill, li jaġixxu b'mod unanimu, ħlief fejn it-Trattati jipprevedu eċċezzjonijiet bħal fl-Artikolu 24 tat-TUE;

AR.  billi l-Parlament, bħala rappreżentanza diretta taċ-ċittadini tal-UE fil-livell tal-Unjoni, għandu rwol uniku fl-istituzzjonijiet tal-UE u għandu rwol ċentrali biex jiżgura li t-teħid tad-deċiżjonijiet tal-UE, inkluż fil-qasam tal-politika barranija, ikun allinjat max-xewqat taċ-ċittadini, kif iddikjarat fir-rapport finali tal-Konferenza dwar il-Futur tal-Ewropa;

1.  Jirrakkomanda lill-Kunsill u lill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà:

2.  Jagħti istruzzjonijiet lill-President tiegħu biex tgħaddi din ir-rakkomandazzjoni lill-Kunsill, lill-Kummissjoni u lill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà.

(1) Testi adottati, P9_TA(2022)0039. (2) Testi adottati, P9_TA(2022)0040. (3) ĠU L 102, 24.3.2021, p. 14. (4) ĠU C 263, 25.7.2018, p. 125. (5) Testi adottati, P9_TA(2022)0121. (6) Testi adottati, P9_TA(2022)0099. (7) Testi adottati, P9_TA(2022)0052. (8) ĠU L 161, 29.5.2014, p. 3. (9) ĠU L 149, 30.4.2021, p. 10.