Tá Parlaimint na hEorpa,

–  ag féachaint don iarraidh ar tharscaoileadh dhíolúine Beata Mazurek, a thíolaic an XIVú Rannán Coiriúil de Chúirt Dúiche Vársá-Mokotów an 13 Nollaig 2022 maidir le himeachtaí coiriúla tar éis dó díotáil shibhialta a thaisceadh agus a cuireadh in iúl sa suí iomlánach an 13 Feabhra 2023,

–  ag féachaint don fhíoras gur tharscaoil Beata Mazurek a ceart éisteacht a fháil i gcomhréir le hAirteagal 9(6) dá Rialacha Nós Imeachta,

–  ag féachaint d’Airteagail 8 agus 9 de Phrótacal Uimh. 7 ar Phribhléidí agus Díolúintí an Aontais Eorpaigh agus d’Airteagal 6(2) d’Ionstraim an 20 Meán Fómhair 1976 maidir le toghadh chomhaltaí Pharlaimint na hEorpa trí vótáil chomhchoiteann dhíreach,

–  ag féachaint do na breithiúnais a thug Cúirt Bhreithiúnais an Aontais Eorpaigh (CBAE) an 21 Deireadh Fómhair 2008, an 19 Márta 2010, an 6 Meán Fómhair 2011, an 17 Eanáir 2013 agus an 19 Nollaig 2019(1),

–  ag féachaint d’Airteagal 105(2) agus d’Airteagal 108 de Bhunreacht Phoblacht na Polainne, mar aon le hAirteagal 7b(1) agus Airteagal 7c(1) de dhlí na Polainne ón 9 Bealtaine 1996 ar shainordú Feisire agus Seanadóra de chuid na Polainne a chomhlíonadh,

–  ag féachaint do Riail 5(2), do Riail 6(1) agus do Riail 9 dá Rialacha Nós Imeachta,

–  ag féachaint don tuarascáil ón gCoiste um Ghnóthaí Dlíthiúla (A9-0347/2023),

A.  de bhrí, an 13 Nollaig 2022, gur thíolaic breitheamh den XIVú Rannán Coiriúil de Chúirt Dúiche Vársá-Mokotów iarraidh ar dhíolúine pharlaiminteach Beata Mazurek, a toghadh sa Pholainn, a tharscaoileadh, arb iarraidh í a chuir duine aonair faoina bhráid ar bhonn postála ar chuntas Twitter Pháirtí an Dlí agus an Cheartais a líomhnaítear go raibh ábhar inti a spreagann fuath náisiúnta, eitneach, ciníoch agus reiligiúnach; de bhrí go bhfuair Cúirt Dúiche Vársá-Mokotów, an 17 Samhain 2021, an díotáil arna gcur isteach ag ionadaí an ionchúisitheora ionadaigh; de bhrí gur iarr an t-ionadaí ar an gcúirt freisin a iarraidh ar údarú chun imeachtaí coiriúla a thionscnamh i gcoinne Beata Mazurek a chur ar aghaidh chuig Parlaimint na hEorpa;

B.  de bhrí gur chuir an t-údarás breithiúnach an iarraidh sin ar tharscaoileadh díolúine pharlaiminteach ar aghaidh i gcomhréir le hAirteagal 9(12) de Rialacha Nós Imeachta Pharlaimint na hEorpa; ag tabhairt aird, áfach, ar an bhfíric go gceanglaítear faoi Riail 9(1), dá Rialacha Nós Imeachta go mbeidh gach iarraidh ar dhíolúine a tharscaoileadh seolta ag ‘údarás inniúil Ballstáit’, agus nach ionann an dá rud; de bhrí go gcinntear brí an téarma ‘údarás inniúil Ballstáit’ leis an dlí náisiúnta is infheidhme; de bhrí, i gcás na Polainne, gur cheart tagairt a dhéanamh d’fhorálacha Airteagal 7b(1) de Dhlí na Polainne an 9 Bealtaine 1996 maidir le sainordú Feisire agus Seanadóra de chuid na Polainne a chomhlíonadh, lena bhforáiltear gur tríd an Ard-Ionchúisitheoir a dhéanfar iarraidh ar údarú chun imeachtaí coiriúla a thionscnamh i gcoinne Feisire nó Seanadóra i gcás cion is inphionóis le hionchúiseamh poiblí; de bhrí, sa chás seo, gur seoladh an iarraidh chuig an Ard-Ionchúisitheoir, a rinne an t-iarratas a sheoladh ar ais, áfach, ar an bhforas go raibh ‘cúiseamh ionadach’ san áireamh freisin sa ‘cúiseamh príobháideach’ agus go raibh an iarraidh ar dhíolúine Fheisire den Pharlaimint a tharscaoileadh laistigh de dhlínse na cúirte ar tugadh an cás os a comhair;

C.  de bhrí go ndearna ionadaí an ionchúisitheora ionadaigh iarratas a chur faoi bhráid na Cúirte ar chead chun imeachtaí coiriúla a thionscnamh in aghaidh Beata Mazurek, inter alia, as gníomhaíocht a thagann faoi Airteagal 256(2) de Chód Coiriúil na Polainne;

D.  de bhrí, an 17 Deireadh Fómhair 2018, gur foilsíodh fógra toghcháin dar teideal ‘Bezpieczny samorząd’ (bardasacht shlán) ar na meáin shóisialta ar chuntas Pháirtí an Dlí agus an Cheartais faoi chuimse na dtoghchán bardasach a reachtáladh an 21 Deireadh Fómhair 2018 sa Pholainn; de bhrí gur chuidigh Beata Mazurek, i measc daoine eile, lena scaipeadh; de bhrí go líomhnaítear go spreagtar fuath i gcoinne inimircigh Mhoslamacha sa phostáil;

E.  de bhrí go bhfuil Beata Mazurek ar dhuine de na daoine atá i staid chomhchosúil mar gheall ar na cionta líomhnaithe atá i gceist, agus gurb é an t-aon difríocht atá ann faoi láthair go bhfuil díolúine aici mar Fheisire de Pharlaimint na hEorpa; de bhrí gur cheart a cur san áireamh, dá bhrí sin, nach í Beata Mazurek an t-aon duine amháin a d’fhéadfaí a chúiseamh sa chás atá i gceist;

F.  de bhrí gur toghadh Beata Mazurek chuig Parlaimint na hEorpa i dtoghcháin an 26 Bealtaine 2019;

G.  de bhrí nach mbaineann an choir líomhnaithe le tuairimí ná vótaí a chaith Beata Mazurek i gcomhlíonadh a dualgas mar Fheisire de Pharlaimint na hEorpa, de réir bhrí Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh; go mbaineann an iarraidh ar tharscaoileadh díolúine, sa chás seo, le fíorais a bhaineann le gníomhaíochtaí de chineál áitiúil roimh an stádas a fháil agus dá dhroim sin roimh an díolúine mar Fheisire de Pharlaimint na hEorpa;

H.  de bhrí gurb é is cuspóir do dhíolúine pharlaiminteach ná Parlaimint na hEorpa agus a Fheisirí a chosaint ar imeachtaí dlíthiúla a bhaineann le gníomhaíochtaí a dhéantar agus dualgais pharlaiminteacha á gcomhlíonadh agus nach féidir í a dhealú ó na dualgais sin;

I.  de bhrí go bhforáiltear le hAirteagal 9 de Phrótacal Uimh. 7 ar Phribhléidí agus Díolúintí an Aontais Eorpaigh go dteachtfaidh Feisirí de Pharlaimint na hEorpa, ina gcríoch náisiúnta, na díolúintí a thugtar do chomhaltaí Pharlaimint a Stáit;

J.  de bhrí, de bhun Airteagal 105(2) agus Airteagal 108 de Bhunreacht Phoblacht na Polainne an 2 Aibreán 1997, agus de bhun Airteagal 7 (1), (2) agus (4), Airteagal 7b(1) agus Airteagal 7c(1) de Dhlí an 9 Bealtaine 1996 maidir le comhlíonadh dhualgais Feisire agus Seanadóra(2), nach bhféadfar éisteacht a thabhairt d’fheisire mar dhuine atá faoi dhrochamhras agus nach féidir é nó í a chur faoi dhliteanas coiriúil gan údarú ó Pharlaimint na hEorpa;

K.  de bhrí nach féidir le Parlaimint na hEorpa ról cúirte a ghlacadh, agus de bhrí nach féidir, i nós imeachta um dhíolúine a tharscaoileadh, Feisire a mheas mar ‘cosantóir’(3);

L.  de bhrí, sa chás sin, nár tháinig an Pharlaimint ar fhianaise fumus persecutionis, i.e. gnéithe fíorasacha lena léirítear go bhféadfadh sé a bheith mar bhunchuspóir an nós imeachta dhlíthiúil damáiste a dhéanamh do ghníomhaíocht pholaitiúil an Fheisire, agus do Pharlaimint na hEorpa, dá bhrí sin;

1.  ag cinneadh díolúine Beata Mazurek a tharscaoileadh;

2.  á threorú dá hUachtarán an cinneadh seo agus tuarascáil a coiste fhreagraigh a chur ar aghaidh láithreach chuig údaráis inniúla Phoblacht na Polainne agus chuig Beata Mazurek.

(1) breithiúnas ón gCúirt Bhreithiúnais an 21 Deireadh Fómhair 2008, Marra v De Gregorio agus Clemente, C-200/07 agus C-201/07, ECLI:EU:C:2008:579; breithiúnas ón gCúirt Ghinearálta an 19 Márta 2010, Gollnisch v Parlaimint, T-42/06, ECLI:EU:T:2010:102; breithiúnas ón gCúirt Bhreithiúnais an 6 Meán Fómhair 2011, Patriciello, C-163/10, ECLI:EU:C:2011:543; breithiúnas ón gCúirt Ghinearálta an 17 Eanáir 2013, Gollnisch v an Pharlaimint, T-346/11 agus T-347/11, ECLI:EU:T:2013:23; breithiúnas ón gCúirt Bhreithiúnais an 19 Nollaig 2019, Junqueras Vies, C-502/19, ECLI:EU:C:2019:1115. (2) Iris Oifigiúil 2022.1339, leagan códaithe. (3) breithiúnas ón gCúirt Ghinearálta an 30 Aibreán 2019, Briois v Parlaimint, T-214/18, ECLI:EU:T:2019:266;