Tá Parlaimint na hEorpa,

–  ag féachaint don iarraidh ar tharscaoileadh dhíolúine Tomasz Piotr Poręba, a thíolaic an XIVú Rannán Coiriúil de Chúirt Dúiche Vársá-Mokotów an 13 Nollaig 2022 maidir le himeachtaí coiriúla tar éis díotáil shibhialta a thaisceadh agus a cuireadh in iúl sa suí iomlánach an 13 Feabhra 2023,

–  ag féachaint don fhíoras gur tharscaoil Tomasz Piotr Poręba a ceart éisteacht a fháil, i gcomhréir le hAirteagal 9(6) dá Rialacha Nós Imeachta,

–  ag féachaint d’Airteagail 8 agus 9 de Phrótacal Uimh. 7 ar Phribhléidí agus Díolúintí an Aontais Eorpaigh agus d’Airteagal 6(2) d’Ionstraim an 20 Meán Fómhair 1976 maidir le toghadh chomhaltaí Pharlaimint na hEorpa trí vótáil chomhchoiteann dhíreach,

–  ag féachaint do na breithiúnais a thug Cúirt Bhreithiúnais an Aontais Eorpaigh (CBAE) an 21 Deireadh Fómhair 2008, an 19 Márta 2010, an 6 Meán Fómhair 2011, an 17 Eanáir 2013 agus an 19 Nollaig 2019(1),

–  ag féachaint d’Airteagal 105(2) agus d’Airteagal 108 de Bhunreacht Phoblacht na Polainne, mar aon le hAirteagal 7b(1) agus Airteagal 7c(1) de dhlí na Polainne ón 9 Bealtaine 1996 ar shainordú Feisire agus Seanadóra de chuid na Polainne a chomhlíonadh,

–  ag féachaint do Riail 5(2), do Riail 6(1) agus do Riail 9 dá Rialacha Nós Imeachta,

–  ag féachaint don tuarascáil ón gCoiste um Ghnóthaí Dlíthiúla (A9-0348/2023),

A.  de bhrí, an 13 Nollaig 2022, gur thíolaic breitheamh den XIVú Rannán Coiriúil de Chúirt Dúiche Vársá-Mokotów iarraidh ar dhíolúine pharlaiminteach Tomasz Piotr Poręba, a toghadh sa Pholainn, a tharscaoileadh, ar iarraidh í a chuir duine aonair faoina bhráid ar bhonn postála ar chuntas Twitter Pháirtí an Dlí agus an Cheartais a líomhnaítear go bhfuil ábhar inti a spreagann fuath náisiúnta, eitneach, ciníoch agus reiligiúnach; de bhrí go bhfuair Cúirt Dúiche Vársá-Mokotów, an 17 Samhain 2021, an díotáil arna gcur isteach ag ionadaí an ionchúisitheora ionadaigh; de bhrí gur iarr an t-ionadaí ar an gcúirt freisin a iarraidh ar údarú chun imeachtaí coiriúla a thionscnamh i gcoinne Tomasz Piotr Poręba a chur ar aghaidh chuig Parlaimint na hEorpa;

B.  de bhrí gur chuir an t-údarás breithiúnach an iarraidh sin ar tharscaoileadh díolúine pharlaiminteach ar aghaidh i gcomhréir le hAirteagal 9(12) de Rialacha Nós Imeachta Pharlaimint na hEorpa; ag tabhairt aird, áfach, ar an bhfíric go gceanglaítear faoi Riail 9(1) dá Rialacha Nós Imeachta go mbeidh gach iarraidh ar dhíolúine a tharscaoileadh seolta ag ‘údarás inniúil Ballstáit’, agus nach ionann an dá choincheap; de bhrí go gcinntear brí an téarma ‘údarás inniúil Ballstáit’ leis an dlí náisiúnta is infheidhme; de bhrí, i gcás na Polainne, gur cheart tagairt a dhéanamh d’fhorálacha Airteagal 7b(1) de Dhlí na Polainne an 9 Bealtaine 1996 maidir le sainordú Feisire agus Seanadóra de chuid na Polainne a chomhlíonadh, lena bhforáiltear gur tríd an Ard-Ionchúisitheoir a dhéanfar iarraidh ar údarú chun imeachtaí coiriúla a thionscnamh i gcoinne Feisire nó Seanadóra i gcás cion is inphionóis le hionchúiseamh poiblí; de bhrí, sa chás seo, gur seoladh an iarraidh chuig an Ard-Ionchúisitheoir, a rinne an t-iarratas a sheoladh ar ais, áfach, ar an bhforas go raibh ‘cúiseamh ionadach’ san áireamh freisin sa ‘cúiseamh príobháideach’ agus go raibh an iarraidh ar dhíolúine Feisire den Pharlaimint a tharscaoileadh laistigh de dhlínse na cúirte ar tugadh an cás os a comhair;

C.  de bhrí go ndearna ionadaí an ionchúisitheora ionadaigh iarratas a chur faoi bhráid na cúirte ar chead chun imeachtaí coiriúla a thionscnamh in aghaidh Tomasz Piotr Poręba, i measc daoine eile, as gníomhaíocht a thagann faoi Airteagal 256(2) de Chód Coiriúil na Polainne;

D.  de bhrí, an 17 Deireadh Fómhair 2018, gur foilsíodh fógra toghcháin dar teideal ‘Bezpieczny samorząd’ (bardasacht shlán) ar na meáin shóisialta ar chuntas Twitter Pháirtí an Dlí agus an Cheartais faoi chuimse na dtoghchán bardasach a reachtáladh an 21 Deireadh Fómhair 2018 sa Pholainn; de bhrí gur chuidigh Tomasz Piotr Poręba, i measc daoine eile, lena scaipeadh; de bhrí go líomhnaítear go spreagtar fuath i gcoinne inimircigh Mhoslamacha sa phostáil;

E.  de bhrí go bhfuil Tomasz Piotr Poręba ar dhuine de na daoine atá i staid chomhchosúil mar gheall ar an gcion líomhnaithe atá i gceist, agus gurb é an t-aon difríocht atá ann faoi láthair go bhfuil díolúine aige mar Fheisire de Pharlaimint na hEorpa; de bhrí gur cheart a chur san áireamh, dá bhrí sin, nach é Tomasz Piotr Poręba an t-aon duine amháin a d’fhéadfaí a chúiseamh sa chás atá i gceist;

F.  de bhrí gur toghadh Tomasz Piotr Poręba chuig Parlaimint na hEorpa sna toghcháin in 2019;

G.  de bhrí nach mbaineann an cion líomhnaithe le tuairimí nó vótaí a chaith Tomasz Piotr Poręba i gcomhlíonadh a dualgas mar Fheisire de Pharlaimint na hEorpa, de réir bhrí Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh ach go mbaineann sé le gníomhaíochtaí de chineál áitiúil;

H.  de bhrí gurb é is cuspóir do dhíolúine pharlaiminteach ná Parlaimint na hEorpa agus a Feisirí a chosaint ar imeachtaí dlíthiúla a bhaineann le gníomhaíochtaí a dhéantar agus dualgais pharlaiminteacha á gcomhlíonadh agus nach féidir í a dhealú ó na dualgais sin;

I.  de bhrí go bhforáiltear le hAirteagal 9 de Phrótacal Uimh. 7 ar Phribhléidí agus Díolúintí an Aontais Eorpaigh go dteachtfaidh Feisirí de Pharlaimint na hEorpa, ina gcríoch náisiúnta, na díolúintí a thugtar do chomhaltaí Pharlaimint a Stáit;

J.  de bhrí, de bhun Airteagal 105(2) agus Airteagal 108 de Bhunreacht Phoblacht na Polainne an 2 Aibreán 1997, agus de bhun Airteagal 7 (1), (2) agus (4), Airteagal 7b(1) agus Airteagal 7c(1) de Dhlí an 9 Bealtaine 1996 maidir le comhlíonadh dhualgais Feisire agus Seanadóra(2), nach bhféadfar éisteacht a thabhairt d’fheisire mar dhuine atá faoi dhrochamhras agus nach féidir é nó í a chur faoi dhliteanas coiriúil gan údarú ó Pharlaimint na hEorpa;

K.  de bhrí nach féidir le Parlaimint na hEorpa ról cúirte a ghlacadh, agus de bhrí nach féidir, i nós imeachta um dhíolúine a tharscaoileadh, Feisire a mheas mar ‘cosantóir’(3);

L.  de bhrí, sa chás seo, nár tháinig an Pharlaimint ar fhianaise fumus persecutionis, i.e. gnéithe fíorasacha lena léirítear go bhféadfadh sé a bheith mar bhunchuspóir an nós imeachta dhlíthiúil dochar a dhéanamh do ghníomhaíocht pholaitiúil an Fheisire, agus do Pharlaimint na hEorpa, dá bhrí sin;

1.  ag cinneadh dhíolúine Tomasz Piotr Poręba a tharscaoileadh;

2.  á threorú dá hUachtarán an cinneadh seo agus tuarascáil a coiste fhreagraigh a chur ar aghaidh láithreach chuig údaráis inniúla Phoblacht na Polainne agus chuig Tomasz Piotr Poręba.

(1) Breithiúnas ón gCúirt Bhreithiúnais an 21 Deireadh Fómhair 2008, Marra v De Gregorio agus Clemente, C-200/07 agus C-201/07, ECLI:EU:C:2008:579; breithiúnas ón gCúirt Ghinearálta an 19 Márta 2010, Gollnisch v Parlaimint, T-42/06, ECLI:EU:T:2010:102; breithiúnas ón gCúirt Bhreithiúnais an 6 Meán Fómhair 2011, Patriciello, C-163/10, ECLI:EU:C:2011:543. breithiúnas ón gCúirt Ghinearálta an 17 Eanáir 2013, Gollnisch v an Pharlaimint, T-346/11 agus T-347/11, ECLI:EU:T:2013:23; breithiúnas ón gCúirt Bhreithiúnais an 19 Nollaig 2019, Junqueras Vies, C-502/19, ECLI:EU:C:2019:1115. (2) Iris Oifigiúil 2022.1339, leagan códaithe. (3) Breithiúnas ón gCúirt Ghinearálta an 30 Aibreán 2019, Briois v Parlaimint, T-214/18, ECLI:EU:T:2019:266;