Iċ-ċittadini: id-drittijiet fundamentali, is-sigurtà u l-ġustizzja

Iċ-ċittadini tal-UE jgawdu d-dritt li jivvjaġġaw, jgħixu u jaħdmu liberament madwar l-Unjoni, bl-appoġġ ta’ qafas legali u istituzzjonali li jkompli jevolvi. Il-Karta tad-Drittijiet Fundamentali tikkonsolida d-drittijiet individwali skont prinċipji ewlenin bħad-dinjità tal-bniedem, il-libertajiet fundamentali, l-ugwaljanza, is-solidarjetà, id-drittijiet taċ-ċittadini, u l-ġustizzja. L-Unjoni tippromwovi u tipproteġi d-drittijiet fundamentali, l-istat tad-dritt, u l-valuri demokratiċi, inkluż fl-oqsma tal-ġustizzja u l-affarijiet interni, l-immigrazzjoni u l-ażil, u l-ugwaljanza bejn il-ġeneri. Iċ-ċittadini għandhom id-dritt li jressqu petizzjoni quddiem il-Parlament Ewropew u li jipparteċipaw direttament fit-tfassil tal-liġijiet tal-UE permezz tal-Inizjattiva taċ-Ċittadini Ewropej. L-affarijiet legali u kostituzzjonali għandhom rwol ċentrali biex jiżguraw li l-leġiżlazzjoni tal-UE tirrispetta dawn id-drittijiet u tikkonforma mat-Trattati. It-Trattat ta’ Liżbona saħħaħ ir-responsabbiltà demokratika fl-oqsma tal-libertà, is-sigurtà u l-ġustizzja, u espanda r-rwol tal-parlamenti nazzjonali u tal-Qorti tal-Ġustizzja tal-UE. Il-politiki kulturali u edukattivi jikkontribwixxu wkoll għall-promozzjoni ta’ valuri u drittijiet fundamentali kondiviżi madwar l-Unjoni.