Qafas finanzjarju pluriennali

Sal-lum ġew adottati sitt oqfsa finanzjarji pluriennali (QFP), inkluż il-QFP 2021-2027. It-Trattat ta’ Liżbona ttrasforma l-QFP minn ftehim interistituzzjonali għal regolament. Stabbilit għal perjodu ta’ mill-inqas ħames snin, l-għan tal-QFP huwa li jiżgura li n-nefqa tal-UE tiżviluppa b’mod ordnat u fil-limiti tar-riżorsi proprji tagħha. Dan jistabbilixxi d-dispożizzjonijiet li magħhom irid jikkonforma l-baġit annwali tal-UE. Ir-Regolament dwar il-QFP jistabbilixxi limiti massimi għan-nefqa għall-kategoriji wiesgħa tal-infiq imsejħa intestaturi. Wara l-proposti inizjali tagħha tat-2 ta’ Mejju 2018 u wara t-tifqigħa tal-COVID-19, fis-27 ta’ Mejju 2020 il-Kummissjoni pproponiet pjan ta’ rkupru (NextGenerationEU) li kien jinkludi proposti riveduti għall-QFP 2021-2027 u r-riżorsi proprji, u l-istabbiliment ta’ strument ta’ rkupru b’valur ta’ EUR 750 biljun (fi prezzijiet tal-2018). Il-pakkett ġie adottat fis-16 ta’ Diċembru 2010 wara li seħħew in-negozjati interistituzzjonali. Rieżami tal-funzjonament tal-QFP, u, kif xieraq, proposti għal reviżjoni, huma mistennija sal-1 ta’ Jannar 2024, data li l-Parlament talab li tiġi antiċipata.

Il-bażi ġuridika

• L-Artikolu 312 tat-Trattat dwar il-Funzjonament tal-Unjoni Ewropea;
• Ir-Regolament tal-Kunsill (UE, Euratom) 2020/2093 tas-17 ta’ Diċembru 2020 li jistabbilixxi l-qafas finanzjarju pluriennali għas-snin mill-2021 sal-2027;
• Ir-Regolament tal-Kunsill (UE) 2020/2094 tal-14 ta’ Diċembru 2020 li jistabbilixxi Strument tal-Unjoni Ewropea għall-Irkupru biex jappoġġa l-irkupru wara l-kriżi tal-COVID-19
• Ftehim Interistituzzjonali tas-16 ta’ Diċembru 2020 bejn il-Parlament Ewropew, il-Kunsill u l-Kummissjoni Ewropea dwar dixxiplina baġitarja, dwar kooperazzjoni f’materji baġitarji u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta’ riżorsi proprji ġodda.

L-isfond

Fis-snin tmenin, inħolqot atmosfera ta’ kunflitt fir-relazzjonijiet bejn l-istituzzjonijiet minħabba inkompatibbiltà dejjem akbar bejn ir-riżorsi disponibbli u l-ħtiġijiet reali tal-baġit. Il-kunċett ta’ perspettiva finanzjarja pluriennali ġie żviluppat bħala tentattiv biex inaqqas il-kunflitt, iżid id-dixxiplina baġitarja u jtejjeb l-implimentazzjoni permezz ta’ ppjanar aħjar. L-ewwel ftehim interistituzzjonali (FII) għal dan il-għan ġie konkluż fl-1988. Dan kien fih il-perspettiva finanzjarja għall-1988-1992 (magħrufa wkoll bħala l-pakkett Delors I), li kellha l-għan li tforni r-riżorsi meħtieġa għall-implimentazzjoni baġitarja tal-Att Uniku Ewropew. Fid-29 ta’ Ottubru 1993 intlaħaq qbil dwar FII ġdid, flimkien mal-perspettiva finanzjarja għall-1993-1999 (il-pakkett Delors II), li ppermetta l-irduppjar tal-Fondi Strutturali u ż-żieda tal-limitu massimu tar-riżorsi proprji (1.4.1.1). It-tielet FII dwar il-perspettiva finanzjarja għall-2000-2006, magħruf ukoll bħala l-Aġenda 2000, ġie ffirmat fis-6 ta’ Mejju 1999, u wieħed mill-għanijiet ewlenin tiegħu kien li jiżgura r-riżorsi neċessarji għall-finanzjament tat-tkabbir. Il-qbil dwar ir-raba’ FII, li kopra l-perjodu 2007-2013, intlaħaq fis-17 ta’ Mejju 2006.

It-Trattat ta’ Liżbona ttrasforma l-QFP minn ftehim interistituzzjonali għal regolament tal-Kunsill li għandu jiġi adottat unanimament, suġġett għall-approvazzjoni tal-Parlament Ewropew, skond proċedura leġiżlattiva speċjali. Minbarra li jiddetermina “l-ammonti tal-limiti massimi annwali ta’ approprjazzjonijiet għal impenji skont il-kategorija tal-infiq u tal-limitu massimu annwali ta’ approprjazzjonijiet għall-pagamenti”, l-Artikolu 312 tat-Trattat dwar il-Funzjonament tal-Unjoni Ewropea (TFUE) jiddikjara li l-QFP irid ukoll “jistabbilixxi kwalunkwe dispożizzjoni oħra meħtieġa għat-tħaddim tajjeb tal-proċedura annwali tal-baġit”.

Il-ħames QFP, li jkopri l-perjodu 2014-2020, kien l-ewwel wieħed li ra tnaqqis fl-ammonti globali f’termini reali. Waħda mill-prekundizzjonijiet tal-Parlament biex jaċċetta l-QFP kienet għalhekk reviżjoni obbligatorja ta’ nofs it-terminu li tagħti lok għall-valutazzjoni mill-ġdid u l-aġġustament tal-ħtiġijiet baġitarji matul il-perjodu tal-QFP, jekk dan ikun meħtieġ. Il-ftehim żgura wkoll, inter alia, aktar flessibbiltà biex jippermetti l-użu sħiħ tal-ammonti ppjanati u fehim dwar it-triq lejn sistema ġenwina ta’ riżorsi proprji għall-UE. Fl-20 ta’ Ġunju 2017 ġie adottat QFP rivedut għall-2014-2020 b’appoġġ addizzjonali għall-miżuri relatati mal-migrazzjoni, l-impjiegi u t-tkabbir. L-Istrument ta’ Flessibbiltà u r-Riżerva ta’ Għajnuna f’Emerġenza ġew imsaħħa wkoll, u dan ippermetta li aktar fondi jiġu trasferiti aktar faċilment bejn l-intestaturi u s-snin tal-baġit, sabiex tkun possibbli reazzjoni għal avvenimenti mhux previsti u għal prijoritajiet ġodda.

Il-qafas finanzjarju pluriennali 2021-2027

Fit-2 ta’ Mejju 2018, il-Kummissjoni ppreżentat proposti leġiżlattivi għal QFP li jkopri s-snin mill-2021 sal-2027. Il-proposta tal-Kummissjoni kienet tammonta għal EUR 1 134.6 biljun (fi prezzijiet tal-2018) f’approprjazzjonijiet ta’ impenn, li jirrappreżentaw 1.11% tal-ING tal-UE-27. Din kien fiha, fost oħrajn, żidiet għall-ġestjoni tal-fruntieri, il-migrazzjoni, is-sigurtà, id-difiża, il-kooperazzjoni għall-iżvilupp u r-riċerka. Ġie propost tnaqqis b’mod partikolari għall-politika ta’ koeżjoni u dik agrikola. L-arkitettura ġenerali kellha tiġi razzjonalizzata (37 programm ta’ nefqa minflok 58) u l-Kummissjoni pproponiet sett ta’ strumenti speċjali barra mil-limiti massimi tal-QFP biex tittejjeb il-flessibbiltà fl-ibbaġitjar tal-UE. Il-Fond Ewropew għall-Iżvilupp (FEŻ) se jkun integrat fil-QFP. Il-Kummissjoni pproponiet ukoll li timmodernizza s-sistema tad-dħul, bl-introduzzjoni ta’ diversi kategoriji ġodda ta’ riżorsi proprji.

Fl-14 ta’ Marzu 2018 u fit-30 ta’ Mejju 2018 il-Parlament adotta riżoluzzjonijiet dwar il-QFP għall-2021-2027. Fl-14 ta’ Novembru 2018, il-Parlament kompla jiddeskrivi l-mandat ta’ negozjar tiegħu, inklużi l-emendi għar-Regolament dwar il-QFP u għall-proposti għall-FII, u ġabra sħiħa ta’ ċifri bi tqassim skont l-intestatura u l-programm. Huwa speċifika li l-limitu massimu tal-QFP għall-impenji għandu jiżdied mill-1.0% (għall-UE-28) għall-1.3% tal-ING tal-UE (għall-UE-27), jiġifieri EUR 1 324 biljun (fi prezzijiet tal-2018), li jikkorrispondu għal żieda ta’ 16.7% fuq il-proposta tal-Kummissjoni. L-allokazzjonijiet għall-politika agrikola komuni u l-politika ta’ koeżjoni għandhom jibqgħu l-istess f’termini reali, filwaqt li diversi prijoritajiet – inklużi Orizzont Ewropa, Erasmus+ u LIFE – għandhom jissaħħu aktar; għandhom jinħolqu Garanzija għat-Tfal ġdida (EUR 5.9 biljun) u Fond għal Tranżizzjoni Enerġetika ġdid (EUR 4.8 biljun); il-finanzjament għall-aġenziji deċentralizzati involuti fil-migrazzjoni u l-ġestjoni tal-fruntieri għandu jiżdied b’aktar minn erba’ darbiet (għal aktar minn EUR 12-il biljun). Il-kontribuzzjoni tal-baġit tal-UE għall-ilħuq tal-objettivi klimatiċi għandha tiġi stabbilita fuq minimu ta’ 25% tan-nefqa tal-QFP għall-2021-2027, tiġi integrata fl-oqsma ta’ politika rilevanti kollha, u tiżdied għal 30% sa mhux aktar tard mill-2027. Ir-reviżjoni ta’ nofs it-terminu tal-QFP għandha tkun obbligatorja.

Fit-30 ta’ Novembru 2018 u fil-5 ta’ Diċembru 2019, il-Kunsill ippubblika abbozz ta’ “kaxxa ta’ negozjar”, li tinkludi wkoll kwistjonijiet orizzontali u settorjali li normalment jaqgħu taħt il-programmi ta’ nfiq suġġetti għall-proċedura leġiżlattiva ordinarja (li safa kkritikat mill-Parlament)[1]. Il-Kunsill kien favur ammont globali tal-QFP ta’ EUR 1 087 biljun f’approprjazzjonijiet ta’ impenn, fi prezzijiet tal-2018 (1.07% tal-ING tal-UE-27), ferm aktar baxx mill-aspettattivi tal-Parlament.

Fl-10 ta’ Ottubru 2019 u fit-13 ta’ Mejju 2020, il-Parlament aġġorna l-mandat tiegħu wara l-elezzjonijiet Ewropej u talab lill-Kummissjoni tippreżenta proposta għal pjan ta’ kontinġenza tal-QFP biex tipprovdi xibka ta’ sikurezza biex tipproteġi l-benefiċjarji tal-programmi tal-Unjoni f’każ li jkun hemm bżonn li l-QFP attwali jiġi estiż, fid-dawl tan-nuqqas ta’ qbil fi ħdan il-Kunsill Ewropew.

Sadattant, fl-14 ta’ Jannar 2020, il-Kummissjoni ressqet proposta għal Fond għal Tranżizzjoni Ġusta bħala element addizzjonali fil-pakkett ta’ proposti għall-QFP, bħala parti mill-Patt Ekoloġiku Ewropew.

Fid-dawl tal-kriżi tal-COVID-19 u l-effetti ekonomiċi serji tal-lockdowns meħtieġa, il-Kummissjoni ppubblikat proposti emendati fis-27 u t-28 ta’ Mejju 2020[2] għal QFP ta’ EUR 1 100 biljun u strument ta’ rkupru addizzjonali, NextGenerationEU (NGEU)[3], b’valur ta’ EUR 750 biljun (fi prezzijiet tal-2018), li minnhom EUR 500 biljun se jitħallsu fil-forma ta’ għotjiet u EUR 250 biljun fil-forma ta’ self. Il-pakkett kien jinvolvi proposti leġiżlattivi għal strumenti finanzjarji ġodda kif ukoll bidliet għall-programmi tal-QFP diġà mressqa. Il-finanzjament tal-pakkett addizzjonali kellu jiġi żgurat billi jittieħed self fis-swieq finanzjarji. Għal dan il-għan, il-Kummissjoni emendat ukoll il-proposta għal Deċiżjoni dwar ir-Riżorsi Proprji biex tippermetti s-self sas-somma ta’ EUR 750 biljun. Finalment, il-pakkett tal-Kummissjoni kien jinkludi żieda ta’ EUR 11.5 miljun fil-limitu massimu għall-impenji għas-sena 2020 fi ħdan il-QFP 2014-2020, bil-għan li jiġi mobilizzat l-appoġġ qabel il-QFP il-ġdid.

Fil-21 ta’ Lulju 2020, il-Kunsill Ewropew adotta konklużjonijiet[4] dwar l-isforz ta’ rkupru (NextGenerationEU), il-QFP 2021-2027, u r-riżorsi proprji. Sforz ta’ rkupru fl-ammont ta’ EUR 750 biljun ġie approvat għas-snin 2021-2023. Madankollu, il-komponent tal-għotjiet tnaqqas minn EUR 500 biljun għal EUR 390 biljun u dak tas-self żdied minn EUR 250 biljun għal EUR 360 biljun. Il-Kunsill Ewropew irrifjuta r-reviżjoni ’l fuq tal-limitu massimu tal-QFP għas-sena 2020. Il-limitu massimu globali għall-impenji fil-QFP 2021-2027 ġie stabbilit f’EUR 1 074.3 biljun. Barra minn hekk, il-konklużjonijiet iddikjaraw li kien ser jiġi introdott reġim ta’ kondizzjonalità biex jiġu protetti l-baġit u l-NGEU. Mill-1 ta’ Jannar 2021 intlaħaq qbil dwar riżorsa proprja ġdida bbażata fuq l-iskart mill-imballaġġ tal-plastik mhux riċiklat u kienet ippjanata ħidma favur l-introduzzjoni ta’ riżorsi proprji oħra matul il-QFP 2021-2027, biex jintużaw għall-ħlasijiet lura bikrija tas-self fil-qafas tan-NGEU. Il-bażi ġuridika proposta tal-NGEU kienet l-Artikolu 122 tat-TFUE, li jippermetti lill-UE tistabbilixxi miżuri xierqa għas-sitwazzjoni ekonomika b’maġġoranza kwalifikata fil-Kunsill, mingħajr ma jiġi involut il-Parlament fil-proċedura leġiżlattiva.

Il-Parlament immedjatament irreaġixxa għal dawn il-konklużjonijiet f’riżoluzzjoni adottata fit-23 ta’ Lulju 2020, li fiha talab il-ħolqien tal-istrument ta’ rkupru bħala att storiku, iżda ddeplora t-tnaqqis li sar għal programmi orjentati lejn il-futur. Insista li żidiet immirati flimkien maċ-ċifri proposti mill-Kunsill Ewropew iridu jiffokaw fuq programmi relatati mal-klima, it-tranżizzjoni diġitali, is-saħħa, iż-żgħażagħ, il-kultura, l-infrastruttura, ir-riċerka, il-ġestjoni tal-fruntieri u s-solidarjetà. Barra minn hekk, huwa tenna li mhux se jagħti l-approvazzjoni tiegħu għall-QFP mingħajr ftehim dwar ir-riforma tas-sistema tar-riżorsi proprji tal-UE, bil-għan li tal-inqas jiġu koperti l-ispejjeż relatati mal-NGEU (il-kapital u l-interess), sabiex jiġu żgurati l-kredibbiltà u s-sostenibbiltà tiegħu. Il-Parlament talab ukoll, bħala parti mill-awtorità baġitarja, li jkun involut bis-sħiħ fl-istrument ta’ rkupru, f’konformità mal-metodu Komunitarju.

It-taħditiet trilaterali bejn il-Parlament, il-Kunsill u l-Kummissjoni bdew f’Awwissu 2020 u ġew konklużi fl-10 ta’ Novembru 2020. Ir-Regolament tal-Kunsill dwar il-QFP 2021-2027 ġie adottat fis-17 ta’ Diċembru, wara l-approvazzjoni tal-Parlament.

Is-27 Stat Membru kollha rratifikaw id-Deċiżjoni dwar ir-Riżorsi Proprji sal-31 ta’ Mejju 2021, u dan ippermetta lill-UE tibda toħroġ dejn fis-swieq kapitali taħt l-NGEU.

Mekkaniżmu ġdid li jipproteġi l-baġit tal-UE minn ksur tal-prinċipji tal-istat tad-dritt, li jikkostitwixxi kundizzjoni oħra stabbilita mill-Parlament għall-approvazzjoni tiegħu, daħal fis-seħħ fl-1 ta’ Jannar 2021.

Qafas finanzjarju pluriennali (UE-27) (EUR miljun, prezzijiet tal-2018)

Il-Parlament irnexxielu jiggarantixxi b’mod partikolari:

• Ammont addizzjonali ta’ EUR 15-il biljun meta mqabbel mal-proposta ta’ Lulju 2020, għall-programmi ewlenin: Orrizont Ewropa, Erasmus+, il-programm l-UE għas-Saħħa, InvestEU, il-Fond għall-Ġestjoni tal-Fruntieri, l-Istrument ta’ Viċinat, ta’ Kooperazzjoni għall-Iżvilupp u ta’ Kooperazzjoni Internazzjonali (NDICI), l-Għajnuna Umanitarja, il-programm dwar id-Drittijiet u l-Valuri, Ewropa Kreattiva ;
• Pjan direzzjonali legalment vinkolanti għall-introduzzjoni ta’ riżorsi proprji ġodda tal-UE;
• Żieda progressiva tal-limitu massimu kumplessiv għall-QFP 2021-2027 minn EUR 1 074.3 biljun għal EUR 1 085.3 biljun fi prezzijiet tal-2018 (spjegazzjoni hawn isfel);
• Ammont addizzjonali ta’ EUR 1 biljun għall-Istrument ta’ Flessibbiltà;
• Pass proċedurali ġdid (il-“proċedura ta’ skrutinju baġitarju”) għall-istabbiliment ta’ mekkaniżmi futuri għal kriżi bbażati fuq l-Artikolu 122 tat-TFUE, b’implikazzjonijiet baġitarji potenzjalment sinifikanti;
• L-involviment tal-Parlament fl-użu tad-dħul assenjat estern (EAR) tal-NGEU, rivalutazzjoni ġenerali tal-EAR u l-għoti u t-teħid b’self fir-reviżjoni li jmiss tar-Regolament Finanzjarju, u tal-arranġamenti għall-kooperazzjoni fin-negozjati futuri tal-QFP;
• Metodoloġija mtejba li tittraċċa l-klima biex tintlaħaq il-mira ta’ mill-inqas 30% tan-nefqa tal-QFP/NGEU biex jiġu appoġġati l-objettivi klimatiċi[5];
• Mira annwali ġdida tal-bijodiversità (7.5% fl-2024 u 10% fl-2026 u fl-2027) u t-tfassil ta’ metodoloġija biex titkejjel in-nefqa relevanti għall-ġeneru;
• Riforma tal-ġbir, il-kwalità u l-komparabbiltà tad-data dwar il-benefiċjarji sabiex il-baġit tal-UE jiġi protett aħjar, inkluża n-nefqa tal-NGEU.

Komponenti oħra tal-QFP 2021-2027 li jikkorrispondu għall-prijoritajiet tal-Parlament jinkludu:

• L-integrazzjoni tal-Fond Ewropew għall-Iżvilupp fil-baġit tal-UE;
• Il-livelli globali ta’ finanzjament għall-agrikoltura u l-koeżjoni ta’ daqs komparabbli għall-2014-2020;
• Il-ħolqien tal-Fond għal Tranżizzjoni Ġusta.

Is-sors ewlieni għaż-żidiet (EUR 11-il biljun) jiġi minn mekkaniżmu ġdid marbut mal-multi miġbura mill-Unjoni u jirriżulta f’allokazzjonijiet addizzjonali awtomatiċi għall-programmi kkonċernati fl-2022-2027. Il-limitu massimu globali ta’ seba’ snin tal-QFP għalhekk se jilħaq EUR 1 085.3 biljun fi prezzijiet tal-2018 b’mod inkrementali, jiġifieri EUR 2 biljun ogħla f’termini reali mil-limitu ekwivalenti tal-QFP 2014-2020 (EUR 1 083.3 biljun fi prezzijiet tal-2018 mingħajr ir-Renju Unit, u bil-FEŻ). Żidiet ulterjuri (EUR 2.5 biljun) jiġu minn bilanċi li jibqgħu mhux allokati fil-limiti massimi stabbiliti mill-Kunsill Ewropew. EUR 1 biljun jiġi minn rimborżi mill-Faċilità ta’ Investiment tal-AKP (Fond Ewropew għall-Iżvilupp) għall-benefiċċju tal-NDICI. EUR 0.5 biljun jiġi minn approprjazzjonijiet diżimpenjati fil-qasam tar-riċerka għall-benefiċċju ta’ Orizzont Ewropa (l-Artikolu 15(3) tar-Regolament Finanzjarju).

Skont il-FII, il-ħlasijiet lura u l-interessi tal-irkupru tad-dejn għandhom jiġu ffinanzjati mill-baġit tal-UE taħt il-limiti massimi tal-QFP għall-perjodu 2021-2027, “inkluż permezz ta’ dħul suffiċjenti minn riżorsi proprji ġodda introdotti wara l-2021”. Dan mingħajr preġudizzju għal kif din il-kwistjoni se tiġi indirizzata fil-QFP futuri mill-2028 ’l hemm u l-mira espressa li jiġu ppreservati l-programmi u l-fondi tal-UE.

Fit-22 ta’ Diċembru 2021, il-Kummissjoni pproponiet riżorsi proprji ġodda u emenda mmirata tar-Regolament QFP. Il-Parlament adotta riżoluzzjoni interim dwar din l-emenda fit-13 ta’ Settembru 2022. L-emenda hija mmirata, fost affarijiet oħra, biex jiġi introdott mekkaniżmu ġdid li jippermetti li l-limiti massimi jiżdiedu b’mod awtomatiku sabiex jakkomodaw kwalunkwe dħul addizzjonali li jirriżulta minn riżorsi proprji ġodda għall-ħlas lura bikri tad-dejn ta’ NextGenerationEU.

Il-Kummissjoni ddikjarat li sal-1 ta’ Jannar 2024[6] se tippreżenta rieżami tal-funzjonament tal-QFP u, jekk ikun il-każ, tressaq proposti ta’ reviżjoni. Fil-Komunikazzjoni tagħha tat-18 ta’ Mejju 2022 dwar l-għajnuna lill-Ukrajna u r-rikostruzzjoni tagħha, il-Kummissjoni ddikjarat li “dawn il-ħtiġijiet mhux previsti maħluqa mill-gwerra fl-Ewropa jmorru lil hinn mill-mezzi disponibbli fil-qafas finanzjarju pluriennali attwali”. ”.

Ir-Regolament tal-Kunsill (UE, Euratom) 2022/2496 emenda l-QFP bħala parti minn pakkett adottat mill-Parlament fl-24 ta’ Novembru 2022, skont proċedura ta’ urġenza. Dan jestendi l-kopertura baġitarja attwalment applikabbli għas-self lill-Istati Membri għal self ta’ assistenza makrofinanzjarja lill-Ukrajna, għas-snin 2023 u 2024: f’każ ta’ inadempjenza, l-ammonti meħtieġa jiġu mmobilizzati lil hinn mil-limiti massimi tal-QFP, sal-limiti tal-limitu massimu tar-riżorsi proprji (mill-hekk imsejjaħ marġni ta’ manuvra). Total ta’ EUR 18-biljun f’assistenza makrofinanzjarja huwa mistenni li jiġi pprovdut lill-Ukrajna fl-2023.

Fid-19 ta’ Mejju 2022, il-Parlament talab “proposta leġiżlattiva għal reviżjoni komprensiva tal-QFP mill-aktar fis possibbli u mhux aktar tard mill-ewwel trimestru tal-2023”. Biex jistabbilixxi l-aġenda, fil-15 ta’ Diċembru 2022, il-Parlament adotta riżoluzzjoni dwar “It-titjib tal-Qafas Finanzjarju Pluriennali 2021-2027:baġit reżiljenti tal-UE adattat għal sfidi ġodda”, li jistabbilixxi t-talbiet ewlenin tagħha:

• Flessibbiltà suffiċjenti u kapaċità ta’ rispons għall-kriżijiet,
• Riżorsi addizzjonali biex jiġu ffinanzjati ambizzjonijiet ġodda ta’ politika jew biex jagħmlu tajjeb għan-nuqqas ta’ finanzjament eżistenti,
• It-tqegħid tal-ħlas lura tad-dejn tan-NextGenerationEU lil hinn mil-limiti massimi tal-infiq biex titnaqqas il-pressjoni miż-żieda fir-rati tal-imgħax, jiġu salvagwardjati l-programmi u jinħoloq spazju biex il-baġit jirrispondi meta jkun meħtieġ.

Għal aktar informazzjoni dwar dan is-suġġett, żur is-sit web tal-Kumitat għall-Baġits.

 

Alix Delasnerie

04-2023