Rialacha nua chun sluamhaoiniú a éascú san Aontas Eorpach
Faoi rialacha nua a ceadaíodh sa Pharlaimint an 5 Deireadh Fómhair 2020, beidh ardáin shluamhaoinithe in ann deiseanna úra a chur ar fáil do ghnólachtaí nuathionscanta agus d’infheisteoirí.
D’fhaomh feisirí Pharlaimint na hEorpa an 5 Deireadh Fómhair rialacha nua a chuirfidh ar chumas ardáin shluamhaoinithe seirbhísí a sholáthar go héasca ar fud an mhargaidh aonair. A bhuí leis na rialacha úra, tiocfaidh méadú ar líon na n-infheisteoirí a bheidh ar fáil do ghnólachtaí beaga nuathionscanta, agus beidh rogha tionscadal níos leithne agus cosaint níos fearr ag infheisteoirí.
I gcás na n-ardán sluamhaoinithe sin a fheidhmíonn i níos mó ná ballstát AE amháin, ní bheidh orthu ach cloí le sraith bunrialacha aonair – an rialachán úr – seachas le rialacha éagsúla i ngach tír. Tá sé mar aidhm ag an treoir a ghabhann leis an rialachán go mbeidh rochtain níos fearr ar mhaoiniú ag gnólachtaí beaga. Leis na rialacha nua, cumhdófar feachtais shluamhaoinithe dar luach suas le €5 mhilliún thar thréimhse 12 mhí.
Cad is sluamhaoiniú ann?
I gcás gnólachtaí nuathionscanta, is minic a bhíonn iasacht ón bhanc ródhaor nó a bhíonn deacracht rochtain a fháil uirthi mar gheall ar easpa staire creidmheasa nó comhthaobhachta inláimhsithe.
Tugann soláthróirí shluamhaoinithe deis dóibh mar sin nascadh le hinfheisteoirí beaga agus maoiniú a fháil uathu, trí ardáin dhigiteacha de ghnáth.
Cén fáth a bhfuil gá le reachtaíocht shluamhaoinithe ar an leibhéal Eorpach?
Níl na rialacha náisiúnta maidir le sluamhaoiniú atá i bhfeidhm faoi láthair comhionann, agus is minic nach gcuireann soláthróirí sluamhaoinithe seirbhísí trasteorann ar fáil de dheasca na héiginnteachta dlíthiúla seo.
Tá deiseanna teoranta, mar sin, do ghnólachtaí a d’fhéadfadh leas a bhaint as infheistíocht ó líon mór daoine, go háirithe má fheidhmíonn siad i margaí beaga.
Cén cosaint a thabharfar d’infheisteoirí?
Baol amháin a bhaineann le sluamhaoiniú d’infheisteoirí ná gur minic a bhíonn a chinnteoireacht bunaithe ar mhothúcháin seachas ar shonraí. I measc na bhfadhbanna nach dtuarann infheisteoirí le gnólachtaí beaga tá féimheacht agus moill i seachadadh earraí. Éilítear faoi na rialacha nua go dtabharfaidh soláthróirí seirbhísí sluamhaoinithe eolas soiléir do chliaint maidir leis an bhaol a d’fhéadfadh a bheith ann le gach tionscadal.
An chéad chéim eile
Beidh feidhm ag na rialacha nua AE maidir le sluamhaoiniú bliain tar éis dóibh a bheith foilsithe san Iris Oifigiúil.
Tuilleadh eolais
- Preaseisiúint (5 Deireadh Fómhair 2020)
-
(oscail i gclib nua)
Suíomh gréasáin an Choimisiúin Eorpaigh
