X'inhuma gruppi politiċi u kif inhuma ffurmati? 

Wara l-elezzjonijiet, il-Membri tal-Parlament Ewropew jiffurmaw gruppi politiċi. Dawn il-gruppi jlaqqgħu flimkien lill-Membri tal-Parlament Ewropew minn Stati Membri differenti abbażi tal-affinitajiet politiċi tagħhom. Gruppi jistgħu jiġu ffurmati wkoll aktar tard matul il-mandat tal-Parlament. Bħalissa hemm 8 gruppi politiċi fil-Parlament Ewropew.

Biex jikseb l-istatus formali ta' grupp politiku, il-grupp jeħtieġlu jikkonsisti minn tal-anqas 23 MPE, li jiġu eletti f'tal-anqas kwart tal-Istati Membri (jiġifieri tal-anqas 7). Il-Membri jistgħu jagħmlu parti minn grupp politiku wieħed biss, filwaqt li xi wħud m'huma affiljati ma ebda grupp u huma magħrufa bħala "membri mhux affiljati".

Meta jiġi stabbilit grupp, Il-President tal-Parlament jeħtieġlu li jiġi notifikat b’dikjarazzjoni li tispeċifika l-isem tal-grupp, il-membri tiegħu u t-tmexxija tiegħu.

Meta jiffurmaw grupp, il-MPE jaċċettaw l-affinità politika awtomatikament u l-Parlament normalment ma jivvalutax l-affinità politika tal-membri tal-grupp. Huwa biss meta din l-affinità tinċaħad mill-Membri kkonċernati stess li l-Parlament jevalwa jekk il-grupp ikunx fil-fatt ġie ffurmat f'konformità mar-regoli.

Gruppi politiċi jistgħu jimpjegaw persunal u huma pprovduti b'uffiċċji, iffinanzjati mill-baġit tal-Parlament. Il-Bureau tal-Parlament jistabbilixxi r-regoli dwar kif dawn il-fondi u l-faċilitajiet huma ġestiti u awditjati. Il-fondi disponibbli għall-gruppi huma intenzjonati li jkopru mhux biss l-ispiża amministrattiva u operazzjonali tal-persunal ta' grupp iżda anke l-ispiża ta' attivitajiet politiċi u ta' informazzjoni b'rabta mal-attivitajiet politiċi tal-Unjoni Ewropea.

Il-baġit ma jistax jintuża biex tiġi ffinanzjata kwalunkwe forma ta' kampanja elettorali Ewropea, nazzjonali, reġjonali jew lokali jew biex jiġu ffinanzjati l-partiti politiċi fil-livell nazzjonali u Ewropew jew il-korpi dipendenti tagħhom.

Mhux il-Membri tal-Parlament Ewropew kollha jpoġġu fi grupp. Dawk li ma jpoġġux fi grupp huma msejħa membri "mhux affiljati". Huma intitolati wkoll għal persunal u għandhom drittijiet skont ir-regoli stabbiliti mill-Bureau.