Kif il-Parlament adatta biex ikompli jaħdem matul pandemija
Il-pandemija tal-COVID-19 ġiegħlet lill-Parlament jillimita l-laqgħat fiżiċi u jaħdem mill-bogħod, iżda l-Membri tal-PE qed ikomplu jieħdu miżuri urġenti u jimplimentaw prijoritajiet fit-tul
Il-Parlament kompla l-funzjonijiet ewlenin tiegħu – jiġifieri li jgħaddi l-liġijiet, japprova l-baġit tal-UE u jissorvelja lill-Kummissjoni – filwaqt li adatta biex jippermetti lill-kumitati u lill-plenarja jimplimentaw azzjonijiet meħtieġa biex l-UE twieġeb għall-Covid-19 kif ukoll prijoritajiet fit-tul bħall-Patt Ekoloġiku, is-servizzi diġitali, il-politika agrikola tal-UE, il-baġit fit-tul u l-Brexit.
Id-demokrazija ma tistax tiġi sospiża
Bħal miljuni ta' Ewropej oħra, il-Membri tal-PE u l-membri tal-persunal tal-Parlament bdew jaħdmu mid-dar minħabba l-miżuri ta' kwarantina u tbegħid soċjali li jinsabu fis-seħħ biex jiġi limitat it-tixrid tal-coronavirus. "Id-demokrazija ma tistax tiġi sospiża f'nofs kriżi daqshekk drammatika ... Bħala leġiżlaturi, għandna l-mezzi, il-possibbiltà u d-dmir li ngħinu", qal il-President tal-PE Sassoli qabel l-ewwel plenarja fejn qatt ittieħdet votazzjoni mill-bogħod f'Marzu 2020.
"Il-Parlament adatta ruħu biex jiżgura li jkun jista' jkompli jiffunzjona u li l-ilħna tal-membri jkunu jistgħu jinstemgħu",
Plenarja
Preċedentement, il-votazzjoni kienet teħtieġ preżenza fiżika fil-kamra. Skont ir-regoli, id-dritt tal-vot huwa wieħed personali u l-Membri tal-PE jitfgħu l-vot tagħhom individwalment u personalment.
Il-Parlament żviluppa sistema remota li hija kemm sikura, b'mekkaniżmi ta' verifika inkorporati, kif ukoll effiċjenti: Jekk fil-plenarja fl-aħħar ta' Marzu kien hemm dibattitu wieħed, tliet sessjonijiet ta' votazzjoni u 11-il vot, fil-plenarja fl-aħħar ta' Ottubru, kien hemm 18-il dibattitu, 13-il sessjoni ta' votazzjoni u aktar minn 1 500 vot.
Matul il-plenarja ta' Ottubru, il-Membri tal-PE setgħu jipparteċipaw fid-dibattiti mill-uffiċċji ta' kollegament tal-PE fl-Istati Membri tagħhom.
Filwaqt li s-sitwazzjoni serja tas-saħħa tfisser li s-sessjonijiet plenarji bħalissa qed iseħħu mill-bogħod, il-President qal li l-Parlament se jerġa' lura għas-sede tiegħu fi Strasburgu malli l-kundizzjonijiet ikun jippermettu dan.
Kumitati
Il-ħidma fil-kumitati wkoll ġiet adattata, u l-laqgħat qed isiru permezz tal-vidjokonferenzi jew f'format ibridu. L-interpretazzjoni u l-votazzjoni fil-kumitati nżammu.
Gruppi politiċi u korpi governattivi
Is-seba' gruppi politiċi u l-korpi governattivi tal-Parlament, bħalma hi l-Konferenza tal-Presidenti, ukoll qed ikomplu l-ħidma tagħhom mill-bogħod.
Aktar informazzjoni
- (iftaħ f’tab ġdida) Il-laqgħat tal-plenarja u tal-kumitati qed ikomplu jixxandru fuq l-internet:
- (iftaħ f’tab ġdida) EP Newshub – Segwi l-Membri tal-PE fuq il-midja soċjali