Il-progress tal-UE fl-għanijiet tagħha għat-tibdil fil-klima (infografika)
L-UE qabżet il-miri biex tnaqqas l-emissjonijiet ta' gassijiet serra tagħha sal-2020. Ara l-infografika tagħna biex issir taf aktar.
Il-ġlieda kontra t-tibdil fil-klima hija prijorità għall-UE. Hija impenjat ruħha għal sensiela ta' objettivi li jistgħu jitkejlu u ħadet diversi miżuri biex tnaqqas il-gassijiet serra. Xi progress sar s'issa?
L-għanijiet klimatiċi tal-UE għall-2020
Il-miri tal-UE għall-2020 ġew stabbiliti fil-pakkett dwar il-klima u l-enerġija adottat fl-2008. Wieħed mill-objettivi tiegħu kien tnaqqis ta' 20% fl-emissjonijiet ta' gassijiet serra meta mqabbla mal-livelli tal-1990.
Skopri l-gassijiet serra differenti u l-potenzjal tagħhom għat-tisħin globali.
Huwa stmat li l-emissjonijiet tal-UE fl-2020 kienu 31% inqas milli fl-1990, jiġifieri l-UE qabżet il-mira tagħha bi 11-il punt perċentwali. Id-data kkonfermata turi li l-emissjonijiet naqsu b'24% sal-2019 meta mqabbla mal-1990. Kien hemm tnaqqis kbir fl-emissjonijiet ta' gassijiet serra tal-UE bejn l-2019 u l-2020 u dan it-tnaqqis huwa marbut bil-qawwi mal-pandemija tal-COVID-19.
Madankollu, skont l-aħħar projezzjonijiet tal-Istati Membri bbażati fuq miżuri eżistenti, it-tnaqqis nett tal-emissjonijiet sal-2030 se jkun biss ta' madwar 41%. Il-mira tal-UE għall-2030 rigward l-emissjonijiet, kif stabbilita fil-liġi tal-UE dwar il-klima, hija li dawn jonqsu b'tal-inqas 55% meta mqabbla mal-livelli tal-1990. Dalwaqt mistenni pakkett ta' leġiżlazzjoni ġdida u riveduta, magħruf bħala "Lesti għall-mira ta' 55%", bl-għan li jilħaq l-objettivi tal-Patt Ekoloġiku Ewropew u li jagħmel mill-Ewropa kontinent newtrali għall-klima sal-2050.
Progress fis-setturi tal-enerġija u tal-industrija
Biex tilħaq il-mira tagħha għall-2020 imsemmija hawn fuq, l-UE qed tieħu azzjoni f'diversi oqsma. Waħda minnhom hija s-Sistema tal-UE għall-Iskambju ta' Kwoti tal-Emissjonijiet (ETS) li tkopri l-emissjonijiet ta' gassijiet serra minn faċilitajiet fuq skala kbira fis-setturi tal-enerġija u tal-industrija, kif ukoll mis-settur tal-avjazzjoni, li jikkaġuna madwar 40% tal-emissjonijiet ta' gassijiet serra totali tal-UE.
Bejn l-2005 u l-2020, l-emissjonijiet mill-impjanti tal-enerġija u mill-fabbriki koperti mis-sistema tal-UE għall-iskambju ta' kwoti tal-emissjonijiet naqsu b'40%. Dan huwa ferm aktar mit-tnaqqis ta' 23% stabbilit bħala l-mira għall-2020.
Status għall-miri nazzjonali
Biex inaqqsu l-emissjonijiet minn setturi oħra (l-akkomodazzjoni, l-agrikoltura, l-iskart, it-trasport, iżda mhux l-avjazzjoni), il-pajjiżi tal-UE stabbilew miri nazzjonali għat-tnaqqis tal-emissjonijiet fl-ambitu tad-Deċiżjoni dwar il-Kondiviżjoni tal-Isforzi. L-emissjonijiet mis-setturi koperti mill-miri nazzjonali kienu 15% aktar baxxi fl-2020 milli kienu fl-2005 u b'hekk qabżu l-mira għall-2020 li jkun hemm tnaqqis ta' 10%.
It-tnaqqis kien primarjament dovut għal titjib fl-effiċjenza enerġetika u għall-bidla lejn fjuwils li jużaw inqas karbonju. Għall-kuntrarju ta' dan, l-emissjonijiet mit-trasport żdiedu kull sena sal-bidu tal-pandemija tal-COVID-19.
Il-miri nazzjonali rigward l-emissjonijiet għall-2020 kienu jvarjaw minn tnaqqis ta' 20% sal-2020 (meta mqabbla mal-livelli tal-2005) għall-aktar pajjiżi sinjuri għal żieda ta' 20% għall-anqas pajjiżi għonja.
Aktar infografika dwar it-tibdil fil-klima:
Għal aktar informazzjoni:
-
(iftaħ f’tab ġdida)
L-Aġenzija Ewropea għall-Ambjent (EEA): L-UE tilħaq il-miri klimatiċi 20-20-20 [EN]
-
(iftaħ f’tab ġdida)
Ir-rapport annwali tal-EEA: Xejriet u projezzjonijiet fl-Ewropa 2021 [EN]
-
(iftaħ f’tab ġdida)
L-EEA: Sit web dwar il-klima u l-enerġija [EN]
-
(iftaħ f’tab ġdida)
Il-Kummissjoni Ewropea: Il-progress li sar fit-tnaqqis tal-emissjonijiet [EN]
