It-tniġġis tat-tajers: tnaqqis tal-emissjonijiet b'tikketti ġodda tal-UE tat-tajers
Tajers aktar effiċjenti jfissru inqas emissjonijiet. It-tikketti ġodda tat-tajers proposti tal-UE se jgħinuk tagħżel abbażi tal-effiċjenza fil-fjuwil, il-qbid fuq l-imxarrab u l-istorbju.
L-UE impenjat ruħha li tnaqqas l-emissjonijiet tagħha ta' gassijiet serra b'tal-inqas 40 % taħt il-livelli tal-1990 sal-2030 skont il-Ftehim ta' Pariġi. It-trasport bit-triq huwa responsabbli għal madwar 22 % tal-emissjonijiet tal-gassijiet serra tal-UE u t-trasport huwa l-uniku settur fejn l-emissjonijiet jibqgħu ogħla milli fl-1990. Sabiex tkun tista' tintlaħaq in-newtralità klimatika sal-2050, l-UE trid tnaqqas l-emissjonijiet mit-trasport b'60 % sal-2050, meta mqabbla mal-livell tal-1990.
It-tajers jikkawżaw bejn 20 % u 30 % tal-konsum tal-fjuwil ta' vettura, li jfisser li għażla ta' tajers aktar effiċjenti fl-użu tal-fjuwil tista' tgħin biex jitnaqqsu l-emissjonijiet ikkawżati mit-trasport. Sabiex il-konsumaturi jiġu megħjuna jagħmlu deċiżjonijiet infurmati, l-UE qed tintroduċi skema ġdida ta' tikkettar għat-tajers.
Tikketti ġodda biex jgħinu lill-konsumaturi
It-tikketti jkunu jinkludu informazzjoni dwar l-effiċjenza fl-użu tal-fjuwil u l-qbid fuq l-imxarrab, fuq skala minn A sa G (simili għat-tikkettar tal-enerġija użat għal apparat domestiku), kif ukoll informazzjoni dwar il-livell ta' storbju estern tagħhom, espress f'deċibels.
Fil-futur tista' tiżdied informazzjoni dwar il-qbid fuq il-borra u s-silġ, u informazzjoni dwar il-kilometraġġ u l-brix (responsabbli għat-tniġġis tal-mikoplastik) meta jsir disponibbli metodu ta' ttestjar.
It-tikketti jridu jkunu viżibbli b'mod ċar għall-konsumaturi, għandhom jintwerew fis-sitwazzjonijiet kollha fejn jinbiegħu t-tajers, inkluż online, u għandhom jipprovdu kodiċi QR għal skennjar faċli.
Benefiċċji tat-tikkettar il-ġdid tal-UE tat-tajers
Tikketti ġodda tat-tajers se jippermettu lill-konsumaturi tal-UE jagħżlu tajers aktar effiċjenti fl-użu tal-fjuwil, u dan jista' jwassal għal iffrankar kbir għalihom f'termini ta' nfiq kif ukoll ta' inqas emissjonijiet. Is-sikurezza fit-toroq tissaħħaħ permezz ta' qbid aħjar fuq l-imxarrab u informazzjoni dwar il-livelli ta' storbju tgħin biex jitnaqqas it-tniġġis akustiku kkawżat mill-karozzi.
Il-passi li jmiss
Il-Parlament Ewropew u l-Kunsill tal-UE laħqu ftehim informali dwar l-iskema ta' tikkettar f'Novembru 2019. Il-Kunsill approva formalment ir-regoli fi Frar 2020 u l-Kumitat tal-industrija, ir-riċerka u l-enerġija tal-Parlament ivvota favurihom fit-28 ta' April. Il-Parlament kollu kemm hu jeħtieġlu japprova l-ftehim.
