Hemm bżonn ta’ aktar azzjoni mill-UE għal provvista sikura tal-ikel
- L-Ukrajna teħtieġ għajnuna alimentari robusta
- It-twaqqif ta’ kurituri tal-ikel lejn u mill-Ukrajna
- L-UE għandha tiddiversifika s-sorsi tal-importazzjonijiet tal-ikel tagħha
- Il-ħtieġa li l-UE tagħti spinta lill-produzzjoni agrikola domestika
- Għajnuna meħtieġa għall-bdiewa affettwati tal-UE
Il-Parlament jitlob għajnuna alimentari immedjata u sostanzjali lill-Ukrajna u lill-UE biex tagħmel il-produzzjoni tal-ikel tagħha aktar indipendenti.
Riżoluzzjoni dwar il-ħtieġa għal pjan ta’ azzjoni urġenti tal-UE biex tiġi żgurata s-sigurtà tal-ikel fl-UE u barra minnha wara l-invażjoni Russa tal-Ukrajna ġiet adottata nhar il-Ħamis bi 413-il vot favur, 120 kontra u 49 astensjoni. Fit-test, il-MPE jappellaw għal għajnuna immedjata fil-forma ta’ provvisti tal-ikel għall-Ukrajna, u għal irkupru tal-istrateġija tal-UE għall-produzzjoni tal-ikel.
Għajnuna alimentari għall-poplu Ukren
Minħabba l-impatt serju li l-attakk Russu fuq l-Ukrajna se jkollu fuq is-sigurtà tal-ikel għall-Ukreni, il-Parlament jappella għal għajnuna alimentari umanitarja robusta fit-tul għall-Ukrajna kemm mill-UE kif ukoll fil-livell internazzjonali. L-UE għandha tiftaħ ukoll kurituri tal-ikel lejn u mill-Ukraina, li jservu bħala alternattiva għall-portijiet magħluqa tal-Baħar l-Iswed. Il-bdiewa Ukraini għandhom jingħataw ukoll żrieragħ, fjuwil, u fertilizzanti skarsi.
UE aktar indipendenti
Il-MPE jgħidu li l-pandemija tal-COVID-19 u l-gwerra fl-Ukrajna għamluha ċara li l-UE jeħtieġ li tnaqqas id-dipendenza tagħha fuq l-importazzjonijiet minn ftit wisq fornituri. Huma jappellaw għal diversifikazzjoni tal-provvista minn pajjiżi terzi, u jeħtieġu fuq medda qasira ta’ żmien li l-Kummissjoni tivvaluta kif tista’ ttaffi l-impatt tal-prezzijiet għoljin tal-fertilizzanti fuq il-bdiewa. Biex titnaqqas id-dipendenza fuq l-importazzjonijiet tal-fertilizzanti fit-tul, il-Parlament jipproponi bidla għal sorsi organiċi alternattivi ta’ nutrijenti għall-agrikoltura u appoġġ għall-innovazzjoni agrikola.
Żieda fil-produzzjoni tal-UE u għajnuna għall-bdiewa
Minħabba t-tfixkil fl-importazzjonijiet agrikoli, il-MPE jitolbu żieda fil-produzzjoni domestika tal-ikel. L-art agrikola għandha tintuża biss għall-produzzjoni tal-ikel u l-għalf. Biex jiġu indirizzati l-ħtiġijiet immedjati, il-MPE jridu li jkun possibbli għall-bdiewa li jużaw art mistrieħa għall-produzzjoni ta’ għelejjel tal-proteina fl-2022. Il-Kummissjoni għandha tipprovdi wkoll appoġġ għas-setturi l-aktar milquta u għandha timmobilizza r-riżerva għall-kriżijiet ta’ EUR 479 miljun. L-Istati Membri għandhom ukoll, skont il-MPE, jitħallew jagħtu għajnuna mill-Istat wiesgħa, rapida u flessibbli lill-operaturi fis-suq agrikolu.
Kuntatti:
-
Hana RAISSI
Press officer