Tibdil fil-klima: Il-Parlament jinsisti għal azzjoni tal-UE aktar rapida u għall-indipendenza enerġetika
- Ir-riforma tas-Sistema għall-Iskambju ta' Kwoti tal-Emissjonijiet: tneħħija aktar malajr tal-kwoti bla ħlas għall-industriji u l-inklużjoni aktar tard taċ-ċittadini fl-ETS II
- Kamp ta' applikazzjoni usa' u implimentazzjoni aktar rapidafl-istrument il-ġdid tar-rilokazzjoni tal-emissjonijiet tal-karbonju
- Fond Soċjali għall-Klima biex jiġġieled kontra l-faqar enerġetiku u dak tal-mobbiltà
Il-MPE adottaw il-pożizzjoni tagħhom dwar tliet abbozzi ta' liġijiet biex jiġi miġġieled it-tibdil fil-klima billi jitnaqqsu l-emissjonijiet tal-gassijiet serra b'mill-inqas 55% sal-2030.
Wara dibattitu fil-plenarja fis-7 ta’ Ġunju, il-Parlament adotta l-Erbgħa il-pożizzjoni tiegħu dwar tliet liġijiet ewlenin tal-UE li huma parti mill-pakkett "Lesti għall-mira ta' 55% fl-2030". Dan huwa l-pjan tal-UE li tnaqqas l-emissjonijiet tal-gassijiet serra b'mill-inqas 55% sal-2030 meta mqabbla mal-livelli tal-1990, u li tikseb emissjonijiet ta' gassijiet serra żero netti (newtralità klimatika) sal-2050, skont il-Liġi Ewropea dwar il-Klima. Il-Parlament issa huwa lest li jibda negozjati mal-gvernijiet tal-UE dwar il-liġijiet finali.
Il-pakkett adottat illum huwa pass importanti lejn l-għan tal-UE li ssir indipendenti mill-fjuwils fossili għoljin u li jniġġsu mir-Russja ferm qabel l-2030.
Ir-riforma tas-Sistema għall-Iskambju ta' Kwoti tal-Emissjonijiet
Il-Parlament irid jinċentivizza l-industriji sabiex ikomplu jnaqqsu l-emissjonijiet tagħhom u jinvestu f'teknoloġiji b'livell baxx ta' emissjonijiet tal-karbonju. Is-Sistema għall-Iskambju ta' Kwoti tal-Emissjonijiet (ETS) għandha tiġi riformata, inkluż:
- ETS II ġdida għall-bini u t-trasport bit-triq - iċ-ċittadini ma għandhomx jiġu inklużi qabel l-2029
- Il-mira tal-2030 għat-tnaqqis tal-emissjonijiet tal-gassijiet serra għandha tiżdied minn 61% għal 63%
- Il-kwoti bla ħlas għandhom jibdew jitneħħew b'mod gradwali mill-2027 sakemm jispiċċaw kompletament fl-2032
- Għandha tiġi introdotta sistema ta' bonus-malus mill-2025
- Id-dħul għandu jintuża esklussivament għall-azzjoni klimatika fl-UE u fl-istati membri.
Għal aktar dettalji, dalwaqt se tkun disponibbli stqarrija għall-istampa separata hawnhekk.
Ambizzjoni akbar fl-istrument il-ġdid tar-rilokazzjoni tal-emissjonijiet tal-karbonju
Il-Membri tal-PE jappellaw għal kamp ta' applikazzjoni usa' u implimentazzjoni aktar rapida tal-Mekkaniżmu tal-UE ta' Aġġustament tal-Karbonju fil-Fruntiera (CBAM) biex tiġi evitata r-rilokazzjoni tal-emissjonijiet tal-karbonju u tiżdied l-ambizzjoni klimatika globali, inkluż:
- Li jiddaħħal is-CBAM aktar kmieni u jitwaqqfu l-kwoti bla ħlas fl-EU ETS sal-2032;
- Il-kamp ta' applikazzjoni għandu jiġi estiż biex jinkludi s-sustanzi kimiċi organiċi, il-plastik, l-idroġenu u l-ammonia, kif ukoll l-emissjonijiet indiretti;
- Ammont ekwivalenti għad-dħul mis-CBAM għandu jintuża mill-baġit tal-UE biex jappoġġa t-tranżizzjoni ekoloġika fil-pajjiżi l-anqas żviluppati;
- Il-ħtieġa għal awtorità ċentralizzata tas-CBAM tal-UE.
Għal aktar dettalji, ara l-istqarrija għall-istampa separata li se tkun disponibbli dalwaqt.
Fond Soċjali għall-Klima biex jiġġieled kontra l-faqar enerġetiku u dak tal-mobbiltà
Il-Parlament jaqbel li jistabbilixxi Fond Soċjali għall-Klima (SCF) biex jgħin lil dawk l-aktar milquta mill-faqar enerġetiku u dak tal-mobbiltà jlaħħqu maż-żieda fl-ispejjeż tat-tranżizzjoni tal-enerġija. Il-Fond għandu jappoġġa
- Miżuri temporanji ta' appoġġ dirett għad-dħul (bħal tnaqqis fit-taxxi u fit-tariffi tal-enerġija) biex tiġi indirizzata ż-żieda fil-prezzijiet tat-trasport bit-triq u tal-fjuwil għat-tisħin;
- Investimenti fir-rinnovazzjoni tal-bini, l-enerġija rinnovabbli u bidla mit-trasport privat għal dak pubbliku, il-car-pooling u l-car-sharing u l-użu ta' modi attivi ta' trasport biex in-nies imorru minn post għal ieħor, bħaċ-ċikliżmu. Il-miżuri jistgħu jinkludu inċentivi fiskali, vawċers, sussidji jew self mingħajr imgħax.
Għal aktar dettalji, ara l-istqarrija għall-istampa separata disponibbli hawn.
Il-Parlament adotta wkoll il-pożizzjoni tiegħu dwar
— Standards tal-emissjonijiet tas-CO2 għall-karozzi u l-vannijiet
— Is-settur tal-użu tal-art, it-tibdil fl-użu tal-art u l-forestrija (LULUCF)
— Emissjonijiet ta’ gassijiet serra f’setturi oħra (kondiviżjoni tal-isforzi)
— It-tnaqqis ta’ l-emissjonijiet fis-settur ta’ l-avjazzjoni
Kuntatti:
-
Thomas HAAHR
Press Officer -
Dana POPP
Press Officer