dwar ir-Responsabilità Soċjali Korporattiva: imġiba kummerċjali responsabbli u trasparenti u tkabbir sostenibbli

(2012/2098(INI))

Il-Parlament Ewropew,

–   wara li kkunsidra r-Riżoluzzjoni tal-Kunsill tat-3 ta’ Diċembru 2001 dwar is-segwitu tal-Green Paper rigward ir-responsabilità soċjali korporattiva(1),

–   wara li kkunsidra r-Riżoluzzjoni tal-Kunsill tas-6 ta’ Frar 2003 dwar ir-responsabilità soċjali korporattiva(2),

–   wara li kkunsidra l-Komunikazzjoni tal-Kummissjoni "Il-Modernizzazzjoni tal-Liġi tal-Kumpaniji u t-Tisħiħ tal-Governanza Korporattiva fl-Unjoni Ewropea – Pjan għall-Avvanz” (COM(2003)0284) (il-Pjan ta’ Azzjoni dwar il-Governanza Korporattiva),

–   wara li kkunsidra l-Komunikazzjoni tal-Kummissjoni bl-isem “Pakkett ‘Negozji Responsabbli’” (COM(2011)0685),

–   wara li kkunsidra l-Komunikazzjoni tal-Kummissjoni bl-isem “Inizjattiva għan-Negozju Soċjali – Il-ħolqien ta’ klima favorevoli għall-intrapriżi soċjali, il-partijiet interessati ewlenin fl-ekonomija soċjali u l-innovazzjoni” (COM(2011)0682),

–   wara li kkunsidra l-Komunikazzjoni tal-Kummissjoni bl-isem ‘Ewropa 2020 – Strateġija għal tkabbir intelliġenti, sostenibbli u inklussiv’ (COM(2010)2020),

–   wara li kkunsidra r-riżoluzzjoni tiegħu tat-30 ta’ Mejju 2012 dwar il-Green Paper tal-Kummissjoni dwar il-promozzjoni ta’ qafas Ewropew għar-responsabilità soċjali tal-intrapriżi(3),

–   wara li kkunsidra r-riżoluzzjoni tiegħu tat-13 ta’ Mejju 2003 dwar “il-Komunikazzjoni mill-Kummissjoni dwar ir-Responsabilità Soċjali Korporattiva: Kontribut kummerċjali għal Żvilupp Sostenibbli”(4),

–   wara li kkunsidra r-Riżoluzzjoni tiegħu tat-13 ta’ Marzu 2007 dwar “ir-responsabilità soċjali korporattiva: sħubija ġdida”(5),

–   wara li kkunsidra l-opinjoni tal-Kumitat Ekonomiku u Soċjali Ewropew tal-24 ta’ Mejju 2012 dwar il-Komunikazzjoni tal-Kummissjoni bl-isem ta’ “Strateġija rinnovata tal-UE 2011-14 għar-Responsabilità Soċjali Korporattiva”(6),

–   wara li kkunsidra l-Komunikazzjoni tal-Kummissjoni bl-isem “Strateġija rinnovata tal-UE 201114 għar-Responsabilità Soċjali Korporattiva” (COM(2011)0681),

–   wara li kkunsidra l-Artikolu 48 tar-Regoli ta’ Proċedura tiegħu,

–   wara li kkunsidra r-rapport tal-Kumitat għall-Affarijiet Legali u l-opinjonijiet tal-Kumitat għall-Impjiegi u l-Affarijiet Soċjali, il-Kumitat għall-Affarijiet Barranin, il-Kumitat għall-Iżvilupp, il-Kumitat għall-Kummerċ Internazzjonali u l-Kumitat għall-Kultura u l-Edukazzjoni(A7-0017/2013),

Kunċett modern tar-Responsabilità Soċjali Korporattiva (RSK): rimarki preliminari

1.  Jenfasizza li n-negozju ma jistgħux jieħdu f’idejhom ir-responsabilità tal-awtoritajiet pubbliċi f’dak li għandu x’jaqsam mal-promozzjoni, l-implimentazzjoni u l-kontroll ta’ standards soċjali u ambjentali;

2.  Jenfasizza li l-kriżi ekonomika globali attwali kienet riżultat ta’ żbalji fundamentali rigward it-trasparenza, l-obbligu ta’ rendikont u r-responsabiltià, kif ukoll minn kunsiderazzjoni ta’ medda qasira ta’ żmien biss, u li l-UE għandha d-dmir tiżgura li dawn il-lezzjonijiet jitgħallimhom kulħadd; jilqa’ l-intenzjoni tal-Kummissjoni li twettaq stħarriġiet tal-Ewrobarometru dwar il-fiduċja fin-negozju; jappella biex ir-riżultati ta’ dawn l-istħarriġiet jiġu diskussi bis-sħiħ u biex il-partijiet interessati kollha jieħdu azzjoni; huwa bil-qawwa favur ir-responsabilità soċjali korporattiva (RSK), u huwa tal-fehma li din – jekk tkun implimentata b'mod korrett u titħaddem mill-impriżi kollha, mhux biss minn dawk kbar – tista’ tagħti kontribut kbir biex terġa’ titkattar il-fiduċja mitlufa, li hija meħtieġa għal irkupru ekonomiku sostenibbli, u tista’ ttaffi l-konsegwenzi soċjali tal-kriżi ekonomika; jinnota li meta n-negozju jassumi responsabilità għas-soċjetà, l-ambjent, u l-impjegati, huwa joħloq sitwazzjoni ta’ benefiċċju għal kulħadd li sservi biex twessa’ l-bażi ta’ fiduċja meħtieġa għas-suċċess ekonomiku; iqis li huwa fl-interess tan-negozju u tas-soċjetà kollha kemm hi li l-RSK issir parti minn strateġija ta’ negozju sostenibbli; jirrimarka li diversi negozji – speċjalment impriżi ta’ daqs żgħir u medju (SMEs) – qed jagħtu eżempju eċċellenti f’dan il-qasam;

3   Huwa tal-fehma li l-impriżi jistgħu jikkontribwixxu għall-iżvilupp ta’ ekonomija soċjali tas-suq u għall-ilħiq tal-objettivi tal-istrateġija Ewropa 2020, filwaqt li jipprovdu postijiet tax-xogħol u jwittu t-triq għall-irkupru ekonomiku;

4.  Jemmen li d-dibattitu dwar l-RSK għandu jitqiegħed f’kuntest usa’ li, filwaqt li jiżgura li s-CRS tibqa’ primarjament politika volontarja, iħalli wkoll lok għal djalogu dwar miżuri regolatorji, kull fejn dan ikun f’postu;

5.  Japprova d-definizzjoni l-ġdida tal-RSK proposta mill-Kummissjoni, li twarrab id-dikotomija bejn l-approċċi volontarji u dawk obbligatorji;

6.  Iqis li l-governanza korporattiva tikkostitwixxi element fundamentali tar-responsabilità soċjali korporattiva, speċjalment f’dak li jirrigwarda r-relazzjonijiet mal-awtoritajiet pubbliċi, mal-ħaddiema u mal-assoċjazzjonijiet li jirrappreżentawhom, u rigward il-politika dwar il-bonusijiet, ir-rimunerazzjoni u s-salarji; jemmen li, b’mod partikolari f’każijiet meta negozju jsib ruħu f'diffikultajiet, bonusijiet, rimunerazzjoni u salarji eċċessivi mħallsa lill-maniġers mhumiex kompatibbli ma’ mġiba soċjalment responsabbi;

7.  Jemmen li l-politika fiskali ta’ negozju għandha titqies bħala parti integrali mill-RSK u li, b’konsegwenza ta dan, imġiba soċjalment responsabbli ma tħalli l-ebda lok għal strateġiji maħsuba biex jevadu t-taxxa jew jisfruttaw ir-rifuġji fiskali;

8.  Iqis li, fil-valutazzjoni tar-responsabilità soċjali ta’ kumpanija, jeħtieġ li titqies l-imġiba tal-kumpaniji li joperaw fil-katina ta’ provvista tagħha u, fejn dan ikun applikabbli, tas-subkuntratturi tagħha;

It-tisħiħ tar-rabta bejn l-RSK, il-pubbliku ġenerali, il-kompetittività u l-innovazzjoni

9.  Jistieden lill-Kummissjoni u lill-awtoritajiet nazzjonali biex jippromwovu mudelli ta’ negozju innovattivi, imfassla biex isawru rabtiet aktar stretti bejn l-impriżi u l-ambjent soċjali li joperaw fih;

10. Jitlob li l-Kummissjoni tikunsidra d-diskussjonijiet attwali li qed isiru rigward ir-reviżjoni tad-Direttivi dwar il-Kontabilità u t-Trasparenza sabiex l-istrateġija tal-RSK il-ġdida li ġiet proposta tikkumplimenta d-Direttiva riveduta.

11. Jenfasizza l-importanza li jintrifdu soluzzjonijiet innovattivi li permezz tagħhom l-impriżi jkunu jistgħu jindirizzaw sfidi soċjali u ambjentali bħalma huma l-introduzzjoni ta’ sistemi ta’ trasport intelliġenti u prodotti ekoeffiċjenti, aċċessibbli u ddisinjati għal kulħadd;

12. Jinkoraġġixxi lill-Kummissjoni fl-isforzi tagħha biex tkabbar il-viżibilità tal-RSK u xxerred l-aqwa prattiki, u jiffavorixxi bis-sħiħ l-introduzzjoni ta’ skema ta’ premju Ewropew għal impriżi u sħubijiet li jħaddmu l-RSK; f’dan ir-rigward, jitlob lill-Kummissjoni biex tikkunsidra, fost azzjonijiet oħra, jekk għal dan il-għan tistax tiġi introdotta tikketta soċjali Ewropea;

13. Jilqa’ l-idea li jinħolqu pjattaformi tal-RSK b’diversi partijiet interessati, u jaqbel mal-approċċ settorjali li ntgħażel;

14. Jagħraf l-importanza u l-potenzjal tal-inizjattiva ‘Impriża 2020’ tan-netwerk CSR Europe, li jista’ jkolha rwol sostanzjali fit-tisħiħ tar-rabta bejn l-RSK u l-kompetittività billi trawwem id-disseminazzjoni tal-aqwa prattiki; jitlob lill-Kummissjoni u lill-Istati Membri biex irawmu aktar sinerġiji rigward l-objettiv ta’ politiki u inizjattivi li jġibu ‘l quddiem l-innovazzjoni soċjali u l-ħolqien tal-impjiegi; iħeġġeġ lill-Kummissjoni biex tirfed l-isforzi tan-netwerk CSR Europe, filwaqt li l-ewwel u qabel kollox taħdem biex issaħħaħ il-kooperazzjoni bejn in-negozji u l-Istati Membri b’tali mod li jissawru l-pedamenti għal pjanijiet ta’ azzjoni nazzjonali u għat-tixrid tal-prattiki tajbin;

15. Japprova l-proposta tal-Kummissjoni li tagħmel stħarriġiet perjodiċi dwar il-fiduċja pubblika fin-negozju u l-attitudnijiet tal-pubbliku lejn strateġiji tal-RSK implimentati mill-impriżi; jirrakkomanda li l-kontenut ta’ dawn l-istħarriġiet jintrabat mar-reviżjoni tal-pjan ta’ azzjoni għall-konsum u l-produzzjoni sostenibbli, bil-għan li jiġu identifikati l-ostakoli għal konsum aktar responsabbli;

Titjib tat-trasparenza u l-effikaċja ta’ politiki tal-RSK

16. Iħeġġeġ lill-Kummissjoni biex tfassal miżuri speċifiċi maħsuba ħalli jikkumbattu informazzjoni żvijanti u falza rigward impenji favur ir-responsabilità soċjali korporattiva u relatata mal-impatt ambjentali u soċjali ta’ prodotti u servizzi, lil hinn mill-miżuri stabbiliti fid-Direttiva dwar Prattiki Kummerċjali Żleali, b’attenzjoni partikolari għal kwistjonijiet dwar ir-reġistrazzjoni u l-kunsiderazzjoni ta’ lmenti abbażi ta’ proċedura miftuħa u ċara kif ukoll dwar il-ftuħ ta’ investigazzjonijiet; iqis li l-“greenwashing” mhuwiex biss forma ta’ qerq li jiżvija lill-konsumaturi, lill-awtoritajiet pubbliċi u lill-investituri, iżda wkoll li jnaqqas il-fiduċja fl-RSK bħala mezz effikaċi għall-promozzjoni ta’ tkabbir sostenibbli u inklussiv;

17. Jaqbel li kunsiderazzjonijiet soċjali u ambjentali għandhom jitqiesu aktar fl-akkwisti pubbliċi; jitlob, f’dan il-kuntest, li l-kriterju tal-prezz l-aktar baxx ma jibqax jintuża għall-għoti ta’ appalti, u li jkun hemm aktar responsabilizzazzjoni matul il-katina tas-subappalti;

18. Jistieden lill-Kummissjoni biex tieħu inizjattivi ħalli tiżblokka u ssaħħaħ il-potenzjal tal-RSK fl-indirizzar tat-tibdil fil-klima (billi torbotha mal-effiċjenza tar-riżorsi u tal-enerġija), pereżempju fil-proċessi li l-kumpaniji jużaw għax-xiri ta' materja prima;

19. Jenfasizza li l-għajnuna li l-UE tagħti lil gvernijiet ta' pajjiżi terzi biex jimplimentaw regolamentazzjoni soċjali u ambjentali kif ukoll reġimi ta' spezzjoni effikaċi tikkostitwixxi komplement meħtieġ sabiex l-RSK tan-negozji Ewropej tinġieb ‘il quddiem madwar id-dinja kollha;

20. Jenfasizza li l-Investiment Soċjalment Responsabbli (SRI) jagħmel parti mill-proċess ta' implimentazzjoni tal-RSK fid-deċiżjonijiet marbutin mal-investiment; jinnota li, għalkemm bħalissa ma teżisti l-ebda definizzjoni universali tal-SRI, is-soltu dan jgħaqqad l-għanijiet finanzjarji tal-investituri mal-preokkupazzjonijiet tagħhom rigward kwistjonijiet soċjali, ambjentali, etiċi u ta' governanza korporattiva;

21. Jagħraf li huwa importanti li n-negozji jiżvelaw informazzjoni dwar is-sostenibbiltà, bħal fatturi soċjali u ambjentali, bil-għan li jiġu identifikati riskji ta’ sostenibbiltà u li titkattar il-fiduċja tal-investituri u tal-konsumaturi; jindika l-progress notevoli li qed isir f’dan ir-rigward, u jitlob li l-Kummissjoni tappoġġja l-mira tal-Kunsill Internazzjonali dwar lir-Rappurtar Integrat (IIRC) li r-appurtar integrat (IR) isir l-istandard globali fid-deċennju li ġej;

22. Jisħaq li jeħtieġ li jitħarsu r-rispett rigoruż għad-drittijiet tal-bniedem, id-diliġenza u t-trasparenza biiex l-RSK tkun żgurata tul il-katina ta’ provvista kollha kemm hi, biex jitkejjel l-impatt tan-negozji Ewropej fuq is-sostenibbiltà, u biex jiġu miġġielda l-evitar tat-taxxi u l-fluss ta’ flejjes illeċiti;

23. Jenfasizza li r-responsabbiltà korporattiva m’għandhiex tiġi ristretta għal strument ta’ marketing, u li l-uniku mod biex l-RSK tiġi żviluppata bis-sħiħ huwa li din tkun integrata fl-istrateġija komprensiva tan-negozju u tkun implimentata u msarrfa fir-realtà fl-operazzjonijiet ta’ kuljum u fl-istrateġija finanzjarja; ikun favur rabta bejn responsabilita korporattiva tajba u governanza korporattiva tajba; jemmen li l-Kummissjoni għandha tinkoraġġixxi lill-kumpaniji biex jiddeċiedu dwar strateġija tal-RSK fil-livell tal-bord tad-diretturi; jistieden lill-Kummissjoni u lill-Istati Membri biex jintroduċu kodiċijiet ta’ ġestjoni korporattiva li jirriflettu l-importanza tar-responsabilità għal kulħadd fil-kumpanija, u li jistabbilixxu rabta soda bejn il-prestazzjoni tal-kumpanija mil-lati tal-ambjent, is-soċjetà u d-drittijiet tal-bniedem u r-riżultati finanzjarji tagħha;

24. Jenfasizza li l-investituri u l-konsumaturi għandhom ikunu jistgħu jidentifikaw faċilment l-impriżi li jkunu impenjaw ruħhom favur l-RSK, għax dan iservi biex iħeġġeġ lil dawn tal-aħħar fl-isforzi tagħhom;

25. Jisħaq li l-Investiment Soċjalment Responsabbli (SRI), bħala parti mill-proċess ta’ implementazzjoni tal-RSK f’deċiżjonijiet tal-investiment, jikkombina l-objettivi finanzjarji u ekonomiċi tal-investituri ma’ kunsiderazzjonijiet soċjali, ambjentali, etiċi, kulturali u edukattivi;

26. Qiegħed isegwi mill-qrib id-diskussjonijiet attwali dwar il-proposta leġiżlattiva dwar it-trasparenza tal-informazzjoni soċjali u ambjentali mogħtija mill-kumpaniji; huwa favur l-adozzjoni ta’ proposta leġiżlattiva li tippermetti flessibilità ta’ azzjoni kbira, fil–qies tan-natura multidimensjonali tal-RSK u tad-diversità tal-politiki tal-RSK implimentati min-negozji, akkumpanjata b’livell suffiċjenti ta’ paragunabbilità li jaqdi l-ħtiġijiet tal-investituri u tal-partijiet interessati l-oħra, kif ukoll il-ħtieġa li l-konsumaturi jingħataw aċċess faċli għall-informazzjoni dwar l-impatt tan-negozji fuq is-soċjetà, inkluż dwar aspetti ta’ governanza u tal-metodoloġija ta’ kostijiet tul iċ-ċiklu tal-ħajja; iqis li l-informazzjoni dwar is-sostenibbiltà għandha tkopri wkoll, fejn dan ikun f’loku, il-ktajjen ta’ subappalti u ta’ provvista, u għandha tissejjes fuq metodoloġiji aċċettati globalment bħal dawk tal-Inizjattiva Globali dwar ir-Rappurtar jew tal-Kunsill dwar ir-Rappurtar Integrat; jitlob, barra minn hekk, li għall-SMEs jiġu applikati eżenzjoni jew qafas semplifikat;

27. Jitlob li jitkattar il-monitoraġġ aktar inklussiv u aktar trasparenti tal-prinċipjio tal-RSK fil-politika kummerċjali tal-UE, b'punti ta' riferiment ċari biex jitkejjel it-titjib, bl-għan li titħeġġeġ il-fiduċja fis-sistema;

28. Iħeġġeġ lill-UE kif ukoll lill-Istati Membri biex jagħtu tagħrif konkret dwar l-RSK, u tagħlim u taħriġ dwarha, ħalli l-impriżi jkunu jistgħu jieħdu vantaġġ sħiħ mill-RSK u jimplementawha fil-kultura organizzattiva tagħhom;

29. Iħeġġeġ lill-kumpaniji tal-midja biex jinkludu standards trasparenti ta’ ġurnaliżmu fil-politiki tal-RSK tagħhom, inklużi garanziji ta’ protezzjoni tal-fonti u l-jeddijiet tal-whistleblowers;

30. Jistieden lill-Kummissjoni biex tikkunsidra ulterjormanet miżuri vinkolanti u mhux vinkolanti maħsuba biex jiffaċilitaw r-rikonoxximent u l-promozzjoni tal-isforzi magħmula min-negozji rigward it-trasparenza u d-divulgazzjoni ta’ informazzjoni mhux finanzjarja;

31. Jopponi bil-qawwa l-introduzzjoni ta’ parametri speċifiċi, bħall-iżvilupp ta’ indikaturi ta’ prestazzjoni fil-livell tal-UE kollha kemm hi, li jistgħu jikkawżaw burokrazija żejda u strutturi operazzjonali ineffiċjenti; minflok, jitlob lill-Kummissjoni biex tagħti lill-kumpaniji, u tippromwovi fosthom, l-użu ta’ metodoloġiji aċċettati internazzjonalment, bħalma huma dawk tal-Inizjattiva Globali dwar ir-Rappurtar u tal-Kunsill dwar ir-Rappurtar Integrat;

32. Iqis li huwa essenzjali, madankollu, li l-Kummissjoni, mill-aktar fis, tiżviluppa l-metodoloġija komuni prevista biex tkejjel il-prestazzjonijiet ambjentali tul iċ-ċiklu tal-ħajja; jemmen li din il-metodoloġija tkun utli kemm mil-lat ta' trasparenza tal-informazzjoni tal-negozji kif ukoll għall-finijiet tal-valutazzjoni li l-awtoritajiet pubbliċi jagħmlu rigward il-prestazzjonijiet ambjentali tal-kumpaniji;

33. Jilqa’ l-intenzjoni tal-Kummissjoni li tvara ‘Komunità ta' Prattika’ dwar l-RSK u azzjoni soċjali min-naħa tan-negozji; jemmen li dan jeħtieġlu jkun kumplimentarju għal kodiċi ta’ prattika tajba għall-koregolamentazzjoni u l-awtoregolamentazzjoni, li permezz tiegħu l-partijiet interessati kollha jkunu jistgħu jimpenjaw ruħhom fi proċess ta’ tagħlim kollettiv biex itejbu l-effiċjenza u l-obbligu ta’ rendikont f’azzjonijiet b’diversi partijiet interessati;

34. Jitlob li jkun hemm konsultazzjoni sħiħa u attiva u involviment ta’ organizzazzjonijiet rappreżentattivi, inklużi t-trejdjunjins, fl-iżvilupp, l-operat u l-monitoraġġ tal-proċessi u l-istrutturi tal-RSK tal-kumpaniji, filwaqt li jaħdmu ma’ min iħaddem f’approċċ ta’ sħubija ġenwina;

35. Jitlob lill-Kummissjoni biex tiżgura li obbligu ta’ rappurtar sistematiku fuq informazzjoni essenzjali dwar is-sostenibbiltà ma jkunx ta’ piż żejjed fuq il-kumpaniji, ladarba jeħtieġ li dawn tal-aħħar jilqgħu kwalunkwe strateġija ġdida tal-RSK; jitlob li l-Kummissjoni taħseb għal perjodu ta’ tranżizzjoni qabel ma jidħol fis-seħħ ir-rappurtar mhux finanzjarju fuq bażi regolari għall-kumpaniji, minħabba li dan jagħtihom l-opportunità inizjali li jimplimentaw sewwa l-RSK internament, b’tali mod li jistabbilixxu politika akkurata u dettaljata tal-RSK bħala parti mis-sistemi ta' ġestjoni interna tagħhom;

36. Jappoġġja l-proposta tal-Kummissjoni li tobbliga lill-fondi ta’ investiment u l-istituzzjonijiet finanzjarji kollha biex jinfurmaw lill-klijenti tagħhom (ċittadini, negozji, awtoritajiet pubbliċi, eċċ.) dwar kriterji ta’ investiment etiku jew responsabbli li japplikaw jew dwar kwalunkwe standard jew kodiċi li jimxu miegħu;

37. Japprova d-direttiva tal-Kummissjoni dwar l-istandards minimi għall-vittmi; jappella biex il-politiki tal-RSK tal-kumpaniji fis-setturi rilevanti (bħall-ivvjaġġar, l-assigurazzjoni, l-akkomodazzjoni u t-telekomunikazzjonijiet) jinkludu strateġiji u strutturi pożittivi u prattiċi biex jappoġġjaw il-vittmi ta’ reati u l-familji tagħhom waqt kriżi, u biex jistabbilixxu politiki speċifiċi għal kwalunkwe impjegat li, fil-post tax-xogħol jew barra minnu, jisfa vittma ta’ reat;

38. Jirrikonoxxi l-valur u l-potenzjal sostanzjali ta’ strumenti ta’ awtoregolamentazzjoni u koregolamentazzjoni bħalma huma kodiċijiet ta’ kondotta speċifiċi għas-settur; jilqa’ għalhekk ix-xewqa tal-Kummissjoni li ttejjeb l-istrumenti eżistenti billi tiżviluppa kodiċi ta' prattiki tajba għal dan il-qasam; huwa kontra, madanakollu, l-introduzzjoni ta’ approċċ uniku li ma jikkunsidrax l-ispeċifiċitajiet ta’ kull settur u r-rekwiżiti speċifiċi tan-negozji;

L-RSK u l-SMEs: mit-teorija għall-prattika

39. Ifakkar fil-karatteristiċi speċjali tal-SMEs, li joperaw prinċipalment fuq livell lokali u reġjonali ġewwa setturi speċifiċi; iqis li huwa essenzjali, għalhekk, li l-politiki tal-Unjoni dwar l-RSK, inklużi pjanijiet ta’ azzjoni nazzjonali dwar l-RSK, jikkunsidraw sewwa r-rekwiżiti essenzjali tal-SMEs, bi qbil mal-prinċipju “aħseb l-ewwel fiż-żgħir”, u jirrikonoxxu l-approċċ informali u intuwittiv tal-SMEs lejn l-RSK;

40. Jindika l-importanza li l-impriżi żgħar u ta' daqs medju jkunu involuti fl-RSK u li l-kisbiet tagħhom f'dan il-qasam jiġu rikonoxxuti;

41. Jirrikonoxxi li bosta SMEs fl-Ewropa diġà jħaddmu politiki tal-RSK, bħall-impjieg lokali, l-involviment fil-komunità, l-applikazzjoni ta’ politiki ta’ governanza tajba fil-katina ta’ provvista tagħhom, eċċ.; jirrimarka, madankollu, li l-maġġoranza ta’ dawn l-SMEs ma jafux li fil-fatt qed jimplimentaw fil-prattika sostenibbiltà, RSK u prattiki tajba ta’ governanza korporattiva; jistieden lill-Kummisjsoni, għalhekk, biex l-ewwel teżamina l-prattiki attwali tal-SMEs qabel ma tikkunsidra strateġiji speċifiċi tal-RSK għall-SMEs;

42. Jesprimi l-oppożizzjoni tiegħu għal kull miżura li tista’ tikkawża piżijiet amministrattivi jew finanzjarji addizzjonali għall-SMEs, filwaqt li juri l-appoġġ tiegħu għal miżuri li jħallu lill-SMEs jagħmlu azzjonijiet konġunti;

43. Jistieden lill-Istati Membri u lill-awtoritajiet reġjonali biex jagħmlu użu intelliġenti mill-fondi ta’ koeżjoni bil-għan li jirfdu attivitajiet promozzjonali rigward l-RSK minn organizzazzjonijiet intermedjarji tal-SMEs, fuq l-eżempju tal-programm ewlieni Ġermaniż kofinanzjat mill-Fond Soċjali Ewropew;

44. Jitlob lill-Kummissjoni, b’kollaborazzjoni mal-Istati Membri, ma’ organizzazzjonijiet intermedjarji tal-SMEs u ma’ partijiet interessati oħra, biex tfassal strateġiji u miżuri ħalli tgħin lill-SMEs jaqsmu bejniethom l-aqwa prattiki tal-RSK, pereżempju permezz ta’ database għall-ġbir ta’ informazzjoni fuq politiki tal-RSK implimentati mill-SMEs, b’dettalji ta’ proġetti mwettqa f’pajjiżi differenti;

45. Jirrakkomanda li jitfasslu gwidi u manwali dwar l-RSK għall-SMEs; jenfasizza, f’dan ir-rigward, l-urġenza ta’ aktar riċerka akkademika fuq kif tista’ titqawwa l-aċċettazzjoni tal-RSK min-naħa tal-SMEsm kif ukoll dwar l-impatt ekonomiku, soċjali u ambjentali tal-politiki tal-RSK fil-livell lokali u reġjonali;

46. Huwa tal-fehma li, biex ikollha impatt ġenwin fuq it-tnaqqis tal-faqar, l-aġenda tal-RSK għandha wkoll tiffoka fuq l-SMEs, minħabba li l-impatt soċjali u ambjentali kumulattiv tagħhom huwa sinifikanti;

47. Jistieden lill-Kummissjoni u lill-Istati Membri biex jidentifikaw strategiji ta’ żvilupp u ta’ appoġġ maħsuba għad-disseminazzjoni tal-RSK fost l-SMEs; jirrakkomanda, b’mod partikolari, li jitfasslu miżuri speċifiċi għal-impriżi żgħar u għall-mikroimpriżi;

48. Jenfasizza li, wara d-dħul fis-seħħ tat-Trattat ta’ Lisbona, il-Parlament għandu jinżamm infurmat bis-sħiħ dwar kif ir-riżultati tal-Valutazzjonijiet tal-Impatt fir-rigward tas-Sostenibilità (SIA) tal-ftehimiet jiġu inkorporati fin-negozjati qabel il-konklużjoni tagħhom, u li l-Parlament ikun mgħarraf dwar liema kapitoli ta’ dawn il-ftehimiet ikunu nbidlu, bil-għan li jiġu evitati impatti negattivi identifikati fl-SIA;

49. Jenfasizza li jeħtieġ li trattati bilaterali futuri dwar l-investiment iffirmati mill-UE jiżguraw li jintlaħaq bilanċ ġust bejn il-ħtieġa li l-investituri jkunu protetti u l-ħtieġa li jkun previst intervent mill-istat, speċjalment b'rabta ma’ standards soċjali, tas-saħħa u ambjentali;

50. Jistieden li l-idea ta’ sponsorizzazzjoni tiġi promossa fost min iħaddem;

51. Ifakkar li, għas-soluzzjoni ta' tilwim kummerċjali u/jew għat-talba ta' kumpens għal esternalitajiet negattivi ta' attività tan-negozju irresponsabbli jew illegali tan-negozju, diġà jeżistu kemm il-kawżi fil-qrati kif ukoll alternattivi għal dawn tal-aħħar; jistieden lill-Kummissjoni, f'dan ir-rigward, biex taħdem aktar ħalli tkattar l-għarfien dwar iż-żewġ triqat kemm fost il-komunità tan-negozju kif ukoll fost il-pubbliku ġenerali; ifakkar li l-Kamra Internazzjonali tal-Kummerċ (ICC) tipprovdi servizzi ta' soluzzjoni tat-tilwim għal individwi, negozji, stati, entitajiet statali u organizzazzjonijiet internazzjonali li jfittxu alternattivi għal kawżi fil-qrati, liema alternattivi jistgħu jikkontribwixxu biex itejbu l-aċċess effikaċi għall-ġustizzja għall-vittmi f'każ ta' ksur ta' prattiki kummerċjali responsabbli li jikkawżaw danni ekonomiċi, soċjali u ambjentali fl-UE u/jew barra minnha;

52. Jenfasizza li s-sensibilizzazzjoni fil-livell korporattiv dwar l-importanza tal-RSK u l-konsegwenzi tan-nuqqas ta' ottemperanza, bħala kompitu għall-Kummissjoni, jeħtieġ li tkun akkumpanjata minn sensibilizzazzjoni u tisħiħ xieraq tal-kapaċitajiet fil-livell tal-gvernijiet tal-pajjiżi ospitanti, biex ikunu żgurati l-implimentazzjoni effikaċi tad-drittijiet tal-RSK u l-aċċess għall-ġustizzja;

53. Huwa tal-fehma li l-Kummissjoni u l-Istati Membri għandhom iħeġġu lill-kumpaniji tal-UE biex jieħdu inizjattivi immirati li jippromwovu l-RSK u jiskambjaw prattiki tajba ma’ sħabhom f'pajjiżi oħra;

Konklużjonijiet

54. Jenfasizza l-ħtieġa li l-miżuri regolatorji jitfasslu fi ħdan qafas legali solidu u f’konformità ma’ standards internazzjonali, bil-għan li jiġu evitati interpretazzjonijiet nazzjonali differenti u riskji ta’ vantaġġi jew żvantaġġi kompetittivi fuq skala reġjonali, nazzjonali jew makroreġjonali;

55. Iħeġġeġ lill-Kummissjoni biex tissokta bl-isforzi tagħha għall-promozzjoni tal-RSK f’relazzjonijiet ma' pajjiżi u reġjuni oħra madwar id-dinja; jitlob, f’dan ir-rigward, li jsiru sforzi akbar biex ir-reċiproċità ssir prinċipju ċentrali tar-relazzjonijiet kummerċjali;

56. Jerġa’ jsostni l-konvinzjoni tiegħu li l-iżvilupp tal-RSK għandu jiġi avvanzat primarjament permezz tal-approċċ li jħaddan diversità ta’ partijiet interessati filwaqt li jalloka rwol ewlieni lin-negozji, li jeħtieġ li jkunu jistgħu jiżviluppaw approċċ imfassal għas-sitwazzjoni speċifika tagħhom; jisħaq fuq il-ħtieġa ta’ miżuri u approċċi speċifiċi għall-iżvilupp tal-RSK fost l-SMEs;

57. Jinnota li l-istrateġija attwali tal-Kummissjoni dwar l-RSK tkopri l-perjodu 2011-2014; jitlob li l-Kummissjoni tiżgura li tiġi adottata strateġija ambizzjuża fil-ħin għall-perjodu ta’ wara l-2014;

58. Jagħti istruzzjoni lill-President tiegħu biex iressaq din ir-riżoluzzjoni lill-Kunsill, lill-Kummissjoni, u lill-gvernijiet u lill-parlamenti tal-Istati Membri.

(1) ĠU C 86, 10.4.2002, p. 3. (2) ĠU C 39, 18.2.2003, p. 3. (3) ĠU C 187 E, 7.8.2003, p. 180. (4) ĠU C 67 E, 17.3.2004, p. 73. (5) ĠU C 301 E, 13.12.2007, p. 45. (6) ĠU C 229, 31.7.2012, p. 77.

1. Kumment preliminari dwar aspetti proċedurali

Il-Kumitat għall-Affarijiet Legali u l-Kumitat għall-Impjiegi u l-Affarijiet Soċjali ddeċidew li jikkollaboraw ma’ xulxin mill-qrib bil-għan li jiżguraw approċċ koerenti fit-tfassil tal-pożizzjoni tal-Parlament dwar l-Istrateġija rinnovata tal-UE dwar ir-responsabilità soċjali korporattiva għall-perjodu 2011-14(1). Bi qbil mal-objettiv imsemmi hawn fuq u b’rispett sħiħ tal-kompetenzi u responsabilitajiet speċifiċi, iż-żewġ kumitati ddeċidew li jelaboraw żewġ rapporti ta’ inizjattiva dwar temi distinti, li għalihom japplika l-Artikolu 50 tar-Regolament.

Il-kompetenzi esklussivi ta’ kull kumitat ġew stabbiliti abbażi tat-tliet kelmiet ewlenin li ġejjin:

– nies: kwistjonijiet soċjali u impjiegi dejjiema;

– profitt: imġiba mhux spekulattiva u tkabbir sostenibbli;

– dinja: azzjonijiet li jirispettaw l-ambjent.

Ir-responsabbiltajiet tal-Kumitat għall-Impjiegi u l-Affarijiet Soċjali ġew stabbiliti abbażi tal-kelma “nies” u dawk tal-Kumitat għall-Affarijiet Legali abbażi tal-kelma “profitt”. L-oqsma identifikati abbażi tal-kelma "dinja" nqasmu bejn iż-żewġ kumitati skont jekk kinux jirrelataw aktar mal-"profitt" jew man-"nies".

2. Introduzzjoni: l-Istrateġija Rinnovata tal-UE dwar l-RSK

Bl-Istrateġija l-ġdida, il-Kummissjoni Ewropea tipproponi definizzjoni ġdida tal-RSK(2), rikonoxxuta bħala “r-responsabilità tal-impriżi għall-impatti tagħhom fuq is-soċjetà”(3). F’konformità mad-definizzjoni l-ġdida, l-intrapriżi għandu jkollhom proċess li jintegra l-kwistjonijiet soċjali, ambjentali u etiċi, id-drittijiet tal-bniedem u l-ħtiġijiet tal-konsumaturi fl-istrateġija kummerċjali u bażika tagħhom. L-għan ta’ dan il-proċess għandu jkun li jinħoloq valur komuni bejn is-sidien/l-azzjonisti, il-partijiet oħrajn interessati u s-soċjeta b’mod ġenerali, sabiex jidentifikaw, jipprevjenu u jtaffu l-effetti negattivi possibbli li jirriżultaw mix-xogħol tal-intrapriża.

Abbażi tad-definizzjoni l-ġdida, il-Kummissjoni tipproponi numru ta’ miżuri speċifiċi, sabiex tkompli ttejjeb l-impatt tal-politiki tal-RSK, f’konformità ma’ tmien oqsma ta’ intervent:

– li tippromwovi l-viżibbiltà tal-RSK u d-disseminazzjoni tal-prattiki tajba;

– li ttejjeb u tissorvelja l-livelli ta’ fiduċja taċ-ċittadini fl-intrapriżi;

– li ttejjeb il-proċessi ta’ awtoregolamentazzjoni u koregolamentazzjoni;

– li ttejjeb il-“primjum tas-suq” għall-RSK;

– li żżid l-iżvelar mill-intrapriżi ta' informazzjoni soċjali u ambjentali;

– li tintegra l-RSK iżjed fil-fond fl-edukazzjoni, fit-taħriġ u fir-riċerka;

– li tenfasizza fuq l-importanza ta' politiki nazzjonali u sottonazzjonali rigward l-RSK ;

– li ttejjeb l-allinjament tal-approċċi globali u Ewropej għall-RSK.

3. Pożizzjoni tar-Rapporteur dwar aspetti tal-kompetenza ekslussiva tal-Kumitat għall-Affarijiet Legali

3.1 Kunsiderazzjonijiet preliminari fuq id-definizzjoni l-ġdida u l-karatteristiċi tal-RSK

Ir-rikonoxximent dejjem jikber tar-rwol “soċjalment responsabbli” li l-impriżi jista’ jkollhom jista’ jiġi interpretat b’modi differenti. Minn naħa waħda, il-globalizzazzjoni u l-emerġenza tas-swieq "globali" joħolqu art għammiela għall-iżvilupp ta' standards soċjali u ambjentali min-naħa tal-intrapriżi(4); min-naħa l-oħra, soċjetà ċivili dejjem aktar attenta u infurmata qed tesiġi li n-negozji jġibu ruħhom b’mod aktar responsabbli(5). L-impuls doppju fil-bażi tal-progress tal-RSK f’sistema ta’ governanza internazzjonali (jew, skont xi wħud, postnazzjonali(6)) jirrifletti l-komplementarjetà tal-interessi bejn l-intrapriżi u s-soċjetà b’mod ġenerali, li jirrikjedi approċċ aktar wiesa’ u li jħares aktar ’il quddiem fuq din il-kwistjoni, sabiex il-potenzjal tal-RSK jiġi sfruttat bl-aħjar mod possibbli.

Minħabba l-kunsiderazzjonijiet preċedenti, ir-Rapporteur jaqbel mad-definizzjoni l-ġdida proposta mill-Kummissjoni, li tinnewtralizza l-kuntrast bejn l-approċċi volontarji u l-approċċi obbligatorji, li s’issa kienet ippolarizzat id-diskussjonijiet fuq l-RSK. Fil-fatt, il-varjetà ta’ oqsma ta’ applikazzjoni, l-istrateġiji numerużi użati mill-intrapriżi u l-pluralità tal-approċċi regolatorji juru kif l-RSK tkun żviluppata abbażi ta’ proċessi varji. Għalhekk, ir-Rapporteur iqis li huwa meħtieġ li jiġi kontestwalizzat id-dibattitu dwar l-RSK f’kuntest aktar wiesa’, li filwaqt li jippreserva orjentazzjoni primarjament volontarja, jippermetti fejn hu xieraq id-djalogu dwar miżuri regolatorji.

Għaldaqstant, ir-Rapporteur jirrifjuta kull approċċ għall-RSK li jista’ jimplika li l-intrapriżi jieħdu f’idejhom funzjonijiet primarji tal-awtoritajiet pubbliċi fir-rigward tal-promozzjoni, l-implimentazzjoni u l-kontroll ta’ standards soċjali u ambjentali. Għal din ir-raġuni, ir-Rapporteur jappoġġja l-orjentazzjoni lejn l-RSK, primarjament immexxi mill-intrapriżi stess, skont il-possibiltajiet u l-ħtiġijiet tagħhom, u appoġġjat b’mod xieraq mill-awtoritajiet pubbliċi, sabiex jiġu bbilanċjati l-interessi tal-intrapriżi u tas-soċjetà.

3.2 It-tisħiħ tar-rabta bejn l-RSK, il-kompetittività u l-pubbliku ġenerali

Ir-responsabilità soċjali korporattiva hija wkoll fattur ewlieni fil-kompetittività(7). Dan ma jfissirx li l-miżuri kollha tal-RSK awtomatikament itejbu l-kompetittività ta’ negozju. Ifisser li miżuri li joħolqu valur tal-ishma għal negozju, għall-partijiet interessati tiegħu u għas-soċjetà ġenerali jistgħu jsaħħu lil dak in-negozju(8).

Fid-dawl ta’ dawn il-kunsiderazzjonijiet, ir-rapporteur iqis bħala prijorità t-tisħiħ tar-rabta bejn l-RSK, il-kompetittività u ċ-ċittadini, permezz ta’ sensiela ta’ azzjonijiet radikali maħsuba biex isaħħu r-reċiproċità bejn l-istrateġiji kummerċjali tal-intrapriżi u l-kuntest soċjali li joperaw fihom. F’dan ir-rigward, ir-rapporteur jinkoraġġixxi li jkunu appoġġjati soluzzjonijiet innovattivi li jistgħu jippermettu lill-intrapriżi jaffrontaw sfidi soċjali u ambjentali bħat-trasport intelliġenti u prodotti ekoeffiċjenti.

Fl-istess waqt u bil-għan li tiżdied il-viżibilità tal-RSK minn naħa, u d-diffużjoni ta’ prattiki tajba minn naħa oħra, ir-rapporteur jappoġġja l-introduzzjoni ta’ rikonoxximent Ewropew għal intrapriżi u għal sħubija dwar l-RSK u l-ħolqien ta' pjattaforma multilaterali għall-RSK. F’dan ir-rigward, ir-rapporteur huwa favorevoli għall-inizjattiva ‘Enterprise 2020’ tan-netwerk tal-RSK Ewropa, li tista’ tikkontribwixxi sostanzjalment biex tkun ikkonsolidata r-rabta bejn l-RSK u l-kompetittività.

3.3. Titjib tat-trasparenza u l-effikaċja tal-politiki tal-RSK

Ir-rapporteur jaqbel mal-objettiv ġenerali li titjieb it-trasparenza, il-proċessi ta’ awtoregolamentazzjoni u koregolamentazzjoni u l-primjum tas-suq għall-RSK. Dawn huma fil-fatt progressi essenzjali biex jiżdied il-livell ta’ fiduċja taċ-ċittadini fl-intrapriżi, filwaqt li jitnaqqas id-distakk bejn l-aspettativa taċ-ċittadini u dak li huma jqisu bħala imġiba reali tal-intrapriżi.

F’dawn iċ-ċirkustanzi, ir-rapporteur iqis li hu fundamentali li ma tintesiex in-natura multidimensjonali tal-RSK u l-approċċ differenzjat tal-intrapriżi għal din il-kwistjoni. Minħabba f’hekk, ir-rapporteur jittama li ssir l-adozzjoni ta’ kriterji regolatorji li jippermettu l-preservazzjoni tal-flessibilità ta’ azzjoni l-aktar wiesgħa għall-intrapriżi, li jiggwidaw primarjament l-iżvilupp tal-RSK.

Il-kunsiderazzjonijiet imsemmija huma marbuta, b’mod partikolari, mal-proposta leġiżlattiva futura dwar it-trasparenza tal-informazzjoni soċjali u ambjentali mogħtija mill-intrapriżi u l-iżvilupp ta’ kodiċi ta’ kondotta ta’ awtoregolazzjoni u koregolazzjoni maħsub biex itejjeb l-effikaċja tal-proċess tal-RSK. Fiż-żewġ każi, ir-rapporteur jopponi soluzzjonijiet “universali”, li ma jikkunsidrawx l-ispeċifiċità tas-swieq u tal-varji setturi li fihom joperaw l-intrapriżi, bir-riskju li jikkawżaw piżijiet amministrattivi u restrizzjonijiet operattivi kontroproduċenti.

3.4 Rikonoxximent u promozzjoni tal-involviment tal-SMEs fl-RSK

L-SMEs, li jirrappreżentaw aktar minn 90% tan-negozji fl-Ewropa, u li għandhom rabtiet stretti mar-reġjun jew mal-belt fejn joperaw, jistgħu jiżvolġu rwol fundamentali biex jippromwovu d-diffużjoni tal-RSK(9). Barra minn hekk, l-SMEs tal-istess settur għandhom il-possibilità li jaffrontaw problemi soċjali u ambjentali simili b’mod kollettiv, u b’hekk inaqqsu l-ispejjeż ta’ azzjoni u jintlaħaq titjib li SME waħda diffiċli tilħqu.

Minkejja l-fatt li l-SMEs jistgħu jiżvolġu rwol ewlieni fid-dibattitu dwar l-RSK, fuq il-livell mikro huwa evidenti lidawn ma għandhomx familjarità mal-kunċett tal-RSK, li għalihom ta’ spiss huwa kunċett "intanġibbli" li diffiċilment jidentifikaw miegħu, sakemm ma jkunux minn ikunu żviluppaw kuxjenza soċjali ġenwina(10).

Problema oħra hija marbuta mal-perċezzjoni tal-“ispejjeż” u mhux tal-potenzjal ekonomiku tal-RSK. Fil-fatt, minħabba li l-RSK hija marbuta ma’ investiment ekonomiku li r-riżultati tiegħu mhumiex tanġibbli immedjatament, din ħafna drabi “titqies” bħala tip ta’ “piż” għall-intrapriżi li għandhom riżorsi limitati. Fost ir-raġunijiet għal dan hemm il-fatt li ħafna SMEs mhumiex konxji mill-impatt pożittiv li l-RSK jista’ jkollha fuq il-prestazzjonijiet ekonomiċi tagħhom u ma ġewx informati dwar il-prattiki tajba li jistgħu jkomplu jqawwu dawn l-impatt(11).

Abbażi ta’ dawn il-kunsiderazzjonijiet, ir-rapporteur huwa tal-fehma li l-Parlament għandu jagħmel prijorità politika l-involviment akbar tal-SMEs fl-RSK għas-snin li ġejjin. Minħabba f’hekk, ir-rapporteur jipproponi serje ta’ azzjonijiet maħsuba biex iżidu l-involviment tal-SMEs fl-RSK:

– l-ewwel nett, huwa essenzjali li kull miżura f’dan il-qasam, ta’ natura vinkolanti jew volontarja, ma tikkawżax piżijiet amministrattivi jew finanzjarji addizzjonali għall-SMEs u tkun f’konformità mal-prinċipju “aħseb l-ewwel fiż-żgħir”;

– l-objettiv bażiku ta’ kull azzjoni li tittieħed għandu jkun li jitkattar l-għarfien dwar l-RSK u li potenzjal tagħha jitkabbar kemm jista’ jkun. Il-kwistjonijiet għandhom għalhekk jiġu affrontati b’mod raġunat u interdixxiplinarju u għandhom ikunu bbażati fuq objettivi strateġiċi mistqarra b’mod espliċitu;

– b’mod partikolari, l-awtoritajiet pubbliċi għandhom jagħmlu sforzi akbar biex irawmu d-diffużjoni tal-RSK fost l-SMEs, filwaqt li jappoġġjaw ir-rwol tal-organizzazzjonijiet intermedjarji, b’mod li jkun iffaċilitat it-tixrid tal-informazzjoni u l-prattiki tajba;

– il-Kummissjoni għandha tirfed l-azzjonijiet tal-gvernijiet nazzjonali billi tintensifika l-attivitajiet ta’ koordinament tagħha, billi tiġbor sitematikament informazzjoni dwar l-implimentazzjoni ta’ politiki tal-RSK implimentati mill-SMEs, bil-għan li trawwem il-ġmigħ u l-qsim ta’ prattiki tajba u tipprovdi materjal għar-riċerka akkademika f’dan il-qasam, b’mod partikolari fuq l-impatt ekonomiku, soċjali u ambjentali tal-RSK fil-livell lokali u reġjonali;

– finalment, minħabba n-natura speċifika tal-SMEs, ir-rapporteur jistieden lill-Kummissjoni biex tibda konsultazzjonijiet wiesgħa bil-għan li tidentifika u tiddefinixxi strateġiji tal-RSK li jaqdu l-ħtiġijiet tal-SMEs, inklużi miżuri speċjali għall-mikroimpriżi.

(1) COM(2011)0681. (2) Qabel, il-Kummissjoni Ewropea kienet iddefinixxiet l-RSK bħala “kunċett li bih, fuq bażi volontarja, il-kumpaniji jintegraw preokkupazzjonijiet soċjali u ambjentali fl-operat tan-negozju tagħhom u fl-interazzjoni tagħhom mal-partijiet interessati” (ara COM(2001)0366). (3) Ara COM(2011)0681, p.7. (4) Ara Scherer, A./ Palazzo, G. (2008): Globalisation and Corporate Social Responsibility. Fi: Crane, A. et al. (2008): The Oxford Handbook of Corporate Social Responsibility. Oxford, p. 413. (5) Ara Di Pascale, Alessia (2010): La responsabilità sociale dell'impresa nel diritto dell'Unione europea. Milan: Giuffre' editore, pp. 33-39. (6) Ara Habermas, J. (2002): La costellazione postnazionale. Milan: Feltrinelli. (7) Ara Martinuzzi, A. et al. (2010): Does Corporate Responsibility Pay Off? Exploring the Links between CSR and Competitiveness in Europe's Industrial Sectors. Dan l-istudju janalizza r-rabtiet bejn l-RSK u l-kompetittività fis-settur tal-bini, dak tad-drapp u dak tal-kimika. (8) Dawn ir-rabtiet kumplessi bejn in-negozju, iċ-ċittadini u l-kompetittività jista’ jinġabru fi ftit kliem b’parafrażi ta’ dak li kiteb aktar minn 10 snin ilu Michael E. Porter, wieħed mill-kontributuri ewlenin għat-teorija tal-maniġment, kif ġej: “negozji li jirnexxu għandhom bżonn soċjetà b’saħħitha, u soċjetà b’saħħitha għandha bżonn negozji li jirnexxu”. Ara Porter, M.E./Kramer, M.R. (2006): Strategy and Society: The Link Between Competitive Advantage and Corporate Social Responsibility. Fi: Harvard Business Review, Diċembru 2006, pp. 78-93. (9) Ara l-Kummissjoni Ewropea – DĠ Intrapriżi (2007): Opportunity and Responsibility. How to help more small business to integrate social and environmental issues into what they do. (10) Ara Perrini (2006): SMEs and CSR Theory: Evidence and Implications from an Italian Perspective. Fi: Journal of Business Ethics, Vol. 67, 305-316. L-artiklu, li jeżamina s-sitwazzjoni fl-Italja, jenfasizza l-ħtieġa ta’ approċċi mfassla apposta għall-RSK. Fil-każ tal-SMEs, l-approċċ għandu jibbaża fuq il-kunċett ta’ “kapital soċjali”, aktar milli fuq il-prinċipji tradizzjonali tat-“teorija tal-partijiet interessati”. Dwar l-istess tema ara wkoll: Morsing, M./Perrini, F. (2009): CSR in SMEs: do SMEs matter for the CSR agenda? Fi: Business Ethics, Vol. 18, Ħarġa 1. (11) Ara MacGregor, S./Fontrodona, J. (2011): Strategic CSR for SMEs: paradox or possibility? Fi: Universia Business Review.

(*) Proċedura b’kumitati assoċjati – Artikolu 50 tar-Regoli ta’ Proċedura

SUĠĠERIMENTI

Il-Kumitat għall-Impjiegi u l-Affarijiet Soċjali jistieden lill-Kumitat għall-Affarijiet Legali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jenfasizza li l-kriżi ekonomika globali attwali rriżultat minn żbalji fundamentali fir-rigward tat-trasparenza, l-obbligu ta’ rendikont, ir-responsabbiltà u mill-ħsieb esklussiv fuq medda qasira ta’ żmien, u li l-UE għandha d-dmir li tiżgura li dawn il-lezzjonijiet jitgħallimhom kulħadd; jilqa’ l-intenzjoni tal-Kummissjoni li twettaq stħarriġiet tal-Ewrobarometru dwar il-fiduċja fin-negozju; jappella biex ir-riżultati ta’ dawn l-istħarriġiet jiġu diskussi b’mod sħiħ u tittieħed azzjoni mill-partijiet interessati kollha; jappoġġa bis-saħħa r-responsabbiltà soċjali korporattiva (RSK), u hu tal-fehma li jekk din tiġi implimentata b'mod korrett u tintuża fil-prattika mill-kumpaniji kollha u mhux biss mill-kumpaniji l-kbar, tista’ tagħti kontribut kbir biex terġa’ titkattar il-fiduċja mitlufa, li hija assolutament meħtieġa għall-irkupru ekonomiku sostenibbli, u tista’ ttaffi l-konsegwenzi soċjali tal-kriżi ekonomika; jinnota li meta n-negozju jassumi responsabbiltà għas-soċjetà, l-ambjent, u l-impjegati, tinħoloq sitwazzjoni ta’ benefiċċju għal kulħadd li sservi biex twessa’ l-bażi ta’ fiduċja meħtieġa għas-suċċess ekonomiku; hu tal-fehma li huwa fl-interess tan-negozji u tas-soċjetà b’mod globali li l-RSK issir parti minn strateġija ta’ negozju sostenibbli; jirrimarka li diversi negozji, speċjalment intrapriżi żgħar u ta’ daqs medju (SMEs), qed jagħtu eżempju eċċellenti f’dan il-qasam;

2.  Jemmen li filwaqt li l-koregolamentazzjoni u l-awtoregolamentazzjoni ma jistgħux jissostitwixxu regolamentazzjoni settorjali xierqa fejn din tkun meħtieġa, pereżempju fir-rigward tar-rekwiżiti soċjali u ambjentali, il-prattiki tax-xogħol u l-impjiegi, id-drittijiet tal-bniedem, jew fi kwalunkwe qasam ieħor kopert mill-RSK, jistgħu jappoġġaw inizjattivi privati u volontarji eżistenti tal-RSK billi jistabbilixxu prinċipji minimi, biex b’hekk jiżguraw il-konsistenza, il-materjalità, kontribut minn partijiet interessati multipli u t-trasparenza, u billi jiffaċilitaw il-ħolqien ta’ aġenziji ta’ klassifikazzjoni ambjentali u soċjali speċjalizzati fl-RSK; jenfasizza li kwalunkwe forma ta’ RSK ibbażata fuq l-awtoregolamentazzjoni u l-awtoorganizzazzjoni tas-suq għandha tinkludi dispożizzjoni għal ‘aċċess għal rimedju’ f’konformità mat-‘tielet pilastru’ tal-Prinċipji Gwida tan-Nazzjonijiet Uniti dwar in-Negozju u d-Drittijiet tal-Bniedem; jinnota, fl-istess ħin, li l-amministrazzjonijiet pubbliċi għandhom jipprovdu appoġġ billi joħolqu kundizzjonijiet xierqa – u jipprovdu għodod u strumenti xierqa, bħal sistema ta’ inċentivi – għall-kooperazzjoni tal-RSK; jemmen li l-attivitajiet filantropiċi tan-negozji għandhom, bħala kwistjoni ta’ prinċipju, ikunu volontarji;

3.  Iqis li hu vitali li jittieħdu miżuri biex jiġu żgurati l-provvista xierqa ta’ servizzi u l-konformità mal-prinċipji tal-kompetizzjoni ġusta fis-suq uniku; jissuġġerixxi, għalhekk, li kriterji soċjali flimkien ma’ klawsoli tal-ILO, jiġu inklużi fl-għoti ta’ kuntratti, bħala kundizzjoni essenzjali u bi trasparenza massima, biex b'hekk jiġi salvagwardjat il-valur soċjali siewi tal-attività tal-RSK; jenfasizza li dan jista’ jinkoraġġixxi wkoll it-twettiq ta’ attività tal-RSK iktar xierqa u effettiva fi ħdan is-setturi industrijali;

4.  Jirrifjuta l-idea li negozji żgħar huma inqas responsabbli minn dawk kbar sempliċement għax m’għandhomx infrastruttura tal-RSK separata; jemmen li, sabiex jitqiesu l-ħtiġijiet ta’ negozji żgħar, għandhom jiġu stabbiliti limiti raġonevoli fi kwalunkwe proposti leġiżlattivi ġodda relatati mal-RSK li jitressqu; jappella, madankollu, għal azzjoni Ewropea li tibni fuq l-esperjenza tal-Italja, li tiddependi fuq il-kmamar reġjonali tal-kummerċ, u ta’ Franza, iffukata fuq il-banek ta’ tfaddil tagħha (Inizjattiva Cordé), għal ragruppament ta’ negozji żgħar skont il-lokalità jew is-settur, sabiex tkabbar sew is-sensibilizzazzjoni dwar il-kontribut tan-negozji żgħar kif ukoll il-viżibilità tiegħu;

5.  Jilqa’ l-intenzjoni tal-Kummissjoni li tniedi ‘Komunità ta' Prattika’ dwar l-RSK u l-azzjoni soċjali min-naħa tan-negozji; jemmen li dan għandu jkun kumplementarju għall-kodiċi ta’ prattika tajba għall-koregolamentazzjoni u l-awtoregolamentazzjoni, billi l-partijiet interessati kollha jitħallew jimpenjaw ruħhom fi proċess ta’ tagħlim komuni sabiex jittejbu u jissaħħu l-effiċjenza u l-obbligu ta’ rendikont tal-azzjonijiet b’partijiet interessati multipli;

6.  Hu tal-fehma li t-trasparenza u l-kredibbiltà tal-azzjonijiet tal-RSK jistgħu jkunu żgurati jekk jiġu stabbiliti standards minimi; jinnota li l-istandards minimi f’dan il-qasam għandhom, fi kwalunkwe każ, ikopru l-involviment tar-rappreżentanti tal-impjegati u t-trejdjunjins, flimkien ma’ partijiet interessati oħra, rigward il-kontenut, l-infurzar u l-monitoraġġ, l-involviment tal-katina ta’ valur, u r-rieżami indipendenti ta’ konformità mal-obbligi awtoimposti;

7.  Jappoġġa l-intenzjoni tal-Kummissjoni li tressaq proposta dwar id-‘divulgazzjoni mhux finanzjarja’ min-negozji, li tiffaċilita l-UE tinkoraġġixxi n-negozji Ewropej japplikaw il-Prinċipji Gwida tan-NU dwar in-Negozju u d-Drittijiet tal-Bniedem(1) u l-Patt Globali tan-NU; jilqa’ l-fatt li din il-proposta hija bbażata fuq konsultazzjoni pubblika mifruxa kif ukoll fuq sensiela ta' workshops ma' partijiet interessati rilevanti; jenfasizza li l-użu tat-terminu ‘mhux finanzjarja’ m’għandux jaħbi l-konsegwenzi finanzjarji reali għan-negozji f’termini tal-impatti soċjali, ambjentali u tad-drittijiet tal-bniedem; jindika li l-impatt tal-azzjoni tan-negozju u l-involviment soċjali jista’ jitkejjel ukoll f’termini finanzjarji; jitlob għal proposta li tqiegħed lill-UE fil-qalba tal-bosta inizjattivi internazzjonali attwali dwar ir-rappurtar tas-sostenibbiltà korporattiva u li tkun kompletament konformi mal-obbjettiv li rappurtar integrat, kif qed jiġi żviluppat issa mill-Kunsill Internazzjonali ta’ Rappurtar Integrat (IIRC), isir in-norma globali sa tmiem id-deċennju; jenfasizza, madankollu, li kwalunkwe soluzzjoni li tintgħażel m’għandhiex toħloq piżijiet amministrattivi eċċessivi, partikolarment għall-SMEs; jemmen li attivitajiet filantropiċi tan-negozji m’għandhomx jiġġeneraw burokrazija u spejjeż li jistgħu jipperikolaw l-impenji volontarji tagħhom; jilqa’ l-għan tal-kxif tal-ksur tad-drittijiet tal-bniedem u l-iskemi kriminali, u jħeġġeġ l-istati jikkastigaw dawn bl-akbar rigorożità;

8.  Jistieden lill-Kummissjoni tindirizza, fil-kuntest tad-Direttiva dwar Prattiki Kummerċjali Żleali, il-kwistjoni ta’ forom qarrieqa ta’ kummerċjalizzazzjoni fir-rigward ta’ impatti ambjentali u soċjali tal-operazzjonijiet tal-kumpaniji;

9.  Jikkundanna bl-akbar qawwa l-korruzzjoni korporattiva u l-evażjoni tat-taxxa, iżda jsostni li l-Kummissjoni għandha tiddistingwi b’mod aktar ċar bejn (1) l-azzjoni filantropika, (2) l-azzjoni soċjali min-negozji, (3) l-azzjoni antisoċjali min-negozji, fejn eżempju wieħed huwa t-tħaddim furzat tat-tfal; jikkundanna bil-qawwa azzjoni antisoċjali min-naħa tan-negozji, u jemmen li għandha titqiegħed pressjoni ikbar fuq pajjiżi biex japplikaw l-istandards internazzjonali fil-liġi nazzjonali u jinfurzaw din il-leġiżlazzjoni; ma jilqax, madankollu, kundanni ġeneralizzati fir-rigward tan-negozju kumplessivament fuq il-bażi ta’ prattiki inġusti u ksur tal-liġi min-naħa ta’ ftit kumpaniji biss; hu tal-fehma li filwaqt li kumpaniji għandhom obbligu li jitkellmu dwar kwistjonijiet pubbliċi ta’ tħassib, inklużi d-drittijiet tal-bniedem, l-attivitajiet ta’ lobbying tagħhom għandhom ikunu trasparenti bis-sħiħ u konformi mal-prinċipji demokratiċi; jenfasizza l-importanza tal-offerta ta’ taħriġ speċifiku tal-RSK fl-universitajiet u fl-iskejjel tan-negozju u maniġerjali;

10. Jenfasizza li rispett strett tad-drittijiet tal-bniedem, diliġenza u trasparenza xierqa għandhom jinżammu sabiex jiżguraw RSK tul il-katina tal-provvista kollha, il-kejl tal-marka tas-sostenibbiltà tan-negozju Ewropew, u l-ġlieda kontra l-evażjoni tat-taxxa u flussi ta’ flus illiċiti; jirrimarka li d-dibattiti parlamentari li għadhom għaddejjin dwar l-abbozz ta’ Liġi tal-UE dwar it-Trasparenza tal-Industrija Estrattiva għall-industrija estrattiva u tal-injam (2011/0307(COD)), ir-rieżami tad-Direttiva kontra l-Ħasil tal-Flus u l-abbozz imħabbar tal-leġiżlazzjoni dwar ir-rappurtar mhux finanzjarju jipprovdu opportunitajiet biex itejbu t-trasparenza tal-kumpaniji għal dawn il-finijiet;

11. Jenfasizza li r-responsabbiltà korporattiva m’għandhiex tiġi ristretta għal strument ta’ kummerċjalizzazzjoni, iżda li l-uniku mod biex tiġi żviluppata bis-sħiħ huwa li l-RSK tiġi integrata fl-istrateġija ġenerali ta’ negozju ta’ kumpanija, u tiġi implimentata u tradotta fir-realtà fl-operazzjonijiet ta’ kuljum tal-kumpanija u fl-istrateġija finanzjarja; jilqa’ rabta bejn responsabbiltà korporattiva tajba u governanza korporattiva tajba; jemmen li l-Kummissjoni għandha tħeġġeġ lill-kumpaniji jiddeċiedu dwar l-istrateġija tal-RSK fil-livell tal-bord; jitlob lill-Kummissjoni u lill-Istati Membri jintroduċu kodiċijiet ta’ ġestjoni korporattiva li jirriflettu l-importanza tar-responsabbiltà għal kulħadd fil-kumpanija, u li jistabbilixxu r-rabta soda bejn il-prestazzjoni ambjentali, soċjali u tad-drittijiet tal-bniedem tal-kumpanija u r-riżultati finanzjarji tagħha.

RIŻULTAT TAL-VOTAZZJONI FINALI FIL-KUMITAT

(1) Report of the Special Representative of the Secretary-General on the issue of human rights and transnational corporations and other business enterprises, John Ruggie: Guiding Principles on Business and Human Rights: Implementing the United Nations ‘Protect, Respect and Remedy’ Framework, 21 ta’ Marzu 2011.

SUĠĠERIMENTI

Il-Kumitat għall-Affarijiet Barranin jistieden lill-Kumitat għall-Affarijiet Legali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jilqa’ l-fatt li d-definizzjoni l-ġdida stabbilita fil-Komunikazzjoni tal-Kummissjoni tal-25 ta’ Ottubru 2011 dwar ir-Responsabbiltà Soċjali Korporattiva tissottolinja l-esiġenza tal-ottemperanza mar-regoli legali fis-seħħ bħala prekundizzjoni għal aġir responsabbli u li tippreċiża l-qafas meħtieġ għar-responsabbiltà korporattiva permezz tal-esiġenza li “li l-proċess operattiv" jintegra r-responsabbiltajiet soċjali, ambjentali, etiċi u dawk li jirrigwardaw id-drittijiet tal-bniedem u tal-konsumatur fl-operazzjonijiet ta' negozju u l-istrateġija ewlenija tal-impriżi b'kollaborazzjoni mill-qrib mal-partijiet interessati; itenni li r-responsabbiltà soċjali korporattiva jeħtieġ li testendi wkoll għall-aġir tal-impriżi fil-konfront ta' pajjiżi terzi u f’dawk il-pajjiżi;

2.  Jilqa’ l-isforzi tal-Unjoni Ewropea u tal-Istati Membri li jallinjaw il-politiki tagħhom mar-reviżjoni tal-2011 tal-linji gwida tal-OECD għall-impriżi multinazzjonali kif ukoll mal-Prinċipji Gwida tan-NU dwar in-Negozju u d-Drittijiet tal-Bniedem(1) u jissottolinja li dawn l-isforzi, speċjalment fis-settur tal-kummerċ internazzjonali li mhuwiex regolat mill-istati nazzjon għadhom s'issa ma wasslux għal impenn suffiċjenti għaż-żamma u r-rieżami ta’ standards ambjentali, soċjali, u tad-drittijiet tal-bniedem;

3.  Jenfasizza l-importanza li titqies l-katina tal-provvista fil-valutazzjoni tar-rispett tar-responsabilità soċjali min-naħa ta' kumpannija; iqis li hija ta' importanza enormi li jiġu stabbiliti indikaturi effiċjenti u trasparenti li jippermettu l-valutazzjoni b'mod preċiż tal-impatti tal-attivitajiet tal-kumpanniji mil-lat sistematiku;

4.  Jinsisti li kull wieħed mis-27 Stat Membru jrid jaċċellera r-reviżjoni tal-pjanijiet tiegħu ta’ azzjoni dwar ir-Responsabilità Soċjali tal-Kumpaniji (RSK), u l-iżvilupp tal-pjanijiet nazzjonali li jimplementaw il-Prinċipji Gwida tan-NU, li għandhom ikunu ffinalizzati sa mhux aktar tard minn tmiem Diċembru 2013; iqis li l-Istati Membri għandhom jiżguraw li dawn il-pjanijiet jitfasslu bil-parteċipazzjoni tal-istakeholders relevanti kollha, inklużi l-NGOs, is-soċjetà ċivili, it-trade unions, l-organizzazzjonijiet ta' min iħaddem u l-istituzzjonijiet nazzjonali tal-jeddijiet tal-bniedem (NHRI); jitlob lill-UE tiffaċilita t-tagħlim mill-esperjenza ta’ dawk l-Istati Membri li għaddejjin bħalissa mill-proċess; jinkoraġġixxi lill-Istati Membri jitnebbħu mil-linji gwida li jinsabu fl-istandard ISO 26000, mill-aħħar verżjoni tal-linji gwida tal-Global Reporting Initiative u mill-gwida mogħtija mill-Grupp Ewropew tal-Istituzzjonijiet Nazzjonali tal-Jeddijiet tal-Bniedem (NHRIs);

5.  Jissottolinja li r-responsabbiltà soċjali tal-impriżi sew fi ħdan l-UE kif ukoll f’pajjiżi terzi għandha tiġi estiża għal oqsma bħall-organizzazzjoni tax-xogħol, il-kwalita tal-impjiegi, l-ugwaljanza tal-opportunitajiet, il-parteċipazzjoni soċjali, il-ġlieda kontra d-diskriminazzjoni kif ukoll it-tagħlim tul il-ħajja;

6.  Jitlob li jkun hemm koerenza akbar fil-politiki f’livell ta’ UE billi l-politiki u ftehimiet dwar l-akkwist pubbliku, il-kreditu tal-esportazzjoni, il-governanza t-tajba, il-konkorrenza, l-iżvilupp, il-kummerċ, l-investiment u oħrajn jinġiebu f’konformità mal-istandards internazzjonali tal-jeddijiet tal-bniedem, soċjali u ambjentali, imniżżlin fil-linji gwida u l-prinċipji tal-OECD u tan-NU; jitlob, f’dan is-sens, għal kooperazzjoni mal-korpi li jirrappreżentaw l-impjegati, dawk li jħaddmu u lill-konsumaturi filwaqt li jittieħed il-parir tal-NHRIs, bħalma huma s-sottomissjoni tal-Grupp Ewropew tal-NHRIs lill-Kummissjoni dwar il-jeddijiet tal-bniedem u l-akkwist; jitlob li jkun hemm valutazzjonijiet sinifikanti u adegwati tal-impatt tal-proposti leġiżlattivi għal inkoerenza potenzjali mal-Prinċipji Gwida, u jinsisti fuq il-koordinazzjoni mal-Grupp ta' Ħidma dwar in-Negozju u l-Jeddijiet tal-Bniedem, ħalli tkun evitata interpretazzjoni ma ssegwix u inkonsistenti ta’ dawk il-Prinċipji Gwida; filwaqt li jirrikonoxxi l-importanza tal-qafas tal-jeddijiet tal-bniedem tan-NU għar-RSK, ifakkar li l-Artikolu 16 tal-Karta tad-Drittijiet Fundamentali tal-Unjoni Ewropea tiggarantixxi d-dritt fundamentali ta' libertà ta' intrapriża, dritt li għandu jiġi kkunsidrat kif xieraq u jservi ta' referenza għall-appoġġ ta' politiki tar-RSK fl-UE; jenfasizza l-importanza li jinżamm bilanċ bejn il-libertà ta' intrapriża u drittijiet oħra garantiti minn din il-Karta kif ukoll prinċipji u linji gwida rikonoxxuti internazzjonalment għar-RSK; jilqa' f'dan il-kuntest, l-isforzi tal-Aġenzija tal-Unjoni Ewropea għad-Drittijiet Fundamentali sabiex tiġbor evidenza u għarfien espert dwar l-eżistenza u l-interpretazzjoni tal-libertà ta' intrapriża;

7.  Jimpenja ruħu li jissokta jgħolli b’mod konsistenti l-istennija tiegħu li l-istituzzjonijiet u l-uffiċjali tal-UE, inkluż ir-Rappreżentant Speċjali tal-UE għall-Jeddijiet tal-Bniedem kif ukoll ir-Rappreżentanti Speċjali tal-UE speċifiċi għall-pajjiż u għar-reġjun, jagħmlu kull sforz biex imexxu ’l quddiem l-istandards soċjali u ambjentali, u l-jeddijiet tal-bniedem u l-aġenda tan-negozju fir-relazzjonijiet u l-azzjonijiet esterni kollha tal-UE; jstieden lill-Kummissjoni u lill-Istati Membri jwettqu valutazzjonijiet tal-impatt b'rabta mad-drittijiet fundamentali qabel il-konklużjoni u waqt l-evalwazzjoni ta' ftehimiet multilaterali u bilaterali tal-kummerċ u tal-investiment u l-attribuzzjoni ta' għajnuna mill-Istat u jiżguraw li dawn id-drittijiet jiġu rispettati;

8.  Jirrikonoxxi li l-NHRIs allinjati mal-Prinċipji ta' Pariġi huma pożizzjonati b'mod tajjeb ħalli jagħtu l-appoġġ għall-implementazzjoni tal-Prinċipji Gwida tan-NU, inkluża l-faċilitizzazzjoni tal-aċċess għal irmedji jekk mhux l-iżgurar tiegħu; jitlob lill-UE u lill-Istati Membri tagħha jirrikonoxxu l-NHRIs flimkien mal-impriżi u l-korpi rappreżentanti l-impjegati, lil min iħaddem u lill-konsumaturi bħala sieħba ewlenin fl-avvanz tal-jeddijiet tal-bniedem u l-aġenda tan-negozju, bl-iżvilupp tar-rabtiet bejn in-negozju, l-istat u s-soċjetà ċivili u l-promozzjoni ta’ standards u linji-gwidi soċjali, ambjentali u ta’ jeddijiet tal-bniedem li jkunu internazzjonalment rikonoxxuti; jitlob, f’dan il-kuntest, lill-Istati Membri jsaħħu u, fejn ikun neċessarju, iwessgħu l-mandati tal-NHRIs ħalli jagħmluhom aktar effettivi, jew, fejn ma jkunx hemm NHRI allinjat mal-Prinċipji ta’ Pariġi, ħalli jieħdu passi biex iwaqqfuhom, u ħalli l-UE tiżviluppa appoġġ stateġiku xieraq; jimpenja ruħu li jwaqqaf skambju regolari ta’ kull sena ta’ veduti mal-NHRIs fil-qafas tal-LIBE u/jew DROI, billi jibni fuq l-esperjenza tal-iskambju ta’ veduti tad-DROI dwar is-‘Samit tal-2011 tal-Ombudsmen tal-UE u tas-Sħubija Lvant’, u li jikkomplementa tali skambji b’workshops iddedikati apposti għall-jeddijiet tal-bniedem u n-negozju;

9.  Jilqa' favorevolment l-adozzjoni mill-Organizzazzjoni Internazzjonali tax-Xogħol, fl-14 ta' Ġunju 2012, tar-Rakkomandazzjoni nru 202 dwar il-bażijiet ta' protezzjoni soċjali; jintrabat li jqiegħed il-kwestjoni tal-'drittijiet tal-bniedem u n-negozju' fuq l-aġendi tal-laqgħat li jmiss tal-UE ma' pajjiżi terzi, l-aktar dawk li magħhom l-UE għandha rapport speċjali; jitlob li r-RSK tkun inkorporata fir-relazzjonijiet kontrattwali atl-UE ma' pajjiżi terzi u jitlob li, jekk ikun neċessarju, it-traduzzjonijiet tal-Prinċipji Gwida tan-NU jitwettqu bl-użu tal-kapaċità tal-PE jew ta' istituzzjonijiet oħrajn tal-UE;

10. Jitlob lill-UE, u b’mod partikolari lill-Kummissjoni, tiżgura li l-istrumenti finanzjarji, inkluż l-Istrument Ewropew għad-Demokrazija u d-Drittijiet tal-Bniedem (EIDHR), jaraw lill-NHRIs konformi mal-Prinċipji ta’ Pariġi bħala sħab kjavi fil-ksib tal-objettivi tagħhom, u tappoġġjahom fl-użu effiċjenti li jagħmlu mill-pożizzjoni unika u mill-għarfien espert tagħhom dwar il-jeddijiet tal-bniedem ħalli joħolqu spazju għad-djalogu bejn l-istakeholders varji, inklużi l-awtoritajiet statali, is-soċjetà ċivili u n-negozju, għal dan il-fini:

(1) (1) jiżgura li t-tema tar-responsabbiltà soċjali korporattiva tkun tidher fost il-prijoritajiet tal-istrumenti finanzjarji individwali skont il-perspettiva tal-Qafas Finanzjarju Pluriennali (QFP) għall-perijodu 2014-2020; kif ukoll

(2) jiżviluppa appoġġ speċifiku skont l-EIDHR għat-taħriġ u l-bini globali tal-kapaċità fil-qasam tal-jeddijiet tal-bniedem u n-negozju tal-organizzazzjonijiet tas-soċjetà ċivili, l-NHRIs, id-difensuri tal-jeddijiet tal-bniedem, it-trade unions, u organizzazzjonijiet oħrajn tal-jeddijiet tal-bniedem;

11. Jinsisti, sabiex jiżgura li l-implementazzjoni tal-istrateġija l-ġdida RSK tal-UE tkun tippromwovi l-interessi tas-soċjetà, ir-rispett għall-jeddijiet tal-bniedem, u triq għal progress sostenibbli u inklussiv, li l-proposta leġiżlattiva dwar il-kxif obbligatorju tal-informazzjoni mhux finanzjarja (inkluża informazzjoni ambjentali, soċjali u ta’ governanza) tal-kumpanniji tiżgura t-trasparenza billi tagħti qafas ċar, mhux ambigwu, komuni u determinat minn qabel, b’riferiment speċifiku għall-jeddijiet tal-bniedem, li jkun kompletament allinjat mal-Prinċipji Gwida tan-NU u msejjes fuq indikaturi oġġettivi: l-ugwaljanza bejn in-nisa u l-irġiel, inklużi kwestjonijiet bħalma hija l-qabża fis-salarji bejn il-ġeneri u l-proporzjon ta’ nisa f’pożizzjonijiet għolja; il-pagi taż-żgħażagħ; il-possibilità li l-ħaddiem jissieħbu fi trade unions u jkollhom negozjati kollettivi; garanziji effettivi ta’ sigurtà fuq il-post tax-xogħol; u d-diżabbiltà;

12. Jitlob lill-UE tindirizza l-avariji fil-kapaċità interna u fl-għarfien espert billi timplementa progammi ta’ taħriġ sinifikanti dwar il-‘jeddijiet tal-bniedem u n-negozju' fl-istituzzjonijiet u l-oqsma kollha tal-politiki tal-UE;

13. Itenni t-talbiet tiegħu lill-UE u lill-Istati Membri li jtejbu l-eżekuzzjoni tal-liġijiet eżistenti li jindirizzaw ir-RSK it-tħassib tan-negozju u l-jeddijiet tal-bniedem, u li jiżviluppaw aktar soluzzjonijiet li jimmiraw lejn opportunitajiet indaqs għall-impriżi tan-negozju kemm domestiċi kemm ta' pajjiżi terzi bil-għan li jiġi miġġieled id-dumping soċjali;

14. Jitlob li jkun hemm standards ta' għall-jeddijiet tal-bniedem u għall-katina ta’ fornitura f’livell ta’ UE li, fost ħwejjeġ oħra, jissodisfaw ir-rekwiżiti mniżżlin fil-Gwida tal-OKŻE dwar id-Diliġenza Dovuta għal Ktajjen ta’ Provvista Responsabbli tal-Minerali minn Zoni Affettwati mill-Kunflitti u Zoni ta’Riskju Għoli li jkunu indirizzati, fost kwestjonijiet oħrajn, oqsma b'potenzjal sinifikattiv ta' impatt negattiv jew pożittiv fuq il-jeddijiet tal-bniedem bħalma huma l-ktajjen ta' fornituri globali u lokali, il-minerali tal-kunflitti, l-outsourcing, il-ħtif tal-art, u reġjuni fejn id-dritt tax-xogħol u ħarsien il-ħaddiema huma insuffiċjenti jew fejn jiġu mmanifatturati l-prodotti li huma perikolużi għall-ambjent u għas-saħħa; jilqa' pożittivament il-programmi diġà stabbiliti mill-UE, partikolarment il-programm FLEGT fil-qasam tas-silvikultura, u jsostni l-Inizjattiva għat-trasparenza tal-industriji estrattivi (EITI);

15. Jitlob li fejn l-UE jew l-Istati Membri jkunu sħab fin-negozju (eż., fl-akkwist pubbliku, fl-impriżi tal-istat, fil-joint ventures, fil-‘blending’, fil-garanziji tal-kreditu għall-esportazzjoni, fil-proġetti fuq skala kbira f’pajjiżi terzi), il-konsistenza mal-Linji gwida u prinċipji tal-OECD u tan-NU għandha tkun prijorità, riflessa fi klawsoli kontrattwali speċifiċi, u b'konsegwenzi għall-kumpanniji li jiksru b'mod ċar l-istandards soċjali, ambjentali u tad-drittijiet tal-bniedem; jirrakkomanda li l-‘Pjattaforma tal-UE għall-Kooperazzjoni u l-Iżvilupp Esterni’ twaqqaf modalitajiet bħal dawn bil-ħsieb li jtejbu l-kwalità u l-effiċjenza tal-mekkaniżmi ta' taħlit u tal-istrumenti finanzjarji tal-kooperazzjoni esterna tal-UE u l-kooperazzjoni u l-koordinazzjoni bejn l-UE, l-Istituzzjonijiet Finanzjarji u partijiet interessati oħra f'dan il-qasam;

16. Jisħaq fuq l-importanza tal-qafas tan-Nazzjonijiet Uniti "protezzjoni, rispett u rimedju"u jqis li dawn it-tliet pilastri: ir-responsabilità tal-Istat li jipproteġi mill-ksur tad-drittijiet tal-bniedem, ir-responsabilità tal-kumpanniji li jirrispettaw id-drittijiet tal-bniedem u l-bżonn ta' aċċess aktar effettiv għar-rimedju għandhom ikunu suġġetti għal provvedimenti adegwati li jippermettu l-implementazzjoni tagħhom;

17. Jenfasizza li, minħabba l-piż tagħhom fil-kummerċ internazzjonali, l-kumpanniji Ewropej, is-sussidjarji tagħhom u s-sottokuntratturi tagħhom jiżvolġu rwol fundamentali fil-promozzjoni u t-tixrid tal-istandards soċjali u tax-xogħol fid-dinja; jirrikonoxxi li l-ilmenti kontra l-kumpaniji tal-UE li joperaw barra huma aktar iva milli le riżolti b'mod tajjeb in situ; ifaħħar lill-Punti Nazzjonali ta’ Kuntatt tal-OECD bħala mekkaniżmu mhux legali bbażati fuq l-istat li jistgħu jimmedjaw fuq firxa wiesgħa ta’ tilwimiet tan-negozju u tal-jeddijiet tal-bniedem; jitlob, b’danakollu, li jkun hemm sforzi akbar mill-kumpanniji fl-iżvilupp tal-mekkaniżmi ta’ lmentar allinjati mal-kriterji ta’ effikaċja msemmijin fil-Prinċipji Gwida u li jfittxu aktar gwida awtorevoli pprovduta minn prinċipji u linji gwida rikonoxxuti internazzjonalment, b'mod partikolari l-Linji Gwida tal-OECD aġġornati reċentement għal Intrapriżi Multinazzjonali, l-għaxar prinċipji tal-Patt Globali tan-Nazzjonijiet Uniti, l-Istandard ta' Gwida dwar ir-Responsabilità Soċjali ISO 26000, id-Dikjarazzjoni Tripartitika tal-Prinċipji fir-rigward tal-Impriżi Nazzjonali u l-Politika Soċjali tal-ILO;

18. Jilqa’ l-intenzjoni tal-Kummissjoni Ewropea li temenda d-dispożizzjonijiet tad-dritt internazzjonali privat misjubin fir-Regolament Brussell I, u b'mod partikolari l-introduzzjoni tal-prinċipju tal-'forum necessitatis'; jisħaq dwar il-ħtieġa li jiżviluppa atkar aċċess effikaċi għar-rimedji għall-vittmi tal-vjolazzjonijiet tal-jeddijiet tal-bniedem riżultanti mill-operazzjonijiet tal-kumpanniji barra l-UE, permezz ta’ riformi tar-regolamenti Brussell I u Ruma II; jitlob li jkun hemm miżuri effikaċi għat-tneħħija tal-ostakli eżistenti għall-ġustizzja, bħalma huma l-kostijiet mhux xierqa tal-litigazzjoni, permezz ta' inizjattivi bħalma huwa l-iżvilupp ta' standards minimi ta' rimedju kollettiv, jew soluzzjonijiet għall-problema tal-'personalità ġuridika separata' tal-kumpanniji;

19. Jitlob l-iżvilupp ta' standards ta' trasparenza u responsabilità aktar effettivi għall-kumpaniji teknoloġiċi tal-UE fir-rigward ta' teknoloġiji ta' esportazzjoni li jistgħu jintużaw sabiex jiksru il-jeddijiet tal-bniedem jew jaġixxu kontra l-interess tas-sigurtà tal-UE;

20. Jilqa' favorevolment ir-rieda tal-Kummissjoni li tittratta l-kwestjoni tar-responsabilità soċjali tal-kumpanniji fil-kuntest tat-tkabbir; huwa diżappuntat, b’dana kollu, li din il-kwestjoni ma ġiet indirizzata b’mod speċifiku fin-negozjati għat-tisħib mal-pajjiżi kandidati jew imsemmija fil-komunikazzjoni tal-Kummissjoni tal-10 ta’ Ottubru 2012 bit-titlu ‘L-Istrateġija ta’ Tkabbir u l-Isfidi Ewlenin 2012-2013’ (COM(2012)0600);

21. Jilqa' pożittivament l-intenzjoni tal-Kummissjoni li tistabbilixxi kampanji mondjali, linji gwida internazzjonali u miżuri leġiżlattivi komplementari bil-għan li jiġi garantit li l-impriżi jħallu impatti pożittivi fuq il-kumpanniji barranin; jinnota li l-impatti pożittivi tal-impriżi fuq il-kumpanniji barranin jistgħu, fost affarijiet oħrajn, jitkejlu skont l-aċċess għar-riżorsi mill-popolazzjonijiet lokali, tas-sovranità tal-ikel tal-popolazzjonijiet, tal-iżvilupp endoġenu tal-kumpanniji;

22. Jitlob l-implimentazzjoni tal-'konoxxenza tal-utent finali proprju' sabiex ikun żgurat li jiġi evitat il-ksur tal-jeddijiet tal-bniedem fl-istadji tal-bidu u dawk sussegwenti fi fluss tal-produzzjoni jew tas-suq.

RIŻULTAT TAL-VOTAZZJONI FINALI FIL-KUMITAT

(1) Kunsill tal-Jeddijiet tal-Bniedem tan-Nazzjonijiet Uniti, 17-il Sessjoni, 21 ta' Marzu 2011, Rapport tar-Rappreżentant Speċjali tas-Segretarju-Ġenerali dwar il-kwestjoni tal-jeddijiet tal-bniedem u l-korporazzjonijiet transnazzjonali u impriżi oħrajn tan-negozju, John Ruggie: "Prinċipji Gwida dwar il-Kummerċ u d-Drittijiet tal-Bniedem: Implementing the United Nations “Protect, Respect and Remedy” Framework”’ (A/HRC/17/31) (magħrufin minn issa ’l quddiem bħala l-“Prinċipji Gwida tan-NU”).

SUĠĠERIMENTI

Il-Kumitat għall-Iżvilupp jistieden lill-Kumitat għall-Affarijiet Legali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jinnota li minħabba l-eteroġeneità tal-kunċett tar-Responsabbiltà Soċjali Korporattiva (RSK), fejn kumpaniji differenti żviluppaw standards differenti dwar il-kontabilità, l-awditjar u r-rappurtar, il-livelli tar-RSK diffiċli jitqabblu; jenfasizza li r-regolazzjoni maqbula f'livell internazzjonali fil-kuntest tal-RSK toħloq fiduċja u ekwità fir-relazzjonijiet kummerċjali u jkollha l-benefiċċji taċ-ċertezza, l-infurzabbiltà progressiva, l-universalità u l-għoti tas-setgħa lill-partijiet interessati;

2.   Jaqbel mal-Kummissjoni li l-RSK trid tkopri d-drittijiet tal-bniedem, il-prattiki fil-qasam tax-xogħol u l-impjieg, il-kwistjonijiet ambjentali (bħall-bijodiversità, it-tibdil fil-klima, l-effiċjenza fl-użu tar-riżorsi) u l-ġlieda kontra t-tixħim u l-korruzzjoni, b'mod partikolari permezz ta' governanza tajba fil-qasam tat-taxxa (jiġifieri t-trasparenza, l-iskambju tal-informazzjoni u l-kompetizzjoni ġusta fil-qasam tat-taxxa);

3.   Ifakkar li l-RSK tkopri diversi standards soċjali iżda dawn ftit li xejn huma enfasizzati peress li ma ġewx stabbiliti indikaturi li jippermettu l-kejl tal-progress miksub fil-livell soċjali;

4.   Jenfasizza li l-impriżi li jimpenjaw ruħhom favur l-RSK għandhom ikunu jistgħu jiġu identifikati faċilment mill-investituri u l-konsumaturi sabiex jiġu inkoraġġiti fl-isforzi tagħhom;

5.   Jenfasizza l-ħtieġa li l-UE teżamina l-possibbiltà li jiddaħħlu marki jew tikketti xierqa li jintużaw maġenb l-ismijiet tal-impriżi li impenjaw ruħhom favur l-RSK, jew fuq il-prodotti tagħhom, sabiex ikun faċli li jiġu identifikati;

6.   Jirrimarka li l-RSK hija l-aħjar għodda sabiex il-kumpaniji juru l-impenn, is-solidarjetà u r-responsabbiltà tagħhom lejn is-soċjetà u hija wkoll essenzjali biex jintlaħaq l-objettiv tal-koerenza tal-politiki għall-iżvilupp (PCD); jilqa' bi pjaċir l-impenn tal-Kummissjoni li tippromwovi l-RSK b'konsistenza sħiħa mal-linji gwida internazzjonali attwali, inklużi l-Linji Gwida għall-Impriżi Multinazzjonali tal-OECD, l-għaxar prinċipji tal-Patt Dinji tan-Nazzjonijiet Uniti, l-Istandard Gwida dwar ir-Responsabbiltà Soċjali ISO 26000, id-Dikjarazzjoni Tripartitika tal-Prinċipji fir-rigward tal-Impriżi Multinazzjonali u l-Politika Soċjali tal-ILO, u l-Prinċipji Gwida tan-Nazzjonijiet Uniti dwar in-Negozju u d-Drittijiet tal-Bniedem; jiddispjaċih, madankollu, li l-lingwaġġ tar-RSK fil-parti l-kbira tiegħu huwa volontarju;

7.   Jiddispjaċih għan-nuqqas ta' informazzjoni mogħtija lill-SMEs dwar l-eżistenza tal-Patt Dinji li bis-saħħa tiegħu l-impriżi jistgħu jieħdu l-impenn li jallinjaw l-operazzjonijiet u l-istrateġiji tagħhom mal-għaxar prinċipji aċċettati b'mod universali fl-oqsma tad-drittijiet tal-bniedem, ix-xogħol, l-ambjent u l-ġlieda kontra l-korruzzjoni;

8.   Jenfasizza li l-Patt Dinji tan-NU u l-istandards ISO 26000 mhumiex adattati biżżejjed għall-SMEs u minħabba f'hekk l-idea kollha tal-RSK hija inqas effettiva fl-UE;

9.   Jenfasizza li huwa utli li fil-livell tal-UE u f'dak nazzjonali jiġu eżaminati l-mezzi ta' inċentiv fiskali li jistgħu jippermettu l-promozzjoni tal-RSK mal-ikbar numru possibbli ta' impriżi;

10. Jenfasizza li, bħala impenn purament volontarju, l-RSK taf ma tkunx biżżejjed biex tittratta l-esternalitajiet li jirriżultaw mill-operazzjonijiet tal-kumpaniji multinazzjonali, inklużi l-vjolazzjonijiet tad-drittijiet tal-bniedem u d-degradazzjoni ambjentali; itenni t-talba tiegħu sabiex l-investituri u l-kumpaniji barranin li joperaw f'pajjiżi li qed jiżviluppaw jikkonformaw bis-sħiħ mal-obbligi legalment vinkolanti fil-livell internazzjonali fir-rigward tad-drittijiet tal-bniedem u l-istandards ambjentali u l-istandards tax-xogħol ewlenin tal-ILO kif ukoll il-Prinċipji Gwida tan-NU dwar in-Negozju u d-Drittijiet tal-Bniedem; jitlob li l-politiki tal-RSK jinkludu wkoll miżuri speċifiċi li jindirizzaw il-prattika illegali li permezz tagħha ħaddiema jitqiegħdu fuq “lista sewda”u jinċaħdu l-aċċess għall-impjieg, ħafna drabi minħabba s-sħubija jew l-attivitajiet tagħhom f’xi trade union jew ir-rwol rappreżentattiv tagħhom fil-qasam tas-saħħa u s-sikurezza;

11. Jenfasizza l-fatt li l-kumpaniji għandhom jitħeġġu jimplimentaw prattiki ta' RSK u li l-kumpaniji li jkunu diġà implimentaw dawn il-prattiki għandhom jitħeġġu jsegwu l-għanijiet tal-RSK; jitlob lill-Kummissjoni tqis inċentivi, bħall-għoti ta' prijorità f'kuntratti ta' akkwist pubbliku tal-UE, sabiex il-kumpaniji iqisu l-RSK bħala opportunità u mhux bħala theddida;

12. Jenfasizza li l-RSK għandha twassal sabiex ikun hemm impenji ċari favur ir-rispett għad-drittijiet, il-protezzjoni u l-benesseri tal-ħaddiema b'indikaturi tal-prestazzjoni u punti ta' riferiment ċari għall-kejl tat-titjib, u li għandu jsir provvediment għal monitoraġġ oġġettiv, inklużiv u trasparenti u mekkaniżmi effikaċi ta' għoti ta' rendikont u ta' infurzar biex jiġu indirizzati każijiet ta' nuqqas ta' konformità, inkluża proċedura aktar miftuħa u ċara għat-tressiq u l-ikkunsidrar tal-ilmenti u għat-tnedija ta' investigazzjonijiet meta jkun meħtieġ;

13. Itenni li l-RSK għandha tkun applikabbli għall-impriżi kollha biex ikun hemm kundizzjonijiet ġusti u ugwali għal kulħadd; madankollu, jirrimarka li l-mod kif l-industriji estrattivi joperaw fil-pajjiżi li qed jiżviluppaw jirrikjedi li wieħed imur lil hinn minn approċċ volontarju; jenfasizza li l-investiment fin-Niġerja min-naħa tal-industrija tal-pitrolju huwa eżempju tajjeb tal-limitazzjonijiet tal-RSK kif implimentata bħalissa, fejn kumpaniji naqsu milli jieħdu inizjattivi ta' RSK biex joħolqu prattiki ta' negozju sostenibbli, jew jikkontribwixxu għall-iżvilupp tal-istati ospitanti tagħhom; jappoġġa b'mod qawwi l-proposta leġiżlattiva għar-rappurtar skont il-pajjiż, abbażi tal-istandards tal-Inizjattiva għat-Trasparenza tal-Industriji Estrattivi (EITI), rappurtar tal-bejgħ u l-profitti, kif ukoll tat-taxxi u d-dħul, sabiex tiġi skoraġġita l-korruzzjoni u evitat l-evitar tat-taxxa; jistieden lill-industriji estrattivi Ewropej li joperaw f'pajjiżi li qed jiżviluppaw biex jagħtu eżempju ta' responsabbiltà soċjali u jippromwovu x-xogħol deċenti;

14. Jistieden lill-Kummissjoni tieħu inizjattivi ulterjuri mmirati lejn l-iżblukkar u t-tisħiħ tal-potenzjal tal-RSK fl-indirizzar tat-tibdil fil-klima (billi torbotha mal-effiċjenza fl-użu tar-riżorsi u tal-enerġija), pereżempju fil-proċessi li l-kumpaniji jużaw għax-xiri ta' materji primi;

15. Jenfasizza li l-RSK għandha tapplika għall-katina kollha tal-provvista globali, inklużi l-livelli kollha ta' sottokuntrattar, li fil-provvista kemm ta' prodotti, kemm ta' ħaddiema kif ukoll ta' servizzi, għandha tinkludi dispożizzjonijiet biex testendi l-protezzjoni għall-ħaddiema migranti, il-ħaddiema temporaniji permezz tal-aġenziji u l-ħaddiema stazzjonati, u li għandha tkun imsejsa fuq pagi ġusti u kundizzjonijiet tax-xogħol deċenti u tiggarantixxi d-drittijiet u l-libertajiet fir-rigward tat-trade unions; huwa tal-fehma li l-kunċett tal-Ġestjoni Responsabbli tal-Katina tal-Provvista jeħtieġ li jiġi elaborat aktar bħala mekkaniżmu għat-twettiq tac-RSK;

16. Huwa tal-fehma li, biex ikollha impatt ġenwin fuq it-tnaqqis tal-faqar, l-aġenda tal-RSK għandha wkoll tiffoka fuq l-SMEs, billi l-impatt soċjali u ambjentali kumulattiv tagħhom huma sinifikanti;

17. Iqis li l-kumpaniji tal-UE għandhom ikunu legalment responsabbli u li bejniethom u s-sussidjarji tagħhom u l-entitajiet li jikkontrollaw fil-pajjiżi li qed jiżviluppaw għandhom jiġu implimentati mekkaniżmi ta' għoti ta' rendikont u ta' responsabbiltà; jilqa' bi pjaċir, barra minn hekk, il-ħidma li saret mis-soċjetà ċivili tal-UE, li ilha involuta b'mod attiv fis-sensibilizzazzjoni rigward vjolazzjonijiet imwettqa minn dawn il-kumpaniji barra minn pajjiżhom;

18. Jinsisti li huwa d-dmir tal-istat li jipproteġi minn vjolazzjonijiet tad-drittijiet tal-bniedem u tax-xogħol, inkluż mill-kumpaniji, li jżomm responsabbli lill-kumpaniji, li jiddefendi l-libertà ta' assoċjazzjoni u d-drittijiet ta' negozjar kollettiv u li jipprovdi aċċess għall-ġustizzja għall-vittmi; jistieden lill-Kummissjoni tipprovdi miżuri effikaċi biex tibda tħaddem il-Qafas Ipproteġi, Irrispetta u Irrimedja tan-NU propost minn John Ruggie, ir-Rappreżentant Speċjali tan-NU dwar in-Negozju u d-Drittijiet tal-Bniedem;

19. Jenfasizza li l-implimentazzjoni aħjar tal-Prinċipji Gwida tan-NU dwar in-Negozju u d-Drittijiet tal-Bniedem se tikkontribwixxi għall-għanijiet tal-UE fir-rigward ta' kwistjonijiet speċifiċi marbutin mad-drittijiet tal-bniedem u standards ewlenin tax-xogħol; għalhekk jistieden lill-UE tistinka biex ikun hemm qafas ġuridiku internazzjonali ċar dwar ir-responsabbiltajiet u l-obbligi tan-negozji f'dak li għandu x'jaqsam mad-drittijiet tal-bniedem;

20. Jilqa' l-fatt li n-numru ta' kumpaniji li qed jiżvelaw informazzjoni dwar il-prestazzjoni ambjentali, soċjali u ta' governanza tagħhom (ESG) kiber b'mod sinifikanti dawn l-aħħar snin; jirrimarka madankollu li l-kumpaniji li jirrappurtaw tali informazzjoni xorta għadhom jirrappreżentaw sehem żgħir tan-negozju globali; jinnota li, filwaqt li d-Direttiva tal-UE dwar l-Immodernizzar tal-Kontijiet (2003/51/KE)(1) tiżgura livell minimu ta' żvelar ta' indikaturi ta' prestazzjoni ewlenin kemm finanzjarji u kemm mhux finanzjarji, din ma tistabbilixxi l-ebda rekwiżiti fir-rigward tat-tip ta' indikaturi li jridu jiġu inklużi fir-rapporti annwali; jistieden lill-Kummissjoni tinvestiga miżuri possibbli ulterjuri biex issaħħaħ l-iżvelar ta' informazzjoni dwar l-ESG fil-livell Ewropew;

21. Jenfasizza li l-għajnuna li l-UE tagħti lill-gvernijiet ta' pajjiżi terzi biex jimplimentaw regolamentazzjoni soċjali u ambjentali kif ukoll reġimi ta' spezzjoni effikaċi tikkostitwixxi komplement meħtieġ sabiex l-RSK tan-negozji Ewropej tikseb progress fid-dinja kollha;

22. Jenfasizza li l-Investiment Soċjalment Responsabbli (ISR) jagħmel parti mill-proċess ta' implimentazzjoni tal-RSK fid-deċiżjonijiet marbutin mal-investiment; jinnota li għalkemm bħalissa ma teżisti l-ebda definizzjoni universali tal-ISR, is-soltu dan jgħaqqad l-għanijiet finanzjarji tal-investituri mal-preokkupazzjonijiet tagħhom dwar kwistjonijiet soċjali, ambjentali, etiċi u ta' governanza korporattiva;

23. Iħeġġeġ lill-UE u lill-Istati Membri tagħha jieħdu inizjattivi ulterjuri ta' politika mmirati lejn is-sensibilizzazzjoni u t-tisħiħ tal-iżvilupp tal-ISR, pereżempju billi jikkunsidraw formulazzjoni ġuridika għall-istabbiliment ta' standards minimi ta' ISR, speċjalment fl-ambitu tal-ftehimiet kummerċjali u ta' investiment tal-UE ma' pajjiżi li qed jiżviluppaw;

24. Jinnota li l-RSK hija mekkaniżmu li permezz tiegħu min iħaddem jista' jappoġġa lill-ħaddiema u lill-komunitajiet lokali fil-pajjiżi li qed jiżviluppaw u li l-RSK tista' tiżgura li l-qligħ jinqasam b'mod ekwu sabiex tiġi żviluppata prosperità ekonomika u soċjali sostenibbli u sabiex aktar nies jintrefgħu mill-faqar, speċjalment fi żmenijiet ta' kriżi finanzjarja; jiddispjaċih li l-protokolli għall-intervent soċjali bħalissa huma biss volontarji u jħeġġeġ lill-Kummissjoni tagħmilhom vinkolanti;

25. Jappella sabiex l-organizzazzjonijiet rappreżentattivi, inklużi t-trade unions, jiġi kkonsultati u involuti b'mod sħiħ u attiv fl-iżvilupp, it-tħaddim u l-monitoraġġ tal-proċessi u l-istrutturi ta' RSK tal-kumpaniji, inkluż permezz tal-iżvilupp kontinwu tal-ħiliet u l-kwalifiki tal-ħaddiema bis-saħħa tat-taħriġ u t-tagħlim tul il-ħajja, filwaqt li wieħed jaħdem ma' min iħaddem f'approċċ ta' sħubija ġenwina.

RIŻULTAT TAL-VOTAZZJONI FINALI FIL-KUMITAT

(1) ĠU L 178, 17.7.2003, p. 16.

SUĠĠERIMENTI

Il-Kumitat għall-Kummerċ Internazzjonali jistieden lill-Kumitat għall-Affarijiet Legali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jinnota b'interess li l-Kummissjoni bdiet tinkludi referenzi għar-Responsabbiltà Soċjali Korporattiva fil-ftehimiet kummerċjali tal-UE; huwa tal-fehma li, meta jitqies ir-rwol ewlieni tal-korporazzjonijiet, is-sussidjarji tagħhom u l-ktajjen ta' provvista tagħhom fil-kummerċ internazzjonali, ir-responsabbiltà soċjali u ambjentali korporattiva għandha ssir parti integrali tal-kapitolu dwar l-iżvilupp sostenibbli tal-ftehimiet kummerċjali tal-UE; jistieden lill-Kummissjoni tiżviluppa proposti konkreti għall-implimentazzjoni ta' dawn il-prinċipji tar-Responsabbiltà Soċjali Korporattiva fil-politika kummerċjali;

2.  Jimpenja ruħu li jżid l-isforzi tiegħu b’mod kontinwu sabiex l-istituzzjonijiet u l-uffiċjali tal-UE, inkluż ir-Rappreżentant Speċjali tal-UE għad-Drittijiet tal-Bniedem, ikollhom l-obbligu jinfurzaw l-istandards soċjali, ambjentali u tad-drittijiet tal-bniedem fir-relazzjonijiet u l-azzjonijiet esterni kollha tal-UE;

3.  Jenfasizza li l-promozzjoni tar-Responsabbiltà Soċjali Korporattiva huwa objettiv appoġġat mill-Unjoni Ewropea, u li għalhekk l-Unjoni għandha tiżgura li l-politiki esterni li timplimenta jikkontribwixxu lejn l-iżvilupp sostenibbli u l-iżvilupp soċjali tal-pajjiżi kkonċernati;

4.  Iħeġġeġ lill-Kummissjoni, fit-tfassil ta' proposti konkreti għall-applikazzjoni ta' prinċipji tar-Responsabbiltà Soċjali Korporattiva, tibbaża fuq il-Linji Gwida tal-OECD għall-Intrapriżi Multinazzjonali, inkluża l-proċedura ta' lmenti tal-OECD;

5.  Ifaħħar lill-istati membri kollha tal-OECD għall-ħidma komprensiva tagħhom fuq il-Linji Gwida tal-OECD għall-Intrapriżi Multinazzjonali, ippubblikati fil-25 ta' Mejju 2011; jinnota li 44 gvern aderenti, li jirrappreżentaw ir-reġjuni kollha tad-dinja u li jikkostitwixxu 85 % tal-investiment barrani dirett, iħeġġu lill-intrapriżi tagħhom jirrispettaw dawn ir-rakkomandazzjonijiet estensivi għal imġiba kummerċjali responsabbli kull fejn dawn joperaw;

6.  Jaqbel li l-imperattivi ambjentali u klimatiċi attwali u l-iżvilupp ta' ktajjen tal-produzzjoni globali jesiġu kopertura usa' tal-kunċett tar-Responsabbiltà Soċjali Korporattiva milli kien previst meta l-kunċett ġie definit għall-ewwel darba; għalhekk iqis li hu neċessarju li jiġi elaborat kunċett aġġornat tar-Responsabbiltà Soċjali Korporattiva, li jikkonċerna d-drittijiet tax-xogħol u tal-bniedem u l-kwistjonijiet tal-impjiegi, kif ukoll il-protezzjoni ambjentali, il-preokkupazzjonijiet relatati mat-tibdil fil-klima u l-evitar tal-korruzzjoni u l-evażjoni tat-taxxa;

7.  Jappella sabiex il-kumpaniji Ewropej kollha li joperaw f'pajjiżi terzi u li jimpjegaw aktar minn 1 000 persuna jkunu obbligati japplikaw il-Linji Gwida tal-OECD għall-Intrapriżi Multinazzjonali mill-1 ta' Jannar 2014;

8.  Jitlob lill-Kummissjoni tinkludi klawsola vinkolanti dwar ir-Responsabbiltà Soċjali Korporattiva fil-ftehimiet bilaterali kummerċjali u ta’ investiment kollha ffirmati mill-UE, abbażi tal-prinċipji tar-Responsabbiltà Soċjali Korporattiva kif definiti fil-livell internazzjonali, b'enfasi fuq l-iżvilupp sostenibbli u l-governanza tajba u b'attenzjoni ċara fuq id-drittijiet tal-bniedem, ix-xogħol deċenti, l-istandards tax-xogħol, il-libertà ta' assoċjazzjoni, in-negozjar kollettiv u kunsiderazzjonijiet soċjali oħrajn, b'mod partikolari l-aġġornament tal-2010 tal-Linji Gwida tal-OECD; jissuġġerixxi li din il-klawsola għandha tarmonizza l-istandards u l-kunċetti eżistenti sabiex jiġu żgurati l-komparabilità u s-sens ta' ġustizzja, u tkun tinkludi miżuri għall-monitoraġġ ta' dawn il-prinċipji fil-livell tal-UE u għall-implimentazzjoni tagħha, u li jitwaqqfu Punti ta' Kuntatt Nazzjonali bħala forums għall-mistoqsijiet dwar il-kwistjonijiet li jitqajmu fil-Linji Gwida tal-OECD, bħar-rekwiżit li jiġu mmonitorjati l-attivitajiet tal-kumpaniji u s-sussidjarji tagħhom u l-ktajjen ta' provvista, u r-rekwiżit li tiġi applikata diliġenza dovuta;

9.  Jistieden lill-Kummissjoni tiżgura li l-kumpaniji kollha li joperaw fis-suq uniku, inklużi dawk il-korporazzjonijiet transnazzjonali li s-sussidjarji jew il-ktajjen ta' provvista tagħhom jinsabu fl-UE, jikkonformaw mal-obbligi legali kollha tagħhom kemm fil-livell nazzjonali kif ukoll f'dak tal-UE sabiex tiġi żgurata kompetizzjoni ġusta u jiġu massimizzati l-benefiċċji għall-konsumaturi tal-UE; jistieden lill-Kummissjoni tippromwovi b'mod attiv imġiba kummerċjali responsabbli fost kumpaniji tal-UE li joperaw barra minn pajjiżhom, b'enfasi speċjali fuq l-iżgurar ta' konformità stretta mal-obbligi legali kollha tagħhom li joriġinaw jew mil-liġijiet nazzjonali jew minn kwalunkwe obbligu legali bilaterali jew internazzjonali li l-operazzjonijiet kummerċjali tagħhom huma suġġetti għalihom, mhux l-inqas il-konformità mal-istandards u r-regoli internazzjonali fl-oqsma tad-drittijiet tal-bniedem, ix-xogħol u l-ambjent; jissuġġerixxi għal dan il-għan li l-Kummissjoni għandha tinvolvi ruħha b'mod attiv mas-sħab tagħha fil-pajjiżi li qed jiżviluppaw u f'dawk emerġenti għall-iskambju tal-aqwa prattiki u ta' għarfien dwar modi u mezzi kif jittejjeb l-ambjent kummerċjali u titqajjem kuxjenza dwar imġiba kummerċjali responsabbli;

10. Jissuġġerixxi li l-gvernijiet tal-Istati Membri jistiednu lill-BEI jinkludi klawsola dwar ir-Responsabbiltà Soċjali Korporattiva fl-operazzjonijiet tiegħu;

11. Jistieden lill-Kummissjoni tintroduċi proċedura aktar miftuħa u ċara għat-tressiq u l-eżami ta' lmenti relatati ma' nuqqas ta' konformità mal-prinċipji tar-Responsabbiltà Soċjali Korporattiva, inklużi mekkaniżmi ta' infurzar, u tniedi investigazzjonijiet fejn ikun meħtieġ;

12. Jistieden lill-Kummissjoni tħeġġeġ lill-kumpaniji japplikaw ir-Responsabbiltà Soċjali Korporattiva; jenfasizza l-ħtieġa li t-tixrid ta’ dawn il-prattiki jiġi mħeġġeġ u appoġġat fost l-SMEs filwaqt li jiġu limitati l-ispejjeż u l-burokrazija;

13. Jistieden lill-Kummissjoni tinkludi klawsola dwar ir-Responsabbiltà Soċjali Korporattiva fi ftehimiet ma' organizzazzjonijiet nongovernattivi (NGOs), partikolarment f'każijiet fejn dawn ikunu relatati ma' attivitajiet ta' żvilupp;

14. Jistieden lill-Kummissjoni tuża l-miżuri bbażati fuq inċentivi b'mod aktar effikaċi u biex tkun aktar attenta fil-monitoraġġ u fl-iżgurar li l-korporazzjonijiet transnazzjonali li s-sussidjarji jew il-ktajjen ta’ provvista tagħhom jinsabu f’pajjiżi li qed jipparteċipaw fil-GSP u l-GSP+, għandhomx jew le l-uffiċċju rreġistrat tagħhom fl-Unjoni Ewropea, kif ukoll il-pajjiżi kkonċernati a) jikkonformaw mal-obbligi legali nazzjonali u internazzjonali tagħhom fl-oqsma tad-drittijiet tal-bniedem, l-istandards soċjali u tax-xogħol u r-regoli ambjentali, b) juru impenn ġenwin fir-rigward tad-drittijiet, il-protezzjoni u l-benessri tal-ħaddiema tagħhom u taċ-ċittadini b'mod ġenerali, c) jiddefendu l-libertà ta' assoċjazzjoni u d-drittijiet ta' negozjar kollettiv, u d) jittrattaw kwalunkwe ksur b'mod rapidu u effikaċi;

15. Jistieden lill-Kummissjoni tippromwovi r-Responsabbiltà Soċjali Korporattiva f’forums multilaterali billi tappoġġa kooperazzjoni msaħħa bejn id-WTO u forums multilaterali oħra li jittrattaw ir-Responsabbiltà Soċjali Korporattiva, bħall-ILO u l-OECD;

16. Ifakkar li għas-soluzzjoni ta' tilwim kummerċjali u/jew it-talba ta' kumpens għal esternalitajiet negattivi ta' attività kummerċjali irresponsabbli jew illegali, diġà jeżistu kemm ir-rikorsi fil-qrati kif ukoll alternattivi għar-rikorsi fil-qrati; jistieden f'dan ir-rigward lill-Kummissjoni tieħu aktar inizjattivi sabiex iżżid l-għarfien dwar iż-żewġ alternattivi kemm fost il-komunità kummerċjali kif ukoll il-pubbliku b'mod ġenerali; ifakkar li l-Kamra Internazzjonali tal-Kummerċ (KIK) tipprovdi servizzi ta' soluzzjoni tat-tilwim għal individwi, negozji, stati, entitajiet statali u organizzazzjonijiet internazzjonali li jfittxu alternattivi għal rikorsi fil-qorti, liema alternattivi jistgħu jikkontribwixxu biex itejbu l-aċċess effikaċi għall-ġustizzja għall-vittmi f'każ ta' ksur ta' prattiki kummerċjali responsabbli li jikkawżaw danni ekonomiċi, soċjali u ambjentali fl-UE u/jew barra minnha;

17. Jitlob li jkun hemm monitoraġġ ta' miżuri restrittivi (sanzjonijiet, bojkotts, embargos), kif ukoll skemi ta' liċenzji għal oġġetti b'użu doppju, fil-livell tal-UE;

18. Jitlob li jiġu stabbiliti mekkaniżmi li permezz tagħhom il-prinċipji tar-Responsabbiltà Soċjali Korporattiva ikollhom jiġu rispettati mhux biss mill-kumpanija ewlenija jew mill-appaltatur prinċipali li jibbenefika minn ftehim kummerċjali, iżda wkoll minn kwalunkwe subappaltatur jew katina ta' provvista li jistgħu jutilizzaw, sew jekk fil-provvista ta' oġġetti, ħaddiema jew servizzi, biex b'hekk jiġu żgurati kundizzjonijiet ugwali ta' kompetizzjoni bbażati fuq salarji ġusti u kundizzjonijiet ta' xogħol deċenti, u jiġu garantiti d-drittijiet u l-libertajiet trejdjunjonistiċi;

19. Jistieden lill-Kummissjoni ttejjeb il-mudell tagħha ta’ valutazzjoni tal-impatt fir-rigward tas-sostenibilità, sabiex dan jirrifletti sew l-implikazzjonijiet ekonomiċi, soċjali, ambjentali u tad-drittijiet tal-bniedem, inklużi l-għanijiet ta' mitigazzjoni tat-tibdil fil-klima, tan-negozjati kummerċjali; jistieden lill-Kummissjoni tagħti segwitu għall-ftehimiet kummerċjali mal-pajjiżi sħab tal-UE billi twettaq, qabel u wara l-iffirmar ta' ftehim kummerċjali, studji ta’ valutazzjoni tal-impatt fir-rigward tas-sostenibilità, filwaqt li tqis b'mod partikolari s-setturi vulnerabbli;

20. Jenfasizza li wara d-dħul fis-seħħ tat-Trattat ta’ Lisbona, il-Parlament għandu jinżamm infurmat bis-sħiħ dwar kif ir-riżultati tal-Valutazzjonijiet tal-Impatt fir-rigward tas-Sostenibilità (SIA) tal-ftehimiet jiġu inkorporati fin-negozjati ta' qabel il-konklużjoni tagħhom u dwar liema kapitoli ta’ dawn il-ftehimiet ikunu nbidlu bil-għan li jiġu evitati impatti negattivi identifikati f'dawn il-valutazzjonijiet;

21. Jitlob li tiġi stabbilita sistema ta’ kooperazzjoni legali transnazzjonali bejn l-UE u l-pajjiżi terzi firmatarji ta’ ftehimiet kummerċjali bilaterali sabiex jiġi żgurat aċċess effikaċi għall-ġustizzja fil-pajjiż fejn ikun twettaq il-ksur għall-vittmi ta’ ksur ta’ liġijiet soċjali jew ambjentali, jew ta' nuqqas ta' osservanza ta' impenji fil-qasam tar-Responsabbiltà Soċjali Korporattiva min-naħa ta' multinazzjonali jew is-sussidjarji immedjati tagħhom, kif ukoll bħala appoġġ għall-istabbiliment ta' proċeduri ġudizzjarji internazzjonali sabiex ikun żgurat, fejn xieraq, għoti ta' kastig fil-każ ta' ksur tal-liġi min-naħa ta' kumpaniji;

22. Jitlob l-iżvilupp ta' standards ta' trasparenza u responsabbiltà aktar effikaċi għall-kumpaniji teknoloġiċi tal-UE involuti fl-esportazzjoni ta' teknoloġiji li jistgħu jintużaw sabiex jiksru id-drittijiet tal-bniedem jew jaġixxu kontra l-interess tas-sigurtà tal-UE;

23. Jistieden lis-SEAE jiżgura li l-uffiċjali tal-UE fil-qasam tal-kummerċ, jekk ikunu bbażati f'ambaxxati tal-UE, jingħataw taħriġ regolari dwar kwistjonijiet b'rabta mar-Responsabbiltà Soċjali Korporattiva, b'mod partikolari fir-rigward tal-implimentazzjoni tal-Qafas tan-NU ‘Protezzjoni, Rispett u Rimedju’ u li l-ambaxxati tal-UE jaġixxu bħala punti ta' kuntatt tal-UE għal ilmenti li jikkonċernaw kumpaniji tal-UE u s-sussidjarji tagħhom, billi l-Punti ta' Kuntatt Nazzjonali tal-OECD jinsabu biss f'pajjiżi aderenti mal-OECD u għaldaqstant fil-prattika, mhumiex aċċessibbli għal impjegati ta' kumpaniji bħal dawn ibbażati f'pajjiżi li mhumiex OECD;

24. Jappella li l-valutazzjonijiet tal-impatt tat-teknoloġiji l-ġodda fuq id-drittijiet tal-bniedem isiru kemm jista' jkun kmieni possibbli fil-fażi tar-riċerka u l-iżvilupp, u jitlob sabiex tali valutazzjonijiet ikunu jinkludu studji ta' xenarji u kunsiderazzjonijiet għall-identifikazzjoni ta' standards sabiex jiġu inkorporati d-drittijiet tal-bniedem fit-tfassil (id-Drittijiet tal-Bniedem fit-Tfassil);

25. Jenfasizza li s-sensibilizzazzjoni fil-livell korporattiv dwar l-importanza tar-Responsabbiltà Soċjali Korporattiva u l-konsegwenzi tan-nuqqas ta' konformità, bħala kompitu għall-Kummissjoni, għandhom ikunu akkumpanjati minn sensibilizzazzjoni u tisħiħ xieraq tal-kapaċitajiet fil-livell tal-gvernijiet tal-pajjiżi ospitanti, biex tiġi żgurata l-implimentazzjoni effikaċi tad-drittijiet tar-Responsabbiltà Soċjali Korporattiva u l-aċċess għall-ġustizzja;

26. Jitlob li jiġi implimentat il-prinċipju "kun af l-utent aħħari tiegħek" biex jiġi żgurat aktar skrutinju u biex jiġi evitat milli jseħħ ksur tad-drittijiet tal-bniedem fi stadji tal-bidu jew dawk sussegwenti fil-ktajjen ta' provvista u fil-flussi tal-produzzjoni jew tas-swieq;

27. Jenfasizza li trattati bilaterali futuri dwar l-investiment iffirmati mill-UE għandhom jiżguraw li jinstab bilanċ ġust bejn il-ħtieġa li jitħarsu l-investituri u l-ħtieġa li jkun previst intervent mill-istat, b’mod partikolari b'rabta mal-istandards soċjali, tas-saħħa u dawk ambjentali;

28. Jieħu nota tal-passi pożittivi li saru fir-riforma attwali tad-Direttiva dwar it-Trasparenza (2004/109/KE) u d-Direttiva dwar il-Kontabilità (2003/51/KE) sabiex tiġi indirizzata l-kwistjoni tar-Responsabbiltà Soċjali Korporattiva filwaqt li jinstab bilanċ bejn it-tiftix leġittimu għat-trasparenza u r-responsabbiltà u l-impenn ta' rappurtar min-naħa tal-kumpaniji; jistieden lill-Kummissjoni tiżgura li l-kumpaniji li jaqgħu fl-ambitu ta' dawn id-Direttivi jkunu obbligati jirrappurtaw regolarment dwar l-attivitajiet ta' Responsabbiltà Soċjali Korporattiva tagħhom, f'konformità mal-Linji Gwida tal-OECD għall-Kumpaniji Multinazzjonali, filwaqt li jiġu żgurati arranġamenti speċjali għall-SMEs sabiex ir-rappurtar ikun possibbli kemm mil-lat finanzjarju kif ukoll dak amministrattiv;

29. Jenfasizza li d-dimensjoni tar-Responsabbiltà Soċjali Korporattiva għandha tiġi inkorporata fil-ftehimiet kummerċjali multilaterali u għalhekk jistieden lill-Kummissjoni tappoġġa proposti f'dak ir-rigward kemm fil-fora internazzjonali, b'mod partikolari fl-OECD u fl-ILO, kif ukoll fid-WTO fil-kuntest ta' wara Doha;

30. Jappella sabiex miżuri futuri b'rabta mar-Responsabbiltà Soċjali Korporattiva jinkludu l-katina tal-valur kollha, mill-estrazzjoni tal-materja prima, għall-kummerċ u r-riċiklaġġ;

31. Jitlob li l-politiki tar-Responsabbiltà Soċjali Korporattiva jiġu inklużi fil-livelli kollha tal-ftehimiet kummerċjali mal-UE, u jkunu jinkludu dispożizzjonijiet biex tiġi estiża l-protezzjoni għall-ħaddiema migranti, tal-aġenziji u dawk ippostjati;

32. Huwa tal-fehma li l-Kummissjoni u l-Istati Membri għandhom iħeġġu lill-kumpaniji tal-UE jieħdu inizjattivi immirati li jippromwovu r-Responsabbiltà Soċjali Korporattiva u jiskambjaw prattiki tajba mas-sħab tagħhom f'pajjiż oħra;

33. Jitlob li l-politiki fil-qasam tar-Responsabbiltà Soċjali Korporattiva u d-drittijiet tax-xogħol u trejdjunjonistiċi fundamentali, bħad-dritt għall-privatezza u l-libertà ta' assoċjazzjoni, jiġu rispettati mill-kumpaniji tal-UE fl-operazzjonijiet kollha tagħhom, sew jekk ikunu bbażati fl-UE u sew jekk f'pajjiżi terzi;

34. Jitlob li jkun hemm konsultazzjoni sħiħa u attiva u involviment tal-organizzazzjonijiet rappreżentattivi, inklużi t-trejdjunjins, fl-iżvilupp, l-operazzjoni u l-monitoraġġ tal-proċessi u l-istrutturi tal-Responsabbiltà Soċjali Korporattiva tal-kumpaniji; jistieden lill-organizzazzjonijiet rappreżentattivi ta' din ix-xorta sabiex jaħdmu ma' min iħaddem b'approċċ ġenwin ta' sħubija;

35. Jitlob li jiżdied il-monitoraġġ tal-prinċipji tar-Responsabbiltà Soċjali Korporattiva fil-politika kummerċjali tal-UE u li jkun aktar inklużiv u trasparenti, b'punti ta' riferiment ċari biex jitkejjel it-titjib bl-għan li titħeġġeġ il-fiduċja fis-sistema;

36. Jinnota li r-Responsabbiltà Soċjali Korporattiva hija mekkaniżmu li tippermetti lil min iħaddem jappoġġa l-ħaddiema tiegħu u l-komunitajiet lokali fil-pajjiżi li qed jiżviluppaw, li r-rispett għar-Responsabbiltà Soċjali Korporattiva u għall-istandards tax-xogħol jippermettu lil dawn il-pajjiżi jibbenefikaw minn aktar kummerċ internazzjonali, u li r-Responsabbiltà Soċjali Korporattiva tista' tiżgura li l-gwadann jinqasam b'mod ekwu għall-iżvilupp ta' prosperità ekonomika u soċjali sostenibbli u sabiex aktar persuni jinqalgħu mill-faqar, speċjalment fi żmien ta' kriżi finanzjarja; jiddispjaċih li l-protokolli għal intervent soċjali attwalment huma biss volontarji u jħeġġeġ lill-Kummissjoni tagħmilhom vinkolanti;

RIŻULTAT TAL-VOTAZZJONI FINALI FIL-KUMITAT

SUĠĠERIMENTI

Il-Kumitat għall-Kultura u l-Edukazzjoni jistieden lill-Kumitat għall-Impjiegi u l-Affarijiet Soċjali, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jinkoraġġixxi lill-UE twettaq rwol attiv fis-sensibilizzazzjoni tal-kontribut li jistgħu jagħtu l-impriżi lis-soċjeta permezz tar-Responsabilità Soċjali tal-Kumpaniji (RSK) fil-qasam tal-kultura, l-edukazzjoni, l-isport u ż-żgħażagħ;

2.  Jinkoraġġixxi lill-UE kif ukoll lill-Istati Membri jagħtu tagħrif konkret dwar l-RSK, u tagħlim u taħriġ dwarha, ħalli l-impriżi jieħdu vantaġġ sħiħ mill-RSK u jkunu jistgħu jimplementawha fil-kultura organizzattiva tagħhom;

3.  Jitlob lill-Istati Membri jintroduċu eżenzjonijiet fiskali għall-azjendi li jiffinanzjaw ix-xogħol volontarju u l-inizjattivi mhux għal skop ta’ lukru;

4.  Jiġbed l-attenzjoni għall-ħtieġa li r-RSK tkun inkorporata fil-kurrikula tal-istituzzjonijiet edukattivi fil-livelli kollha, inklużi l-business schools, u fil-programmi ta' taħriġ għall-instituri u l-impjegati tal-impriżi żgħar u ta' daqs medju;

5.  Jinkoraġġixxi lill-Istati Membri jintegraw l-RSK fil-kurrikuli relevanti tal-edukazzjoni;

6.  Jisħaq dwar l-importanza tar-rabta bejn l-impriżi u l-iskejjel billi jagħtu edukazzjoni sekondarja għolja u, b’mod aktar speċjali, fil-livell ogħla ta’ edukazzjoni9 jindika r-rwol li jista’ jkollha l-RSK fl-għoti ta’ esperjenza prattika lill-istudenti matul l-istudji tagħhom, kemm fuq bażi part-time bi ħlas kemm waqt stages bi ħlas fl-impriżi;

7.  Iħeġġeġ lill-impriżi jagħtu stages ta’ kwalità b’komponent qawwi ta’ tagħlim li jiffaċilita t-tranżizzjoni bejn l-edukazzjoni u l-impjieg, jiffaċilita l-iżvilupp tal-ħiliet relevanti għas-suq tax-xogħol u jappoġġja l-awtonomija taż-żgħażagħ;

8.  Jinkoraġġixxi lill-impriżi jippromwovu l-kreattività u l-proġetti kulturali fil-politiki tagħhom ta’ RSK fil-kuntest tal-impenn ċiviku u li jistimulaw it-tkabbir u l-ħolqien sostenibbli tal-impjiegi;

9.  Jindika l-importanza li jkunu involuti l-impriżi żgħar u ta' daqs medju fir-RSK u jirrikonoxxi l-kisbiet tagħhom f'dan il-qasam;

10. Jinkoraġġixxi lill-impriżi, b’kollaborazzjoni mal-instituri u l-ħaddiema, jinfurmaw lill-impjegati tagħhom, u jħarrġuhom u jdaħħluhom, fl-isfidi soċjali maġġuri li jolqtu lill-Ewropa, l-aktar f'dak li għandu x'jaqsam mal-ekonomija, is-soċjetà, l-ambjent u internazzjonalment;

11. Jistieden li fost min iħaddem tkun promossa l-idea tal-isponsorizzazzjoni;

12. Jindika l-kontribut importanti tal-RSK fil-ħolqien tal-opportunitajiet għat-tagħlim u t-tkabbir, u fit-tiswir u l-promozzjoni ta’ attitudni soċjali, impenn ċiviku, etika professjonali u integrazzjoni soċjali bħala interazzjoni ta’ livell għoli mas-soċjetà, kif ukoll l-attivitajiet interġenerazzjonali bħalma huma l-mentoring reċiproku u t-trasferiment tan-know-how mix-xjuħ għaż-żgħażagħ; jisħaq b’mod partikolari l-kontribut li tista’ tagħti r-RSK fil-ħolqien ta’ opportunitajiet għaż-żgħażagħ u fl-iżvilupp tat-talenti tagħhom;

13. Jisħaq dwar l-importanza li jiġu rispettati l-jeddijiet tal-bniedem fir-relazzjonijiet mal-pajjiżi mhux membri fl-UE;

14. Jilqa’ l-iskema Ewropea ta’ aġġudikazzjoni tal-isħubijiet RSK bejn l-impriżi u stakeholders oħrajn, inklużi l-istituzzjonijiet edukattivi u l-organizzazzjonijiet sportivi bħala pass importanti fit-tkattir tal-viżibilità tal-RSK;

15. Jisħaq li l-Investiment Soċjalment Responsabbli (SRI), bħala parti mill-proċess ta’ implementazzjoni tar-RSK fid-deċiżjonijiet tal-investiment, jikkombina l-objettivi finanzjarji u ekonomiċi tal-investituri mal-kunsiderazzjonijiet soċjali, ambjentali, etiċi, kulturali u edukattivi tagħhom;

16. Iħeġġeġ lill-Istati Membri u lill-Unjoni jqisu huma u jħejju l-aġenda tagħhom tar-RSK li l-SMEs kulturali u kreattivi jista’ jkollhom impatti sinifikattiv fuq il-bidla soċjali u ambjentali bl-integrazzjoni ta’ kunsiderazzjonijiet soċjali u t-twassil ta' soluzzjonijiet fit-tul fit-taqbida kontra l-faqar billi jagħtu impulsi ġodda lis-suq tax-xogħol;

17. Jistieden li ssir riċerka dwar ir-raġunijiet għall-effikaċja jew nuqqas tagħha tal-varji strateġiji tar-RSK li ġew implementati;

18. Jistieden lill-Istati Membri jagħtu sostenn u jtejbu l-istatus lill-volontarjat tal-impjegati u lill-volontarjat appoġġjat minn min iħaddem ukoll fil-kuntest tal-RSK, kif jingħad fir-riżoluzzjoni tat-12 ta’ Ġunju 2012 dwar ir-rikonoxximent u l-promozzjoni fl-UE tal-ħidmiet volontarji transkonfinali(1); jisħaq li l-volontarjat ma għandu b’ebda mod jolqot il-paga jew ix-xogħol tal-ħaddiema u li l-attivitajite ta’ volontarjat u x-xogħol bi ħlas għandhom jikkomplementaw wieħed lill-ieħor;

19. Jemmen li l-kumpaniji b'kontenut kulturali u ta' media għandhom responsabilità soċjali tal-kumpaniji li jiżgura li l-jeddijiet tal-bniedem tal-ut’nti jkunu protetti, u jqis li l-awtoregolazzjoni u l-ispezzjonijiet deep packet għandhom ir-riskju li jagħmlu outsourcing tal-pulizija u tal-eżekuzzjoni tal-liġi favur is-settur privat;

20. Iħeġġeġ lill-kumpaniji tal-media jinkludu standards ta’ ġurnaliżmu trasparenti fil-politiki tagħhom ta’ RSK, inklużi garanziji ta’ protezzjoni tal-fonti u l-jeddijiet tal-whistle blowers.

RIŻULTAT TAL-VOTAZZJONI FINALI FIL-KUMITAT

(1) Testi adottati, P7_TA(2012)0236.