(Proċedura ta' kodeċiżjoni: l-ewwel qari)

Il-Parlament Ewropew,

–   wara li kkunsidra l-proposta tal-Kummissjoni lill-Parlament Ewropew u lill-Kunsill (COM(2007)0797),

–   wara li kkunsidra l-Artikolu 251(2) u l-Artikolu 137(2) tat-Trattat tal-KE, skond liema artikoli l-Kummissjoni ppreżentat il-proposta lill-Parlament (C6-0469/2007),

–   wara li kkunsidra l-Artikolu 51 tar-Regoli tal-Proċedura tiegħu,

–   wara li kkunsidra r-rapport tal-Kumitat għall-Impjiegi u l-Affarijiet Soċjali u l-opinjoni tal-Kumitat għad-Drittijiet tan-Nisa u l-Ugwaljanza bejn is-Sessi (A6-0173/2008),

1.  Japprova l-proposta tal-Kummissjoni kif emendata;

2.  Jieħu nota ta' l-istqarrija tal-Kummissjoni annessa magħha;

3.  Jistieden lill-Kummissjoni biex terġa" tirreferi l-kwistjoni lill-Parlament jekk ikollha l-ħsieb li temenda l-proposta b'mod sustanzjali jew li tbiddilha b'test ġdid;

4.  Jagħti istruzzjonijiet lill-President tiegħu sabiex jgħaddi l-pożizzjoni tal-Parlament lill-Kunsill u lill-Kummissjoni.

(Peress li ntlaħaq ftehim bejn il-Parlament u l-Kunsill, il-pożizzjoni tal-Parlament fl-ewwel qari jaqbel ma' l-att leġislattiv finali, d-Deċiżjoni Nru 1098/2008/KE.)

Il-Kummissjoni tagħti l-ogħla importanza għall-faċilitazzjoni u l-appoġġ ta' parteċipazzjoni wiesgħa fil-livelli kollha fl-attivitajiet marbuta mas-Sena Ewropea għall-Ġlieda Kontra l-Faqar u l-Esklużjoni Soċjali 2010 bħala mezz prattiku biex jiġi żgurat li l-impatt tagħha jkun pożittiv u dejjiemi.

B'konformità mad-Deċiżjoni dwar is-Sena Ewropea, il-Kummissjoni se tfassal linji gwida komuni fid-Dokument ta' Qafas Strateġiku (SFD) li se jistabbilixxi l-prijoritajiet ewlenin għall-implimentazzjoni tal-attivitajiet relatati mas-Sena Ewropea, inklużi standards minimi f'termini ta' parteċipazzjoni f'entitajiet u azzjonijiet nazzjonali (ara l-Anness, Parti II, punt 2 tad-Deċiżjoni).

L-SFD huwa indirizzat lill-Entitajiet ta' Implimentazzjoni Nazzjonali (NIBs) responsabbli għad-definizzjoni tal-programmi nazzjonali għas-Sena Ewropea u biex jintgħażlu azzjonijiet individwali li jridu jiġu proposti għall-finanzjament Komunitarju, u lill-atturi l-oħra kkonċernati.

F'dak il-kuntest, il-Kummissjoni se tenfasizza l-importanza tal-faċilitazzjoni tal-aċċess mill-NGOs kollha, inklużi organizzazzjonijiet żgħar u ta' daqs medju. Sabiex jiġi żgurat l-aktar aċċess wiesa' possibbli, l-NIBs jistgħu jiddeċiedu li ma jitolbu l-ebda kofinanzjament u minflok jiffinanzjaw kompletament ċerti azzjonijiet.