'Roam like at home': táillí fánaíochta ar bith do thaistil laistigh de AE
Faoi bheartas fánaíochta AE, is féidir le daoine Eorpacha glaochanna a chur agus téacsanna a sheoladh pé áit ina bhfuil siad laistigh de AE, gan aon chostas breise.
Ghlac Parlaimint na hEorpa, in éineacht leis an gComhairle, síneadh ar na rialacha fánaíochta a chuireann ar chumas tomhaltóirí AE glaonna a chur agus sonraí a aistriú thar theorainneacha AE gan aon chostas breise a thabhú. Tá an reachtaíocht mar chuid den aistriú digiteach, rud atá ar cheann de na tosaíochtaí is tábhachtaí ag an AE.
Taithí níos fearr taistil
Ó tugadh na rialacha seo isteach i mí an Mheithimh 2017, tá na céadta milliún duine tar éis leas a bhaint as buntáistí a bhaineann le bheith cónasctha agus iad ag taisteal, agus ag an bpraghas céanna a d’íocfaidís sa bhaile. Tá an córas i bhfeidhm ar fud an Limistéir Eorpaigh Eacnamaíoch, lena n-airítear 27 Ballstát an AE, chomh maith leis an Íoslainn, Lichtinstéin agus an Iorua.
Bhí an beartas seo thar a bheith rathúil; mar shampla, tháinig méadú faoi sheacht déag ar úsáid sonraí fánaíochta i samhradh na bliana 2019 i gcomparáid leis an samhradh sula gcuireadh deireadh leis na táillí fánaíochta.
Dúirt níos mó ná 81% de chónaitheoirí AE in Eorabharaiméadair 2023 gur bhain siad tairbhe as an riail seo agus iad ag taisteal ar fud an Aontais.
Caighdeán níos fearr, tuilleadh seirbhísí
Faoin rialachán seo, cuirfear síneadh leis na rialacha bailí ar feadh 10 mbliana eile. Áiritheoidh sé seirbhísí fánaíochta níos fearr do thaistealaithe freisin. Mar shampla, beidh ceart ag tomhaltóirí chun an luais agus an chaighdeáin chéanna ó thaobh líonra mhóibíligh de, i gcéin is i gcóngar, áit ar bith a mbeidh líonraí coibhéiseacha ar fáil.
Cinnteofar leis na rialacha gur féidir le daoine glaochanna a chur, téacsanna a sheoladh agus úsáid a bhaint as aipeanna chun teaghmháil a dhéanamh le seirbhísí éigeandála saor in aisce.
Beidh sé de dhualgas ar oibritheoirí úsáideoirí a chur ar an eolas faoi chostais mhéadaithe a bhaineann le seirbhísí breisluacha a úsáid agus iad ag fánaíocht, ar nós deasc chabhrach theicniciúil, nó seirbhísí cúraim custaiméirí de chuid aerlínte nó cuideachtaí árachais.
Inbhuaineacht fánaíochta i gcomhair oibritheoirí
Tá sé mar aidhm leis na rialacha a dheimhniú go bhfuil an córas inbhuanaithe i gcomhair oibritheoirí, agus go gcoiméadtar an spreagadh le hinfheistiú i líonraí.
