Kif nippreservaw il-bijodiversità: Politika tal-UE (filmat)
Sabiex tippreserva l-ispeċijiet fil-periklu u l-ħajja tal-bniedem, l-UE tixtieq ittejjeb u tippreserva l-bijodiversità fil-kontinent. Skopri kif fil-filmat tagħna.
F'Mejju 2020, il-Kummissjoni Ewropea ppreżentat l-Strateġija għall-Bijodiversità għall-2030 il-ġdida, wara li f'Jannar 2020 il-Parlament kien appella biex jiġu indirizzati l-ixprunaturi ewlenin tat-telf tal-bijodiversità u jiġu stabbiliti miri legalment vinkolanti.
Waqt is-sessjoni plenarja ta' Ġunju 2021, il-Parlament adotta l-pożizzjoni tiegħu dwar l-"Istrateġija tal-UE għall-Bijodiversità għall-2030:Inreġġgħu n-natura lura f'ħajjitna", filwaqt li insista li l-implimentazzjoni tagħha tkun konsistenti ma' strateġiji oħrajn tal-Patt Ekoloġiku Ewropew, inkluża l-istratġeija Mill-Għalqa sal-Platt.
Fi Frar 2024, il-Membri tal-PE appoġġaw liġi ġdida dwar ir-restawr tan-natura, li hija parti mill-isforzi tal-UE biex tippreserva l-bijodiversità fl-Ewropa. Din il-liġi torbot lill-pajjiżi kollha tal-UE biex jaħdmu għar-restawr tal-ħabitats naturali.
Skopri aktar dwar l-importanza tal-bijodiversità
L-istrateġija tal-UE għall-Bijodiversità għall-2030: x'hemm fiha?
L-iffissar ta' miri tal-UE għall-bijodiversità
Skont l-istrateġija tal-UE għall-bijodiversità għall-2030, l-UE stabbiliet għaliha miri ġodda għall-għaxar snin li ġejjin.
Il-membri tal-PE appoġġaw bis-sħiħ il-miri tal-UE li jipproteġu mill-inqas 30 % tal-inħawi tal-baħar u terrestri tal-UE (foresti, artijiet mistagħdra, torbieri, bwar u ekosistemi kostali), u li 10 % tal-oċeani u l-art tal-UE, inklużi l-foresti primarji u antiki kollha li jifdal u ekosistemi oħra rikki fil-karbonju għandhom jibqgħu essenzjalment mhux disturbati.
Huma jridu li l-miri jkunu vinkolanti u implimentati mill-pajjiżi tal-UE fil-livell nazzjonali, f'kooperazzjoni mal-awtoritajiet reġjonali u lokali.
Ir-restawr tan-natura
Il-Parlament laqa' wkoll proposta għal miri vinkolanti dwar ir-restawr tan-natura, li titlob mira minima ta' mill-inqas 30 % tal-art u tal-ibħra tal-UE.
L-indirizzar tat-tnaqqis tad-dakkara
Il-membri tal-PE enfasizzaw li t-tnaqqis fl-għadd ta' dakkara mhux biss huwa ħażin għall-bijodiversità iżda huwa wkoll theddida għas-sigurtà tal-ikel u appellaw għal reviżjoni urġenti tal-Inizjattiva tal-UE dwar id-Dakkara. L-inizjattiva riveduta għandha tinkludi qafas ġdid ta' monitoraġġ tad-dakkara madwar l-UE b'miżuri robusti, objettivi u indikaturi ċari marbuta maż-żmien, inklużi indikaturi tal-impatt, u l-bini tal-kapaċitajiet meħtieġ;
Nieħdu vantaġġ miż-żoni urbani ekoloġiċi
Skont ir-rapport, iż-żoni urbani ekoloġiċi jistgħu jappoġġaw il-bijodiversità u jikkontribwixxu għall-benesseri fiżiku u mentali tal-popolazzjoni.
Il-membri tal-PE jappoġġaw it-twaqqif ta' pjattaforma tal-UE għall-ekoloġizzazzjoni urbana u jistiednu lill-Kummissjoni tiffissa miri vinkolanti ambizzjużi u speċifiċi dwar il-bijodiversità urbana, inklużi:
- sehem minimu ta' soqfa ekoloġiċi fuq binjiet ġodda
- l-appoġġ għall-biedja urbana
- l-iżgurar li ma jintużawx pestiċidi kimiċi
- it-tnaqqis tal-użu tal-fertilizzanti fiż-żoni ekoloġiċi urbani tal-UE
It-tnaqqis tal-impatt tal-agrikoltura
Il-Membri tal-PE laqgħu wkoll il-miri tal-2030 li tal-inqas 25 % tal-art agrikola tinġieb taħt ġestjoni ta' biedja organika, li għandhom jiżdiedu fuq perjodu ta' żmien medju sa twil;
Huma qablu mal-miri tal-Kummissjoni li tnaqqas:
- l-użu ta' pestiċidi u kimiċi aktar perikolużi b'50 %
- l-użu tal-fertilizzanti b'tal-inqas 20 %
- it-telf ta' nutrijenti b'tal-inqas 50 % sal-2030
X'sar biex jiġu salvagwardjati l-ispeċijiet u l-bijodiversità fil-periklu fl-Ewropa?
S'issa, l-isforzi tal-UE biex ittejjeb il-bijodiversità kienu qed jitwettqu fil-qafas tal-Istrateġija għall-Bijodiversità tal-2020, li ġiet introdotta fl-2010.
- Id-Direttiva dwar l-Għasafar għandha l-għan li tipproteġi l-500 speċi ta' għasafar selvaġġi kollha li jinsabu b'mod naturali fl-UE
- Id-Direttiva dwar il-Ħabitats tiżgura l-konservazzjoni ta' firxa wiesgħa ta' speċijiet ta' annimali u pjanti rari, mhedda jew endemiċi, inklużi madwar 200 tip ta' ħabitats rari u karatteristiċi.
- Natura 2000 huwa l-akbar network ta' żoni protetti fid-dinja, b'siti ewlenin ta' tnissil u ta' mistrieħ għal speċijiet rari u mhedda, u tipi ta' ħabitats naturali rari.
- L-Inizjattiva tal-UE dwar id-Dakkara għandha l-għan li tindirizza t-tnaqqis tad-dakkara fl-UE u tikkontribwixxi għal sforzi ta' konservazzjoni globali, filwaqt li tiffoka fuq it-titjib tal-għarfien dwar it-tnaqqis, l-indirizzar tal-kawżi u s-sensibilizzazzjoni
Barra minn hekk, il-programm Ewropew LIFE, li se jkompli jiffinanzja proġetti għat-titjib tal-bijodiversità, pereżempju, salva lil-linċi tal-Iberja u lill-ispanjulett sekond tal-Bulgarija li kienu kważi estinti.
Skopri fatti u ċifri dwar l-ispeċijiet fil-periklu fl-Ewropa
