Dwarna
Kliem ta’ merħba mill-President tas-Sottokumitat għad-Drittijiet tal-Bniedem
Il-Parlament Ewropew u s-Sottokumitat tiegħu għad-Drittijiet tal-Bniedem (DROI) għandhom rwol kruċjali biex jipproteġu, jippromwovu u jiddefendu d-drittijiet tal-bniedem madwar id-dinja. Is-Sottokumitat DROIjissorvelja r-rispett għad-drittijiet tal-bniedem fil-politiki u fl-azzjonijiet esterni tal-UE sabiex jibqa' element ċentrali tar-relazzjonijiet internazzjonali tal-UE, f'konformità mat-Trattati. Is-Sottokumitat DROI jagħti attenzjoni partikolari biex jiżgura li l-politiki esterni bħall-protezzjoni tar-rifuġjati, il-migrazzjoni u l-kummerċ jibqgħu konformi mal-obbligi tal-UE dwar id-drittijiet tal-bniedem u d-dritt internazzjonali dwar id-drittijiet tal-bniedem.
Is-Sottokumitat DROI jivvaluta wkoll is-sitwazzjonijiet tad-drittijiet tal-bniedem f'pajjiżi madwar id-dinja, iqajjem kuxjenza dwar il-ksur tad-drittijiet tal-bniedem, u jippromwovi r-rispett għall-istandards tad-drittijiet tal-bniedem u l-prinċipji tal-istat tad-dritt u d-demokrazija. Is-Sottokumitat jimpenja ruħu mal-organizzazzjonijiet tas-soċjetà ċivili, mad-difensuri tad-drittijiet tal-bniedem, u mal-korpi internazzjonali biex jiġbor informazzjoni u jippromwovi titjib u azzjoni.
Permezz ta' skambji ta' fehmiet, studji u rapporti, missjonijiet f'pajjiżi terzi u segwitu ta' riżoluzzjonijiet urġenti, is-Sottokumitat DROI jikkontribwixxi għat-tiswir tal-pożizzjoni, tal-leġiżlazzjoni u ta' azzjonijiet oħra tal-UE fi kwistjonijiet globali dwar id-drittijiet tal-bniedem.
Mounir Satouri, President tas-Sottokumitat għad-Drittijiet tal-Bniedem