Sa bhileog eolais seo mínítear an ról tacaíochta atá ag an Aontas i réimse an oideachais trí chur síos a dhéanamh ar na príomhchreataí beartais agus na cláir shuaitheanta lena gcumasaítear comhar Eorpach sa réimse sin. Áirítear le príomhchuspóirí bheartas oideachais an Aontais soghluaisteacht mac léinn agus teagascóirí a spreagadh, aitheantas frithpháirteach do dhioplómaí agus tréimhsí staidéir thar lear a chothú agus comhar idir institiúidí ardoideachais a chur chun cinn.

Bunús dlí

Aithníodh an t-oideachas go foirmiúil mar réimse inniúlachta de chuid an Aontais i gConradh Maastricht 1992. Leagtar amach sna hairteagail seo a leanas den Chonradh ar Fheidhmiú an Aontais Eorpaigh a inniúlachtaí:

  • Sonraítear an méid seo a leanas in Airteagal 6: ‘Beidh inniúlacht ag an Aontas gníomhaíochtaí a chur i gcrích chun tacú le gníomhaíochtaí na mBallstát agus chun iad a chomhordú nó a fhorlíonadh’ Is iad réimsí na gníomhaíochta sin ar leibhéal Eorpach: […] oideachas, gairmoiliúint, óige agus spórt’;
  • Is féidir a rá go bhfuil Airteagal 9 ina ‘chlásal sóisialta’ cothrománach agus sonraítear an méid seo a leanas ann: ‘Agus a bheartais agus a ghníomhaíochtaí á sainiú agus á gcur chun feidhme aige, tabharfaidh an tAontas aird ar na ceanglais atá nasctha le hardleibhéal fostaíochta a chur chun cinn, le cosaint shóisialta leormhaith a ráthú, leis an eisiamh sóisialta a chomhrac agus le hardleibhéal oideachais, oiliúna agus cosanta do shláinte an duine’;
  • Le hAirteagal 165(1) foráiltear maidir leis an méid seo a leanas: ‘Rannchuideodh an tAontas le hoideachas ar ardchaighdeán a fhorbairt tríd an gcomhar idir na Ballstáit a chothú agus, más gá, trí thacú lena ngníomhaíocht agus í a fhorlíonadh, agus freagracht na mBallstát i leith inneachar an teagaisc agus eagrúchán na gcóras oideachais agus a n-éagsúlacht chultúrtha agus teanga á urramú aige’;
  • Sonraítear an méid seo a leanas in Airteagal 165(2): ‘Is é is aidhm do ghníomhaíocht an Aontais:
    • gné Eorpach a fhorbairt san oideachas [...];
    • taobhú le soghluaisteacht mac léinn agus múinteoirí, lena n-áirítear, inter alia, aitheantas acadúil dioplómaí agus tréimhsí staidéir;
    • comhar a chur ar aghaidh idir bunaíochtaí oideachais; malartuithe faisnéise agus taithí a fhorbairt ar shaincheisteanna is coiteann do chórais oideachais na mBallstát;
    • forbairt an chianoideachais a chothú [...]’;
    • Le hAirteagal 166, is féidir leis an Aontas beartas gairmoiliúna a chur chun feidhme chun tacú le gníomhaíocht na mBallstát agus chun an ghníomhaíocht sin a fhorlíonadh. Cuirtear de chúram ar an Aontas an rochtain ar an ngairmoiliúint a éascú agus soghluaisteacht na dteagascóirí agus na n-oiliúnaithe, go háirithe daoine óga, a spreagadh;
    • In Airteagal 14 de Chairt um Chearta Bunúsacha an Aontais Eorpaigh sonraítear an méid seo a leanas: ‘Tá ag gach duine an ceart chun oideachais’.

      Cuspóirí

      A. An Limistéar Eorpach Oideachais

      I dteachtaireacht uaidh maidir le Limistéar Eorpach Oideachais a bhaint amach faoi 2025, a glacadh an 30 Meán Fómhair 2020, rinne an Coimisiún cur síos ar chur chuige a bhfuil sé mar aidhm leis leibhéal oideachais agus oiliúna shaoránaigh na hEorpa a neartú agus a mbraistint go mbaineann siad leis an Aontas Eorpach a fhorbairt. Tá an Limistéar Eorpach Oideachais bunaithe ar shé ghné: cáilíocht an oideachais agus na hoiliúna; cuimsiú; an t-aistriú glas agus an t-aistriú digiteach; múinteoirí agus oiliúnóirí; an t-ardoideachas; agus an ghné gheopholaitiúil. I mí Feabhra 2021, ghlac an Chomhairle rún maidir le creat straitéiseach le haghaidh comhar Eorpach san oideachas agus san oiliúint i dtreo an Limistéir Eorpaigh Oideachais agus níos faide anonn (2021-2030), ina leagtar amach liosta cuspóirí atá le baint amach sna blianta amach romhainn:

      • Ba cheart sciar na ndaoine 15 bliana d’aois atá ag gnóthachtáil go híseal sa léitheoireacht, sa mhatamaitic agus san eolaíocht a bheith níos lú ná 15 % faoi 2030 (sciar 2022: 26.25 % don léitheoireacht, 29.5 % don mhatamaitic agus 24.2 % don eolaíocht);
      • Ba cheart go mbeadh sciar na ndaltaí san ochtú bliain den scolaíocht nach bhfuil máistreacht ar uirlisí teicneolaíochta faisnéise ná litearthacht ar ríomhairí acu níos lú ná 15 % faoi 2030 (Sciar 2023: 43%);
      • Ba cheart do 96 % ar a laghad de leanaí atá idir 3 bliana d’aois agus aois éigeantach scoile páirt a ghlacadh i gcórais chúram agus oideachas na luath-óige faoi 2030 (ráta rannpháirtíochta 2023: 94.6%);
      • Ba cheart gur lú ná 9% faoi 2030 sciar na luathfhágálaithe oideachais agus oiliúna (sciar 2024: 9.3%);
      • Ba cheart gur 45 % ar a laghad a bheadh i sciar na ndaoine idir 25 agus 34 bliana d’aois a bhfuil gnóthachtáil oideachais threasaigh acu (sciar 2024: 44.1%);
      • Ba cheart go mbeadh an sciar de chéimithe óga gairmoideachais agus gairmoiliúna a ghlac páirt i bhfoghlaim obair-bhunaithe le linn a gcuid staidéir ag 60% ar a laghad faoi 2025 (sciar 2023: 65.6%);
      • Ba cheart go mbeadh ar a laghad 47 % de dhaoine fásta idir 25 agus 64 bliana d’aois tar éis a bheith rannpháirteach i bhfoghlaim le linn na tréimhse 12 mhí roimhe sin faoi 2025 (Sciar 2022: 46.6%).
      • In Iúil 2025, d’fhoilsigh an Coimisiún meastóireacht eatramhach ar chreat straitéiseach an Limistéir Eorpaigh Oideachais 2021-2030 agus chinn gur baineadh torthaí luatha dearfacha amach trí chomhar idir na Ballstáit ar thosaíochtaí comhroinnte, lena n-áirítear dul chun cinn i soghluaisteacht ardoideachais, in oideachas cuimsitheach agus digiteach agus i dtionscnamh na nOllscoileanna Eorpacha. Mar sin féin, shainaithin sé dúshláin agus mhol sé feabhsaithe, amhail tosaíochtaí straitéiseacha a shoiléiriú, naisc idir earnálacha difriúla oideachais a neartú, faireachán a fheabhsú, agus sineirgí a threisiú le réimsí Eorpacha eile, amhail taighde.

        B. Próiseas Bologna

        Sa bhreis ar thionscnaimh na mBallstát, tá an tAontas ag tacú go gníomhach le tosaíochtaí Phróiseas Bologna, a d’oibrigh, ó tugadh isteach é in 1999, i dtreo córais ardoideachais níos inchomparáide, níos comhoiriúnaí agus níos comhleanúnaí san Eoraip agus sna réigiúin chomharsanacha araon, agus arb é a tháinig as ná cruthú Limistéar Eorpach an Ardoideachais (EHEA) trí Dhearbhú Chomhdháil Aireachta Bhúdaipeist-Vín i mí an Mhárta 2010. Go dtí seo, tá 49 dtír ina mbaill de EHEA.

        C. Clár oibre athnuaite an Aontais don ardoideachas

        In 2017, d’fhoilsigh an Coimisiún clár oibre athnuaite an Aontais don ardoideachas. Tá sé dírithe ar cheithre réimse tosaíochta:

        • Forbairt scileanna san ardoideachas a ailíniú le riachtanais an mhargaidh saothair;
        • A chinntiú go mbeidh rochtain níos fearr ar an ardoideachas agus go mbeidh sé níos cuimsithí agus go ndéanfar an fhor-rochtain shochaíoch atá aige a neartú;
        • Borradh a chur faoi acmhainneacht nuálaíochta na gcóras ardoideachais;
        • Éifeachtúlacht agus éifeachtacht na gcóras ardoideachais a mhéadú.
        • A bhfuil bainte amach

          A. Erasmus+

          Is é Erasmus+clár an Aontais do chúrsaí oideachais, oiliúna, óige agus spóirt don tréimhse 2021-2027. Is iad seo a leanas cuspóirí ginearálta an chláir Erasmus+:

          • tacú le forbairt oideachasúil, ghairmiúil agus phearsanta tríd an bhfoghlaim ar feadh an tsaoil;
          • ar an mbealach sin, rannchuidiú leis an bhfás inbhuanaithe, le poist ardcháilíochta, le nuálaíocht an chomhtháthaithe shóisialta, le braistint níos láidre ar fhéiniúlacht AE agus ar shaoránacht ghníomhach;
          • an Limistéar Eorpach Oideachais a fhorbairt agus comhar straitéiseach Eorpach a éascú i réimse an oideachais agus na hoiliúna, lena n-áirítear sna bunchláir oibre earnála;
          • an comhar maidir le beartas na hóige a chur chun cinn faoi Straitéis Óige an Aontais Eorpaigh 2019-2027;
          • gné Eorpach an spóirt a fhorbairt,
          • Tá na spriocanna sin á mbaint amach ag an gclár trí chreat príomhghníomhaíochtaí:

            • Príomhghníomhaíocht 1: Soghluaisteacht foghlama daoine aonair;
            • Príomhghníomhaíocht 2: Comhar idir institiúidí agus malartú dea-chleachtais;
            • Príomhghníomhaíocht 3: Tacaíocht d’athchóiriú beartais.
            • Laistigh de struchtúr uileghabhálach Erasmus+, tá ról lárnach ag an ardoideachas, agus leithdháiltear íosmhéid de 34.6 % dá bhuiséad iomlán air. Tacaíonn Erasmus+ le soghluaisteacht mac léinn agus ball foirne san ardoideachas, agus ag an am céanna maoiníonn sé Comhchéimeanna Máistreachta Erasmus Mundus.

              In 2018, seoladh an tionscnamh ‘Ollscoileanna Eorpacha’, lenar tacaíodh le líonraí institiúidí ardoideachais a chruthú ar fud na mBallstát, agus é mar aidhm leis comhar fadtéarmach struchtúrach, straitéiseach agus inbhuanaithe a fhorbairt idir na hinstitiúidí ardoideachais. Trí na comhghuaillíochtaí sin, is féidir le mic léinn a gcéimeanna a bhaint amach trí staidéir a rinne siad i roinnt tíortha Eorpacha a chomhcheangal. Tá 73 chomhghuaillíocht d’Ollscoileanna Eorpacha i 36 thír anois.

              An 22 Deireadh Fómhair 2021, ghlac an Coimisiún creat nua de bhearta cuimsithedo chláir Erasmus+ agus do chláir an Chóir Dlúthpháirtíochta Eorpaigh 2021-2027. Tá sé mar aidhm leis an gcreat sin rochtain a éascú do dhaoine a bhfuil níos lú deiseanna acu agus deireadh a chur leis na bacainní a d’fhéadfadh constaic a chur roimh an rannpháirtíocht. Tacaíonn sé le soláthraithe gairmoideachais agus gairmoiliúna ar mian leo gníomhaíochtaí soghluaisteachta foghlama a eagrú d’fhoghlaimeoirí agus foirne. Tá an comhar ríthábhachtach freisin don chreat nua agus áirítear leis comhpháirtíochtaí mionscála, lena leathnaítear rochtain ar an gclár.

              I mí Iúil 2025, d’fhoilsigh an Coimisiún a mheastóireacht eatramhach ar chlár Erasmus+ 2021-2027 agus an mheastóireacht deiridh ar chlár Erasmus+ 2014-2020. Faoi 2023, ghlac níos mó na 1.6 mhiliún rannpháirtí agus níos mó ná 77 000 eagraíocht páirt sa chlár. Tá a thosaíochtaí idirdhisciplíneacha – go háirithe cuimsiú agus éagsúlacht, aistriú digiteach, agus an t-aistriú glas – éifeachtach, le beagnach aon trian de thurais déanta ag baint úsáid as roghanna taistil níos glaise agus neart rannpháirtithe ag tuairisciú méadú ar scileanna digiteacha agus ar fheasacht comhshaoil.

              Ag an am céanna, leagtar síos leis an togra le haghaidh rialachán Erasmus+ do 2028-2034buiséad beartaithe de thart ar EUR 40.8 billiún.

              B. Gníomhaíochtaí Marie Skłodowska-Curie

              Tacaíonn gníomhaíochtaí Marie Skłodowska-Curie (MSCA) le soghluaisteacht agus oiliúint taighdeoirí. Is cuid d’Fhís Eorpach an Aontais (2021-2027) agus de Chreatchlár um Thaighde agus um Nuálaíocht iad, agus baineann siad le cúig fhoghníomhaíocht. I réimse an ardoideachais, tá gníomhaíochtaí MSCA mar phríomhchlár de chuid an Aontais anois le haghaidh oiliúint dochtúireachta. Leithdháileann an clár Fís Eorpach buiséad thart ar EUR 6.6 billiún ar MSCA.

              C. Comhar san ardoideachas

              I mí Aibreáin 2022, ghlac an Chomhairle conclúidí maidir le straitéis Eorpach lena gcumhachtaítear institiúidí ardoideachais ar mhaithe le todhchaí na hEorpa agus moladh maidir le caidreamh a chothú le haghaidh comhar éifeachtach san ardoideachas Eorpach. Bhí sé d’aidhm acu sin cabhrú le hinstitiúidí ardoideachais Eorpacha a rannchuidiú i dtreo geilleagair inbhuanaithe athléimneacha a mhúnlú agus comhar trasnáisiúnta a threisiú agus a leathnú.

              I mí an Mhárta 2024, ghlac an Coimisiún pacáiste tograí le haghaidh earnáil ardoideachais na hEorpa https://education.ec.europa.eu/news/commission-presents-a-blueprint-for-a-european-degreeina bhfuil treoirphlean le haghaidh comhar trasnáisiúnta níos doimhne agus níos leithne idir institiúidí ardoideachais. Tháinig Moladh ón gComhairle an 25 Samhain 2024 maidir le gairmeacha tarraingteacha inbhuanaithe san ardoideachas i ndiaidh an phacáiste sin den chéad uair, inar leagadh amach bealaí chun feabhas a chur ar dhálaí don fhoireann acadúil agus chun an t-ardoideachas agus a ról sa tsochaí a neartú. Ansin, an 12 Bealtaine 2025, d’fhoilsigh an Chomhairle moladh agus rún comhlántach. Sainítear sa mholadh critéir choiteanna Eorpacha agus socruithe dearbhaithe cáilíochta le haghaidh cláir chomhpháirteacha, agus bunaítear leis an rún cur chuige céim ar chéim maidir le leathadh amach, faireachán agus meastóireacht a dhéanamh ar lipéad cáilíochta, agus é mar aidhm leis bonn eolais a chur faoi chinneadh polaitiúil amach anseo maidir le céim Eorpach chomhpháirteach a chruthú.

              D. Aontas na Scileanna

              An 18 Aibreán 2018, ghlac an Pharlaimint agus an Chomhairle Cinneadh (AE) 2018/646 maidir le creat comhchoiteann le haghaidh soláthar seirbhísí níos fearr do scileanna agus do cháilíochtaí (Europass).

              I mí an Mhárta 2025, sheol an Coimisiún Aontas na Scileanna, creat straitéiseach a bhfuil sé mar aidhm leis na scileanna atá de dhíth don gheilleagar digiteach agus iomaíoch a thabhairt do dhaoine san Aontas. Leagann an tionscamh béim ar bhunscileanna (léitheoireachta, matamaitice, eolaíochta agus digiteacha), ar oideachas ETIM (eolaíocht, teicneolaíocht, innealtóireacht agus matamaitic), ar uas-sciliú agus athsciliú ar feadh an tsaoil (lena n-áirítear micridhintiúir) ar inaistritheacht scileanna agus cailíochtaí tras-Bhallstáit, ar mhealladh agus coinneáil tallainne, agus oibríonn sé i dtreo céim/lipéad Eorpach agus dioplóma/lipéad nua sa ghairmoideachas agus oiliúint. Cruthaíonn sé uirlisí rialachais nua (Faireachlann Eorpach um Fhaisnéis Scileanna agus Bord Ardleibhéil um Scileanna) agus tá sé mar aidhm leis spriocanna éagsúla a bhaint amach, amhail sciar na dtearcghnóthachtálaithe sa léitheoireacht, sa mhatamaitic, san eolaíocht agus i scileanna digiteacha a laghdú faoi bhun 15% faoi 2023.

              Ó 2019 i leith, tá 69 dtionscadal de chuid Ionaid Barr Feabhais Gairme á gcistiú ag Erasmus+, ar tionscadail iad:

              • a dhéanann curaclaim mhodúlacha agus micridhintiúir a fhorbairt atá ailínithe le riachtanais mhargadh an tsaothair;
              • a dhéanann an comhar idir an gairmoideachas agus an ghairmoiliúint, an t-ardoideachas agus an tionsclaíocht a neartú;
              • a dhéanann scileanna glasa agus digiteacha a leabú i gcláir oiliúna;
              • a dhéanann ceannródaíocht ar mhodhanna teagaisc nuálacha, ó uirlisí atá cumhachtaithe ag an intleacht shaorga go foghlaim atá bunaithe ar dhúshláin.
              • E. Éachtaí eile

                In 2020, sheol an Coimisiún an Gradam Eorpach don Teagasc Nuálach, a bhfuil sé d’aidhm aige aitheantas a thabhairt d’obair na múinteoirí (agus a scoileanna) a chuireann go mór leis an ngairm. Tráth chomóradh cúig bliana an chláir, tugadh isteach dhá chatagóir nua: an lipéad teanga Eorpach agus an t-oideachas aosach. Comhlánaítear an tionscnamh seo atá dírithe ar mhúinteoirí le tionscnaimh eile faoi Erasmus+:

                • Acadaimh Múinteoirí, lena gcruthaítear comhpháirtíochtaí Eorpacha agus lena gcuirtear comhar chun cinn idir institiúidí oideachais múinteoirí agus soláthraithe oiliúna chun tacú le múinteoirí ag tús a ngairmréime agus chun a bhforbairt ghairmiúil a neartú;
                • R-Nascadh, ar pobal scoileanna ar líne é a chuireann ardán sábháilte, saor in aisce ar fáil do mhúinteoirí agus do dhaltaí ar fud na hEorpa chun comhoibriú ar thionscadail, plé a dhéanamh i ngrúpaí agus scileanna a fhorbairt.
                • Ról Pharlaimint na hEorpa

                  Tá tionchar méadaitheach ag an bParlaimint ar cheapadh beartais Eorpach i réimse an oideachais.

                  A. Erasmus+

                  I mí na Bealtaine 2021, ghlac an Pharlaimint agus an Chomhairle rialachán lena mbunaítear clár Erasmus+ don tréimhse 2021-2027 (Rialachán (AE) 2021/817). Le buiséad EUR 26.6 billiún (i gcomparáid le EUR 14.7 billiún sa tréimhse roimhe sin), is é is aidhm don chlár reatha comhdheiseanna a áirithiú trí rochtain a fheabhsú do ghrúpaí faoi mhíbhuntáiste.

                  I rún ón bParlaimint maidir le bearta cuimsithe a chur chun feidhme laistigh de Erasmus+ 2014-2020, a glacadh an 23 Meitheamh 2022, thángthas ar an gconclúid, cé go raibh tábhacht níos mó ag baint leis an gcuimsiú agus go rabhthas ag dul i ngleic leis ar bhealach níos cuimsithí agus níos spriocdhírithe ná mar a bhí i gcláir roimhe seo, go raibh dúshláin agus easnaimh shuntasacha fós ann. Deimhníodh leis sin gur gá aird níos mó a thabhairt ar bhearta cuimsithe i gclár Erasmus+ 2021-2027, ar sainaithníodh ‘cuimsiú’ go soiléir ina bhunús dlí mar cheann de phríomhchuspóirí an chláir.

                  I mí Eanáir 2024, ghlac an Pharlaimint rún maidir le cur chun feidhme an Chláir Erasmus+ reatha (2021-2027) mar chuid den mheastóireacht mheántéarma ar an gclár. Thug an Pharlaimint chun suntais go bhfuil an-rath fós ar an gclár Erasmus+, d’iarr sí go mbeadh cistiú breise agus bearta simplithe ann chun feabhas a chur ar rochtain d’fhoghlaimeoirí ar lú na deiseanna atá acu agus mhol sí don Choimisiún comhpháirteanna glasa agus digiteacha an chláir a neartú, i gcomhréir leis an bPlean Gníomhaíochta don Oideachas Digiteach 2021-2027.

                  B. Réimsí sonracha eile

                  Tá spéis mhór ag an bParlaimint in aghaidh a thabhairt ar réimsí sonracha oideachais agus tacú leo, mar a léirítear sna samplaí seo a leanas.

                  I rún uaithi an 25 Márta 2021 maidir le beartas oideachais dhigitigh a mhúnlú, leagann an Pharlaimint amach a seasamh maidir leis an teachtaireacht ón gCoimisiún dar teideal ‘Plean Gníomhaíochta don Oideachas Digiteach (2021-2027) – Athshocrú a dhéanamh ar oideachas agus oiliúint don ré dhigiteach. I mí an Mhárta 2023, d’fhoilsigh Seirbhís Taighde Pharlaimint na hEorpa faisnéisiú maidir le dul chun cinn an Phlean Gníomhaíochta don Oideachas Digiteach, lena ndéantar athbhreithniú ar a chur chun feidhme. Leagadh béim ann ar an ngá atá le haghaidh a thabhairt ar bhearnaí leanúnacha i scileanna digiteacha, i mbonneagar digiteach agus i gcuimsiú digiteach chun a thionchar éifeachtach agus cothrom ar fud an Aontais a áirithiú.

                  Reáchtálann an Pharlaimint clár oideachais Scoil Ambasadóra Pharlaimint na hEorpa agus clár Euroscola chun feasacht ar dhaonlathas agus luachanna na hEorpa a mhéadú. An 6 Aibreán 2022, ghlac an Pharlaimint a rún maidir le gníomhaíochtaí oideachais saoránachta a chur chun feidhme. Cuirtear imní in iúl sa rún maidir leis na míchothromaíochtaí i dtéarmaí an ghnátheolais shibhialta ar fud na mBallstát agus laistigh díobh, agus déantar moltaí éagsúla ann chun dul i ngleic leis sin.

                  I rún uaithi an 11 Samhain 2021 maidir leis an Limistéar Eorpach Oideachais, leag an Pharlaimint béim ar an ngá atá le cur chuige iomlánaíoch agus iarrachtaí comhpháirteacha, agus leag sí béim ar a thábhachtaí atá sé Limistéar Eorpach Oideachais a chothú ó thaobh an oideachais de chun níos mó deiseanna agus deiseanna níos fearr a chur ar fáil do shaoránaigh na hEorpa dul i mbun staidéir, oiliúna, nó oibre thar lear. An 19 Bealtaine 2022, ghlac an Pharlaimint rún maidir leis an Limistéar Eorpach Oideachais a bhunú faoi 2025,, inar chuir sí in iúl gur díol sásaimh di na tograí ón gCoimisiún chun cur chuige Eorpach a fhorbairt i leith micridhintiúr, i leith cuntais foghlama aonair agus i leith na foghlama le haghaidh na hinbhuanaitheachta comhshaoil, agus bhí siad uile san áireamh i measc na gcuspóirí maidir le Limistéar Eorpach Oideachais a bhaint amach faoi 2025.

                  Ghlac an Pharlaimint freisin, an 11 Meán Fómhair 2025, rún lena leagtar amach a fís do chomhghuallaíocht d’Ollscoileanna Eorpacha, lena gcuirtear treoir ar fáil maidir lena bhforbairt amach anseo, lena rialú, agus leis an ról atá acu maidir le barr feabhais acadúil, soghluaisteacht agus féiniúlacht Eorpach a chothú.

                  C. Tograí chun na Conarthaí a leasú

                  An 22 Samhain 2023, ghlac an Pharlaimint a rún maidir le tograí ó Pharlaimint na hEorpa chun na Conarthaí a leasú. I réimse an oideachais, d’iarr sí ar AE cuspóirí agus caighdeáin choiteanna a fhorbairt le haghaidh oideachas lena gcuirtear luachanna daonlathacha agus an smacht reachta chun cinn, chomh maith le litearthacht dhigiteach agus eacnamaíoch. Ina theannta sin, d’iarr an Pharlaimint ar an Aontas comhar agus comhleanúnachas idir córais na bhforas oideachais a chur chun cinn agus traidisiúin chultúrtha agus éagsúlacht réigiúnach á ráthú. D’iarr sí freisin go bhforbródh an tAontas comhchaighdeáin maidir leis an ngairmoiliúint chun soghluaisteacht oibrithe a mhéadú. Mhol sí go mbeadh sé d’aidhm ag an Aontas rochtain ar scolaíocht atá saor agus uilíoch, ar shaoirse acadúil institiúideach agus aonair, agus ar chearta an duine a chosaint agus a chur chun cinn.

                  Is í an Roinn Beartais um an nGeilleagar agus um Fhás i bParlaimint na hEorpa a d’ullmhaigh an bhileog eolais seo. Chun tuilleadh eolais a fháil, féach suíomh gréasáin an Choiste um Chultúr agus um Oideachas.

                   

                  Léanne Emma Clara COSTES / Anastasia MITRONATSIOU